1. ¿Diosta sirvijcunaca ima shina llaquicunahuantaj chꞌimbapuranchij?

¿DIOSTA sirvijcunaca ima llaquicunahuantaj chꞌimbapuracunchij? Tal vez shuj huauqui o panichari congregacionpi ñucanchijta llaquichincuna (Santiago 3:2). O mana cashpaca Jehová Diosta sirvishcamantachari escuelapi, trabajopi compañerocunaca burlarincuna (1 Pedro 4:3, 4). Shinallataj ñucanchij familiachari tandanacuicunaman ama richun, Jehová Diosmanta shujtajcunaman ama huillachun jarcasha nincuna (Mateo 10:35, 36). Cashna llaquicunata charishpaca maipica Jehová Diosta sirvinatachari saquinata yuyanchij. Pero Jehová Dios chaita ahuantangapaj yachaita, fuerzata cunataca manataj cungarinachu canchij.

2. Romanos 15:4-pi nishca shinaca ¿imamantataj Bibliata estudiana canchij?

² Jehová Diosca paita sirvijcuna llaquicunata ima shina ahuantashcatami paipaj Shimipi quillcachishca. Apóstol Pabloca: ‘Ñucanchijpish llaquicunata ahuantachunmi Jehová Diosca paita sirvijcunapaj causaimanta quillcachirca’ nircami (Romanos 15:4-ta liyipai). Bibliapi Diosta sirvijcunamanta yachashpaca ñucanchijca animarishcami sintirishun, ñucanchij fetapishmi sinchiyachishun. Pero Bibliata liyishpallaca mana saquirinachu canchij. Ashtahuanpish ima liyishcacunatami ñucanchij yuyaipi, shungupi huaquichina canchij. Bibliata manaraj liyishpaca: 1) Jehová Diostami mañana canchij. 2) Maijanmanta liyicushpaca paicunahuan chaipi cashca shinami yuyana canchij. 3) Ima liyishcacunapimi cutin cutin yuyana canchij. 4) Chai yachashcacunatami pajtachina canchij. Cunanca Bibliata liyicushpa cai chuscu yuyaicunata ima shina pajtachinatami ricushun. Qꞌuipaca rey Davidpaj causaimanta,  apóstol Pablopaj causaimanta yachashpa cai chuscu yuyaicunata ima shina pajtachinatami ricushun. *

3. ¿Bibliata manaraj liyishpaca imatataj rurana canchij?

³ 1) Bibliata manaraj liyishpaca Bibliapi yachachishcacunata alli intindingapajmi Jehová Diosta ayudachun mañana canchij. Por ejemplo, ñucanchij problemacunahuan ima shina chꞌimbapurangapajca Jehová Dios paipaj shimipi valishca yuyaicunata ricuchichunmi mañana canchij (Filipenses 4:6, 7; Santiago 1:5).

4. ¿Bibliata liyicushpa chaipi cashca shina sintiringapajca imatataj rurana canchij?

⁴ 2) Bibliapi maijanmanta liyicushpaca paicuna ima shina sintirishcata, ima shina yuyashcatami yuyarina canchij. Shinallataj ñucanchijpish paicunahuan chaipi cashcata shinami yuyana canchij. Chashna yuyanaca Dios cushca valishca regalomi can.

5. a) ¿Bibliata liyicushpaca imamantataj liyicushcapica cutin cutin yuyana canchij? b) ¿Ima tapuicunapitaj yuyana canchij?

⁵ 3) Bibliata liyicushpaca imata nicushcapi, imata yachachicushcapimi cutin cutin yuyana canchij. Chashnami imata, imamanta parlacushcata, imata yachachicushcataca alli intindishun. Bibliata liyishpa chaipi mana cutin cutin yuyashpaca granocunata charishpapish mana mishqui micunata yanuj shinami can. Pero Bibliata liyishpa chaipi cutin cutin yuyashpaca granitocunata alajata tandachishpa mishquijllata yanuj shinami can. Bibliata liyicushpaca cai catij tapuicunapimi yuyana canchij: “¿Paica problemata allichingapajca imatataj rurarca? ¿Jehová Diosca paitaca ima shinataj ayudarca? ¿Ñucapish paimantaca pruebacunata chꞌimbapurangapajca imatataj yachai tucuni?”

6. ¿Bibliapi yachachishcacunataca imamantataj ñucanchij causaipi pajtachina canchij?

⁶ 4) Ima yachashcacunatami ñucanchij causaipi pajtachina canchij. Jesusca Bibliapi yachachishcacunata maijanpish mana pajtachishpaca shuj runa paipaj huasita allpa jahuapi shayachij shinami can nircami. Pai sinchita trabajajpipish imapaj mana valingachu. Por ejemplo, achcata tamyajpi, achca huaira shamujpica huasica ratomi urmanga (Mateo 7:24-27). Shinallataj Bibliata yachangapaj Diosta mañashpapish, ima yachashcacunapi cutin cutin yuyashpapish pero chai yachachishcacunata mana ñucanchij causaipi pajtachishpaca imapaj mana valingachu. Ima llaquicuna ricurijpi, contracuna catirashpa llaquichijpica ñucanchij fepish mana sinchichu canga. Pero Bibliapi yachachishcacunata ñucanchij causaipi pajtachishpaca ima decisioncunatapish allimi agllashun, tranquilo causaitami charishun. Shinallataj ñucanchij feca sinchimi canga (Isaías 48:17, 18). Cunanca rey Davidpaj ejemplomanta yachashpa cai chuscu yuyaicunata ima shina pajtachinata ricushun.

7. ¿Pipaj causaimantataj yachagrinchij?

⁷ ¿Cantaca shuj amigo, shuj familia llaquichishcachu? Cashna llaquita charishpaca rey Davidmantami yachai tucungui. Rey Davidtaca paipaj churi Absalonmi llaquichirca. Paipaj mandanatapishmi quichusha nirca (2 Samuel 15:5-14, 31; 18:6-14).

8. ¿Jehová Diostaca imatataj mañana canchij?

⁸ 1) Pi ñucanchijta llaquichijpica ima shina sintirishcatami Jehová Diosmanca tucuita huillana canchij. (Salmo 6:6-9). Qꞌuipaca caicunata ahuantangapaj Davidmanta valishca yuyaicunata yachachichunmi Jehová Diosta mañana canchij.

9. ¿Davidhuan, Absalonhuanca imataj tucurca?

 ⁹ 2) Absalón mandanata quichusha nijpi David ima shina sintirishcapi yuyashun. Absalonca paita apoyachunmi gentecunataca achca huatacunata cꞌuyaj tucurca (2 Samuel 15:7). Qꞌuipaca gentecuna pai mandagrishcata yuyachunmi Israelpi paipaj runacunataca chapachun ñaupachishpa cacharca. Shinallataj paipaj yayapaj alli amigo Ahitofeltapishmi paita apoyachun convencirca. Absalonca pai mandaj cashca laya tucushpami Davidtaca huañuchisha nirca. Chai tiempopica Davidca ungushcami cashcanga (Salmo 41:1-9). Pero Davidca caita yachaj chayashpaca Jerusalenmantami shujtaj ladoman rirca. Chaipica Absalonpaj soldadocunaca Davidpaj runacunahuanmi macanacui callarirca. Pero Absalonpaj soldadocunataca Davidpaj soldadocunami misharca, Absalontapish huañuchircacunami.

10. ¿Davidca imatataj mana rurarca?

¹⁰ David ima shina sintirishcapi yuyashpa catishunchij. Paica Absalontaca achcatami cꞌuyarca. Ahitofelpipish achcatami confiarca. Pero paicunaca ishquindijmi Davidtaca huañuchisha nircacuna. Paicuna chashna rurajpipish Davidca ‘ñuca shujtaj amigocunapish paicunatami apoyanga’ nishpaca mana yuyarcachu. Shinallataj dimastij llaquilla cashpapish shujtaj ladoman miticushpa ringapajca mana paillachu rirca. Ashtahuanpish chai sinchi llaquicunatami paica ahuantashpa catirca.

11. ¿Davidca sinchi llaquicunata ahuantangapajca imatataj rurarca?

¹¹ 3) Davidpaj causaimanta imata yachacushcapi yuyashunchij. Cashna nishpa tapurishunchij: ¿Davidca llaquicunata ahuantangapajca imatataj rurarca? Davidca manchaita charishpapish imata mana rato decidircachu. Ashtahuanpish Jehová Diosta mañashpami alli decidirca. Shinallataj paipaj amigocunapaj ayudatapishmi mashcarca. Paica ima decisionta agllashpaca paipaj causaipica ratomi pajtachij carca. Maipica llaquilla sintirishpapish mana rato pꞌiñarircachu. Paica Jehová Diospi, paipaj amigocunapimi confiashpa catirca.

12. ¿Jehová Diosca Davidtaca ima shinataj ayudarca?

¹² ¿Jehová Diosca Davidtaca ima shinataj ayudarca? Paitaca Jehová Diosca pruebacunata chꞌimbapurachunmi fuerzasta cushpa ayudarca (Salmo 3:1-8; Salmo 3-paj callari yuyai). Shinallataj David agllashca decisioncunatapishmi bendiciarca. Davidpaj amigocunamanpish paita cuidachun fuerzasta cushpami ayudarca.

13. ¿Pi ñucanchijta llaquichijpica Davidpaj ejemplotaca ima shinataj catina canchij? (Mateo 18:15-17).

¹³ 4) Imata yachacushcata ñucanchij causaipi pajtachishunchij. Cashna nishpa tapurishunchij: ¿Davidpaj ejemplotaca ima shinataj catina canchij? Ñucanchijpish ima problemacunata charishpaca rato allichingapajmi esforzarina canchij. Jesús yachachishca shinaca pi ñucanchijta llaquichijpica cutin paicunahuan alli apanacungapajmi esforzarina canchij (Mateo 18:15-17-ta liyipai). Imamantapish llaquirishca o piñarishca cashpaca imatapish mana rato decidinachu canchij. Chaipaj randica alli yuyashpa imatapish decidingapajmi Jehová Dios yachaita cuchun mañana canchij. Ñucanchij amigocunapipish confianataca mana saquinachu canchij. Ashtahuanpish paicuna ayudasha nijpica chasquinami canchij (Proverbios 17:17). Jehová Diospaj consejocunatapish pajtachinami canchij (Proverbios 3:5, 6).

14. ¿Ima llaquicunata charishpataj 2 Timoteo 1:12 al 16; 4:6 al 11, 17 al 22-taca yuyaipi charina canchij?

¹⁴ ¿Ñucanchij familiaca Diosta sirvichunchu jarcancuna? ¿O mana cashpaca ñucanchij  causan lugarcunapica gobiernocunachu Diosta ama sirvichunca catirashpa llaquichincuna? Cashna llaquicunahuan cashpaca 2 Timoteo 1:12-16; 4:6-11, 17-22 nishca versocunatami yuyaipi charina canchij. * Pabloca carcelpi cashpapish cai shimicunatami quillcarca.

15. ¿Jehová Diostaca imatataj mañana canchij?

¹⁵ 1) Contracuna ñucanchijta catirashpa llaquichijpica ima shina sintirishcatami Jehová Diosmanca tucuita parlana canchij. Shinallataj cai llaquicunata ahuantangapajca apóstol Pablopaj causaimantami valishca yuyaicunata yachachichun ayudata mañana canchij.

16. ¿Pabloca ima shinataj sintirirca?

¹⁶ 2) Pablo cashca shina yuyashunchij. Pabloca huaquin cutincunami carcelpi carca. Pero paica Roma carcelpi cashpaca paita huañuchinatami yacharca. Paipaj amigocunapishmi paitaca saquishpa rircacuna. Chaimantami paica fuerza illaj shina sintirirca (2 Timoteo 1:15).

17. ¿Pabloca imatataj mana rurarca?

¹⁷ Pabloca Yaya Diosta sirvinata mana agllashca cashpaca carcelpica mana caimanchu carcani nishpaca mana yuyarcachu. Shinallataj huaquincuna paita saquishpa rijpipish paica mana resintirishca saquirircachu. Ashtahuanpish paipaj amigocunapi, Jehová Diospi confiashpami catirca.

18. ¿Pabloca llaquicunata chꞌimbapurangapajca imatataj rurarca?

¹⁸ 3) Imata yachacushcapi cutin cutin yuyashunchij. Cashna nishpa tapurishunchij: ¿Pabloca cashna llaquicunata ahuantangapajca imatataj rurarca? Paica ñalla huañunata yachashpapish Jehová Diostami jatunyachishpa catirca. Shinallataj shujtajcunata animashpa, Jehová Diosta tucui shunguhuan mañashpami catirca (2 Timoteo 1:3). Huaquin huauqui panicuna paita saqui rijpipish paicuna saquirishcallapi yuyacunapaj randica paica paipaj amigocuna ayudashcamantami agradicirca. Shinallataj Bibliata estudiashpami catirca (2 Timoteo 3:16, 17; 4:13). Tucuimanta yallica Jehovapish, Jesuspish paita cꞌuyashcata, paita manataj saquinatami tucui shunguhuan crirca. Shinallataj Jehová Diosta sirvishcamanta pai shuyacushcata Yayitu Dios cunatami seguro carca.

19. ¿Jehová Diosca Pablotaca ima shinataj ayudarca?

¹⁹ Jehová Diosca Pablota contracuna catirashpa llaquichina cashcataca ñami huillashca carca (Hechos 21:11-13). Pero ¿Paica ima shinataj Pablotaca ayudarca? Pablo mañashcacunata cutichishpami ayudarca. Shinallataj fuerzastami curca (2 Timoteo 4:17). Pablo shuyacushcatapish Diosca cusha nishpami animarca. Paipaj amigocunapish ayudachunmi animarca.

20. ¿Romanos 8:38 y 39-pi nishcacunata tucui shunguhuan cringapajca imatataj rurana canchij?

²⁰ 4) Ima yachashcacunata ñucanchij causaipi pajtachishunchij. Cashna nishpa tapurishunchij: ¿Pablopaj ejemplotaca ima shinataj catina canchij? Ñucanchijpish Yaya Diosta sirvishcamanta Pablota shina catirashpa llaquichinataca allimi yachanchij (Marcos 10:29, 30). Pero tucuimanta yallica Jehová Diostami jatunyachina canchij. Pruebacunata chꞌimbapurangapajca Jehová Diosta mañanata, paipi confianatami manataj saquina canchij. Bibliata estudianatapish manataj saquinachu canchij. Chaita rurajpica Jehová Diosca ñucanchijtaca manataj saquingachu. Paita cꞌuyashpa catichunpish pi mana jarcai tucungachu (Romanos 8:38, 39-ta liyipai; Hebreos 13:5, 6).

21. ¿Shuj precursorapish, huauqui Hectorpish Diosta sirvishpa catichunca imataj ayudarca?

²¹ Ima llaquicunata charishpapish Bibliapi tiyaj Diosta sirvijcunapaj causaimanta yachashpami  ñucanchij feta sinchiyachishun. Por ejemplo, Japón llajtamanta shuj precursoraca: “Ñuca mana manchashpa carritocunahuan huillangapajca Jonaspaj causaimi ñucataca ayudarca” ninmi. Shinallataj Indonesiamanta huauqui Hectorpish: “Ñuca yaya mama mana testigo cajpipish Jehová Diosmanta ashtahuan yachashpa catingapaj, paita sirvishpa catingapajca Rutpaj ejemplomi ayudarca” ninmi.

22. ¿Videocunapi, publicacioncunapi Diosta sirvijcunamanta yachangapajca imatataj rurana canchij?

²² ¿Diosta sirvijcunamantaca maipitaj ashtahuan yachai tucunchij? Videocunapi, publicacioncunapimi paicunamantaca yachai tucunchij. * Pero manaraj ricushpa, manaraj liyishpaca alli intindingapajmi Jehová Diosta ayudachun mañana canchij. Shinallataj Diosta sirvijcunamanta yachacushpaca paicunahuan cashca shinami yuyana canchij. Paicuna pruebacunata ahuantangapaj imata rurashcapi, Jehová Diospish paicunata ima shina ayudashcapimi cutin cutin yuyana canchij. Paicunamanta yachashpaca ñucanchij causaipipishmi pajtachina canchij. Qꞌuipaca Yayitu Diostaca alajata yachachishcamantami agradicina canchij. Shinallataj shujtajcunamanpishmi imalla yachashcacunataca parlashpa animana canchij.

23. ¿Isaías 41:10 y 13-ca Jehová Dios ñucanchijta ima shina cuidanatataj ricuchin?

²³ Cai Allpata Diablo mandacushcamantami achca llaquicunata charishun (2 Timoteo 3:1). Pero manchaitaca mana charinachu canchij. Jehová Diosca ñucanchij ima shina sintirishcata, ima llaquicunahuan cajtaca allimi yachan. Paica ñucanchijtaca ‘manataj saquishachu. Ñuca maquihuanmi charisha’ nicuj shinami cuidanga (Isaías 41:10, 13-ta liyipai). Jehová Dios ñucanchijta manataj saquinataca mana cungarinachu canchij. Bibliata liyinata manataj saquijpica Jehová Diosca llaquicunata chꞌimbapurachunmi fuerzasta cushpa catinga.