1. ¿Jesusca imamantataj paipaj Yayataca paita catijcunata cuidachun mañarca?

JESUSCA pai jahua pachaman tigrajpi paipaj catijcunata Diablo catirashpa llaquichinatami alli yacharca. Chaimi Jesusca paita catijcunata Diablo ama llaquichichunca Yaya Diosta ayudachun mañarca (Juan 17:14, 15). Chashnami paicunataca cꞌuyashcata ricuchirca.

2. ¿Ñucanchij mañashcacunata Jehová cutichinataca imamantataj crinchij?

² Jehová Diosca Jesús mañashcataca paita cuyashcamantami cutichirca. Ñucanchijpish Jehová Diosta tucuipi jatunyachijpica ñucanchijtami cꞌuyanga. Paita ayudachun mañajpipish cutichingami. Paica cꞌuyaj Yaya cashcamantami siempre paipaj huahuacunataca cuidanga. Chaita mana rurashpaca paipaj shutitami yangapi churanman.

3. ¿Imamantataj Jehová Dios ñucanchijta cuidachun minishtinchij?

³ Jesús jahua pachamanta Diablota shitashca horasmantami Diabloca achcata pꞌiñarishpa caticun (Apocalipsis 12:12). Chaimantami gentecunamanca Diosta sirvijcunata llaquichina yuyaita cun. Huaquincunaca chashna llaquichishpaca Diostami sirvicunchij nishpami yuyancuna (Juan 16:2). Cutin Diospi mana crijcunaca cai mundopaj ruraicunapi mana chagrurishcamantami Diosta sirvijcunataca llaquichincuna. Pero paicuna chashna llaquichijpipish mana manchanachu canchij. Bibliapica: ‘Mandaj Diosmi paillapi shunguta churajcunataca huaquichin’ ninmi (Salmo 31:23). ¿Jehová Diosca ima shinallataj ñucanchijta cuidan?

4. Efesios 6:13 al 17-pi nishca shinaca ¿Diablo ama pandachichunca Jehová Diosca imatataj cushca?

⁴ Jehová Diosca Diablo ama pandachichunca tucui macanacunata churarichunmi cushca (Efesios 6:13-17-ta liyipai). Pero cai macanacunataca imapaj mana llujchinachu canchij. Cunanca Dios cushca macanacuna imacunalla cashcatami yachashun.

5. a) ¿Mana llullahuan alli chumbillirishca shina cangapajca imatataj rurana canchij? b) ¿Imamantataj chaita rurana canchij?

⁵ Mana llullahuan alli chumbillirishca shinami Bibliapi yachachishcacunata crina canchij. ¿Imamantataj chaita rurana canchij? Diabloca llullata callarichij cashcamantami llullapaj yaya can (Juan 8:44). Chaimantami paica tucui Allpapi gentecunataca umashpa caticun (Apocalipsis 12:9). Pero ñucanchijca Diablo ama pandachichunca Bibliapi yachachishcacunatami crina canchij. Chaimantami Jehová Diosmanta yachashpa, pai munashca shina tucui shunguhuan adorana canchij. Shinallataj tucuipimi honrados cana canchij (Juan 4:24; Efesios 4:25; Hebreos 13:18).

6. a) ¿Pechopi fierro churanaca imatataj ricuchin? b) ¿Imamantataj Jehová Diospaj mandashcacunata cazuna canchij?

⁶ Pechopi fierro churanaca Dios mandashcacunatami ricuchin. Soldadocunaca paicunapaj shunguta ama pi llaquichichunmi pechopi fierro churanata churarincuna. Chashnallatajmi ñucanchijpish panda yachachishcacuna ama ñucanchij shunguman chayachunca Diospaj mandashcacunata cazuna canchij (Proverbios 4:23). Jehová Diosca paita shungumanta cꞌuyachun, sirvichunmi munan (Mateo 22:36, 37). Chaimantami Diabloca ñucanchij shunguta chaupicuj shina Dios mana munashca ruraicunapi chagrurichun munan (Santiago 4:4; 1 Juan 2:15, 16). Pero Diabloca ñucanchijta mana pandachi tucushpaca contracunahuanmi llaquichi callarin.

7. ¿Pechopi fierro churanata churarishca shina cangapajca imatataj rurana canchij?

⁷ Pechopi fierro churanata churarishca shina cangapajca Diospaj mandashcacunatami tucuipi cazuna canchij (Salmo 97:10). Huaquin gentecunaca Diospaj mandashcacunata cazunaca ñucanchij munashca shina causanatami jarcan nishpami yuyancuna. Pero paicuna shina yuyashpa, Dios mandashcacunata cazunata saquishpaca shuj soldado macanacuipi pechopi fierro churanata llujchij shinami canman. Chai soldadoca pechopi fierro churana achcata llashajta shina yuyashpami llujchinman. Pero chaita rurajpica contracunaca paipaj shungupimi llaquichi tucun. Cutin ñucanchijca Jehová Diosta cꞌuyashpaca paipaj mandashcacunataca shuj llashaj quipita shinaca mana ricushunchu. Chaipaj randica ñucanchij causaipaj cai mandashcacuna valishca cashcatami ricushun (1 Juan 5:3).

8. ¿Chaquicunapi zapatosta churarij shina cangapajca imatataj rurana canchij?

⁸ Chaquicunapi zapatosta churarishca shinami Diospaj Gobiernomanta huillangapajca listos cana canchij. Biblia yachachishcacunata shujtajcunaman huillashpaca ñucanchij fetami sinchiyachinchij. Muyundij Allpapi huauqui panicuna trabajopi, escuelapi, negociocunapi, huasin huasin rishpa o comprasta rurashpa predicajta ricushpaca cushicunchijmi. Shinallataj huasimanta mana llujshi valishpapish mana testigo familiacunaman, shujtajcunaman predicajta ricushpaca contentosmi sintirinchij. Pero manchaimanta predicanata saquishpaca shuj soldado macanacui horas paipaj zapatota llujchij shinami cashun. Shuj soldadoca paipaj zapatota llujchishpaca tal vez chugririnmanmi. Mana cashpaca paitami pi llaquichinman. Paipaj mandaj ima nishcatapish mana cazui tucuimanchu.

9. ¿Imamantataj sinchi feta charina canchij?

 ⁹ Escudota shina charinaca Jehová Diospi feta charinami can. Sinchi feta charishpaca Jehová Dios pai nishcacunata pajtachinatami crishun. Apostatacuna paicunapaj panda yachachishcacunahuan ñucanchijta pandachichunpish mana saquishunchu. Shinallataj paicuna burlarijpipish mana desanimarishunchu. Sinchi feta charishpaca shujtajcuna mana allicunata rurachun nijpipish paicunata cazunapaj randica Jehová Diostami cazushun. Trabajopipish escuelapipish ñucanchij crishcacunatami difindishun (1 Pedro 3:15). Ima trabajopipish ashtahuan cullquita pagasha nijpica cullqui raicullaca Jehová Diosta sirvinataca mana saquishunchu (Hebreos 13:5, 6). Contracuna ñucanchijta llaquichisha nijpipish sinchi feta charishpaca Jehová Diostami sirvishpa catishun (1 Tesalonicenses 2:2).

10. ¿Imamantataj Dios cusha nishcacunapi confiana canchij?

¹⁰ Cascota churarij shina canaca Dios cusha nishcacunapi yuyailla canami can. Diosca sumaj causaitami paita sirvijcunamanca cunga (1 Tesalonicenses 5:8; 1 Timoteo 4:10; Tito 1:1, 2). Huañujpipish paimi causachinga. Chaicuna yuyaillami causana canchij. Shuj soldadoca paipaj uma ama ima tucuchunmi cascota  churarin. Chashnallatajmi problemacuna ñucanchij yuyaita ama pandachichunca Dios cusha nishcacunapi yuyailla causana canchij. Chaipajca Jehová Dios shina yuyangapajmi esforzarina canchij. Por ejemplo, charinalla cosascunapi confianapaj randica Jehová Diospimi confiana canchij (Salmo 26:2; 104:34; 1 Timoteo 6:17).

11. a) ¿Espiritupaj espadaca imataj can? b) ¿Imamantataj Diospaj Shimitaca alli estudiana canchij?

¹¹ Espiritupaj espadaca Diospaj Shimimi can. Diospaj Shimica panda yachachishcacunamanta caruyachun, mana alli ruraicunata saquichunmi ayudan (2 Corintios 10:4, 5; 2 Timoteo 3:16, 17; Hebreos 4:12). Chaimantami ñucanchijca Bibliataca alli estudiana canchij. Jehová Diosca Bibliamanta alli yachajcuna cachunca tandanacuicunahuan, Bibliamanta yachana escuelacunahuanmi yachachin (2 Timoteo 2:15). Cunanca Diablo ama pandachichun Jehová Dios ñucanchijta ayudangapaj ima shujtaj ayudata cushcata ricushun.

12. ¿Diablota mishangapajca imatataj minishtinchij?

¹² Experienciata charij soldadoca contracunata mishangapajca paipaj compañerocuna ayudachunmi minishtin. Chashnallatajmi ñucanchijpish Diablota, paita apoyajcunata mishangapajca huauqui panicuna ayudachun minishtinchij. Jehová Diosca muyundij Allpapimi ñucanchijmanca achca huauqui panicunata cushca (1 Pedro 2:17).

13. Hebreos 10:24, 25-pi nishca shinaca ¿imamantataj tandanacuicunaman rina canchij?

¹³ Huauqui panicunahuan animangapajca tandanacuicunaman rinataca manataj saquinachu canchij (Hebreos 10:24, 25-ta liyipai). Huaquinpica imamantami desanimarishca canchij. Pero tandanacuicunaman rishpaca cushillami sintirinchij. Congregacionpica huauqui panicunaca alajatami participancuna. Shinallataj pushaj huauquicunaca animaj conferenciacunatami cuncuna. Chashnami paicunaca ñucanchijtaca Jehová Diosta sirvishpa catichun animancuna. Tandanacuicunapi huauqui panicunahuan animanacushpaca ashtahuan fuerzata charinchij (1 Tesalonicenses 5:14). Shinallataj tandanacuicunapica shujtajcunatami ayudashun. Paicunata ayudashpaca cushillami sintirishun (Hechos 20:35; Romanos 1:11, 12). Ashtahuancarin tandanacuicunapica alli yachachijcuna canata, alli predicajcuna canatami yachashun. Por ejemplo, tandanacuicunapimi publicacioncunahuan, videocunahuan ima shina yachachinata yachanchij. Pero tandanacuicunapajca allimi prepararina canchij. Chaipi yachashcacunatapish allimi uyana canchij. Yachashcacunatapish ñucanchijca pajtachinami canchij. Caicunata rurashpaca Diablopish paita apoyajcunapish ñucanchijta pandachichunca mana saquishunchu. Ashtahuanpish Diosta alli sirvijcuna cashcatami ricuchishun (2 Timoteo 2:3).

14. ¿Ima shujtaj ayudatataj charinchij?

¹⁴ Huaranga huaranga angelcunapaj ayudatapishmi charinchij. Isaías 37:36-pi ricushca shinaca shuj angelllami achca soldadocunata huañuchirca. Huaranga huaranga angelcunacarin imatapish ratomi mishai tucunga. Chaimantami demoniocunata, Diablota apoyajcunataca angelcunaca rato mishangalla. Ñucanchijmantaca maipica Diosta mana sirvij familiacuna, o escuelapi, trabajopi compañerocunami mana allicunata nincuna o burlarincuna. Pero mana ñucanchijlla cashcata yuyanachu canchij. Jehová Dios, Jesús, angelcunami ñucanchijhuan can (Jueces 6:16). Caita yuyaipi charishpami Diablo pandachichunca mana saquishun.

15. ¿Diosta sirvijcunaca Diablo jarcasha nijpipish imamantataj predicashpa catishun?

¹⁵ Ñucanchijca cai mundopaj ruraicunapi, guerracunapica mana participanchijchu. Shinallataj ñucanchijca Diospaj shutimantami gentecunaman yachachinchij. Paipaj Mandanalla cai Allpaman sumaj causaita apamunatami yachachinchij. Paipaj mandashcacunatapish cazuna valishca cashcatami yachachinchij. Shinallataj “Diabloca gentecunatami llullan. Millai huañuchijpishmi can. Cai mundopaj tucui ruraicunapish ñallami tucuringa” nishpami huillanchij (Juan 8:44). Chaimantami Diablopish paita apoyajcunapish ñucanchijtaca pꞌiñancuna. Ama predicachunpishmi jarcasha nincuna. Pero Jehová Dios ñucanchijhuan cashcamantami Diospaj Gobiernomanta huillashpa catichunca Diabloca mana jarcai tucunga (Isaías 54:15, 17-ta liyipai).

16. ¿Jatun llaqui punllacuna callarijpi paipaj pueblota quishpichingapajca Jehová Diosca imatataj ruranga?

¹⁶ ¿Jatun llaqui punllacuna callarijpi paipaj pueblota quishpichingapajca Jehová Diosca imatataj ruranga? Cai Allpata mandajcunahuanmi tucui panda religioncunata tucuchinga (Apocalipsis 17:16-18; 18:2, 4). Shinallataj Armagedón macanacui callarijpimi cai mundopi tiyaj tucui mana alli ruraicunata tucuchinga (Apocalipsis 7:9, 10; 16:14, 16).

17. ¿Jehová Diosmantaca imamantataj mana caruyana canchij?

¹⁷ Jehová Dioshuan cashcamantami ñucanchijtaca Diabloca mana pandachi tucunga. Jehová Diosca Diablotaca huiñaipajmi tucuchinga (Romanos 16:20). Chaimanta Dios cushca macanacunata churarishpa ladoman amataj saquishunchij. Huauqui panicunapaj ayudatapish mashcashunchij. Jehová Dios ñucanchijta ñaupajman pushachunpish saquishunchij. Caicunata rurajpica Jehová Diosmi ñucanchijtaca sinchiyachishpa, cuidashpa catinga (Isaías 41:10).