1. Mateo 24:9-pi nishca shinaca ¿shujtajcuna ñucanchijta pꞌiñajpica imamantataj mana mancharina canchij?

JEHOVÁ DIOSCA ñucanchijtaca shujtajcunata cꞌuyachun, ñucanchijtapish paicuna cꞌuyachunmi rurarca. Chaimantami ñucanchijta shujtajcuna llaquichijpica llaquilla o mancharishca sintirinchij. Por ejemplo, Europamanta pani Georginaca: “Ñucaca 14 huatacunata charishpami Jehová Diosta sirvi callarircani. Chaimi ñuca mamitaca pꞌiñai callarirca. Ñucata mana pi cꞌuyashcatami yuyarcani. Maipicarin mana allitami ruracuni nishpami yuyai callarircani” ninmi. * Huauqui Daniloca: “Jehovata sirvicushcamanta soldadocuna ñucata macajpi, rimajpica mancharishcami saquirircani” ninmi. Huaquinpica gentecuna pꞌiñajpipish mana mancharinachu canchij. Jesusca ñucanchijta pꞌiñanatami huillarca (Mateo 24:9-ta liyipai).

2, 3. ¿Diosta sirvijcunataca gentecunaca imamantataj pꞌiñancuna?

² Cai mundopaj ruraicunapi mana chagrurishcamantami gentecunaca Diosta sirvijcunataca pꞌiñancuna (Juan 15:17-19). Ñucanchijca gobiernocunata repetashpapish mana politicacunapi chagrurinchijchu. Himno nacionaltapish mana cantanchijchu. Banderatapish mana saludanchijchu. Yaya Dioslla mandana derechota charishcata difindishpami paillata adoranchij. Chaimi Diablopish paita apoyajcunapish Jehová Dios ama gobernachunca jarcasha nincuna (Génesis 3:1-5, 15). Ñucanchijca Jehová Diospaj Gobiernolla tucui llaquicunata tucuchinata, mana alli gentecunatapish tucuchinatami predicanchij (Daniel 2:44; Apocalipsis 19:19-21). Alli shungu gentecunaca caita uyashpaca cushillami sintirincuna. Pero millaicunaca pꞌiñarincunami (Salmo 37:10, 11).

 ³ Cunan punllacunapish gentecunaca ima shinami ñaupa punllacunapi Sodoma, Gomorrapi mana allita, mapata rurashpa causarcacuna, chashnallatajmi causancuna (Judas 7). Pero ñucanchij Diospaj mandashcacunata cazujpimi paicunaca ñucanchijtaca pꞌiñancuna. Caishuj gentecunapish ñucanchijmantami burlarincuna. Shinallataj shujtajcunapish paicunapaj mana alli ruraicunata mana apoyajpimi yangamanta juchachincuna (1 Pedro 4:3, 4).

4. ¿Shujtajcuna pꞌiñajpipish ahuantangapajca imatataj minishtinchij?

⁴ Shujtajcuna llaquichijpi, pꞌiñajpica Jehová Dios ayudanapimi confiana canchij. Sinchi feta charishpallami chaicunataca ahuantashun (Efesios 6:16). Pero sinchi feta charinallaca mana minishtirinchu. Cꞌuyaita ricuchinapishmi minishtirin. Cꞌuyaita charishpaca shujtajcuna ñucanchijta llaquichijpica mana rato pꞌiñarishunchu. Llaquichijpipish ahuantai tucushunmi (1 Corintios 13:4-7, 13). Jehová Diosta, huauqui panicunata, contracunatapish cꞌuyashpa pꞌiñaita ima shina mishanatami yachashun.

5. ¿Jesusca Jehová Diosta cꞌuyashcamantaca imatataj ahuantarca?

⁵ Jesusca ashalla horascuna paita huañuchinapaj faltajpica paipaj catijcunamanca: “Cai pachapi cajcunaca ñuca Yayata ñuca cꞌuyashcatapish, pai mandashca shina rurashcatapish yachachunmi chashna tucugrini” nircami (Juan 14:31). Jesusca Jehová Diosta tucui shunguhuan cꞌuyashcamantami chai pruebacunataca ahuantarca. Ñucanchijpish Jehovata tucui shunguhuan cꞌuyashpaca ima laya pruebacunatapish ahuantashunmi.

6. ¿Diosta sirvijcunaca gentecuna pꞌiñajpica ima shinataj sintirinchij?

⁶ Apostolcuna causashca punllacunapica judiocunata mandajcunaca apostolcunataca Diosmanta ama huillachunmi jarcasha nircacuna. Pero paicunaca Diosta cꞌuyashcamantami runacunata cazunapaj randica Jehová Diosta sirvishpa catircacuna (Hechos 5:29; 1 Juan 5:3). Cunan punllacunapish huaquin huauqui panicunaca gobiernocuna paicunata catirashpa llaquichijpipish Diosta cꞌuyashcamantami huillashpa catincuna. Chashnami gentecuna ñucanchijta pꞌiñajpica mana desanimarinchij. Ashtahuanpish cushillami sintirinchij (Hechos 5:41; Romanos 5:3-5-ta liyipai).

7. ¿Familiacuna pꞌiñashpa, llaquichijpipish imatataj rurana canchij?

⁷ Diosta ama sirvichun familiacuna jarcajpica chaita ahuantanaca mana facilchu can. Tal vez familiacunaca “cantaca testigo de Jehovacunami umashcacuna, canca locomi tucucungui” nishpami rimancuna (Marcos 3:21-ta ricui). Tal vez hasta ñucanchijtachari llaquichingacuna. Jesusca: ‘Cancunata pꞌiñajcunaca quiquin huasi ucupurallatajmi canga’ nircami (Mateo 10:36). Familiacuna ñucanchijta pꞌiñajpipish paicunataca mana pꞌiñanachu canchij. Ashtahuanpish Jehová Diosta cꞌuyashcamantami paicunatapish cꞌuyanchij (Mateo 22:37-39). Pero paicunata cꞌuyashpapish Jehová Diospaj mandashcacunata cazunataca mana saquinachu canchij.

8, 9. ¿Shuj panica paipaj mama catirashpa llaquichijpipish ima shinataj Diosta sirvishpa catirca?

⁸ Párrafo 1-pi parlashca pani Georginaca Diosta ama sirvichun paipaj mama jarcajpipish Diosta sirvishpami catirca. Paica: “Ñucapish, ñuca mamitapish testigo de Jehovacunahuan ishquindijmi Bibliamantaca yachai callarircanchij. Pero 6 quillacuna qꞌuipa ñuca tandanacuicunaman risha nijpica ñuca mamitaca achcatami pꞌiñarirca. Paica apostatacunahuan tandanacushpami parlaj carca. Paica ñucata rimangapajca apostatacunapaj yuyaicunata japishpami rimaj carca. Maipica ajchamantapish, cungamantapish aisashpami shitaj carca. Publicacioncunatapish japishpami tucui  basurapi shitaj carca. Ña ñuca 15 huatacunata charishpami bautizarircani. Chaimi ñuca mamitaca Diosta ama sirvichun mana alli comportarij jovencitacunata ayudaj escuelapi churarca. Chai escuelapica jovencitacunaca drogarishpa, mana allicunata rurashpami causajcuna carca. Ñuca propio familia chashna llaquichijpica chaita ahuantanaca sinchimi carca” ninmi.

⁹ ¿Pani Georginaca llaquicunata ahuantangapajca imatataj rurarca? Paica: “Ñuca mamita Diosta ama sirvichun jarcai horaspajca ñucaca ñami Bibliataca tucui liyishcarcani. Chaimantami Biblia yachachishcacunataca tucui shunguhuan crircani. Jehová Diospajpish amiga cashcata sintircani. Ñucaca Jehová Diostaca cutin cutinmi mañaj carcani. Paica ñuca mañashcacunatami cutichirca. Jovencitacunapaj escuelapi causacui horasca ñucataca shuj ñañami paipaj huasipi Bibliamanta yachangapaj invitarca. Shinallataj shujtaj turi ñañacunapishmi ñucataca ayudarca. Chaimi paicuna ñuca familiacuna cashcata shina sintircani. Pi ñucanchijta llaquichijpi, pꞌiñajpipish Jehová Diosca ñucanchijmanca fuerzata cushpami catin” ninmi.

10. ¿Imamantataj Jehová Diospi confiana canchij?

¹⁰ Apóstol Pabloca maijanpish Diospaj cꞌuyaimantaca manataj anchuchi tucungachu nircami (Romanos 8:38, 39). Ñucanchij llaquicunata charijpica Jehová Diosca manataj saquingachu. Paica fuerzata cushpa, animashpami ayudanga. Shinallataj ima shinami pani Georginata huauqui panicuna ayudarca, chashnallatajmi ñucanchijtapish huauqui panicunaca ayudanga.

11. ¿Jesuspaj discipulocunaca paicunata catirashpa llaquichijpipish imamantataj ahuantarcacuna?

¹¹ Jesusca huañunapaj shuj punlla faltajpimi paita catijcunataca caishujmanta chaishujmanta cꞌuyanacunguichij nishpa mandarca (Juan 15:12, 13-ta liyipai). Jesusta catijcunaca cꞌuyaita ricuchishpami gentecuna pꞌiñajpipish ahuantai tucurcacuna. Tesalónica congregacionpica callarimantami huauqui panicunataca catirashpa llaquichircacuna. Pero cai huauqui panicunaca paicunata llaquichijpipish cꞌuyaita ricuchishpami ahuantarcacuna. Pabloca cai huauqui panicunataca cꞌuyaita ricuchijpipish ashtahuan cꞌuyaita ricuchishpa catichunmi animarca (1 Tesalonicenses 1:3, 6, 7; 4:9, 10). Paicunaca cꞌuyaita ricuchishpami llaquilla cajcunatapish animarcacuna (1 Tesalonicenses 5:14). Chaimi shuj huata huashaca apóstol Pabloca cancuna tucuicunaman cꞌuyaita ricuchicushcaca  ashtahuanmi mirarishpa caticun nircami (2 Tesalonicenses 1:3-5). Cashna cꞌuyaita ricuchishcamantami catirashpa llaquichijpipish paicunaca ahuantarcacunalla.

12. ¿Guerra tiyai horasca huauqui paicunaca ima shinataj cꞌuyaita ricuchircacuna?

¹² Párrafo 1-pi parlashca huauqui Danilomanta, paipaj huarmimanta cutin parlashun. Pai causacun llajtapica guerrami tiyai callarirca. Chashna guerra tiyajpipish paicunaca tandanacuicunaman rishpa, huillashpa, huauqui panicunata micunitacunahuan ayudashpami caticurca. Shuj punllaca Danilopaj huasimanmi soldadocunaca chayarca. Huauqui Daniloca: “Ñucataca Diosta sirvinata saquichunmi obligasha nircacuna. Pero ñuca Diosta sirvinata mana saquisha nijpica ñucataca macarcacunami. Shinallataj pistolata llujchishpami cunanca umapimi disparashun nircacuna. Pero paicunaca uma ladota disparashpami manchachircacuna. Ña chaimanta soldadocuna ricushpaca cancuna ñucanchijta mana cazujpica cutin tigrashpaca cambaj huarmitami violashun nircacunami. Chaita yachaj chayashpaca huauqui paicunaca ratomi trenta japishpa shujtaj llajtaman cacharcacuna. Chai llajtaman chayajpica huauqui panicunaca micunata carashpa, huasita, trabajota mashcashpami ayudarcacuna. Chaitaca manataj cungarishunchu. Tiempo qꞌuipaca shujtaj huauqui paicunapish guerramanta miticushpa ricujcunatami ñucanchijpish ayudarcanchij” ninmi. Cai experienciapi ricushca shinaca huauqui paicunata cꞌuyashcamantami contracuna ñucanchijta llaquichijpipish ahuantai tucunchij.

13. ¿Ñucanchijta pꞌiñajcunata cꞌuyangapajca ima shinataj Diospaj espíritu santoca ayudan?

¹³ Jesusca ñucanchijta pꞌiñajcunata cꞌuyachunmi mandarca (Mateo 5:44, 45). Huaquinpica caita pajtachinaca sinchimi can. Shinapish Jehová Dios paipaj espíritu santohuan ayudajpica paicunatami cꞌuyashun, mana rato pꞌiñarishunchu, pacienciatapishmi charishun (Gálatas 5:22, 23). Catirashpa llaquichijcunaca Diosta sirvij cusa o huarmi, huahuacuna, vecinocuna cꞌuyaita ricuchijpimi maijancunaca cambiashcacuna. Huaquincunacarin testigo de Jehovacunami tucushcacuna. Chaimanta sinchi cajpipish ñucanchijta pꞌiñajcunata cꞌuyangapajmi Jehová Diostaca paipaj espíritu santota cuchun mañana canchij (Lucas 11:13). Jehová Diosta tucuipi cazushpaca alli causaitami charishun (Proverbios 3:5-7).

14, 15. Romanos 12:17-21-pi nishca shinaca ¿Pani Yasminca paipaj cusamanca ima shinataj cꞌuyaita ricuchirca?

 ¹⁴ Asia llajtamanta pani Yasminhuan ima tucushcata ricushun. Pani Yasmín testiga tucujpica paipaj cusaca ‘testigo de Jehovacunami cantaca umashca’ nishpami jarcai callarirca. Paipaj cusaca paita achcata rimashpami paipaj familiacunata pushashpa, religionta pushajtapish, shuj brujotapish pushashpa yangamanta juchachishpa mana allicunata nij carca. Paicunaca familiacunatapishmi chꞌicanyachicunguichij nishpami nijcuna carca. Shuj cutinca cai runaca tandanacuna huasiman rishpami huauqui panicunataca animalta rimarca. Chaimantami pani Yasminca achcata huacaj carca.

¹⁵ Pani Yasmintaca huauqui panicunaca tandanacuipimi animashpa ayudarcacuna. Shinallataj congregacionta pushaj huauquicunaca paipaj cusata cꞌuyaihuan tratashpa catichunmi ayudarcacuna (Romanos 12:17-21-ta liyipai). Pani Yasminca: “Bibliapi mandashcacunata pajtachina huaquinpica sinchimi carca. Pero caita pajtachingapajmi Diostaca ayudachun mañarcani. Chaimi ñuca cusa cocina ucuta nij tucushpa mapayachijpica pꞌichaj carcani. Shinallataj ñucata cꞌamijpica ñucaca mana pꞌiñarircanichu. Pai ungujpipish paitaca cuidashpami ayudarcani” ninmi.

16, 17. ¿Yasminpaj ejemplomantaca imatataj yachanchij?

¹⁶ Pani Yasminca paipaj cusamanmi cꞌuyaita ricuchirca. Paica: “Ñuca mana llullaj cashcamantami paica ñucapi confian. Ñuca crishcacunamanta parlajpipish paica respetanmi. Huasipipish allimi causanchij. Cunancarin ñucataca tandanacuicunaman richunmi animan. Tal vez ima horaca Yaya Diostami paihuan sirvisha” ninmi.

¹⁷ Pani Yasmín shinami ñucanchijta contracuna pꞌiñajpipish cꞌuyaita ricuchishpaca ahuantai tucushun (1 Corintios 13:4, 7). Ñucanchijta pꞌiñashpa llaquichijpica llaquillami sintirinchij. Pero paicunaman cꞌuyaita ricuchijpica paicunaca tal vez cambiangacunami, ñucanchijtapish Jehová Diosta sirvichunmi saquingacuna. Chaita rurajpica Jehová Diosca cushillami sintiringa. Pero contracuna pꞌiñashpa catijpipish Diosta sirvishpami cushilla causashun.

18. ¿Shujtajcuna pꞌiñajpipish imamantataj cushilla cai tucunchij?

¹⁸ Jesusca ‘runacuna pꞌiñajpi, cꞌamijpipish cushichishcami canguichij’ nircami (Lucas 6:22). Jehová Diosta sirvicushcamanta gentecuna  pꞌiñachunca mana munanchijchu. Pero ¿imamantataj gentecuna pꞌiñajpipish cushilla cai tucunchij? Puntapica gentecuna pꞌiñajpipish ahuantashpaca Diospaj ñaupajpimi alli ricurishun (1 Pedro 4:13, 14). Ishquipica ahuantashpaca ñucanchij fetami sinchiyachishun (1 Pedro 1:7). Quimsapica tucui llaquicunata ahuantashpaca huiñai causaitami chasquishun (Romanos 2:6, 7).

19. ¿Apostolcunaca paicunata catirashpa llaquichijpipish imamantataj cushilla huillarcacuna?

¹⁹ Jesús causarishca qꞌuipaca apostolcunaca contracuna paicunata macajpipish, huillachun jarcajpipish paicunaca cushillami huillashpa catircacuna. Paicunaca Diosta sirvicushcamanta llaquicunata apacushpami cushilla sintirircacuna (Hechos 5:40-42). Shinallataj Jesusta cꞌuyashcamantami contracunataca mana mancharcacuna. Cunan punllacunapish huauqui panicunaca llaquicunata charishpapish huillanataca manataj saquincunachu. Jehová Diosta sirvingapaj esforzarishcataca paica manataj cungaringachu (Hebreos 6:10).

20. ¿Catij yachaipica imatataj ricushun?

²⁰ Cai millai mundopi cashcamanta gentecuna pꞌiñajpipish ahuantanami canchij (Juan 15:19). Pero paicuna llaquichijpipish mana manchanachu canchij. Catij yachaipica Jehová Dios ñucanchijta sinchiyachinata, cuidanatami yachashun (2 Tesalonicenses 3:3). Chaimanta Jehová Diosta, huauqui panicunata, ñucanchijta pꞌiñajcunatapish cꞌuyashpa catishunchij. Caita rurashpaca huauqui panicunahuanmi tandalla causashun. Ñucanchij fepish sinchimi canga. Tucuimanta yallicarin Jehová Diostami jatunyachishun. Chashnami pꞌiñaitaca cꞌuyaihuan mishashun.