1, 2. ¿Ancianocunaca Pablomantaca imatataj yachai tucuncuna?

 APÓSTOL Pabloca huauqui panicunataca achcatami cꞌuyarca. Chaimantami paicunapajca sinchita trabajarca (Hechos 20:31). Chaimi huauqui panicunapish paitaca achcata cꞌuyarcacuna. Shuj cutinca Éfeso llajtamanta ancianocunaca Pablo ña mana tigranata yachashcamantami dimastij huacarcacuna (Hechos 20:37). Cunan punllacunapish ancianocunaca Pablo shinami huauqui panicunata cꞌuyancuna. Chaimantami paicunata ayudangapaj tucui pudishcata rurancuna (Filipenses 2:16, 17). Pero maipica paicunapish sinchi jarcaicunahuanmi chꞌimbapurana can. ¿Caicunata mishangapajca imatataj rurana can?

² Sinchita trabajaj ancianocunaca apóstol Pablopaj ejemplotami catincuna (1 Corintios 11:1). Apóstol Pabloca imapi jucha illaj, shuj ángel shinaca mana carcachu. Paipish maipica sinchi jarcaicunahuanmi chꞌimbapurarca (Romanos 7:18-20). Sinchi jarcaicunata charishpapish paica Jehová Diostami cushilla sirvirca. Ancianocunaca ima jarcaicunata charishpapish, apóstol Pablo shinami Jehová Diosta cushilla sirvi tucuncuna. Ancianocuna caita ima shina rurai tucushcata ricushun.

3. ¿Cai yachaipica imatataj yachashun?

³ Cai yachaipica ancianocunapish apóstol Pablo shina ima jarcaicunallahuan chꞌimbapurashcatami yachashun. Ancianocuna ocupados cashpapish ima shina predicanapi apoyanata, ima shina cꞌuyaj, alli michij canatami ricushun. Shinallataj ancianocuna  pandarishpapish ima shina ñaupajman catinata, huauqui panicuna pandarijpipish paicunata ima shina ayudanatami yachashun.

4. ¿Ancianocunapajca imamantataj maipica predicanata apoyanaca sinchi can?

⁴ ¿Caita pajtachinaca imamantataj sinchi can? Ancianocunaca predicashpapish huaquin responsabilidadcunatami charincuna. Paicunaca huaquin conferenciacunata, shujtaj asignacioncunatami allichincuna. Shinallataj siervo ministerial huauquicunatami capacitancuna. Caishuj huauqui panicunatapishmi animancuna (1 Pedro 5:2). Huaquin ancianocunacarin Tandanacuna Huasicunata o shujtaj edificiocunatami Diosta adorangapaj allichishpa o shayachishpa ayudancuna. Pero chashna sinchita ayudashpapish paicunapajca predicanami tucuimanta yalli valishca cana can (Mateo 28:19, 20).

5. ¿Ancianocunaca Pablopaj ejemplomantaca imatataj yachai tucuncuna?

⁵ ¿Pabloca ima shinataj carca? Pabloca alli huillaj cangapajca Filipenses 1:10-pi ima nishcatami pajtachirca. Chai versopica (NWT): “Shinallataj ashtahuan valij cashcacunallata cancuna agllachunmi Diosta mañani” ninmi. Paipajca gentecunaman predicanami tucuimanta yalli valishca carca. Chaimantami paica callecunapi, huasin huasin predicaj carca (Hechos 20:20). Paica shuj agllashca horasllata o semanapi shuj punllallataca mana huillajchu carca. Ashtahuanpish tucui layami predicaj carca. Por ejemplo, shuj cutinca paica Atenas llajtapimi paipaj compañerocunata shuyacurca. Chashna shuyacushpapish paica chaipimi achca gentecunaman predicarca (Hechos 17:16, 17, 34). Shinallataj paica prezupi cashpapish pai huillai tucushca gentecunamanmi huillarca (Filipenses 1:13, 14; Hechos 28:16-24).

6. ¿Pabloca shujtaj huauquicunataca ima shinataj capacitarca?

⁶ Apóstol Pabloca predicangapajmi tiempota alli aprovecharca. Paica shujtajcunatapishmi paihuan predicachun invitaj carca. Por ejemplo, shuj cutinca Juan Marcostami paihuan predicachun invitarca. Cutin qꞌuipaca Timoteotapishmi invitarca (Hechos 12:25; 16:1-4). Shinallataj Pabloca cai huauquicunataca congregacionta alli organizachun, alli michij cachun, alli yachachijcuna cachunmi capacitarca (1 Corintios 4:17).

7. ¿Efesios 6:14, 15-mantaca ancianocunaca imatataj yachai tucuncuna?

⁷ ¿Ancianocunaca imatataj rurai tucuncuna? Ancianocunaca tucui laya predicangapajmi  esforzarina can (Efesios 6:14, 15-ta liyipai). Por ejemplo, huasin huasin rishpa, comprasta randinaman rishpa o trabajopimi predicai tucuncuna. Huaquin ancianocunaca Tandanacuna Huasita shayachishpa ayudacushpapish vecinocunaman o imata saquinaman rijcunamanmi huillai tucuncuna. Ima shinami apóstol Pabloca huillacushpaca caishujcunata capacitarca, chashnallatajmi ancianocunapish huauqui panicunata o siervo ministerialcunata capacitangapaj tiempota surcuna can.

8. ¿Maipica valishca ruraicunata pajtachingapajca ancianocunaca imatataj rurana can?

⁸ Ancianocunaca Diospaj pueblopi achca responsabilidadcunata charishpapish familiahuan Bibliamanta estudiangapaj, predicangapaj, huahuacunamanpish yachachingapajmi tiempota surcuna can. Chaimantami maipica ancianocunaca Diosta mañashca qꞌuipaca imata pajtachichun nijpica “mana pudishachu” nina can. Huaquin ancianocunapajca imatapish “mana pajtachi tucushachu” ninaca sinchimi can. Pero Jehová Diosca paicuna pudishcallata rurachunmi munan.

9. ¿Ancianocunapajca imamantataj maipica huauqui panicunata apoyanaca sinchi can?

⁹ ¿Caita pajtachinaca imamantataj sinchi can? Tucuri punllacunapi causacushcamantami Diosta sirvijcunaca achca llaquicunahuan chꞌimbapuranchij. Chaimantami maijancunaca animachun, apoyachun minishtincuna. Huaquincunacarin ama mana allicunapi urmangapajmi ayudachun minishtincuna (1 Tesalonicenses 5:14). Ancianocunaca cai tucui llaquicunataca mana tucuchi pudincunachu. Pero Jehová Diosca ancianocunataca huauqui panicunata animachun, cuidachunmi mandan. ¿Ancianocunaca ocupados cashpapish huauqui panicunata ayudangapajca imatataj rurana can?

10. 1 Tesalonicenses 2:7-pi nishca shinaca ¿Pabloca ima shinataj huauqui panicunata cuidarca?

¹⁰ ¿Pabloca ima shinataj carca? Apóstol Pabloca huauqui panicunata animangapaj, sinchiyachingapajmi tiempota surcurca. Chashnallatajmi ancianocunapish cꞌuyaihuan huauqui panicunata animangapaj, sinchiyachingapaj tiempota surcuna can (1 Tesalonicenses 2:7-ta liyipai). Pabloca paipish, Jehová Diospish huauqui panicunata achcata cꞌuyashcatami intindichirca (2 Corintios 2:4; Efesios 2:4, 5). Paica huauqui panicunahuanpish shuj amigo shinami tiempota pasangapaj esforzarirca. Shinallataj huauqui panicunamanca pai ima shina sintirishcata, ima jarcaicunahuan chꞌimbapurashcatami parlarca. Chashnami huauqui panicunapi achcata confiashcata ricuchirca (2 Corintios 7:5; 1 Timoteo 1:15). Shinapish paipaj problemacunallapi yuyanapaj randica huauqui panicunata ayudangapajmi sinchita esforzarirca.

11. ¿Apóstol Pabloca imamantataj huauqui panicunata aconsejarca?

 ¹¹ Maipica apóstol Pabloca huauqui panicunatami consejana carca. Pero paica huauqui panicunamanta preocuparishcamantami problemacunapi ama urmachun chashna consejarca. Shinallataj paica intindirinalla consejocunatami cuj carca. Consejota cushpapish pajtachicushcata, mana pajtachicushcata yachangapajmi esforzarirca. Por ejemplo, shuj cutinca paica Corinto llajtapi causaj huauqui panicunamanmi sinchi consejota curca. Pabloca Titotami cai huauqui panicuna chai consejota pajtachicushcata, mana pajtachicushcata yachangapaj cacharca. Pai cushca consejota pajtachicushcata yachashpaca cushillami sintirirca (2 Corintios 7:6, 7).

12. ¿Ancianocunaca huauqui panicunata sinchiyachingapajca imatataj rurana can?

¹² ¿Ancianocunaca imatataj rurai tucuncuna? Ancianocunaca Pablopaj ejemplota catishpaca huauqui panicunahuan tiempota pasangapajmi esforzari tucuncuna. Chaipajca paicunaca huauqui panicunata animangapajmi tandanacuicunaman utcalla ri tucuncuna. Paicunata animangapaj, sinchiyachingapajca maipica asha tiempollami minishtirin (Romanos 1:12; Efesios 5:16). Shinallataj ancianocunaca Bibliahuanmi huauqui panicunata animancuna. Jehová Dios paicunata cꞌuyashcatapishmi ricuchincuna. Ancianocunaca huauqui panicunahuan parlashpa, paicunata felicitashpaca cꞌuyaitami ricuchincuna. Paicunaca piman consejacushpapish Bibliahuan, cꞌuyaihuanmi consejana can (Gálatas 6:1).

13. ¿Ancianocunaca pandarishpaca maipica ima shinataj sintirincuna?

¹³ ¿Caita pajtachinaca imamantataj sinchi can? Ancianocunaca juchayujcunami can. Chaimantami maipica paicunapish pandarincuna (Romanos 3:23). Chashna pandarishpaca huaquincunaca mejorasha nincunami. Pero paicuna pandarishcallapi yuyashcamantami desanimarincuna. Cutin shujtajcunaca “¿imapi mana mejoranachu cani?” nishpami yuyancuna. Pero chashna yuyanaca mana allichu can.

14. Filipenses 4:13-pi nishca shinaca ¿Pabloca ima shinataj pai pandarishcacunataca chꞌimbapurai tucurca?

¹⁴ ¿Pabloca ima shinataj carca? Pabloca pai pandarishcacunahuan pailla mana chꞌimbapurai tucushcataca allimi yacharca. Ashtahuanpish chaita chꞌimbapurangapaj Jehová Diospaj fuerzata minishtishcatami yacharca. Yaya Diosta manaraj rijsishpaca Pabloca Diosta sirvijcunatami catirashpa llaquichirca. Pero tiempo qꞌuipaca paica paipaj causaipi  cambiangapajmi esforzarirca (1 Timoteo 1:12-16). Jehová Diospaj ayudahuanmi paica alli michij, cꞌuyaj, humilde tucurca. Maipica Pabloca ñaupa punllacunapi pandarishcacunallapi yuyashpami llaquilla sintirirca. Pero paica Jehová Dios paita perdonashcapimi confiarca. Chaimantami ña mana pandarishcacunallapi yuyashpa catirca (Romanos 7:21-25). Ashtahuancarin paica mana tucuipi jucha illaj cai tucushcataca allimi intindirca. Pero Dios munashca shina causangapajmi esforzarirca. Chaimantami Jehová Dios paipaj obrata pajtachichun paita ayudanapi confiarca (1 Corintios 9:27; Filipenses 4:13-ta liyipai). *

15. ¿Ancianocunaca pandarishpapish imata rurangapajtaj esforzarina can?

¹⁵ ¿Ancianocunaca imatataj rurai tucuncuna? Ancianocunaca juchayujcuna cashpapish Diospaj ovejacunata michina regalotami chasquishcacuna. Pero Jehová Diosca ancianocuna pandarishpapish paicunapaj causaipi mejorashpa, pai munashca shina causachunmi munan (Efesios 4:23, 24). Ancianocunaca paicuna imapi mejoranata yachangapajca Bibliapimi ricui tucuncuna. Imapi cambianata yachashpaca cambiangapajmi esforzarina can. Cambiocunata rurajpica Jehová Diosca cushilla sintirichun, pai mingashcata pajtachichunmi ayudanga (Santiago 1:25).

16. ¿Huauqui panicunapaj pandarishcallata ricushpaca ancianocunaca imatataj ruranga?

¹⁶ ¿Caita pajtachinaca imamantataj sinchi can? Maipica pushaj ancianocunaca huauqui panicunahuanmi achca tiempota pasancuna. Chaimantami paicuna pandarishcataca ricui tucuncuna. Pero huauqui panicuna pandarishcallata ricushpaca ancianocunaca tal vez pꞌiñarishpami mana alli tratangacuna. Diabloca Diosta sirvijcuna pꞌiñanacushpa mana alli tratachunmi munan (2 Corintios 2:10, 11).

17. ¿Huauqui panicuna pandarijpipish Pabloca ima shinataj tratarca?

¹⁷ ¿Pabloca ima shinataj carca? Pabloca huauqui panicunapaj alli ruraicunatami valorarca. Chaimantami paicunataca cꞌuyaihuan tratarca. Huauqui panicuna pandarijpipish paicuna allita rurangapaj esforzaricushcatami ricurca. Chashna yuyashpaca paicunata ayudangapajmi esforzarirca.

18. ¿Evodiata, Sintiqueta apóstol Pablo ima shina ayudashcamantaca imatataj yachanchij?

¹⁸ Filipos llajtapi causaj huauqui panicunata Pablo ima shina ayudashcata ricushun (Filipenses 4:1-3-ta liyipai). Shuj cutinca Diosta sirvij Evodia y Sintiqueca paicunapura pꞌiñanacushpami chꞌicanyanacushcacuna carca. Pero Pabloca paicunataca mana sinchita rimarcachu.  Ashtahuanpish paicunapaj alli ruraicunata ricushpami felicitarca. Shinallataj Jehová Diospish paicunata cꞌuyashcatami ricuchirca. Chaimantami cꞌuyaihuan paicuna cutin alli tucuchun animarca. Chashna tratashpaca apóstol Pabloca huauqui panicunahuan alli apanacushpa, paicunahuan tandalla cashpaca cushillami sintirirca.

19. a) ¿Huauqui panicuna pandarijpipish ancianocunaca imatataj rurana can? b) ¿Página 30-pi tiyaj fotomantaca imatataj yachanchij?

¹⁹ ¿Ancianocunaca imatataj rurai tucuncuna? Huauqui panicunaca juchayujcuna cashcamantami, maipica paicunapaj ruraicunahuan o ima nishcacunahuan pandaringacuna. Chaimi ancianocunaca tal vez paicunata corregina cangacuna. Chashnapish ancianocunaca huauqui panicunapaj alli ruraicunata ricushpami felicitana can (Filipenses 2:3). Shinallataj huauqui panicuna Jehová Diosta cꞌuyashcata, paicunapaj causaipi mejoracushcatami ricuna can. Ancianocuna chaita rurajpica huauqui panicunaca congregacionpimi cꞌuyaita ricuchishpa tandalla sirvingacuna.

20. ¿Ancianocunaca apóstol Pablopaj ejemplomanta yachashpa catingapajca imatataj rurana can?

²⁰ Ancianocunaca apóstol Pablopaj ejemplomantami yachashpa cati tucuncuna. Por ejemplo, Índice de las publicaciones Watch Tower nishcapi, “Pablo” nishca temapi, “Ejemplo para los ancianos” nishcatami yachai tucuncuna. Chaita estudiacushpaca: “¿Congregacionpi alli anciano cangapajca Pablopaj ejemplomantaca imatataj yachai tucuni?” nishpami tapurina can.

21. ¿Hebreos 6:10-mantaca ancianocunaca imatataj yachai tucuncuna?

²¹ Ancianocuna, Jehová Diosca cancuna jucha illaj cachunca mana shuyanchu. Pero paica alli sirvichunmi shuyan (1 Corintios 4:2). Jehová Diosca apóstol Pablo paita sirvingapaj esforzarishcataca achcatami valorarca. Cancunatapish chashnallatajmi paita sirvingapaj esforzarishcataca achcata valoranga. Hebreos 6:10-pica: ‘Diosca cancunapaj rurashcacunata paipaj shutipi cꞌuyaihuan trabajashpa ricuchishcata, jucha illajcunapajta rurashpa cunancamapish ruracushcamantaca manataj cungaringachu’ ninmi.