1. ¿Imamantataj mana alli yuyaicunamantaca jarcarina canchij?

 CUNANLLA bautizarishca cashpapish, achca huatacunata bautizarishca cashpapish tucuicunami Jehová Dios munashca shina casha ninchij. Chaipajca mana alli yuyaicunataca mana charinachu canchij. Mana alli yuyaicunata charishpaca mana allicunatami parlashun, mana allicunatapishmi rurashun (Efesios 4:17-19). Cutin allicunata yuyashpaca allicunamantami parlashun. Jehová Dios munashca shinapishmi causashun (Gálatas 5:16).

2. ¿Cai yachaipica ima tapuicunatataj yachashun?

² Pasaj yachaipi ricushca shinaca ñucanchij yuyaimantaca mana tucui mana alli yuyaicunata anchuchi tucunchijchu. Pero mana alli yuyaicunata ama rurangapajmi esforzarina canchij. Manaraj bautizarishpaca mana alli rimaicunata, mana alli ruraicunatami saquircanchij. Chashnami mauca causaita saquircanchij. Pero Jehová Diosta tucuipi cushichingapajca Colosenses 3:10-pi ima nishcatami pajtachina canchij. Chaipica (NWT): “Ashtahuanpish mushuj churanata churarij shina Dios cushca mushuj causaita churarichij” ninmi. Cai yachaipica cai ishqui tapuicunatami yachashun: ¿mushuj causaita churarijcunaca ima shinataj can?, ¿mushuj causaita churarishpa catingapajca imatataj rurana canchij?

3. Gálatas 5:22, 23-pi nishca shinaca ¿“mushuj causaita” catijcunaca ima shinataj can?

³ Mushuj causaita catingapajca Jehová Diospaj espíritu santotami minishtinchij. Jehová Diospaj espíritu santota chasquishpaca  Dios shina yuyangapaj, rurangapajmi esforzarishun (Gálatas 5:22, 23-ta liyipai). Por ejemplo, mushuj causaita charijcunaca Jehová Diosta, huauqui panicunatami cꞌuyancuna (Mateo 22:36-39). Sinchi llaquicunata charishpapish paicunaca cushillami ahuantancuna (Santiago 1:2-4). Shujtajcunahuanpish alli apanacungapaj, pacienciata charingapajmi esforzarincuna (Mateo 5:9; Colosenses 3:13). Allita ruranata yachashpaca chaitami rurancuna (Lucas 6:35). Paicunapaj ruraicunahuanmi Jehová Diospi sinchi feta charishcatapish ricuchincuna (Santiago 2:18). Maijancuna paicunata mana alli tratajpipish mana pꞌiñarincunachu. Tentacioncunamantapish jarcarinatami yachancuna (1 Corintios 9:25, 27; Tito 3:2).

4. ¿Mushuj causaita catingapajca ima cualidadcunallatataj charina canchij?

⁴ Gálatas 5:22, 23-pipish, shujtaj versocunapipish huaquin cualidadcunamantami parlan. * Cai cualidadcunaca mana shujtaj shujtaj ropacuna shinachu can. Ashtahuanpish cai tucui cualidadcunaca shujlla ropa shinami can. Chaimanta chai ropata churarij shinami mushuj causaita charingapajca cai tucui cualidadcunata pajtachina canchij. Por ejemplo, shujtajcunaman cꞌuyaita ricuchingapajca pacienciatami charina canchij, allipishmi tratana canchij. Shinallataj allita rurangapajca alli shungumi cana canchij, mana allicunamantapishmi jarcarina canchij.

5. 1 Corintios 2:16-pi nishca shinaca ¿imamantataj Jesuspaj ejemplomanta yachana canchij?

⁵ (1 Corintios 2:16-ta liyipai). Mushuj causaita churaringapajca Jesús shinami yuyana canchij. Jesusca Jehová Diospaj tucui cualidadcunataca shuj espejo shinami alli ricuchin (Hebreos 1:3). Ñucanchijpish Jesús yuyashca shina yuyangapaj esforzarishpaca paipaj ejemplotami catishun (Filipenses 2:5, QC, 1989).

6. ¿Jesuspaj ejemplota mana tucuipi alli pajtachi tucushpapish imatataj yuyarina canchij?

⁶ Canca: “Jesusca jucha illajmi can. Paipaj ejemplota catinaca sinchimi can” nishpachari yuyangui. Chashna yuyashpaca cai quimsa yuyaicunapi yuyari. Puntaca, cantaca Jehová Diosca paiman, Jesusman rijchajtami rurashca. Chaimanta canca juchayuj cashpapish paicunapaj ejemplota catingapajmi esforzari  tucungui (Génesis 1:26). Ishquipica, Jehová Diosca paipaj espíritu santohuanmi, can mana yuyashcata pajtachichun ayudanga. Quimsapica, Jehová Diosca cunan punllacunapica tucuipi Jesuspaj ejemplota alli pajtachichunca mana mañanchu. Por ejemplo, paica Paraíso Allpapi causagrijcuna 1.000 huatacunata jucha illaj tucuchunmi ayudanga (Apocalipsis 20:1-3). Pero Jehová Diosca cunan punllacunapimi Jesuspaj ejemplota catingapaj esforzarichun mañan. Chaita pajtachichunca paillatajmi ayudanga.

7. ¿Cunanca imatataj yachagrinchij?

⁷ Cunanca Jesuspish ima shina Jehová Diospaj chuscu cualidadcunata pajtachishcata, ñucanchijpish ima shina pajtachi tucushcatami yachashun. Shinallataj huaquin tapuicunata ricushpami imapi mejoranata yachashun.

8. ¿Jesusca gentecunata cꞌuyashcataca ima shinataj ricuchirca?

⁸ Jesusca Jehová Diosta achcata cꞌuyashcamantami gentecunamanpish cꞌuyaita ricuchirca (Juan 14:31; 15:13). Cai Allpapi cashpaca gentecuna paita mana alli tratajpipish paica tucuicunatami llaquishpa alli tratarca. Shinallataj gentecunata cꞌuyashcamantami Jehová Diospaj Gobiernomantapish huillarca (Lucas 4:43, 44). Ashtahuancarin Jehová Diosta, gentecunata cꞌuyashcamantami paica llaquicunata apashpa ñucanchij juchacunamanta huañurca. Chashnami ñucanchijtapish huiñai causaita charichun ayudashca.

9. ¿Jesús shina gentecunaman cꞌuyaita ricuchingapajca imallatataj rurana canchij?

⁹ Jehová Diosta cꞌuyashcamantami paiman mingarishpa bautizarircanchij. Chaimantami Jesús shina gentecunamanpish cꞌuyaita ricuchina canchij. Apóstol Juanca: “Maijanpish: ‘Ñucaca Diostami cꞌuyani’ nishpapish, paipaj huauquita pꞌiñajca llullami” nircami (1 Juan 4:20). Cashna nishpa tapurishunchij: “¿Shujtajcunataca shungumantachu cꞌuyani? ¿Shujtajcuna mana alli tratajpipish paicunataca allichu tratani? ¿Gentecunaman Jehová Diosmanta huillangapajpish tiempotachu surcuni? ¿O imalla cosascunahuanchu ayudani? ¿Casi la mayoría gentecuna manataj uyajpipish o jarcaicunata churajpipish huillangapajchu esforzarini? ¿Ashtahuan predicangapajpish tiempotachu surcuni?” (Efesios 5:15, 16).

10. ¿Jesusca shujtajcunahuan alli apanacungapaj, shujtajcunapish alli apanacuchunca imatataj rurarca?

¹⁰ Jesusca paita mana alli tratajpipish mana tigra llaquichircachu. Ashtahuancarin paicunahuan alli tucungapajmi esforzarirca. Paita catijcunatapish chashnallataj rurachunmi yachachirca. Por ejemplo, Diosta sirvijcunataca paicunapura pꞌiñanacushpaca rato alli tucuchunmi yachachirca (Mateo 5:9, 23, 24). Shinallataj Jesusca paipaj apostolcunatapish paicunapuramanta “maijanshi ashtahuan jatun canchij” nishpa pꞌiñanacujpimi, paica ama chashna pꞌiñanacushpa catichun animarca (Lucas 9:46-48; 22:24-27).

11. ¿Shujtajcunahuanpish alli apanacungapaj, shujtajcunatapish alli apanacuchun yachachingapajca imatataj rurana canchij?

¹¹ Shujtajcunahuan alli apanacungapajca paicunata ama llaquichingapaj, pihuanpish pꞌiñanacushpaca alli tucungapajmi esforzarina canchij. Huauqui panicunatapish shujtajcunahuan alli apanacuchunmi animana canchij (Filipenses 4:2, 3; Santiago 3:17, 18). Chaimanta cashna nishpa tapurishunchij: “¿Shujtajcunahuan alli tucungapajca esforzaricunichu? ¿Maijan huauqui o pani ñucata llaquichijpica resintirishcachu saquirini? ¿Shujtajcunahuan alli tucungapajca ñucarajchu esforzarini? ¿Huauqui panicunatapish shujtajcunahuan  alli apanacuchunchu animacuni?”.

12. ¿Jesusca alli shungu cashcataca ima shinataj ricuchirca?

¹² Jesuspish alli shungu cashcamantami shujtajcunata ayudarca. Corregichun minishtijpica paicunata corregirca (Mateo 11:28-30). Por ejemplo, Feniciamanta shuj huarmica paipaj ushushi ungujpimi Jesustaca jambichun mañarca. Jesusca puntaca imamanta mana jambi tucushcatami paimanca intindichirca. Pero qꞌuipaca cai huarmi sinchi feta charijta ricushpaca paipaj ushushitami cꞌuyaihuan jambirca (Mateo 15:22-28). Cutin apóstol Pedroca jatun tucushpami Jehová Diospaj munaita Jesús ama pajtachichun jarcasha nirca. Chaimi Jesusca caishuj discipulocunapaj ñaupajpi paitaca corregirca (Marcos 8:32, 33). Jesusca Pedrota malpi saquingapajllaca mana corregircachu. Ashtahuanpish Pedro, chaipi caj tucui discipulocuna ama jatun tucuchunmi chashna yachachisha nirca. Pedroca tal vez asha pingaihuanmi sintirishcanga. Pero chashna corregishcamantaca achcatami yachashcanga.

13. ¿Alli shungu cashcata ricuchingapajca imatataj rurana canchij?

¹³ Ñucanchijpish alli shungu cashcata ricuchingapajca maipica Jesús shinami cꞌuyaihuan shujtajcunata corregina canchij. Shinallataj Bibliahuanpishmi consejota cuna canchij. Pero huauqui panicuna Jehová Diosta cꞌuyashcamanta, ñucanchijta cꞌuyashcamanta ima consejota chasquinapimi confiana canchij. Chaimanta cashna nishpa tapurishunchij: “¿Shuj cꞌuyashca amigo mana allita ruracujpica utcachu corregini? ¿Cꞌuyaihuan o pꞌiñarishcachu corregini? ¿Paihuan pꞌiñarishca cashcallamanta o paita imapi ayudasha nishcamantachu consejani?”.

14. ¿Jesusca cꞌuyaimantaca imatataj rurarca?

¹⁴ Jesusca imacuna alli cashcata yachashpallaca mana saquirircachu. Paica Jehová Diosta, gentecunata cꞌuyashcamantami paicunapaj allita rurarca. Ñucanchijpish imacuna alli cashcallata yachashpaca mana saquirinachu canchij. Ashtahuanpish shujtajcunata cꞌuyashcamantami paicunapaj allicunata rurashpa ayudana canchij. Pero caita yuyarishunchij, gentecuna ricuchunllaca imatapish mana ruranachu canchij. Por ejemplo, Jesús cai Allpapi cajpica huaquincunaca gentecuna ricuchunllami pobrecunaman cullquita cuj tucurcacuna. Pero paicuna chashna cushcataca Jehová Diosca mana chasquircachu (Mateo 6:1-4).

15. ¿Ñucanchijllapi yuyanapaj randica imatataj rurana canchij?

¹⁵ Ñucanchijllapi yuyanapaj randica shujtajcunapaj allita rurashpami ayudana canchij. Chaimanta cashna nishpa tapuri: “¿Shujtajcunata ayudangapajchu esforzaricuni? ¿Imamantataj shujtajcunapajca allita rurani?”.

16. ¿Cada punlla imatataj rurana canchij?

¹⁶ Bautizarishpaca imapi ña mana cambiana cashcataca mana yuyanachu canchij. Ashtahuanpish mushuj causaita churarishpami catina canchij. Caipi yuyashun. Mushuj churana ama maucayachunca cada punllami cuidanchij. Chashnallatajmi Dios cushca mushuj causai ama maucayaj shina tucuchunca, Diospaj cualidadcunata cada punlla pajtachina canchij. Jehová Diosca cai cualidadcunata pajtachichunca paipaj espíritu santotami cunga (Génesis 1:2). Santiagoca: ‘Alli ruraicunata mana rurajpica ñucanchij feca huañushcami can’ nircami (Santiago 2:26, NWT). Santiago nishca  shinaca fetapish, shujtaj cualidadcunatapish pajtachicushcataca ñucanchij ruraicunahuanmi ricuchina canchij. Cada punlla cai cualidadcunata pajtachishpaca Jehová Diospaj espíritu santota charishcatami ricuchishun.

17. ¿Imapi pandarishpa shujtajcunata mana alli tratashpaca imatataj rurana canchij?

¹⁷ Achca huatacunata bautizarishca cashpapish maipica Diospaj cualidadcunata pajtachinaca mana facilchu can. Pero pajtachingapajmi esforzarishpa catina canchij. Cai ejemplopi yuyashun. Ñucanchij munashca mushuj ropa lliquirijpica mana chai rato basurapi shitanchijchu. Ashtahuanpish cutinmi alli sirashpa allichinchij, qꞌuipapish ama dañarichunmi cuidanchij. Chashnallatajmi maipica pandarishpa shujtajcunata mana alli tratashun. Pero desanimarinapaj randica paicunahuan alli tucungapaj, paicunata ama llaquichingapajmi esforzarina canchij.

18. ¿Jehová Diosca imata rurachuntaj ayudashpa catinga?

¹⁸ Jesusca ñucanchijpajca alli ejemplomi can. Chaimantami cushilla sintirinchij. Jesús shina yuyangapaj esforzarishpaca Dios cushca mushuj causaitami churarishun. Cai yachaipica Jehová Diospaj chuscu cualidadcunallatami yachashcanchij. Pero Jehová Diospaj ashtahuan cualidadcunata yachangapajmi tiempota surcui tucunchij. Diospaj cualidadcunamanta ashtahuan yachangapajca Guía de estudio para los testigos de Jehová, “El vivir cristiano” nishca temapi, “Fruto del espíritu” nishca temata españolpi ricui. Jehová Dios cushca mushuj causaita churarishpa catingapajca Jehová Diosllatajmi ayudanga.