1. ¿Babiloniamanta cacharichishca judiocunaca ima oportunidadtataj charigrircacuna?

 JEHOVÁ DIOSCA Persia llajtata mandaj Ciromanmi paipaj espirituhuan Babilonia prezupi cashca israelitacunata Jerusalenman tigrachichun yuyaita curca. Mandaj Ciroca judiocunataca paicunapaj llajtaman tigrashpa ‘Diospaj templotapish shayachichunmi’ nirca (Esdras 1:1, 3). Chaita yachashpaca judiocunaca dimastijmi cushilla sintirishcangacuna. Paicunaca Jerusalén llajtallapitajmi Jehová Diosta adorana oportunidadta charigrircacuna.

2. ¿Huaquin judiocunaca Jerusalenman chayashcahuanca imatataj rurai callarircacuna?

² Huata 537-pica Judapi saquirij Jerusalenmanmi huaquin judiocunaca chayarcacuna. Chaiman chayashcahuanmi paicunaca Diospaj templota shayachingapaj trabajai callarircacuna. Ña huata 536-pajca callari rumicunata churashpami ña tucuchircacuna.

3. ¿Judiocunaca ima jarcaicunahuantaj chꞌimbapurarcacuna?

³ Judiocuna Diospaj templota shayachi callarijpica, contracunaca Diospaj templota ama shayachishpa catichunmi desanimachisha nircacuna (Esdras 4:4). Qꞌuipacarin 522 huatapajca Artajerjesmi Persia llajtataca ña mandai callarirca. * Cai contracunaca judiocunata jarcangapajmi, “paicunaca mandashcacunataca mana cazunchu” nishpa mandaj Artajerjesman llullacunata  nircacuna (Salmo 94:20; Esdras 4:11-16). Artajerjesca chaita crishpami Diospaj templota ama shayachishpa catichun jarcarca (Esdras 4:17-23). Chaimi judiocunaca desanimarishca sintirishcangacuna (Esdras 4:24).

4. ¿Contracuna Diospaj templota shayachichun jarcajpica Jehová Diosca imatataj rurarca? (Isaías 55:11).

⁴ Jerusalenpaj cꞌuchupi causaj contracunapish, Persia llajtata huaquin mandajcunapish judiocuna Diospaj templota ama shayachishpa catichunmi jarcaicunata churarcacuna. Pero Jehová Diospaj munai pajtarichunca pi mana jarcai tucurcachu. Diosca israelitacunatami paipaj templota shayachichun animarca (Isaías 55:11-ta liyipai). Chaipajca Jehová Diosca profeta Zacariasmanmi ocho muscuicunata ricuchirca. Zacariasca mana manchashpami imata muscushcataca judiocunaman parlarca. Chaita yachashpami judiocunaca Diospaj templota shayachishpa catinata intindircacuna. Zacariasca shuj muscuipica shuj candelerota, ishqui olivos yuracunatami ricurca.

5. ¿Cai yachaipica imatataj ricushun?

⁵ Israelitacunaca Zacarías shuj muscuipi imata ricushcata yachashpaca animarishcami sintirishcangacuna. Ñucanchijpish Zacarías muscushcamanta yachashpaca animarishcami sintirishun. Cai yachaipica contracuna jarcajpipish, ñucanchij causaipi ima cambiocuna tiyajpipish, ima instruccioncunata mana alli intindishpapish imata ruranatami ricushun.

6. ¿Zacarías 4:1 al 3-manta yachashpaca judiocunaca ima shinataj animarircacuna? (Párrafo 1-pi tiyaj fotota ricui).

⁶ (Zacarías 4:1-3-ta liyipai). Judiocunaca Zacarías ricushca shuj candeleromanta, ishqui olivos yuracunamanta yachashpaca paicunaca contracuna catirashpa llaquichijpipish, chaicunahuan ima shina chꞌimbapuranatami yacharcacuna. Chai muscuipica Zacariasca ishqui olivos yuracunamanta aceite llujshishpa shuj lamparapi jundacushcatami ricurca. Chai lamparapi aceite mana illashcamantami mechacunaca japirishpa saquirijta ricurca. Zacariasca angeltaca: “¿Caicunaca imatataj nisha nin?” nishpami tapurca. Chaimi angelca: “Mandaj Diosca cashnami nin: Mana soldadocunallahuanchu, mana cꞌari cꞌari macanacushpallachu mishangui. Ashtahuanpish ñuca Espirituhuanmari mishangui” nircami (Zacarías 4:4, 6). Chaita yachashpaca judiocunaca ishqui yuramanta aceite llujshishpa mana tucurij laya Jehová Dios paipaj espíritu santohuan paicunata siempre ayudanatami yachana carcacuna. Israelitacunaca Jehová Diospaj espíritu santota chasquishpa Diospaj templota shayachi tucunapimi confiarcacuna. Persia llajtata mandajcuna Diospaj munai pajtarichun mana jarcai tucushcatapishmi intindircacuna. Chaimantami paicunaca contracuna jarcajpipish Jehová Diospi confiashpa, cutin Diospaj templota shayachishpa cushilla catircacuna.

7. ¿Judiocunataca mandaj Darioca ima shinataj ayudarca?

⁷ Huata 520-pica Persia llajtataca Dariomi mandai callarirca. Paica ña ishqui huatacunata mandacushpaca Jerusalenpi Diospaj templota shayachishpa catinalla cashcatami ricurca. Chaimi paica judiocunamanca Diospaj templota shayachishpa catichun permisota curca (Esdras 6:1-3). Ashtahuancarin mandaj Darioca Jerusalén cꞌuchullapi causajcuna judiocunata ama jarcaicunata churashpa catichun, ashtahuanpish cullquihuan o ima minishtirishca materialcunahuan ayudachunmi mandarca (Esdras 6:7-12). Chaimi judiocunaca chuscu  huata qꞌuipalla huata 515-pajca Diospaj templota ña shayachishpa tucuchircacuna (Esdras 6:15).

8. ¿Shujtajcuna jarcajpipish ima shinataj Jehová Diosta mana manchashpa sirvi tucunchij?

⁸ Huaquin llajtacunapica testigo de Jehovacunataca Jehová Diosta ama sirvichunmi carcelpi churancuna, mana cashpaca mandajcunapaj ñaupajmanmi apancuna. Chaimi cai huauqui panicunaca mandajcunamanpish, shujtajcunamanpish predicai tucushcacuna (Mateo 10:17, 18). Shinapish maipica shuj mushuj gobierno o shuj juezca testigo de Jehovacuna chai llajtacunapi huillashpa catichunmi ayudangacuna. Cutin shujtaj huauqui panicunaca gobiernocuna mana jarcajpipish paicunapaj huasi ucupimi jarcaicunata charincuna (Mateo 10:32-36). Pero familiacuna chashna jarcajpipish paicunaca Jehová Diostami sirvishpa catincuna. Chashna ahuantajta ricushpami huaquin familiacunaca qꞌuipaca Jehová Diosta rijsishpa, paicunapish Yaya Diosta cushilla sirvi callarishcacuna. Chaimanta gobiernocuna, familiacuna jarcajpipish mana manchashpa Jehová Diosta sirvishpa catishunchij. Diosmi ñucanchijtaca paipaj espíritu santohuan ayudanga.

9. ¿Cunanlla templota shayachicujta ricushpaca imamantataj huaquin judiocunaca dimastij llaquilla sintirircacuna?

⁹ Judiocuna mushuj templota shayachingapaj callari rumicunata churajpica mayorlla judiocunaca achcatami huacarcacuna (Esdras 3:12). Paicunaca cunanlla shayachicun templo mana Salomón shayachishca templo laya cajta ricushpami dimastij llaquilla sintirishcangacuna (Ageo 2:2, 3). Pero Zacariasca pai charishca muscuimanta intindichishpami judiocunataca animarca.

10. ¿Zacarías 4:8 al 10-pi tiyaj shimicunata uyashpaca judiocunaca ima shinataj sintirircacuna?

¹⁰ (Zacarías 4:8-10-ta liyipai). Zacariashuan parlaj angelca muscuipica judiocuna cushilla cajtami ricurca. Shinallataj mandaj Zorobabelpish maquipi plomadata charicushcatami ricurca. ¿Zorobabel maquipi charicushca plomadaca imatataj ricuchisha nirca? Shuj plomadaca patacunata alli, rectota shayachingapajmi can. Shinaca cai plomadaca Diospaj templota cutin alli shayachinatami ricuchirca. Cai templo Salomonpaj templo shina mana cajpipish Jehová Diosca judiocuna chai templota alli shayachijpica cushillami  sintirigrirca. Chaimantami judiocunaca templota shayachicun horasmanta cushilla sintirina carcacuna. Jehová Diosca chai mushuj templopi pai munashca shina adorachunmi munarca. Chaita yachashpaca judiocunaca Dios munashca shina adorashpa, Diospaj ñaupajpi alli ricurishpami cushilla sintirircacuna.

11. ¿Huaquin huauqui panicunaca imamantataj llaquilla sintirincuna?

¹¹ Tiempo completopi sirvij huaquin huauqui panicunaca shujtaj asignaciontami chasquishcacuna. Cutin shujtajcunaca ña mayoryashcamantami paicuna munashca asignacionta saquishcacuna. Chashna cambiocuna tiyajpica maipica llaquillami sintirinchij. Tal vez imamanta chashna cambiocuna tiyashcataca manachari tucuita intindinchij. Mana cashpaca “ña ñaupa layaca mana sirvi tucushachu” nishpachari llaquilla sintirinchij (Proverbios 24:10). Pero Zacariaspaj muscuimanta yachashpaca Jehová Diosta sirvishpa cati tucushcatami intindinchij.

12. ¿Zacarías muscushcamanta yachashpaca ima cambiocuna tiyajpipish imamantataj mana desanimarina canchij?

¹² Ñaupa punlla laya Jehová Diosta mana sirvi tucushpapish paita sirvishpa cati tucushcatami yuyarina canchij. Jehová Diosca paipaj munaita pajtachingapajca tucui ñucanchijcunatami paita ayudachun saquishca (1 Corintios 3:9). Chaimanta ñucanchij ima responsabilidadta ña mana charijpipish Jehová Diosca ñucanchijtaca cꞌuyashpami catinga. Caita yachashpaca imamanta ima cambiocuna tiyashcata mana yuyashpalla saquirinachu canchij. “Ñaupa punllacunapimi Jehová Diostaca ashtahuan alli sirvi tucurcani” nishpapish mana yuyashpalla saquirinachu canchij (Eclesiastés 7:10). Ashtahuancarin cunanpish Jehová Diosta tucui pudishcahuan sirvi tucushcapimi yuyarina canchij. Zacariaspaj muscuimanta yachashpaca ima cambiocuna tiyajpipish Jehová Diosta cushilla sirvi tucushcatami yachashcanchij.

13. ¿Huaquin judiocunaca imamantataj mandaj Zorobabelpish, sacerdote Josuepish mana alli decidishcata yuyarcacuna?

¹³ Contracuna jarcacujpipish Jerusalenta mandaj Zorobabelpish, sacerdote Josuepish Diospaj templotami cutin shayachishpa catircacuna (Esdras 5:1, 2). Chaita yachashpaca huaquin judiocunaca: “Mana allimi decidicuncuna, contracunaca Diospaj huasita  shayachichunca jarcangacunami” nishpami yuyashcangacuna. Chaimi mandaj Zorobabelpish, sacerdote Josuepish Jehová Diospi confiana carcacuna. Chashna confiajpica Jehová Diosca paicunatami ayudarca. Ima shinalla Jehová Dios ayudashcata ricushun.

14. ¿Zacarías 4:12, 14-pi nishca shimicunata uyashpaca mandaj Zorobabel, sacerdote Josueca imatataj intindircacuna?

¹⁴ (Zacarías 4:12, 14-ta liyipai). Zacarías muscushca ishqui olivo yuracunaca Dios churashca ishqui runacunatami ricuchirca. Paicunaca sacerdote Josué, mandaj Zorobabelmi carca. Shinallataj Zacariasca cai ishqui runacuna Diospaj ñaupajpi shayacushcatami huillarca. Chashna huillashpaca Jehová Dios paicunapi confiashcatami ricuchisha nirca. Jehová Diosca Josuetapish, Zorobabeltapish paipaj pueblota pushachunmi utilizacurca. Chaita yachashpaca judiocunaca cai ishqui runacunapimi confiana carcacuna.

15. ¿Jehová Dios ñucanchijta ñaupajman pushachunca imatataj rurana canchij?

¹⁵ Cunan punllacunapica Jehová Diosca paipaj Shimihuanmi paipaj pueblotaca yachachishpa ñaupajman pushacun. Chaimantami Bibliata liyingapaj, alli intindingapaj tiempota surcuna canchij. Cashna nishpa tapurishunchij: “¿Bibliata, publicacioncunata liyicushpaca imata liyishcapi yuyangapajchu tiempota surcuni? ¿Imata mana alli intindishpapish alli investigangapajchu esforzarini? ¿O jahua jahuallachu liyishpa saquirini?” (2 Pedro 3:16). Bibliata estudiangapaj tiempota surcushpaca Dios yachachishcata, ima mingashcatapishmi alli pajtachishun (1 Timoteo 4:15, 16).

16. ¿“Alli cazuj alli yuyaiyuj” sirvij huauquicuna instruccionta cujpi mana alli intindishpapish imatataj rurana canchij?

¹⁶ Shinallataj cunan punllacunapish Jehová Diosca “alli cazuj alli yuyaiyuj” sirvij huauquicunahuanmi paipaj pueblota ñaupajman pushacun (Mateo 24:45, QC, 1989). Maipica cai huauquicuna ima instruccionta cujpica manachari tucuita alli intindishun. Por ejemplo, jatun terremotocuna, acapanacuna o shujtaj llaquicuna manaraj tiyajpimi imata ruranata huillancuna. Pero ñucanchijca: “Ñucanchij causan lugarpica chaica mana pasangachu” nishpachari yuyashun. Mana cashpaca shuj pandemia tiyajpi ima instruccioncunata cujpica chaita cazunaca sinchi layachari ricuringa. Pero ¿cai pushaj huauquicuna cushca instruccionta cazungapajca imatataj rurana canchij? Ñaupa punllacunapi judiocuna Josueta, Zorobabelta  cazushcamanta ima shina beneficiarishcapimi yuyai tucunchij. Shujtajcunapish Diospaj instruccioncunata cazushcamanta ima shina quishpiri tucushcapimi yuyai tucunchij. Chashnami Diosta cazuna siempre alli cashcata cuentata cushun (Jueces 7:7; 8:10).

17. ¿Zacarías ima muscushcata yachashpaca judiocunaca imatataj rurarcacuna?

¹⁷ Zacarías imata muscushcata yachashpaca judiocunaca Diospaj templota shayachingapaj, Jehová Diosta adorangapajmi fuerzasta japircacuna. Shinallataj Jehová Diospish paicunata cꞌuyaihuan ñaupajman pushacushcatami intindircacuna. Jehová Diospaj espíritu santota chasquishpacarin Dios mingashcatami cushilla pajtachi tucurcacuna (Esdras 6:16).

18. ¿Zacarías ricushca muscuimantaca imatataj yachashcanchij?

¹⁸ ¿Zacarías ricushca candeleromanta, ishqui olivos yuramantaca imatataj yachashcanchij? Contracuna jarcajpipish Jehová Diosca fuerzastami cunga. Ima cambiocuna tiyajpipish Jehová Diosta tucui pudishcahuan sirvishpaca cushillami sintirishun. Ima instruccioncunata mana alli intindishpapish Jehová Diospi confiashpa catishunchij. Chaimanta ñucanchij causaipi ima llaquicuna tiyajpica Jehová Dios paipaj pueblota ima shina ayudashcapimi confiana canchij. Shinallataj Jehová Diostapish tucui shunguhuanmi sirvishpa catina canchij (Mateo 22:37). Chaita rurajpica Jehová Diosca paita cushilla sirvishpa catichunmi ayudanga (Colosenses 1:10, 11).