1. ¿Bibliata manaraj estudiashpaca ima shinataj causaj carcanchij?

 ¿TESTIGO de Jehovacunahuan Bibliamanta manaraj estudiashpaca cambaj causaica ima shinataj carca? Huaquincunaca cai mundopi tiyaj mana allicunata rurashpa mana alli yuyaicunatami charij carcanchij. Chaimantami ima esperanzata mana charircanchij, Dios illajpish causarcanchij (Efesios 2:12). Pero Bibliata estudiashcamantami chashna mana alli causanataca saqui tucushcanchij.

2. ¿Bibliata estudiai callarishpaca canca imatataj cuentata curcangui?

² Bibliamanta estudiai callarishpaca Jehová Dios canta achcata cꞌuyashcatami yachashcangui. Shinallataj Yayitu Diospaj ñaupajpi alli ricuringapaj, paipaj pueblopi cangapajca cambaj causaipi, yuyaipi cambiocunata rurana cashcatami cuentata cushcangui. Yayitu Diosta tucuipi cazuna cashcatapishmi intindishcangui (Efesios 5:3-5).

3. a) Colosenses 3:9, 10-pi nishca shinaca ¿Jehová Diosca imata rurachuntaj munan? b) ¿Cai yachaipica imatataj ricushun?

³ Jehová Diosca tucuita ruraj cashcamanta, ñucanchij Yaya cashcamantami paica paipaj pueblopi cajcunaman ima shina causana cashcata yachachin. Jehová Diosca bautizarisha nijcunataca: ‘Cancunapaj mauca causaita saquishpa rurashcacunandij anchuchichij’ ninmi * (Colosenses 3:9, 10-ta liyipai). Cai yachaipica cai catij tapuicunatami yachashun: ¿mauca causaita pajtachijcunaca ima shinataj can?, ¿Jehová Diosca imamantataj chai mauca causaita saquichun munan?, ¿chaita  saquingapajca imatataj rurana canchij? Mauca causaipi ama urmangapaj imata rurana cashcatami yachashun.

4. ¿“Mauca causaita” charijcunaca ima shinataj can?

⁴ Mauca causaita pajtachijcunaca rato pꞌiñarijcuna, paicunallapi yuyajcuna, mana agradicijcuna, jatun tucushcacunami can. Shinallataj paicunaca huainayanahuan, macanacuihuan chagrurij ricunacunatachari ricunata munancuna. Maijancunaca chashna rurashcamantami mana alli sintirincuna o cambiashapish nincuna. Pero paicunapajca chaita saquinaca sinchimi can (Gálatas 5:19-21; 2 Timoteo 3:2-5).

5. ¿Mauca causaita saquishpaca imatataj mana rurashun? (Hechos 3:19).

⁵ Tucuicuna juchayuj cashcamantami ñucanchij yuyaimanta, shungumantaca tucui mana alli yuyaicunataca mana anchuchi tucunchij. Chaimantami maipica pandarishun (Jeremías 17:9; Santiago 3:2). Pero chashna juchayujcuna cashpapish mauca causaita saquishpaca mana allicunata rurana yuyaillaca mana causashunchu (Isaías 55:7; Hechos 3:19-ta liyipai).

6. ¿Jehová Diosca imamantataj mauca causaita saquichun munan?

⁶ Jehová Diosca ñucanchijta cꞌuyashcamanta, alli causachun munashcamantami mana alli yuyaicunata, mana alli costumbrecunata saquichun munan (Isaías 48:17, 18). Chai mana allicunata mana saquishpaca ñucanchijllatajmi llaquipi urmashun. Shujtajcunatapishmi llaquichishun. Chaita ricushpaca Jehová Diosca llaquillami sintiringa.

7. Romanos 12:1, 2-pi nishca shinaca ¿imatataj decidina canchij?

⁷ Mana allicunata saquingapaj esforzarijpica tal vez familiacuna, amigocunachari burlaringacuna (1 Pedro 4:3, 4). Tal vez paicunaca: “Ñucanchij munashca shinami causana canchij. Pi imata mana ninachu can” nishpami yuyancuna. Pero Diosta mana cazujcunaca cai mundopaj esclavocuna shinami causancuna (Romanos 12:1, 2-ta liyipai). Cutin ñucanchijca mana cai mundopaj esclavos casha ninchijchu. Chaimantami mauca causaita saquinata decidina canchij. Chaimi Jehová Diosca  paita alli sirvijcuna cachun ayudanga (Isaías 64:8).

8. ¿Mauca causaita saquichunca Jehová Diosca ima shinataj ayudan?

⁸ Mana alli munaicunata, ruraicunata saquingapaj tiempota, fuerzasta minishtishcataca Jehová Diosca allimi yachan (Salmo 103:13, 14). Chaimantami Jehová Diosca ñucanchij cambiachunca fuerzasta, yachaita cun. Shinallataj paipaj Shimihuan, paipaj espíritu santohuan, paipaj pueblohuanmi ayudan. Canca Jehová Dios canta ima shina ayudajtaca de seguro allimi yachangui. Cunanca mauca causaita saquishpa bautizaringapaj imacunallata rurana cashcatami yachangui.

9. ¿Mauca causaita saquingapajca imamantataj Bibliata estudiana cangui?

⁹ Imapi mejorana cashcata yachangapaj Bibliata estudiai. Bibliata estudiashpaca shuj espejopi ricuricuj shinami cambaj causaipi, cambaj yuyaipi imapi cambiana cashcata cuentata cungui (Santiago 1:22-25). Shinallataj canta yachachijta o experienciata charij huauqui panicunatami ayudachun mañai tucungui. Paicunaca Bibliahuanmi can imata alli rurajta o imata mana alli rurajtaca ricuchingacuna. Mana allicunata saquichunpish Bibliamanta huaquin informacioncunata tarichunmi ayudangacuna. Ashtahuancarin Jehová Diosca cambaj shunguta, cambaj yuyaita alli rijsishcamantami canta ayudai tucun (Proverbios 14:10; 15:11). Chaimanta Jehová Diosta mañanata, Bibliata cada punlla estudianata amataj saqui.

10. ¿Canca Eliemantaca imatataj yachai tucungui?

¹⁰ Diospaj mandashcacunata cazushpa alli causanata cri. Jehová Diospaj mandashcacunaca ñucanchij allipajllatajmi can. Paipaj mandashcata cazujcunaca cushillami causancuna (Salmo 19:7-11). Cutin paita mana cazujcunaca achca llaquicunatami charincuna. Elie shuti runa Diosta mana cazushcamanta ima tucushcata ricushun. Eliepaj yaya mama Jehová Diosta cꞌuyajpipish paica jovenmantami mana alli amigocunata chari callarirca. Chaimantami drogarishpa, huainayashpa, shuhuashpa causarca. Chashna causashcamantami dimastij millai runa tucurca. Paica: “Ñuca yaya mamaca allita rurachunmi yachachirca. Pero ñucaca mana allitami rurarcani” ninmi. Shinapish Elieca uchilla cajpi yaya mama yachachishcataca mana cungarircachu. Chaimi paica tiempohuanca Bibliata estudiashpa, mana allita saquishpa huata 2000-pica bautizarirca. ¿Mauca causaita saquishcamantaca paica ima shinataj beneficiarishca? Elieca: “Diospaj mandashcacunata cazushcamantami cunanca cushilla, tranquilo sintirini” ninmi. * Eliepaj causaimanta yachashpaca Diospaj mandashcacunata mana cazushpa llaquicunata chari tucushcatami intindinchij. Pero Jehová Diosca ñucanchijta ayudangapajca listomi can.

11. ¿Jehová Diosca imacunatataj pꞌiñan?

¹¹ Jehová Dios mana ricunayachishcata pꞌiñanata yachai (Salmo 97:10). Bibliapica Diosca jatun tucushcacunata, llullacunata, llaquichijcunata, umajcunataca pꞌiñanmi ninmi (Proverbios 6:16, 17; Salmo 5:6). Noé causashca punllacunapica Jehová Diosca gentecuna mana allicunata rurashcamantami paicunataca tucuchirca (Génesis 6:13). Profeta Malaquiasman quillcachishca shinaca Jehová Diosca cusa huarmi huainayashpa traicionachunpish mana munanchu. Chaita rurajpica  Diosca paita adorachunca mana chasquinchu. Ashtahuancarin paica cada unotami juzganga (Malaquías 2:13-16; Hebreos 13:4).

12. ¿‘Millaita pꞌiñashcataca’ ima shinataj ricuchinchij?

¹² Jehová Diosca: “Millaitaca pꞌiñaichij” ninmi (Romanos 12:9). Caipi yuyashun. Ismushca micunata micuchun nijpica uyashpallami shungu tigranayachishpa mana micusha ninchijman. Chashnallatajmi Jehová Dios pꞌiñashcacunataca mana ricunayachina canchij.

13. ¿Imamantataj mana alli yuyaicunamanta cuidarina canchij?

¹³ Mana alli yuyaicunamanta jarcari. Imata cutin cutin yuyashpaca chaitami rurashun. Chaimantami Jesusca juchapi ama urmangapajca mana alli yuyaicunamanta jarcarichun yachachirca (Mateo 5:21, 22, 28, 29, NWT). Tucuicunami Jehová Diostaca cushichisha ninchij. Chaipajca ñucanchij yuyaicunaman mana alli yuyaicuna shamujpica chaimanta ratomi caruyana canchij.

14. ¿Mana alli rimaicunamanta jarcaringapajca ima tapuicunapitaj yuyana canchij?

¹⁴ Mana alli rimaicunamanta jarcari. Jesusca: ‘Ima rimashca shimiman llujshijca, shungumantami llujshin’ nircami (Mateo 15:18). Jesús nishca shinaca ñucanchij rimashcacunahuanmi ima shina cashcata ricuchinchij. Chaimanta cashna nishpa tapurishunchij: “¿Siemprechu tucuipi verdadta nini? ¿Cazado cashpaca shujtaj cꞌarihuan o huarmihuan mana alli munaicunahuan ama parlangapajchu cuidarini? ¿Huainayana parlocunamantapishchu jarcarini? ¿Shujtajcuna mana alli tratajpica mana pꞌiñarishpachu cutichini?”. Caipi yuyashun. Mauca causaita saquinaca mauca ropata saquina layami can. Pero mana allicunata rimanata mana saquishpaca chai mauca ropata yangamanta siracuj shinami canman. Cutin mana alli rimaicunata saquishpa, llullacunata saquishpaca mauca causaitami saquishun.

15. ¿Mauca causaita shuj caspipi huarcucuj shina saquingapajca imatataj rurana canchij?

¹⁵ Mauca causaita saquingapaj esforzari. Jesusca Jehová Diosta cushichingapajmi paipaj causaita saquishpa paita caspipi huañuchichun saquirca. Chashnallatajmi ñucanchijpish Jehová Diosta cushichingapajca mana alli ruraicunata, mana alli costumbrecunataca saquina canchij. Chaicunata saquishpaca mauca causaita shuj caspipi huarcushpa  huañuchicuj shinami canman (Romanos 6:6, NWT). Chashnami alli concienciata, huiñai causaitapish charishun (Juan 17:3; 1 Pedro 3:21). Yuyashun, Jehová Diosca ñucanchij alli sintirichunllaca paipaj mandashcacunataca mana cambiangachu. Ashtahuanpish ñucanchijmi paita cazungapajca esforzarina canchij (Isaías 1:16-18; 55:9).

16. ¿Imamantataj mana alli munaicunamanta jarcarishpa catina cangui?

¹⁶ Mana alli munaicunamanta jarcarishpa cati. Bautizarishca huashapish mana alli yuyaicunamanta jarcarishpami catina canchij. Caipi yuyashun, Mauricioca jovenmantami cꞌaripurallataj siririj carca. Pero tiempo qꞌuipaca testigo de Jehovacunata rijsishpami Bibliamanta estudiai callarirca. Paipaj causaipi huaquin cambiocunata rurashpami 2002-pica bautizarirca. Mauricioca cashnami nin: “Achca huatacunata Jehová Diosta sirvicujpipish maipica mana alli munaicunami shamun. Pero desanimarinapaj randica chai munaicunata ama charingapajmi esforzarini. Chaita rurajpica de seguro Jehová Diosca cushillami sintiringa” ninmi. *

17. ¿Nabihapaj experienciamantaca imatataj yachangui?

¹⁷ Jehová Diosta paipaj espíritu santohuan ayudachun mañai (Gálatas 5:22; Filipenses 4:6). Mauca causaita saquingapajca achcatami esforzarina canchij. Nabiha shuti panipi yuyashun. Nabihataca paipaj yayaca pai seis huatacunata charijpimi shitashpa rirca. Paica: “Chaimantami shungu pꞌaquirishca sintirircani” ninmi. Ña huiñarishpaca paica imamantapish rato coleraj, drogatapish cꞌatujmi tucurca. Chaimantami paitaca huaquin huatacunata carcelpi churarca. Testigo de Jehovacunaca carcelta visitacushcamantami paimanca Bibliamanta yachachi callarirca. Paica Bibliamanta yachashpaca huaquin cambiocunatami rurarca. Nabihaca: “Huaquin viciocunataca ratomi saquircani. Cutin tabacota fumanataca shuj huata yallitami saquircani. Chaitaca Jehová Diosta cutin cutin mañashpa pai ayudajpimi saqui tucurcani. Shujtajcunapish ñucata layallataj Jehová Dios ayudajpi cambianatami crini” ninmi. *

18. 1 Corintios 6:9 al 11-pi nishca shinaca ¿huaquincunaca Diosta sirvingapajca imatataj rurashcacuna?

¹⁸ Apostolcuna causashca punllacunapica huaquincunaca Diosta manaraj rijsishpaca huainayashpa, shuhuashpa, cꞌaripurallataj siririshpami causajcuna carca. Pero paicuna Jehová Diosta rijsijpica Jehová Diosllatajmi paicunata cambiachun ayudarca. Chaimi Jehová Diosca paicunataca Jesushuan jahua pachapi mandachunpish agllarca (1 Corintios 6:9-11-ta liyipai). Cunan punllapish achca gentecunaca Bibliamanta yachashpami huaquin costumbrecunata, mana alli ruraicunata saquishcacuna. * Paicuna shinami canpish cambaj causaipi cambiocunata rurashpa, Diosman mingarishpa bautizari tucungui.

19. ¿Catij yachaipica imatataj yachashun?

¹⁹ Bautizarisha nijcunaca mauca causaita saquingapaj esforzarishpapish, mushuj causaita charingapajmi esforzarina can. Catij yachaipimi mushuj causaita charingapaj imata ruranata, shujtajcunapish ima shina ayudai tucushcata yachashun.