Maijanpish cai versocunata liyishpaca: “¿Davidca imamantashi chaitaca rurarca?” nishpachari tapurinman. Pero Bibliapica Mefi-boset shuticunaca ishqui runacunami tiyarca. Paicunahuan ima tucushcata yachashpaca shuj valishca yuyaitami ricushun.

Rey Saulca siete churicunata, ishqui ushushicunatami charirca. Punta churica Jonatanmi carca. Qꞌuipaca rey Saulca Rizpa shuti huarmipimi Mefi-boset shuti churita charirca. Cutin Saulpaj churi Jonatanpish Mefi-boset shuti churitami charirca. Chaimi Saulpaj churipish, paipaj nietopish Mefi-boset shuticuna carca.

Shuj cutinca rey Saulca israelitacunapaj chaupipi causaj gabaonitacunatami pꞌiñai callarishpa tucuchisha nirca. Huaquin gabaonitacunatacarin huañuchircami. Pero chaita ruranaca mana allichu carca. Josué causacushca punllacunapica israelitacunaca gabaonitacunata ama llaquichingapajmi ari ninacushcacuna carca (Josué 9:3-27).

Chashna ari ninacushcamantami Saulca gabaonitacunataca mana llaquichina carca. Pero Saulpish, paipaj familiacunapish gabaonitacunata huañuchishcamantami culpables tucurca (2 Samuel 21:1). Ña David rey tucujpica mana tucui huañuj gabaonitacunaca ima tucushcatami tucuita Davidman parlarca. Davidca Jehová Dios, Israel allpata bendiciachunmi gabaonitacunataca: “¿Imatataj cancunapajca rurashari?” nishpa tapurca. Pero gabaonitacunaca cullquitaca mana mañarcacunachu. Ashtahuanpish Saulpaj siete churicunatami huañuchingapaj paicunaman cuchun mañarca (Números 35:30, 31). Davidca paicuna mañashcatami curca (2 Samuel 21:2-6).

Chai tiempopajca Saulpish, Jonatanpish ñami huañushcacuna carca. Pero Jonatanpaj churi Mefi-bosetca causacurcarajmi. Mefi-bosetca uchillapimi shuj accidentepi chaqui lisiarirca. Chaimantami paica paipaj abuelo Saúl gabaonitacunata llaquichicujpica mana chaipi participai tucushcanga. Ashtahuancarin Davidpish Jonatanhuanmi paipaj familiacunata ama llaquichingapaj ari ninacushca carcacuna (1 Samuel 18:1; 20:42). Chaimi Davidca “Jonatanpaj churi Saulpaj nieto Mefi-bosettaca perdonashpa gabaonitacunamanca mana curca” (2 Samuel 21:7).

Shinapish Davidca gabaonitacunamanca Saulpaj ishqui churicunata, pichca nietocunata huañuchichunmi curca. Paicunapuramantaca Saulpaj churi Mefi-boset shutipishmi carca (2 Samuel 21:8, 9). Chaita rurajpica Jehová Diosca Israel llajtapi ña ashtahuan mana yaricai tiyachunmi ayudarca.

Saulpaj ishqui churicuna, paipaj pichca nietocuna mana culpables cashca cajpica, Jehová Diosca paicunata huañuchichunca mana saquinmanchu carca. Moisesman cushca leypica: “Yaya mamapaj juchamantapish huahuacunaca mana huañungachu. Maijanpish juchallijca chai juchamantaca paimi huañunga” nircami (Deuteronomio 24:16). Caita yachashpaca Saulpaj ishqui churicuna, paipaj pichca nietocuna gabaonitacunata huañuchingapaj apoyashcatami cuentata cunchij. Chaimantami Davidca paicunata huañuchichun saquirca.

¿Caimantaca imatataj yachai tucunchij? Mana allita rurashpaca, “shujtajcuna mandashcallamantami chaita ruracuni” nishpaca mana yuyanachu canchij. Ashtahuanpish cai valishca consejopimi yuyana canchij. Bibliapica: “Cambaj chaquihuan maipi sarucushcata alli ricungui. Tucui imata rurashcapish, alli cachun ricungui” ninmi (Proverbios 4:24-27; Efesios 5:15).