1, 2. a) ¿Mateo 24:12-pi nishca shimicunaca puntapica ima shinataj pajtarirca? b) ¿Jesusta punta catijcunapaj cꞌuyai mana chiriyashcataca ima shinataj yachanchij? (Jahuapi tiyaj dibujota ricui).

JESÚS cai Allpapi cashpaca ‘cai shina causai tucurinapaj’ imalla tucunatami huillarca. Por ejemplo, “achcacunapaj cꞌuyaimi chiriyanga” nircami (Mateo 24:3, 12) (“Alli entendishunchij” nishca cuadrota ricui). Cai shimicunaca primer siglopi causaj judiocunapimi puntaca pajtarirca. Paicunaca Diospaj pueblomi canchij nishpapish paicunapaj cꞌuyaica chiriyashcami carca.

² Pero Jesusta achca catijcunaca mana chai judiocuna shinachu carca. Paicunaca ‘Jesusmanta punllanta huillanataca’ manataj saquircacunachu. Diostapish, huauqui panicunatapish, Diosta mana rijsij gentecunatapish cꞌuyashcatami ricuchircacuna. Jesusta catijcunaca Diosta ashtahuan cꞌuyashpami catircacuna (Hechos 2:44-47; 5:42). Pero huaquincunaca Diosta cꞌuyanata saquircacunami. Imamanta chashna tucushcata ricushun.

3. ¿Huaquin crijcunapaj cꞌuyaica imamantataj chiriyarca?

 ³ Efesopi causaj crijcunataca Jesusca, ‘cancunapaj punta cꞌuyaitami saquishcanguichij’ nircami (Apocalipsis 2:4). ¿Imamantataj Jesusca chashna nirca? Efesopi causaj gentecunaca paicunapaj munaita rurashpallami causacurcacuna. Chaimantami Efesopi causaj crijcunaca paicuna shinallataj causai callarishcacuna canga (Efesios 2:2, 3). Éfeso llajtapica achcacunaca charijcunami carca. Paicunapaj charishcacunahuan cushicushpallami causajcuna carca. Shujtajcunacarin mapata rurashpallami causajcuna carca. Dios mandashcacunatapish mana respetajcunachu carca. Diostapish, shujtajcunatapish cꞌuyanapaj randica cushicunallapimi yuyarcacuna.

4. a) ¿Imamantataj achca gentecunapaj cꞌuyaica chiriyashca? b) ¿Cai yachaipica imatataj yachashun?

⁴ Mateo 24:12-pi Jesús nishca shimicunaca cunan tiempopipish pajtaricunmi. Achca gentecunaca Diosta cꞌuyanatami saquishcacuna. Ima problemacuna tiyajpipish Diospaj ayudata mashcanapaj randica gentecunapaj organizacioncunallapimi ayudata mashcancuna. Chaimantami achcacunaca ña mana cꞌuyaita ricuchincuna. Efesopi causaj crijcuna shinami Diosta servijcunapurapipish cꞌuyaica chiriyai tucun. Chaimanta Yaya Diosta, huauqui panicunatapish cꞌuyashpa catingapaj imata ruranata ricushun. Shinallataj Bibliapi yachachishcacunata ñucanchij shungupi huaquichishpa catingapaj imata ruranatami yachashun.

5. ¿Imamantataj Diosta cꞌuyana canchij?

⁵ ¿Pitataj ashtahuan cꞌuyana canchij? Jesusca: “‘Cambaj Mandaj Taita Diosta tucui shunguhuan, tucui almahuan, tucui yuyaihuan cꞌuyangui’. Cai mandashcami tucuimanta ashtahuan yalli allica” nircami (Mateo 22:37, 38). Diosta cꞌuyashcamantami paipaj mandashcacunata cazunchij. Llaquicuna tiyajpipish ahuantanchij. Millai ruraicunatapish pꞌiñanchij (Salmo 97:10-ta leyipai). Pero Diabloca Diosta ama cꞌuyashpa catichunmi tucuita ruran.

6. ¿Diosta cꞌuyanata saquijcunaca ima shinataj causancuna?

⁶ Diosta mana rijsij gentecunaca pandatami yuyancuna. Paicunaca Diosta cꞌuyanapaj randica ‘quiquinlla alli canata munajcunami’ can (2 Timoteo 3:2). Shinallataj ‘aicha munaicunata rurashpalla, ñahui ricushca munaicunata rurashpallami causancuna. Achcata charishcamanta jatun tucujcunami’ can (1 Juan 2:16). Apóstol Pabloca ñucanchij munaicunallata rurashpa causajpi ima tucuna cashcatami huillarca. Paica: “Aichapaj munaita yuyanaca huañuimanmi apan” nircami. ¿Imamantataj huañuiman apan nirca? Paicunapaj munaita rurashpalla causajcunaca Diospaj enemigocunami tucun (Romanos 8:6, 7). Cullquita charinallapi yuyajcuna, mapata rurashpalla causajcunaca, achca llaquicunatami apancuna (1 Corintios 6:18; 1 Timoteo 6:9, 10).

7. ¿Ima panda yuyaicunamantataj caruyana canchij?

⁷ Achcacunaca Dios tiyashcata mana crincunachu. Shujtajcunaca Dios tiyashcata o mana tiyashcata mana yachai tucunchijchu nincunami. Cutin shujtajcunaca tucui ima tiyashcapish evolucionmantami shamun nincunami. Cai gentecunaca Diospi ama crichun, paita ama cꞌuyashpa catichunmi munancuna. Chaimantami, ‘muspacunalla o mana estudiashca gentecunallami Diospi crincuna’ nishpa pandachisha nin.  Shujtaj gentecunacarin tucuita ruraj Diosta respetanapaj randica cientificocunatami ashtahuan respetancuna (Romanos 1:25). Ñucanchijpish paicuna shina yuyai callarishpaca Diosta cꞌuyanatami saquishun (Hebreos 3:12).

8. a) ¿Diosta servijcunaca imamantataj huaquinpica desanimarinchij? b) ¿Salmo 136-pica imatataj yachachin?

⁸ Cai mundota Diablo mandacushcamantami maijan ratoca triste tristella purinchij (1 Juan 5:19). Pero yallitaj llaquilla purishpaca Diosmanta caruyai tucunchijmi. Maipica cullquita mana charishcamanta, ungushca cashcamanta o yuyaj cashcamantachari problemacunata charinchij. Mana cashpaca imatapish alli rurasha nishpa mana rurai pudishcamantachari llaquirinchij. O imapish ñucanchij munashca shina mana pajtarishcamantachari llaquirinchij. Ima problemacunata charijpipish Jehová Diosca ñucanchijta manataj cungarinchu. Salmo 136:23-pica: ‘Ñucanchij llaquihuan cajpica Diosca ñucanchijta yuyarircami. Pai llaquij canaca huiñaipajmari’ ninmi. Diosca ñucanchij mañashcacunataca uyanmi. Chaimanta ima llaquicunata charishpapish Diosta rogarishpami mañana canchij. Paica ñucanchij mañashcacunata cutichingami (Salmo 116:1; 136:24-26).

9. ¿Diosta cꞌuyashpa catingapajca apóstol Pabloca imatataj rurarca?

⁹ Apóstol Pabloca Jehová Dios paita ima shina ayudajta yuyarishpami mana manchaj carca. Chaimantami: “Jatun Diosca ñucata ayudajmi. Pipish ñucata imata ruranataca, mana manchanichu” nircami (Hebreos 13:6). Pabloca Diospi tucui shunguta churashcamantami sinchi llaquicunata charishpapish misharca. Prezu cashpapish huauquicunata panicunata ayudangapajmi cushichij cartacunata escribirca (Efesios 4:1; Filipenses 1:7; Filemón 1). Llaquicunahuan cashpapish Diosta tucui shunguhuan cꞌuyashpami catirca. Shinallataj Diosca llaquij Yaya, tucui llaquicunapipish cushichij Dios cashcatami  crirca (2 Corintios 1:3, 4). ¿Apóstol Pablo laya cangapajca imatataj rurai tucunchij?

10. ¿Diosta tucui shunguhuan cꞌuyashpa catingapajca imatataj rurana canchij?

¹⁰ Pabloca Diosta cꞌuyashpa catingapaj imata ruranatami nirca. Paica: ‘Diosta mañanataca ama shaicuichijchu’. Qꞌuipaca: “Diostaca mañaracuichijlla” nircami (1 Tesalonicenses 5:17; Romanos 12:12). Diosta mañashpaca paihuanmi parlanacunchij (Salmo 86:3). Shinallataj ñucanchij imata yuyashcata, shungupi ima shina sintirishcatami paiman huillanchij. Chashnami Diospajman ashtahuan cꞌuchuyanchij (Salmo 65:2). ‘Mandaj Diosca, tucui paita mañajcunapaj cꞌuchullapimi can’. Chaimanta ñucanchij mañashcacunata cutichijta ricushpaca Diosta ashtahuanmi cꞌuyashun (Salmo 145:18). Jehová ñucanchijta cꞌuyashcata, pai ayudaj cashcata crishpaca cunan punllapi tiyaj llaquicunatapish, shamuj punllapi tiyaj llaquicunatapish mishai pudishunmi.

11, 12. ¿Bibliapi yachachishcacunata shungupi huaquichingapajca imatataj rurana canchij?

¹¹ Dios nishcacunaca Bibliapimi tiyacun. Chai nishcacunaca ñucanchijpajca achca valishcami can. Jesusca: “Cambaj Shimica manataj llullajchu” nircami (Juan 17:17). Bibliata yachashpaca chaipi nishcacuna achca valishca cashcatami ricushun (Colosenses 1:10, NM). Pero mana chaillatachu rurana canchij. Salmo 119-ta quillcaj runaca imata ashtahuan rurana cashcatami huillarca (Salmo 119:97-100-ta leyipai). Bibliata leyishca huashaca imata yachashcata yuyarishpami cainana canchij. Bibliapi yachachishcacunata ima shina pajtachi tucushcata yuyarishpaca ñucanchijpajca achca valishcami canga.

¹² Salmo 119-ta quillcaj runaca: “¡Quiquinpaj shimicunaca ñuca shimipica tucuimanta yalli mishquimari! ¡Ñuca shimipica sacha chuspipaj mishquitapish mai yallimari!” nircami (Salmo 119:103). Dios cushca publicacioncunaca shuj mishqui micuna shinami can. Shuj mishqui micunata micucushpaca mana apurado micunchijchu ¿nachu? Chashnallataj publicacioncunataca mana apurado estudianachu canchij. Chashnami cushicuihuan ‘sumaj shimicunata’ yachashun. Imata yachashcatapish mana cungarishpami shujtajcunata ayudashun (Eclesiastés 12:10).

13. a) ¿Diospaj Shimita shungupi huaquichingapajca Jeremiasca imatataj ruraj carca? b) ¿Diospaj Shimita leyij cashcamantaca imatataj rurarca?

¹³ Profeta Jeremiaspajca Diospaj Shimica achca valishcami carca. Paica: “Tucuita Mandaj Dioslla, ñucaca canhuanmi casha nihuarcanguimari. Chaimantamari cambaj shimicunata ñucaman cujpica, cushicushpa ñuca shungupi chasquij carcani. Cambaj shimi uyarijpica, japishcahuanmari micuj carcani” nircami (Jeremías 15:16). Jeremiasca Diospaj Shimipi yachachishcacunataca tucui shunguhuanmi yachanata munaj carca. Imata yachashcatapish cutin cutinmi yuyarij carca. Chaita rurashcamantami Diosmanta tucui shunguhuan huillashpa catirca. Ñucanchijpish Diospaj Shimita shungupi charishpaca Jehová Dios paipaj testigo cachun agllashcamantaca cushillami sintirishun. Chashnallataj cai tucuri punllacunapi Diosmanta huillashpapish cushillami sintirishun.

14. ¿Diospaj Shimita shungupi huaquichingapajca imatataj ashtahuan rurana canchij?

¹⁴ ¿Diospaj Shimita shungupi huaquichingapajca imatataj ashtahuan rurana canchij?  Jehová Diosca tandanacuicunahuanmi ñucanchijman yachachin. Chaimantami siempre rina canchij. Por ejemplo, cada semanami Huillaj revistahuan Bibliamanta ashtahuan yachanchij. Cai tandanacuipi tucuita entendingapajca manaraj rishpami alli prepararina canchij. Tucui versocunata mashcashpami leyina canchij. Achca huauqui panicunaca revistacunata descargashpami leyincuna. Huillaj revistaca jw.org paginapi, JW Library nishcapimi achca shimicunapi tiyan. Huaquin programacunapicarin utcami versocunata mashcai pudinchij. Ima laya estudiashpapish versocunata leyishpami chaipi alli yuyana canchij. Chaita rurashpaca Diospaj Shimipi yachachishcacunata mana cungarishunchu (Salmo 1:2-ta leyipai).

15, 16. a) ¿Juan 13:34, 35-pica Jesusca imatataj mandarca? b) ¿Bibliapi yachachishcacunata shungupi charishpaca imatataj rurana canchij?

¹⁵ Último tutata Jesús cai Allpapi cashpaca paita catijcunamanca cashnami nirca: “Ñucaca cancunataca manaraj mandashcatami mandani. Cancunaca caishuj chaishuj cꞌuyanacuichij. Ima shinami ñuca cancunata cꞌuyarcani, chashnallataj cancunapish caishuj chaishuj cꞌuyanacuichij. Chashna caishuj chaishuj cꞌuyanacujpimi, cancunataca ñuca yachacujcunataj cashcata tucuicuna rijsingacuna” nircami (Juan 13:34, 35).

¹⁶ Diosta mana cꞌuyashpaca ñucanchij huauqui panicunataca mana cꞌuyanchijmanchu. Cutin huauqui panicunata mana cꞌuyashpaca Diostapish mana cꞌuyai tucunchijmanchu. Apóstol Juanca cashnami nirca: “Maijanpish: ‘Ñucaca Diostami cꞌuyani’ nishpapish, paipaj huauquita pꞌiñajca llullami. Chaimanta maijanpish ricushca huauquita mana cꞌuyajca ¿ima shinataj mana ricushca Diostacarin cꞌuyangari?” nircami (1 Juan 4:20). Shinallataj Bibliapi yachachishcacunata shungupi charishpaca Diostapish, huauqui panicunatapishmi cꞌuyashun (1 Pedro 1:22; 1 Juan 4:21).

17. ¿Ima shinataj ñucanchij huauqui panicunata cꞌuyashcata ricuchinchij?

 ¹⁷ (1 Tesalonicenses 4:9, 10-ta leyipai). ¿Ima shinataj ñucanchij huauqui panicunata cꞌuyashcata ricuchinchij? Maijan yuyajllacunaca tandanacuiman ringapaj ayudachunmi minishtinga. O shuj viuda panica paipaj huasipi imata allichichunmi minishtinga (Santiago 1:27). Mana cashpaca huaquincunaca ima problemata charishcamantachari llaquilla puricuncuna. Paicunata animota cushpami ayudai tucunchij (Proverbios 12:25; Colosenses 4:11). Ñucanchij rurashcahuan, rimashcahuanmi Diosta servijcunapura cꞌuyanacushcata ricuchinchij (Gálatas 6:10).

18. ¿Huauqui panicunahuan pꞌiñanacushpaca imatataj rurana canchij?

¹⁸ Bibliapica, ‘tucuri punllacunapi gentecunaca paicunalla alli canata munajcuna, quiquinpajlla charinata munajcunami canga’ nircami (2 Timoteo 3:1, 2). Chaimantami Diosta servijcunaca Diostapish, shujtaj huauqui panicunatapish ashtahuan cꞌuyangapaj esforzarina canchij. Shinallataj Jehová mandashcacunatapish ama cungaringajmi esforzarina canchij. Juchayujcuna cashcamantaca huaquinpica ñucanchij huauqui panicunahuanchari pꞌiñanacushun. Shinapish paicunata cꞌuyashcamantaca ima problematapish sumajtami utca allichina canchij (Efesios 4:32; Colosenses 3:14). Ñucanchij cꞌuyai chiriyachunca manataj saquinachu canchij. Ashtahuanpish Jehová Diostapish, Bibliapi yachachishcacunatapish, ñucanchij huauqui panicunatapish tucui shunguhuan cꞌuyashpa catishunchij.