Minishtirishcallahuanmi cushilla causanchij
DANIELCA MIRIAMHUANMI septiembre de 2000 huatapi cazararcacuna. Paicunaca España llajtapimi alli vidata charircacuna. Danielca: “Alli trabajota charishcamantami alli restaurantecunapi micuj carcanchij, caru llajtacunamanpish ri pudircanchij, alli ropatapishmi churarij carcanchij. Diosmantapishmi huillaj carcanchij” ninmi. Pero qꞌuipaca ¿imataj tucurca? Ricushun.
2006 huatapica shuj jatun tandanacuimanmi rircacuna. Chai tandanacuipica cashna tapushpami yachachirca: “¿‘Huañuchinaman apashcacunata’ huiñai causanaman apaj ñanta catichun ayudacunchijchu?” nircami (Proverbios 24:11). Chai conferenciapica gentecuna quishpirichunca Diosmanta huillana minishtirishca cashcatami yachachirca (Hechos 20:26, 27). Chai conferenciami Danielpaj shunguman chayarca. Paica: “Jehová Diosca ñucata nicuj layami carca” nin. Shinallataj Diosta tucui shunguhuan servishpaca ashtahuan cushilla causanatami yachachirca. Danielpaj huarmica precursorami carca. Chaimantami cushilla carca. Chaita ricushpami Danielca chai jatun tandanacuipi yachachishcacuna cierto cashcata entendirca.
Chai conferencia Danielpaj shunguman chayashcamantami paipaj causaita cambianata yuyarirca. Asha horascunallata trabajashpami precursor tucurca. Shinallataj Danielca: “Shujtaj llajtacunapi Diosmanta huillanaca achcami minishtirin. Ñuca huarmindij chaiman rishpaca cushillami causashun” nishpami yuyarirca.
ALLI NOTICIATAMI CHASQUIRCANCHIJ
Mayo de 2007-pica Danielpish Miriampish trabajocunata saquishpami Panamá llajtapi causanaman rirca. Chai llajtataca ñami rijsishcacuna carca. Chaipi causacushpaca huaquin islacunapimi Diosmanta huillarcacuna. Chai islacunapi causajcunaca casi tucuicunami ngäbe shimita parlancuna. Danielpish Miriampish: “Ñucanchij cullquica 8 quillacunata caipi cangapajmi pajtanga” nishpami yuyarcacuna.
Diosmanta huillanaman rishpaca bicicletapi, barcopimi rijcunaca carca. Shuj punllaca 30 kilometrocunatami lomacunata bicicletapi rircacuna. Chai punllaca achca rupaimi carca. Danielca yallitaj shaicushca cashcamantami casi desmayarca. Chaipi causaj gentecunaca paicunataca allimi chasquircacuna. Danielpish Miriampish ngäbe shimita ashata yachajpica qꞌuipacunacarin ashtahuan allimi chasquircacuna. Asha tiempollapimi 23 gentecunaman Bibliamanta yachachicurcacuna.
Danielpish Miriampish cullqui illaj saquirishpaca Españaman tigranatami yuyarcacuna, Paicunapaj estudiantecunata saquishpa rina cashcamantami achcata llaquirishpa, huacarcacuna. Pero shuj quilla qꞌuipaca shuj alli noticiatami chasquircacuna. Miriamca: “Precursores especiales cachunmi invitarca. Panamapi saquiri tucushcamantami achcata contentarircanchij” ninmi.
¿IMAMANTATAJ CUSHILLA CAUSANCHIJ?
Diospaj pueblopi huaquin cambiocuna tiyashcamantami Danielpish Miriampish 2015-pica precursores especiales canata saquircacuna. ¿Paicunaca imatataj rurarcacuna? Salmo 37:5-pi nishcatami yuyarircacuna. Chaipica: “Cambaj purinataca Mandaj Diosman mingai. Paillapi shunguta churai. Paica imatapish can munashcata rurangami” ninmi. Qꞌuipaca shuj trabajota japishpami precursores regulares tucurcacuna. Cunanca Veraguas pueblopimi servicuncuna.
Danielca cashnapishmi nin: “Españamanta manaraj llujshishpaca ¿minishtirishcallahuan causai pudishunchu? nishpami preocuparircanchij. Cunanca ñami minishtirishcallahuan causacunchij, cachi huirallapajpish mana faltashcachu. Alli shungu gentecunaman huillanaca tucuimanta yalli valishcami can” ninmi.