1910 huatapimi ñuca yaya mamaca Georgia llajtata saquishpa Canadá llajtapi causanaman shamurca. Campopimi causarcacuna. Ñucaca 1928 huatapimi huacharircani. 6 huauqui panicunamantaca ñucami último carcani. Ñuca manaraj huacharijpimi ñuca yayaca huañurca. Cutin, ñuca mamapish ñuca huahuaraj cajpimi huañurca. Qꞌuipaca ñuca pani Lucyca 17 huatacunata charishpallami huañurca. Paimi ñuca punta pani carca. Chaimantami ñuca tío Nickca ñucanchijta cuidangapaj japirca.

Shuj punllaca ñuca familiaca caballopaj chupata japicujtami ricurca. Ñucaca ishqui huatacunallatami charircani. Chaimantami ñuca familiaca achcata mancharishpa chaimanta anchurichun caparircacuna. Huashamanta caparicushcamantami mana uyarcani. Ñuca mana ima tucujpipish ñuca familiaca sordo cashcatami cuentata curcacuna.

Ñuca familiapaj shuj amigoca: “Sordocunapaj escuelamanmi rina alli canga” nircami. Chaimantami ñuca tío Nickca Saskatoon pueblopi tiyaj escuelaman cacharca. Chai escuela carupi saquirishcamantami achcata mancharcani, 5 huatacunallatami charircani. Escuelapi cashpaca vacacionllapimi ñuca familiata visitanaman rij carcani. Tiempohuanca señas shimitami yacharcani, huambracunahuanpish cushillami pugllaj carcani.

Ñuca shuj punta panica Marion shutimi carca. 1939-pi cazarashca qꞌuipaca paipaj cusandijmi ñuca panitapish ñucatapish cuidarcacuna. Paicunami testigo de Jehovacunahuan punta yachai callarircacuna. Vacacionpimi Bibliamanta ñucanchijman yachachijcuna carca. Paicunaca señas shimita mana yacharcacunachu. Chaimantami ñucahuan parlanacunaca sinchi carca. Chashnapish Diospaj Shimita yachanata achcata munashcatami ricurcacuna. Bibliapi mandashcata ruracujta entendishpami ñucapish paicunandij huillanaman rircani. Asha tiempo qꞌuipaca bautizarisha nircanimi. Chaimantami 5 de septiembre de 1941-pi ñuca cuñadoca shuj tanque yacupi bautizarca. Chai yacuca dimastij chirimi carca.

1946-pimi huasiman tigrarcani. Qꞌuipaca Estados Unidospimi shuj jatun tandanacuiman rircanchij. Punta punllaca ñuca panicunaca, ima yachachishcata shuj hojapimi escribishpa ñucaman curca. Pero caishuj punllaca chai tandanacuillapitaj señaspi yachachicushcata yachashpami achcata cushicurcani. Señaspi Bibliamanta alli entendishpami cushilla sintirircani.

Segunda Guerra Mundial tucurishca qꞌuipaca gentecunaca paicunapaj llajtatami apoyashpa catircacuna. Pero ñucaca escuelaman trigrashpaca Diostaca tucui shunguhuanmi servisha nircani. Chaimantami banderata saludanata, señaspi himno nacionalta cantanata, shujtaj fiestacunapipish participanata saquircani. Ñuca compañerocunahuan iglesiaman rinatapish saquircanimi. Chaita rurajpica escuelapi cajcunaca achcatami pꞌiñarircacuna. Chaimantami llullacunata nishpa, ñuca yuyaita cambiasha nircacuna. Ñuca compañerocunapish ima tucushcata ricurcacunami, chaimi paicunamanpish Diosmanta huillarcani. Tiempohuanca maijancunaca testigo de Jehovacunami tucurca. Por ejemplo, Larry Androsoff, Norman Dittrick y Emil Schneider. Paicunaca cunancamami Diosta servicuncuna.

Shujtaj llajtacunaman rishpaca sordocunaman Diosmanta huillangapajmi esforzarircani. Shuj cutinca Montreal puebloman chayashpaca maipimi sordocuna tandanacun chaimanmi rircani. Chaipica shuj jovenmanmi Diospaj Shimita parlarcani. Paica pandillero partemi cashcarca. Chai jovenca Quebec pueblopimi señas congregacionpi servirca. Shujtaj jovenmanpishmi Diospaj Shimita huillarcani. Paica Juan Ardanez shutimi carca. Paica Bereapi causajcuna shinami Diospaj Shimipi yachachishcacuna cierto cashcata o mana cierto cashcata alli ricuj carca (Hechos 17:10, 11). Qꞌuipaca cai jovenca testigo de Jehovami tucurca. Ottawa llajtapimi huañungacama anciano shina servirca.

1950-pimi Vancouver pueblopi causanaman rircani. Sordocunaman huillanaca sumajmi carca. Pero shuj punllaca shuj uyaj huarmimanmi Diosmanta huillarcani. Chaitaca mana cungarishachu. Paica Chris Spicer shutimi carca. Paica cada quillami ñucanchij revistacunata chasquisha nirca. Paipaj cusatapish rijsichisha nircami. Ña huasipi cashpaca paicunahuanca hojacunapi escribishpallami parlanacurcanchij. Asha huatacuna qꞌuipaca Toronto llajtapi shuj jatun tandanacuipimi tupanacurcanchij.  Chai punllami chai huarmipaj cusaca bautizarigrirca. Cai experienciata yuyarishpami Diospaj Shimita huillashpa catina achca importante cashcata ricurcani. Shujtajcunaman Diospaj Shimita huillajpi paicuna shuj punlla Diosta servinataca mana yachanchijchu.

Qꞌuipaca Saskatoon pueblomanmi tigrarcani. Chaipimi shuj huarmica: ‘Ñucaca ishqui sordo ushushicunatami charini. Paicunaman Diosmanta yachachishpa convidahuai’ nirca. Cai huarmipaj ushushicunaca Jean y Joan shuticunami carca. Ishquindijmi ñuca rishca escuelallapitaj estudiajcuna carca. Diosmanta imata yachacushcataca paicunapaj compañeracunamanpishmi parlashcacuna carca. Chaimantami 5 compañeracunaca testigo de Jehovacuna tucurca. Shujca Eunice shutimi carca. Paitaca escuelata tucuchicushpami rijsircani. Shuj punllaca ñucaman shuj caramelota cushpami: ‘¿Amigos cai tucunchijchu?’ nishpa tapurca.

Eunicepaj mamaca Bibliata yachacushcatami yachaj chayashca carca. Chaimantami achcata pꞌiñarishpa escuelapi directormanca: “Bibliata ama yachashpa catichun jarcapai” nishcarca. Directorca chaitami rurarca, publicacioncunatapish quichurcami. Chaita rurajpipish Euniceca Diosmanta anchurinataca manataj yuyarcachu. Bautizarisha nijpica paipaj yaya mamaca: “Can testigo de Jehová tucujpica huasimantami llujshichishpa cachashun” nircami. Chaimantami Euniceca 17 huatacunata charishpalla testigocunahuan causanaman rirca. Paica Bibliamanta yachashpami catirca. Qꞌuipaca bautizarircami. Paihuanmi 1960 huatapi cazararcani. Bodamanca paipaj yaya mamaca mana shamurcachu. Pero huatacuna pasajpica huahuacunata ima shina huiñachijta ricushpa, ñucanchij rurashcacunata ricushpami paicunaca ñucanchijta respetai callarirca.

7 churicunatami charircanchij. Paicunaca uyajcunami can. Huahuacunata huiñachinaca sinchimi carca. Shinapish paicunahuan alli parlanacushpa Bibliamanta yachachingapajmi señas shimita yachachircanchij. Huauqui panicunapish achcatami ayudarcacuna. Por ejemplo, shuj huauquica: ‘Tandanacuna Huasipimi cambaj huahuaca malas palabrastami nicurca’ nishpami ñucanchijman escribirca. Chai ratomi corregircanchij. Ñuca chuscu churicunaca James, Jerry, Nicholas y Steven shuticunami can. Paicunaca ancianocunami can. Paicunapaj huarmindijmi Diosta servicuncuna. Nicholasca paipaj huarmindijmi Gran Bretañapi señas shimiman traducij sucursalpi ayudan. Cutin Stevenpish paipaj huarmindijmi Estados Unidos sucursalpi señasman traducishpa trabajancuna.

40 huatacuna cazarashcata pajtachingapajca shuj quillalla faltajpimi ñuca huarmica cáncer ungüihuan huañurca. Ungüihuan cashpaca huañushcacunata Dios causachinata yuyarishpami ñaupajman catirca. Pai causarina punlla ña chayamuchunmi shuyacuni.

 Febrero de 2012 huatapica urmashpami siqui tullu pꞌaquirircani. Ayudata minishtishpami ñuca churipaj huasipi causanaman rircani. Ñucapish, ñuca churipish ñuca nuerapish señas congregacionpimi canchij. Chaipica ancianomi cani. Primera vezmi señas congregacionpi servicuni. Ñaupaca inglés congregacionllapimi servircani. Inglés congregacionpi cashpapish Diosmanta ama caruyangapajca Jehová Diosllatajmi ayudashca. Paica, yaya mama illajcunataca cuidasha ninmi. Chaitatajmi pajtachishca (Salmo 10:14). Ñucata ayudangapaj hojacunapi notacunata escribishcamanta, señas shimita yachashcamantami huauquicunata panicunata diosolopagui nini.

Huaquinpica imata nishcata mana entendijchu carcani. Shinallataj sordocunata pi mana ayudai tucushcata yuyashpami llaquirishpa, tucuita chaipi saquisha nircani. Chashna llaquilla cashpaca Pedro nishcatami yuyarij carcani. Paica: “Mandaj Jesús ¿pipajmantaj rishunri? Canmari huiñai causaita cuj shimicunataca charingui” nircami (Juan 6:66-68). Achca sordocunami achca huatacunata Diosta servishpa caticuncuna. Paicuna layallatajmi ñucapish Diospi shuyanata yachashcani. Chashnallataj Jehová Diospi, paipaj pueblota pushajcunapipish tucui shunguta churanatami yachashcani. Chaita rurashcamantami Jehová Diosca achcata bendiciashca. Cunanca señas shimipimi achca publicacioncuna tiyan. Chaimantami tandanacuicunapi, jatun tandanacuicunapipish jahualla entendini. Diosta servishpami cushilla causani, achca bendicioncunatapishmi Diosmanta chasquishcani.