1. Adán Eva Diosta mana cazushca huashaca ¿imatataj pandachij espiritumanta Diosca nirca?

ADANCA culebracuna mana rimaj cashcataca allimi yacharca. Chaimantami culebra Evahuan rimajpica tal vez shuj espiritumi rimacushca canga yuyashcanga (Génesis 3:1-6). Paicunaca chai espíritu pi cashcataca mana yacharcacunachu. Shinapish Diosta cazunapaj randica cai mana alli espiritutami Adán, Evaca cazurcacuna (1 Timoteo 2:14). Chai qꞌuipallami Diosca chai espíritu o enemigomanta huillai callarirca. Shinallataj chai enemigota tucuchinatami huillarca. Chai punlla chayangacama chai espíritu Diosta sirvijcunata llaquichishpa causanatapishmi huillarca (Génesis 3:15).

2, 3. ¿Diosca imamantataj Mesías manaraj shamujpi Satanasmantaca ashallata parlarca?

² Jehová Diosca cai espíritu ima shuti cashcataca mana huillarcachu * (urapi tiyaj notata ricui). Ashtahuanpish 2.500 huatacuna  qꞌuipami chai espíritu pi cashcata Diosca huillarca. Chai espiritumanta parlangapajca Bibliapica Satanás nishpami quillcashca. Chai shimica “Jarcaj” nisha ninmi (Job 1:6). Hebreo rimaipi ñaupa quillcachishcacunapica Satanás shimica: 1 Crónicas, Job, Zacarías librocunallapimi ricurin. Pero Diosca ¿imamantataj Mesías manaraj shamujpi chai enemigomantaca ashallata parlarca?

³ Jehová Diosca Ñaupa Testamento librocunapica Satanasmanta, pai imallata rurashcamantapish mana tucuita huillarcachu. Chaipaj randica gentecuna Mesías pi cashcata alli yachachun, paita catichunmi Diosca Ñaupa Testamento librocunata escribichirca (Lucas 24:44; Gálatas 3:24). Mesías chayamujpimi Diosca Satanás, millai angelcuna pi cashcata rijsichichun Jesusta, paita catijcunatapish agllarca * (urapi tiyaj notata ricui). Shinallataj shamuj punllacunapipish Jesusmi, ungidocunahuan Diablota, millai angelcunatapish tucuchinga (Romanos 16:20; Apocalipsis 17:14; 20:10).

4. ¿Satanastaca imamantataj mana yallitaj manchana canchij?

⁴ Apóstol Pedroca Diablomanta parlashpaca: ‘Paica león huacaricuj shina’ can nircami. Apóstol Juanpish: ‘rucu culebra’ o ‘jatun dragonmi’ can nircami (1 Pedro 5:8; Apocalipsis 12:9). Satanás ima shina cashcata yachashpaca ¿manchaita charinachu canchij? Mana. Paica poderta charishpapish mana tucuita rurai tucunchu (Santiago 4:7-ta leyipai). Jehová Dios, Jesús, angelcunapishmi ñucanchijtaca cuidacun. Chaimantami Diablo llaquichisha, pandachisha nijpipish paipaj trampacunapica mana urmashun. Shinapish Satanasca ¿mashna podertataj charin? ¿Gentecunataca ima shinataj pandachisha nin? ¿Imacunatataj mana rurai tucun? Chai valishca tapuicunatami yachagrinchij.

5, 6. ¿Gobiernocunaca imamantataj cushilla causaita mana cui tucun?

⁵ Achca angelcunami Satanaspaj parte tucushpa Diospaj contra tucurcacuna. ¿Chaitaca ima shinataj yachanchij? Manaraj yacu juillu shamujpimi huaquin angelcunaca cai Allpapi causaj huarmicunahuan chayarircacuna. Paicuna cashna juchapi urmachunca Diablomi pandachirca. Chaimantami Bibliapica: ‘Diabloca quimsapi chaupishca shuj parte luzerocunatami, cielomanta Allpa pachaman paipaj chupahuan aisashpa shitarca’ nin (Génesis 6:1-4; Judas 6; Apocalipsis 12:3, 4). Chai angelcuna Diosmanta, shujtaj alli angelcunamantapish caruyajpimi Satanasca paicunata mandai callarirca. Diabloca Dios layallatajmi shuj organizacionta charisha nin. Chaimantami chai millai angelcunataca organizashcata charin. Shinami shuj rey cashcata sintin. Ashtahuancarin cai Allpata mandachunmi millai angelcunaman poderta cushca (Efesios 6:12).

 ⁶ Chashna organizado cashcamantami Diabloca cai Allpapi mandajcunata mandai tucun. Chaimantami paica Jesusmanca ‘cai pachapi tiyaj mandana tucui llajtacunata’ ricuchirca. Qꞌuipaca: “Cai pachapi tiyaj tucui llajtacunata mandaj canata, chaipi imalla tiyaj sumajcunatapish canmanmi cusha. Tucui caicunataca ñucamanmi curca. Piman cusha nishcaman cui tucunimi” nircami (Lucas 4:5, 6). Diablo cai pachata mandacujpipish huaquin gobiernocunaca paicunapaj llajtacunapaj allitami ruran. Shujtajcunaca gentecunata ayudanatami munan. Pero ni maijan gobierno cushi causaitaca mana apamui tucushcachu (Salmo 146:3, 4; Apocalipsis 12:12).

7. Satanasca gentecunata pandachingapajca ¿ima shinataj panda religioncunata, negociocunatapish utilizan? (Página 15-pi tiyaj dibujota ricui).

⁷ Diablopish millai angelcunapish “allpa pachapi causajcunata” pandachingapajca yanga religioncunatapishmi utilizan (Apocalipsis 12:9). Chaimantami panda religioncunapica Diosmanta llullacunata yachachin. Gentecunapish Diospaj shutita ama yachachunmi Diabloca imatapish ruran (Jeremías 23:26, 27). Diablo chashna pandachijpimi panda religionpi cajcunaca Diostami adoracunchij yuyancuna. Pero demoniocunata adoracushcataca mana cuentata cuncunachu (1 Corintios 10:20; 2 Corintios 11:13-15). Shinallataj Satanasca gentecunata pandachingapajca negociocunatami utilizan. Por ejemplo, ‘achca cullquita, cosascunata charishpallami cushilla causaita chari tucunchij’ nishpa yuyachunmi Diabloca munan (Proverbios 18:11). Chaimantami gentecunaca charinallata mashcashpa causancuna (Mateo 6:24). Diosta sirvijcunapish cai pachapaj cosascunata cꞌuyashcamantami Diosta sirvinata ladoman saquishcacuna (Mateo 13:22; 1 Juan 2:15, 16).

8, 9. a) Adán Evamanta, demoniocunamantaca ¿imatataj yachanchij? b) Diablo cai pachata mandacujpipish ¿imatataj rurana canchij? c) ¿Diablo nishcacuna mana cierto cashcata ricuchingapajca imatataj rurana canchij?

⁸ Adán Evapish millai angelcunapish Diosta cazunapaj randica Diablota cazunatami agllarcacuna. Ñucanchijpish Diosta cazunata o Diablota cazunatami agllana canchij (Mateo 7:13). Adán Evaca Diablota cazushcamantami paicunallataj ima alli cashcata o ima mana alli cashcata agllai tucurca. Shinallataj demoniocunapish gobiernocunatami mandai tucushcacuna (Génesis 3:22). Pero Adán, Eva, demoniocunapish Diosta mana cazushcamantami achca llaquicuna tiyan (Job 21:7-17; Gálatas 6:7, 8). Ñucanchijpish Diablota cazushpaca achca llaquicunatami charishun.

⁹ Diablo cai pachata mandacushcamantami Diosca autoridadcunata, gobiernocunata ima shina respetana cashcata yachachin (1 Pedro 2:17). Diosca paipaj mandashcacunata mana huashaman saquishpa, gobiernocunapaj leycunata cazuchunmi munan (Romanos 13:1-4). Chai leycunata cazushpapish politicapi mana chagrurina cashcatami yachanchij (Juan 17:15, 16; 18:36). Diabloca, Yaya Diospaj shutita gentecuna ama rijsichun, Jehová millai Dios cashcatapish crichunmi tucuita ruran. Chaimantami Diosmanta alli yachachishpa Diablo nishcacuna mana cierto cashcata ricuchishun. Shinallataj testigo de Jehová cashcamanta, Diospaj shutita  huillacushcamantami cushilla sintirinchij. Ñucanchijpajca charishca cosascunatapish yallica Diosta sirvinami cushi causaita cun (Isaías 43:10; 1 Timoteo 6:6-10).

10-12. a) ¿Diabloca angelcunataca ima shinataj pandachirca? b) ¿Cai angelcunahuan ima tucushcamantaca imatataj yachai tucunchij?

¹⁰ Diabloca gentecuna pai munashcata rurachunmi huaquin trampacunata churan. Maipicarin ñucanchijta llaquichingapajca gentecunatami utilizan.

¹¹ Cunanca, Diablo angelcunata ima laya pandachishcata ricushun. Paica angelcunata Diosmanta caruyachishpa paipaj parte tucuchunmi munarca. Chaipajca achca huatacunatami ima laya trampacunata churanata yuyacushcanga. Huaquin angelcunaca Diablopaj trampapi urmashpami cai pacha huarmicunahuan huainayashpa huahuacunata charircacuna. Chai huahuacuna huiñashpami manchanai jatun, millai gentecuna tucurca (Génesis 6:1-4). Satanasca angelcunataca mana chai trampallapichu urmachirca. Ashtahuanpish cai angelcunataca gentecunatami mandanguichij nishcami canga. ¿Imamantataj chaicunata rurarca? Diabloca ‘huarmipaj huahua huahuacunamanta’ shamuj profeciata jarcanatami munarca (Génesis 3:15). Pero Jehová Diosca Diablopaj, demoniocunapaj munaicuna ama pajtarichunmi yacu juilluta apamurca.

¹² Huainayana munaicuna, jatun tucushca canaca Diablopaj trampacunami can. Chai trampacunapi nunca mana urmashachu nishpaca mana yuyanachu canchij. Yuyarishun, chai mana alli angelcunaca huaranga huaranga huatacunatami Diosta sirvishpa causarcacuna. Shina sirvicushpapish mana alli munaicuna paicunapaj shunguman yaicuchunmi saquircacuna. Ñucanchijpish achca huatacunata Diosta sirvicujpipish mana alli munaicuna ñucanchij shunguman yaicui tucunmi (1 Corintios 10:12). Chaimantami ñucanchij shungu ima laya cashcata alli ricuna canchij. Jatun tucuna yuyaicuna, mapa munaicuna ñucanchij shunguman yaicuchunca mana saquinachu canchij (Gálatas 5:26; Colosenses 3:5-ta leyipai).

13. a) ¿Satanasca ima shujtaj trampacunatataj churan? b) ¿Paipaj trampacunapi ama urmangapajca imatataj rurana canchij?

 ¹³ Diabloca demoniocunapi crichunca mana yanga religioncunallatachu utilizan. Shujtaj trampacunatapishmi utilizan. Por ejemplo, huaquin peliculacuna, video juegocunaca brujeriata ruranahuan, huañushcacunahuan parlanahuan, chagrurishcami can. Chaicunata ricuna o rurana alli laya cashcata crichunmi Diabloca munan. Chai trampacunapi ama urmangapajca ¿imatataj rurana canchij? Diospaj organización cai diversioncunami alli, cutin chai diversioncunaca mana allichu nichunca mana shuyanachu canchij. Chaipaj randica cada unomi Dios mandashcacunata alli yachashpa ima alli cashcata ima mana alli cashcata agllana canchij (Hebreos 5:14). Shinallataj ‘mana nij tucushpalla’ Diosta cꞌuyashpaca alli decisioncunatami agllashun (Romanos 12:9). Chaimanta: “Ima diversioncunata agllagricujpi ñucahuan Bibliamanta yachacujcunaca ¿ñuca yachachishcata pajtachicushcatachu ricunga? mana cashpaca ¿nij tucushpalla imatapish ruracushcatachu ricunga?” nishpami tapurina canchij. Yachachishca laya causashpaca Diablopaj trampacunapica mana urmashunchu (1 Juan 3:18).

14. a) Diabloca Diosmanta caruyachingapajca ¿imacunallatataj ruran? b) ¿Diablo ñucanchijta Diosmanta ama caruyachichunca imatataj yuyarina canchij?

¹⁴ Diabloca Diosmanta caruyachingapajca gobiernocunatapishmi utilizan. Chaimantami huaquin gobiernocunaca Diosmanta ama huillachun jarcaicunata churan. Shinallataj Dios mandashcacunata cazushcamantami ñucanchij compañerocunaca trabajopi, escuelapi, colegiopi burlarincuna. Paicuna chashna burlarichunca Diablomi shina yuyaicunata cun (1 Pedro 4:4). Chashnallataj Diabloca ñucanchij familiacunatami utilizan. Chaimantami huaquin familiacunaca tandanacuicunaman ama richun jarcan. Paicunaca alli munaihuan shinachari chashna jarcasha nin (Mateo 10:36). Pero Diablo, ñucanchijta Diosmanta ama caruyachichunca ¿imatataj rurana canchij? Diablo jarcaicunata churashpa ñucanchijhuan macanacucushcatami yuyarina canchij (Apocalipsis 2:10; 12:17). Shinallataj Diabloca: ‘Gentecuna llaquicunata charishpaca Diosta mana sirvingachu, Dios bendiciajpillami gentecunaca  paita sirvin’ ninmi. Chaimantami llaquicuna ricurijpica Diablo ima nishcata yuyarina canchij (Job 1:9-11; 2:4, 5). Ashtahuancarin llaquicunata ahuantangapajmi fuerzata cuhuai nishpa Diosta mañana canchij. Paica ñucanchijtaca manataj saquingachu (Hebreos 13:5).

15. a) ¿Diabloca imatataj mana rurai tucun? b) ¿Imamantataj chashna ninchij?

¹⁵ Diabloca ñucanchij ima mana munashcata rurachunca mana obligai tucunchu (Santiago 1:14). Achca gentecunaca Diablopaj parte cashcataca mana cuentata cuncunachu. Pero Yaya Diosta rijsishpami paita sirvinata o mana sirvinata decidina can (Hechos 3:17; 17:30). Diosta tucui shunguhuan sirvinata munajpica Diabloca mana jarcai tucungachu (Job 2:3; 27:5).

16, 17. a) ¿Diablopish demoniocunapish imatataj mana yachai tucuncuna? b) ¿Imamantataj Diosta sinchita mañanataca mana manchana canchij?

¹⁶ Bibliapica Diablopish demoniocunapish ñucanchij shungupi imata yuyacushcataca mana yachai tucunchu ninmi. Ashtahuanpish Jehová Dios, Jesusllami ñucanchij shungupi imata yuyacushcataca yachai tucun (1 Samuel 16:7; Marcos 2:8). Pero, ¿sinchita Diosta mañacujpi Diablopish demoniocunapish uyangami nishpa manchanachu canchij? ¿Imata mañashcata uyashpa Diablo ñucanchijta llaquichingami nishpa manchanachu canchij? Mana manchanachu canchij. Caipi yuyashun, ñucanchijca Diablo ricucushcallamantaca Diosta sirvinata mana saquinchijchu. Chashnallatajmi Diablo ñucanchij mañashcacunata uyangami nishpallaca Diosta mañanataca mana manchanachu canchij. Bibliapica, ñaupa tiempocunapi Diosta sirvijcunaca sinchita rimashpami Diosta mañajcuna carca ninmi. Paicunaca mañashcacunata Diablo uyangami nishpa mana manchajcunachu carca (1 Reyes 8:22, 23; Juan 11:41, 42; Hechos 4:23, 24). Ñucanchij rimaipipish ruraipipish Dios munashca shina causajpica Jehová Diosca Diablo llaquichichunca manataj saquingachu (Salmo 34:7-ta leyipai).

¹⁷ Ñucanchij enemigo Diablotaca allimi rijsina canchij. Pero pai ima shina cashcata yachashpaca mana yallitaj manchanachu canchij. Juchayujcuna cashpapish Diospaj ayudahuanmi Diablota mishai tucunchij (1 Juan 2:14). Diablo ñucanchijmanta caruyachunca paipaj trampacunapi ama urmangapajmi esforzarina canchij (Santiago 4:7; 1 Pedro 5:9). Cunan tiempopica jovencunatami Diabloca paipaj trampapi ashtahuan urmachinata munan. Chaimanta, jovencunaca paipaj trampapi ama urmangapajca ¿imatataj rurana can? Cai tapuitaca shamuj temapimi yachashun.