1, 2. a) ¿Jesusca huañuna tutaca imatataj nirca? (Jahuapi tiyaj dibujota ricui). b) ¿Huillana importante cashcata yachashpaca imatataj rurashun? c) ¿Imatataj yachagrinchij?

JESUSCA huañuna tutami paipaj apostolcunahuan achcata parlanacurca. Shinallataj paicunata achcata cꞌuyashcatami ricuchirca. Ñaupa yachaipi ricushca shinaca Jesusca paillatajmi uvas yura cashcata nirca. Cutin paipaj catijcunataca ‘achca granocunata pꞌucuchishpami’ catina canguichij nircami. Chashna nishpaca Dios churashca Mandanamanta huillashpa catinatami animacurca (Juan 15:8).

² Jesusca ‘huillanami canguichij’ nishpallaca mana saquircachu. Ashtahuanpish imamanta huillashpa catinatami nirca. Imamanta huillana importante cashcata yachangapajmi Bibliapi chuscu yuyaicunata ricushun. Chaita yachashpami ‘tucui cai pachapi causajcunaman’ huillashpa catishun (Mateo 24:13, 14). Shinallataj granota pꞌucuchishpa catingapaj Jehová Dios chuscu regalocunata cushcatami yachashun.

3. a) ¿Juan 15:8-pi nishca shinaca imamantataj huillana canchij? b) ¿Uvascunaca imatataj ricuchin? c) ¿Cai chꞌimbapuraimantaca imatataj yachacunchij?

³ Diosta jatunyachingapaj, paipaj shutita alli nishca cachunmi huillana canchij (Juan 15:1, 8-ta leyipai). Jesusca paipaj Yayataca uvasta tarpuj runahuanmi chꞌimbapurarca. Cutin paica uvas yurahuanmi chꞌimbapurarirca. Paita catijcunataca uva yurapaj ramacunahuanmi chꞌimbapurarca (Juan 15:5). Cai uvascunaca Jesusta catijcuna Dios churashca Mandanamanta huillanatami ricuchin. Chaimantami Jesusca apostolcunataca: “Cancunaca ñuca yachacujcuna shinataj causashpa achca granota pꞌucushpaca, ñuca Yayatami jatunyachinguichij” nircami. Por ejemplo, uvas chagra alli granota pꞌucujpica tarpuj ruranatami felicitancuna. Ñucanchijpish chashnallatajmi tucui shunguhuan huillashpaca Diosta jatunyachinchij (Mateo 25:20-23).

4. a) ¿Diospaj shutitaca ima shinataj jatunyachinchij? b) ¿Diospaj shutita jatunyachina cashcata yachashpaca ima shinataj sintiringui?

⁴ Diospaj shutica chuya, mapa illajmi can. Paipaj shuti ashtahuan chuya, mapa illaj cachunca imata mana rurai tucunchijchu. Pero profeta Isaiasca: ‘Cancunaca Jehová Diosllata jucha illajmi cangui nichij’ nircami (Isaías 8:13). ¿Diospaj shuti alli nishca cachunca imatataj rurana canchij? Diospaj shutilla tucuimanta yalli chuya, jucha illaj cashcatami intindina canchij. Shinallataj shujtajcunamanpish chaitami huillana canchij (Mateo 6:9). Ashtahuancarin Jehová Dios cꞌuyaj, llaquij cashcata, shamuj punllacunapipish imata ruragrishcata huillashpami paipaj shutita jatunyachishun. Chashnami Diablo yangamanta Jehová Diosta juchachicushcata ricuchishun (Génesis 3:1-5). Chashnallataj tucuita ruraj Diosta alli nina cashcata gentecunaman intindichishpami Diospaj shutita jatunyachinchij (Apocalipsis 4:11). Rene * shuti huauquica 16 huatacunatami precursor carca. Paica: “Yaya Dios paipaj testigo cachun agllashcamantami agradecini. Chaimantami paimanta huillashpa catinata munani” nircami.

5. a) ¿Juan 15:9, 10-pi nishca shinaca imamantataj huillana canchij? b) ¿Jesusca imamantataj ñuca cꞌuyaipi catichij nirca?

⁵ (Juan 15:9, 10-ta leyipai). Jehová Diostapish Jesustapish cꞌuyashcamantami huillanchij (Marcos 12:30; Juan 14:15). Jesusca paita catijcunataca ñuca cꞌuyaipi catichij nircami. ¿Imamantataj chashna nirca? Diosta sirvingapajca ahuantana cashcamantami chashna nirca. Juan 15:4-10-pica Jesusca achca cutinmi “catichij” nirca. Shina nishpaca llaquicuna shamujpipish Diosta sirvijcunaca ahuantana cashcamantami parlacurca.

6. ¿Jesuspaj cꞌuyaipi catingapajca imatataj rurana canchij?

⁶ Jesuspaj cꞌuyaipi catisha nishcata, paipaj ñaupajpi alli ricurisha nishcataca ¿ima shinataj  ricuchinchij? Paitami cazuna canchij. Jesusca ñucanchijpish pai rurashca layallataj imatapish rurachunmi mañan. Chaimantami paica: ‘Ñuca Yaya mandashcacunata cazushpami paipaj cꞌuyaihuan shujlla cani’ nirca (Juan 15:10). Dios mandashcacunata ima shina cazunataca Jesusllatajmi shuj alli ejemplota ricuchishpa saquirca (Juan 13:15).

7. ¿Jesús mandashcata cazushpaca imatataj ricuchinchij?

⁷ Jesusca: ‘Maijanpish ñuca mandashcacunata yachashpa chaitataj rurajca ñucata cꞌuyajmi’ nircami (Juan 14:21). Jesusca paipaj Yaya munashcatami rurachun mandan (Mateo 17:5; Juan 8:28). Chaimantami pai mandashcata cazushpa huillanaman rinchij. Shinami Jehová Diostapish Jesustapish cꞌuyashcata ricuchinchij. Chaita rurajpica paicunapish ñucanchijtaca cꞌuyashpami catinga.

8, 9. a) ¿Imamantataj huillanaman llujshinchij? b) ¿Ezequiel 3:18, 19 y 18:23-pica imatataj yachachin?

⁸ Yaya Dios mana cazujcunata imata ruragrijta gentecuna yachachunmi huillanaman llujshinchij. Manaraj yacu juillu shamujpimi Noeca mana alli gentecuna tucuchishca canata huillarca. Chaimantami Bibliapica Noeca ‘huillajmi’ carca nin (2 Pedro 2:5-ta leyipai). Caimanta parlashpami Jesusca: ‘Yacu juilluta Dios cachanapajpish allita micushpa, ubyashpa, cazarashpa, cazarachishpami causarcacuna. Huambuj huasiman Noé yaicungacamami, chashnallataj catircacuna. Paicunaca yacu juillu shamushpa, tucuicunata chingachingacama mana cazurcacunachu. Runa Aichayuj shamunapajpish chashnallatajmi canga’ nircami (Mateo 24:38, 39). Gentecuna mana uyajpipish Noeca yacu juillu shamunamantaca huillashpami catirca.

⁹ Diosca tucui gentecuna paita uyashpa quishpirichunmi munan. Ñucanchijpish chaillatatajmi munanchij (Ezequiel 18:23). Chaimantami gentecuna Diospaj munai maijan cashcata alli yachachun Dios churashca Mandanamanta huillanchij. Shinallataj millai gentecunata Dios ñalla tucuchigrishcata yachachunmi huasin huasin huillanchij. Achca gentecuna tiyaj puestocunapipishmi huillanchij (Ezequiel 3:18, 19; Daniel 2:44; Apocalipsis 14:6, 7).

10. a) ¿Mateo 22:39-pi nishca shinaca imamantataj huillana canchij? b) ¿Pablopish Silaspish ima shinataj carcelta cuidajta ayudarcacuna?

¹⁰ Gentecunata cꞌuyashcamantami huillashpa catinchij (Mateo 22:39). Gentecunaca huaquinpica llaquicunata charishpami paicunapaj yuyaicunata cambiancuna. Chaimantami huillashpa catinata munanchij. Apóstol Pablohuan, Silashuan ima tucushcata yuyarishun. Paicunataca Filipos llajtapimi prezupi churarcacuna. Prezupi cajpimi chaupi tutataca shuj jatun terremoto tiyarca. Chaimi cárcel pungucunaca pascarirca. Chaita ricushpami carcelta cuidajca prezushcacuna llujshishpa rishcangami yuyashpa huañuchirinata munarca. Shinapish Pabloca ‘ama chaita ruraichu’ nishpami caparirca. Shina nijpimi carcelta cuidajca, ‘quishpiringapajca ¿imatataj rurana cani?’ nirca. Paicunaca: ‘Mandaj Jesucristota cri. Chashna rurashpaca quishpiringuimi’ nircami (Hechos 16:25-34).

11, 12. a) ¿Carcelta cuidajmantaca imatataj yachacunchij? b) ¿Imamantataj huillashpa catinata munanchij?

¹¹ Terremoto pasashca huashaca carcelta cuidajca paipaj yuyaita cambiashpami Diosmanta yachanata munarca. ¿Caimantaca imatataj yachacunchij? Huaquinpica gentecunaca Diospaj Shimita huillanaman rijpica mana uyasha nincunachu. Pero paicunapaj causaipi ima llaquicuna ricurijpimi Diosmanta yachanata munancuna. Por ejemplo, trabajo illaj saquirishpa, cusa huarmicunapura divorciarishpa, shuj millai ungüi japijpi o shuj familia huañujpimi achca llaquilla sintirincuna. Chashna llaquicuna japijpimi ¿imapajtaj causacunchij? nishpa yuyai callarincuna. Ashtahuancarin carcelta cuidaj shinami ‘quishpiringapajca ¿imatataj rurana cani?’ nishpa tapurincuna. Shina tapurijpimi shamuj punllapi shuj sumaj causai tiyanamanta huillajpica uyanata munancuna.

¹² Chashna llaquilla causaj gentecunata cushichingapajmi huillashpa catina canchij (Isaías 61:1). Por ejemplo, Carla panica 38 huatacunatami precursora can. Paica: “Gentecunaca causaihuanca imata ruranata mana yachancunachu. Diospaj Shimita uyanatami minishtincuna” nircami. Eva shuti panipish 34 huatacunatami precursora shina sirvin. Paipish: “Achca gentecuna llaquilla causacujta ricushpami paicunata ayudanata munani. Chaimantami huillashpa catini” nircami. Caipi ricushca shinaca gentecunata achcata cꞌuyashcamantami Diosmanta huillashpa catinata munanchij ¿nachu?

13, 14. a) ¿Juan 15:11-pica ima regalomantataj parlacun? b) ¿Jesús shina cushilla cangapajca imatataj rurana canchij? c) ¿Cushilla cashpaca imatataj rurashpa catishun?

¹³ Jesusca huañuna tutaca Jehová Dios huaquin regalocunata cushcatami apostolcunaman huillarca. Chai regalocunata paicuna chasquishpami granota pꞌucuchij shina Diosmanta huillashpa catina carcacuna. ¿Ima regalocunataj carca? ¿Ñucanchijpish ima shinataj chai regalocunamanta beneficiari tucunchij?

¹⁴ Cushilla cana. ¿Huillanaman rinaca ñucanchijpajca sinchichu can? Mana. Jesusca uvas yuramanta parlashca qꞌuipaca, Dios churashca Mandanamanta huillashpami ñuca shina cushilla canguichij nircami (Juan 15:11-ta leyipai). ¿Chaihuanca  imatataj nisha nirca? Yuyarishun, Jesusca paipaj apostolcunamanca, ñucaca shuj uvas yura shinami cani, cancunaca cai uvas yurapaj ramacunami canguichij nircami. Por ejemplo, ramacunaca yurapi cashpallami yacutapish alimentocunatapish chasquin. Ñucanchijpish Jesusmanta mana caruyashpa, pai shina Diospaj munaita rurashpami cushilla cashun (Juan 4:34; 17:13; 1 Pedro 2:21). Pani Anaca 40 yalli huatacunatami precursora shina sirvicun. Paica: “Huillanamanta tigrashpami cushilla sintirini. Chaimi Diosta sirvishpa catingapaj animan” nircami. Ñucanchijpish cushilla cashpaca gentecuna mana uyasha nijpipish huillashpami catishun (Mateo 5:10-12).

15. a) ¿Juan 14:27-pica ima regalomantataj parlan? b) ¿Jesuspaj sumaj causaica ima shinataj ñucanchijta ayudan?

¹⁵ Sumaj causaita charina (Juan 14:27-ta leyipai). Pai huañugrij tutallatajmi Jesusca paita catijcunataca: “Cancunamanca ñuca sumaj causaitami cuni” nirca. Jesús nishca shimicunaca ¿ima shinataj ñucanchijtapish ayudan? Ima llaquicuna ricurijpipish Diosmanta huillanata mana saquishpaca Diospaj ñaupajpi, Jesuspaj ñaupajpipish allimi ricurishun. Chaita yachashcamantami tranquilo sintirinchij (Salmo 149:4; Romanos 5:3, 4; Colosenses 3:15). Adolfo huauquica 45 huatacunatami precursor can. Paica: “Huillanamanta tigrashpaca shaicushcami sintirini. Pero huillanami ñucamanca cushi causaita cun” ninmi. Jehová Dios ñucanchijman sumaj causaita cushcamantaca achcatami pagui ninchij.

16. a) ¿Juan 15:15-pica ima regalomantataj parlacun? b) ¿Apostolcunaca Jesushuan apanacushpa catingapajca imatataj rurana carcacuna?

¹⁶ Jesushuan apanacuna. Jesusca paipaj apostolcunamanca ñuca shinami cushilla cana canguichij, cꞌuyaitapish ricuchishpami catina canguichij nircami (Juan 15:11-13). Chai qꞌuipaca: “Ñucahuan alli apanacujcunami canguichij” nircami. ¿Manachu Jesushuan apanacunaca sumaj can? Ari. Pero, ¿apostolcunaca Jesushuan apanacushpa catingapajca imatataj rurana carca? Jesusca: ‘Granota cancunapi pꞌucuchishpa catichij’ nircami (Juan 15:14-16-ta leyipai). Chashna nishpaca Diosmanta huillanamantami parlacurca. Jesusca paipaj apostolcunamanca ishqui huatacuna huashamanca: “Jahua pachamanta mandanamari ña mandagrin” nishpa huillaichij nircami (Mateo 10:7). Chaimantami Jesusca pai huañuna  tutaca llaquicuna shamujpipish ahuantashpa catinguichij, huillashpa catinguichij nishpa achcata animarca (Mateo 24:13; Marcos 3:14). Jesús mandashcata pajtachina sinchi laya ricurijpipish apostolcunaca huillanata mana saquircacunachu. Chashnami Jesushuan alli apanacushpa cati tucurcacuna. Cunanca apostolcunaman Dios shujtaj regalota cushcata yachashun.

17, 18. a) ¿Juan 15:16-pica ima regalomantataj parlacun? b) ¿Jehová Diosca ima shinataj apostolcunata ayudarca? c) ¿Huillashpa catingapajca imatataj rurana canchij?

¹⁷ Ñucanchij mañashcacunata Dios cutichinamanta. Jesusca paipaj apostolcunamanca ñuca shutipi imata mañajpica Jehová Diosca cungallami nircami (Juan 15:16). Chaita uyashpami apostolcunaca ashtahuan huillanata munashcacuna canga * (urapi tiyaj notata ricui). Apostolcunaca Jesús ñalla huañugrijtaca mana intindircacunachu. Pero Jesús huañujpipish Diosca paicunata ayudashpami catirca. ¿Ima shina? Apostolcunaca mana manchashpa huillangapajmi Diosta ayudahuai nishpa mañana carca. Chashna mañajpimi Diosca paicunaman fuerzata cushpa ayudarca (Hechos 4:29, 31).

¹⁸ Cunan punllacuna Diospaj Shimita huillana sinchi ricurijpica Jehová Diostami ayudahuai nishpa mañana canchij. Pai ñucanchijta ayudanataca tucui shunguhuanmi crina canchij. Ashtahuanpish huillanataca manataj saquinachu canchij. Chashna rurashpallami Jesushuan alli apanacushun (Filipenses 4:13). Jehová Dios ñucanchij mañashcacunata cutichijta yachashpa, Jesucristo ñucanchij amigo cashcamantaca ¿manachu achcata pagui ninchij? Ari. Chaimantami granota pꞌucuchicuj shina huillashpa catina canchij (Santiago 1:17).

19. ¿Imamantataj huillashpa catinchij? b) ¿Huillashpa catingapajca Diosca ima shinataj ayudan?

¹⁹ Cai temapi yachashca shinaca Diosta jatunyachingapaj, paipaj shuti alli nishca cachunmi huillanchij. Shinallataj paitapish Jesustapish cꞌuyashcamantami huillashpa catinchij. Chashnallataj millaicunata Dios imata ruragrijta gentecuna yachachunmi huillanchij. Ashtahuancarin gentecunata cꞌuyashcamantami huillanchij. ¿Huillashpa catingapajca Diosca ima shinataj ayudashca? Cushichishpa, sumaj causaita cushpa, Jesushuan apanacuchun saquishpa, ñucanchij mañashcacunata cutichishpami ayudan. Chaimanta, achca granota pꞌucuchij shina huillashpa catishunchij. Chaita rurajpica Diosca achcatami cushicunga.