1, 2. a) ¿Mana uyasha nij llajtacunapi huauqui panicuna huillashpa caticushcamantaca ima shinataj sintirinchij? (Jahuapi tiyaj dibujota ricui). b) ¿‘Quiquinpaj llajtapi’ huillanamantaca Jesusca imatataj nirca? (Urapi tiyaj notata ricui).

ESTADOS UNIDOS llajtamanta Sergio, Olindapish precursorcunami can. Paicunaca 80 huatacunata yallimi charincuna. Changa nanaicunata charishcamantami purinatapish mana tanto valincuna. Chashna jahuapish casi tucui tutamantacunami paicuna causan llajtapica 7 de la mañanata shuj plazaman rincuna. Buscuna shayana cꞌuchullapi shayarishpami gentecunaman publicacioncunata cuncuna. Gentecuna mana uyanata munajpipish paicunaca cushilla ñahuihuanmi huillashpa catincuna. Chaupi punlla tucujpimi paicunapaj huasiman gushtullata tigrancuna. Chai cusa huarmicunaca cada huatami semanapica 6 punllacunata chashna huillanaman llujshincuna.

² Sergio, Olinda shinallatajmi achca huauqui panicunapish paicuna causacun llajtacunapi Diospaj Shimita huillacuncuna.  Gentecuna mana uyasha nijpipish huillashpami catincuna. Can causacun llajtapi mana uyasha nijpipish mana shaicushpa huillacushcamantami felicitanchij * (urapi tiyaj notata ricui). Cambaj ejemploca huauqui panicuna ashtahuan huillashpa catichunmi animanga. Shinallataj experienciata charij huauqui panicunapishmi cambaj ejemplota catinata munangacuna. Por ejemplo, huaquin superintendentecunaca: “Diosta alli sirvijcunahuan huillanaman llujshishpaca achca animotami japini”, “gentecuna mana uyasha nijpipish paicuna layallatajmi mana manchashpa huillashpa catisha nini”, “paicunapaj ejemplomi ñucataca achcata animan” nircacunami.

3. a) ¿Imatataj cai temapica yachagrinchij? b) ¿Cai tapuicunataca imamantataj yachana canchij?

³ ¿Imataj ñucanchijtaca desanimachi tucun? ¿Alli granota pꞌucunaca imataj can? ¿Mana shaicushpa huillangapajca imatataj rurana canchij? nishca tapuicunatami cai temapica yachashun. Cai tapuicunata yachashpami ashtahuan huillanata munashun. Shinami Jesús mandashcataca alli pajtachishun.

4. a) ¿Judiocuna mana uyasha nijpica Pabloca ima shinataj sintirirca? b) ¿Imamantataj chashna sintirirca?

⁴ Diospaj Shimita mana uyasha nishca llajtacunapi huillanaca maipica sinchimi can. Canpish huaquinpica apóstol Pablo layachari sintiringui. Paica 30 huatacunata yallimi Diosmanta gentecunaman yachachirca. Chaimi achca gentecunaca Jesusta catijcuna tucurca (Hechos 14:21; 2 Corintios 3:2, 3). Pabloca judiocunamanpishmi Diospaj Shimita yachachinata munarca. Pero achca judiocunaca mana uyanata munarcacunachu. Ashtahuanpish huaquin judiocunacarin paitaca catirashpami llaquichircacuna (Hechos 14:19; 17:1, 4, 5, 13). Chaita ricushpami Pabloca llaquilla sintirishpa: “Ñucaca jatun llaquitami charini. Chai nanaica ñuca shungupi caticunllami” nircami (Romanos 9:1-3). Pabloca shungumantami gentecunata achcata cꞌuyaj carca. Diosmanta huillanatapish achcatami munaj carca. Pero judiocunaca Jehová Dios paicunata cꞌuyashcataca mana intindisha nircacunachu. Chaimantami Pabloca achcata llaquirirca.

5. a) ¿Imamantataj huillanata munanchij? b) ¿Huaquinpica imamantataj huillacushpaca desanimari tucunchij?

⁵ Gentecunata shungumanta llaquishpami Pablo shina ñucanchijpish Diosmanta huillanchij (Mateo 22:39; 1 Corintios 11:1). Ñucanchijca Diosta sirvishpa cushilla causai tucushcataca allimi yachanchij. Gentecunapish chaita cuentata cuchunmi Diosmanta yachachishpa catinchij. Shinallataj pai shamuj punllapi imata ruragrishcatapishmi huillashpa catinchij. Caita ruranaca gentecunaman shuj sumaj regalota cucuj shinami can. Paicuna cai regalota chasquichunmi munanchij. Convidashcata mana chasquijpica Pablo shinami ñucanchijpish achcata llaquirinchij. ¿Sinchi feta mana charishcamantachu chashna sintirinchij? Mana. Ashtahuancarin gentecunata cꞌuyashcamantami chashna sintirinchij. Chaimantami huaquinpi desanimarishca cashpapish huillashpa catinchij. Elena shuti panimanta parlashun. Panica 25 huatacunatami precursora shina sirvin. Paica: “Ñucapajca huillanaca mana jahuallachu can. Shinapish huillanami tucuimanta yalli valishca can” ninmi. ¿Manachu cai pani laya ñucanchijpish sintirishcanchij?

6. ¿Imatataj yachagrinchij?

⁶ Maipi huillashpapish Diostami cushichi tucunchij. ¿Imamantataj chashna ninchij? Caita yachangapajca Jesús parlashca ishqui chꞌimbapuraicunatami ricushun. Cai chꞌimbapuraicunahuanmi Jesusca granota pꞌucuchina minishtirishca cashcata ricuchirca (Mateo 13:23). Puntapica uvas yura imata nisha nishcatami ricushun.

7. a) ¿Uva yurapish, chagrayujpish, ramacunapish picunataj can? b) ¿Ima tapuitataj yachana canchij?

⁷ (Juan 15:1-5, 8-ta leyipai). Jesusca paita catijcunataca: ‘Ñucaca uva yuratajmi cani, ñuca Yayaca chagrayujmi. Ñucapi caj ramacunaca cancunami canguichij’ nircami. Qꞌuipaca paipaj apostolcunataca: “Cancunaca ñuca yachacujcuna shinataj causashpa achca granota pꞌucushpaca, ñuca Yayatami jatunyachinguichij” nircami * (urapi tiyaj notata ricui). Pero ¿Jesús parlashca granoca imataj can? Cai granomanta Jesús mana tucuita huillajpipish ima cashcatami yachai tucunchij.

8. a) ¿Granota pꞌucuchinaca imamantataj Diosta catijcunata ruranaca mana canchu ninchij? b) ¿Diosca imata rurachuntaj mañan?

⁸ Jesusca: ‘Ñuca yayaca ñucapi caj ramacuna maijanpish mana pꞌucujpica anchuchingami’ nircami. Chaimantami Jehová Diosta sirvijcuna cangapajca granota pꞌucuchicuj laya cana canchij (Mateo 13:23; 21:43). Alli granota pꞌucuchinaca Jesusta catijcunata ruranaca mana canchu (Mateo 28:19). ¿Imamantataj caita ninchij? Diospaj Shimita mana uyasha nij llajtacunapi huauqui panicuna yachachijpipish gentecunaca mana Jesusta catijcuna tucusha nincunachu. Chaimantami huauqui panicunaca granota mana pꞌucuchicuj ramacuna shina ricurinman. Pero yuyarishunchij, gentecuna Diosta sirvichunca mana obligai tucunchijchu. Diospish chaitaca allimi yachan. Chaimantami Diosca ñucanchij imata rurana pudishcallata rurachun mañan. Shinami paica ñucanchijta cꞌuyashcata ricuchishca (Deuteronomio 30:11-14).

9. a) ¿Granota pꞌucuchingapajca imatataj rurana canchij? b) ¿Imatataj yachagrinchij?

⁹ ¿Granota pꞌucuchinaca imataj can? Ñucanchij imata rurana pudishcata ruranami can. Pero, ¿Jehová Diosca imata rurachuntaj mandashca? Pai churashca Mandanamanta tucui gentecunaman huillachunmi mandashca. Chaitaca tucuicunami rurai pudinchij * (urapi tiyaj notata ricui) (Mateo 24:14). Caita ashtahuan intindingapajca Jesús parlashca tarpuj runamanta ashtahuan yachashun.

10. a) ¿Muyupish allpapish imatataj ricuchin? b)  ¿Trigo yuraca imatataj pꞌucun?

¹⁰ (Lucas 8:5-8, 11-15-ta leyipai). Tarpuj runamanta parloca caitami nisha nin: muyuca “Taita Diospaj Shimimi” o Dios churashca Mandanamanta alli huillaicunami can. Cutin allpaca gentecunapaj shungutami ricuchin. Tarpuj runa muyuta alli allpapi tarpujpica sapicunayuj tucushpami shuj mushuj yura tucurca. Chai yuramantami patsaj cutincama granoca pꞌucurca. Caipi yuyai, ¿shuj trigo yuramantaca achca trigo yuracunachu llujshin? Mana. Achca trigo muyucunami llujshin. Cai muyucunata tarpujpimi achca trigo yuracuna ricurin. Jesús parlashca chꞌimbapuraipica  shuj muyullamantami patsaj cutincama muyucuna llujshijta ricunchij. Chai parlohuanca ¿huillanamantaca Jesusca imatataj yachachisha nirca?

11. a) ¿Muyuta pꞌucuchishcata ricuchingapajca imataj mana minishtirin? b) ¿Mushuj muyucunata pꞌucuchingapajca imatataj rurana canchij?

¹¹ Ñucanchij yaya mama o pi ñucanchijman Diosmanta yachachishpaca shuj muyuta ñucanchij shungupi tarpucuj shinami carca. Yachanata munajpica paicunaca cushillami sintirircacuna. Diosmanta ashtahuan yachashpaca granota pꞌucuj yura layallatajmi ricurircanchij. Yuyarishun, trigo yura huiñashpaca mana yuracunatachu pꞌucun ashtahuanpish muyucunatami pꞌucun. Cai ejemplopi ricushca shinaca muyuta pꞌucuchingapajca Jesusta catijcunata ruranaca mana minishtirinchu * (urapi tiyaj notata ricui). Pero, ¿ima shinataj muyuta pꞌucuchicushcata ricuchinchij? Cutin yuyarishun ñucanchijman Diosmanta yachachishpaca muyuta tarpuj shinami carca. Ñucanchijpish Dios churashca Mandanamanta tucui laya huillashpami muyuta tarpushpa pꞌucuchicushcata ricuchinchij (Lucas 6:45; 8:1). Chaimanta alli granota pꞌucuchingapajca mana shaicushpami Diosmanta huillashpa catina canchij.

12. a) ¿Uva yuramanta, tarpuj runamanta parlocunaca imatataj yachachin? b) ¿Caita yachashpaca ima shinataj sintiringui?

¹² ¿Uva yuramanta, tarpuj runamanta parlocunaca imatataj yachachin? Granota pꞌucuchingapajca tucui gentecuna ñucanchij huillashcata uyachunca mana minishtinchijchu. Mana uyasha nijpipish huillanataca manataj saquinachu canchij. Pablopish: “Cada quiquin imata rurashca shinallatajmi japinga” nircami (1 Corintios 3:8). Yaya Diosca ñucanchij esfuerzocunata ricushpami bendicianga. Mana shujtajcunata paita sirvichun ayudashcallamantachu bendicianga. Por ejemplo, Matilda shuti panica 20 huatacunatami precursora shina sirvicun. Paica: “Ñucanchij esfuerzocunata ricushpa Jehová Dios bendicianata yachashpami cushilla sintirini” nircami.

13, 14. ¿Romanos 10:1, 2-pi nishca shinaca Pabloca imamantataj huillashpa catirca?

¹³ ¿Alli granotaca ima shinataj pꞌucuchishpa cati tucunchij? Apóstol Pablopaj ejemplomanta  ashtahuan yachashun. Paica achca judiocuna pai huillashcata mana uyasha nijpimi llaquilla sintirirca. Shina sintirishpapish huillanataca manataj saquircachu. Pabloca Roma llajtapi Diosta sirvijcunamanmi judiocunamanta ima shina sintirishcata huillarca. Paica: “Israelcuna quishpirishca canaman chayachun nishpami, ñuca shungupica chai yuyailla Diosta mañacuni. Paicuna Dios yuyailla cashcataca, ñucapish huillai tucunimi. Chashna cashpapish Diosta rijsina cashca shinatajca mana rijsincunachu” nircami (Romanos 10:1, 2). Pabloca ¿imamantataj huillashpa catirca?

¹⁴ Pabloca tucui shunguhuanmi huaquin judiocuna quishpirichun munarca. Chaimantami huillanataca manataj saquirca (Romanos 11:13, 14). Shinallataj paicuna Dios churashca Mandanamanta uyachunmi Pabloca Diosta ayudahuai nishpa mañarca. Ashtahuancarin huaquin judiocuna “Dios yuyailla” cashcatami ricurca. Chaimantami pai layallataj Jesusta alli catijcuna tucunata yacharca.

15. ¿Ima shinataj Pablopaj ejemplota cati tucunchij?

¹⁵ Pablopaj ejemplota catingapajca puntapica, alli shungu gentecunata mashcana munaitami charina canchij. Ishquipica, huillanaman rijpi alli shungu gentecuna ñucanchijta uyachunmi Jehová Diosta mañana canchij (Hechos 13:48; 16:14, NM). Silvana panica 30 huatacunatami precursora can. Paica: “Gentecunaman cushilla  huillangapajmi Jehová Diosta ayudahuai nishpa mañani” ninmi. Ashtahuanpish alli shungu gentecunapajman angelcuna chayachichunmi Diosta mañana canchij (Mateo 10:11-13; Apocalipsis 14:6). Robert huauquica ñami 30 huatacunata precursor shina sirvicun. Paica: “Gentecuna ima shina causacushcataca angelcunami yachan. Paicunahuan colaboranaca sumajmi can” ninmi. Quimsapica, gentecunapaj alli ruraicunatami ricuna canchij. Carl shuti ancianopish ñami 50 huatacunata yalli bautizarishca can. Paipish: “Gentecuna cushilla ñahuihuan chasquijpi, tapuicunata rurajpica Diosmanta yachana munaita charishcatami ricuni” ninmi. Cai quimsa pasocunata rurashpami Pablo shina alli granota pꞌucuchishun.

16, 17. a) ¿Eclesiastés 11:6-pi nishcamantaca imatataj yachai tucunchij? b) ¿Ñucanchij alli conductata ricuchijpica imatataj shujtajcunaca yuyangacuna?

¹⁶ Huaquinpi gentecuna Diosmanta mana uyanata munajpipish huillashpami catina canchij. Tal vez shuj punlla paicunapaj shunguman Diospaj Shimi chayai tucushcatami yuyarina canchij (Eclesiastés 11:6-ta leyipai). Achca gentecunami ñucanchijmanta pandata yuyancuna. Mana uyasha nishpapish ñucanchij ima shina churarishcata ricushpa, shujtajcunata alli tratajta ricushpa, cushilla ñahui purijta ricushpaca tiempohuanca ñucanchijmantaca allitami yuyangacuna. Sergio y Olindaca chaitami cuentata curcacuna.

¹⁷ Sergioca: “Ungushca cashcamantami plazaman mana rircanchij. Plazaman tigramujpica gentecunaca: ‘¿Imataj tucurcanguichij? Cancunata cutin ricushpami cushicunchij’ nircacunami” ninmi. Olindapish: “Busta manejajcunapish saludarcacunami. Asientopi tiyacujcunapish ‘allitami ruracunguichij’ nircami. Revistacunatapishmi mañarcacuna” ninmi. Shuj cutinca shuj runami cai cusa huarmi carritohuan huillacun puestoman chayarca. Chayashpaca paicuna huillacushcamanta pagui nishpami sisacunata curca.

18. ¿Imamantataj huillanataca mana saquina canchij?

¹⁸ Bibliapica: “Chishitapish ama samaricuichu” ninmi. Shinaca gentecunapaj shungupi muyuta tarpuj shina huillanataca amataj saquishunchijchu. Chashnami tucui ‘cai pachapi causajcunaman’ Diospaj Shimi huillarichun ayudashun (Mateo 24:14). Jehová Diospaj ñaupajpipish alli ricurishcamantami cushilla sintirishun. ‘Ima shamujpipish manataj saquirishpa alli granota pꞌucuchijcunataca’ Diosca achcatami cꞌuyan.