ESCUELAPI cajpica ñucanchij pueblopica ima cambiocuna mana tiyarcachu. Primer gradomanta escuelata tucuchingacamami chai compañerocunallahuantaj estudiarcani. Chai pueblopi causajcunapaj shuticunatapishmi yacharcanchij.

Liberty nishca pueblopica achca fincacuna, sara chagracunapishmi tiyarca. Ñuca yayaca chai pueblopimi shuj fincapi trabajarca. Joven cashpaca ñuca yayahuanmi campopi trabajanata, shuj tractorta manejanatapish alli yacharcani.

Ñuca huacharinapajca ñuca mamaca 35 huatacunatami charirca. Cutin ñuca yayaca 56 huatacunatami charirca. Paica mana joven cashpapish sinchi, sano runami carca. Shinallataj alli trabajajmi carca. Ñucanchijtapish alli trabajanatami yachachirca. Mana achca cullquita charishpapish micunata, churanata nunca mana faltachircachu. Maipi causanataca siempremi charircanchij. Ñuca yayaca 93 huatacunayuj cashpami huañurca. Cutin ñuca mamaca 86 huatacunayuj cashpami huañurca. Paicunaca Diosta mana sirvijcunachu carca. Shinapish ñuca shuj huauquimi 1972 huatamanta anciano shina Diosta sirvicun.

Ñuca mamaca siempremi Diosta yuyarij carca. Chaimi cada domingo iglesia bautistaman  ñucanchijta pusharca. 12 huatacunata charishpami Trinidadmamta parlajta uyarcani. Chaimantami ñuca mamataca: “¿Ima shinataj Jesusca paillataj Yaya, Churi, cai tucun?” nircani. Chaipimi paica: “Chaitaca mana intindi tucunchijchu” nircami. Chashna nijpimi ñucapish chaillatataj yuyarcani. Ña 14 huatacunata charishpaca shuj larca yacupimi bautizarircani. Chaipica shujca Yayamanta, shujca Churimanta, shujca espiritumanta nishpami quimsa cutin yacupi pambarcacuna.

Colegiopica shuj boxeador amigotami charircani. Chai amigo inquitajpimi ñucapish macanacunata yachai callarircani. Qꞌuipaca Golden Gloves nishca organizacionmanmi yaicurcani. Pero boxeanataca mana alli yacharcanichu. Chaimantami asha macanacuipi participashca qꞌuipaca chai organizacionmanta llujshircani. Chai qꞌuipaca ñucataca cuartelmanmi aparrircacuna. Cuartelmantaca Alemania llajtamanmi cacharcacuna. Chaipi cajpimi soldadocunata pushajcunaca militarcunapaj escuelaman cacharca. Paicunaca: “Canca militarcunata alli pushajmi cangui” nircami. Ñucaca militar canataca mana munarcanichu. Pero chai tiempopica ishqui huatata soldado shina sirvinaca obligadomi carca. Chaimantami 1956 huatapica chai escuelamanta llujshircani. Pero asha tiempo qꞌuipaca Diosta sirvijcunahuanmi tandanacurcani.

Diosmanta manaraj yachashpaca peliculacunapi ricushca shina, gentecunapaj yuyaita catishpami cꞌari cꞌari shina cashcata sintircani. Bibliamanta yachachijcunaca ñucapajca mana cꞌari laya cajtami ricurcani. Shuj punllaca ñuca causacushca pueblopi mushuj puca carrohuan paseacujpimi ishqui solteracuna saludarcacuna. Paicunaca ñuca panipaj cuñadacunami carca. Ishquindijtajmi testigo de Jehovacuna carca. Huillaj, Rijchari revistacunatami ñucaman saquijcuna carca. Pero Huillaj revistata leyinaca sinchimi carca. Paicunaca Estudio de Libro de Congregación nishca tandanacuiman invitarcacuna. Chai tandanacuitaca paicunapaj uchilla huasipimi rurajcuna carca. Chaipica tapuicunata cutichishpami Bibliata yachajcuna carca. Ñucaca: “Yuyarishami” nircanimi. “¿Ciertotajchu nicungui?” nishpami tapurcacuna. Chaimi: “Ciertotami nicuni” nircani.

Yuyarishami nishca jahuapish ima nishcataca pajtachinami carcani. Chaimantami chai tutaca tandanacuiman rircani. Chaipica huahuacuna Bibliamanta achcata yachajta ricushpami mancharido saquirircani. Achca cutin mamitahuan iglesiaman rij cashpapish Bibliamantaca casi ni imata mana yacharcanichu. Pero Bibliata yachasha nishpami hermanocunahuan estudiai callarircani. Chashnami Diospaj shuti Jehová cashcata yacharcani. Asha huatacuna huashamanca ñuca mamataca “Testigo de Jehovacunaca picunataj can” nijpica, “paicunaca shuj yuyaj runa Jehová nishcatami adoran” nircami. Bibliamanta yachashpami ñuca ñahuicunaca amsamanta pascarishcata shina sintircani.

Yachachishcacuna mana llulla cashcata ricushpami espiritualmente rato huiñarcani. Punta cutin tandanacuiman rishcamantaca 9 quillacuna qꞌuipallami marzo de 1957 huatapi bautizarircani. Bibliapi shuj cꞌari runa ima shina cana cashcata yachashpami ñuca yuyaita cambiarcani. Chashnami cushilla sintirircani. Jesusca paillami jucha illaj, poderyuj runa carca. Cashna cashpapish paica macanacuicunapica  mana chagrurircachu. Ashtahuanpish Isaías 53:2, 7-pi huillashca shinaca paita llaquichichunmi saquirca. Chaimantami Jesusta alli catijcunaca ‘tucuicunata cꞌuyana’ cashcata yacharcani (2 Timoteo 2:24).

1958 huatapimi precursor tucurcani. Pero qꞌuipaca Gloriahuan cazarana cashcamantami precursor canata saquircani. Paimi punta cutin tandanacuiman invitarca. Gloriahuan cazarashcamantaca nunca mana arrepintirinichu. Ashtahuanpish cushillami sintirini. Paica cunancamami ñucapajca sumaj huarmi can. Orotapish yalli valishcami can. Cunanca Gloriami paipaj causaimanta ashata parlanga:

“16 turi ñañacunatami charircani. Mamitaca Diosta alli sirvijmi carca. 14 huatacunata charijpimi paica huañurca. Chai qꞌuipami ñuca yayaca Bibliamanta yachai callarirca. Ñuca ñaña colegiota tucuchingapajpish ashallami faltarca. Chaimi ñuca yayituca directortaca: ‘Ñuca ishqui huahuacuna ¿clasesman turnashpa shamui tucunchu?’ nirca. Paica ari nircami. Chaimantami ñuca ñaña clasesman rijpica ñucaca uchilla turi ñañacunata cuidashpa saquirij carcani. Chishipish ñuca yaya shamunapajca meriendata yanushpami shuyaj carcanchij. Ñuca ñaña colegiota tucuchingacamami chaita rurarcanchij. Ishqui familia testigo de Jehovacunami Bibliamanta yachachircacuna. Paicuna ayudajpimi ñucapish, ñuca 10 turi ñañacunapish bautizarircanchij. Diosmanta huillanataca dimastij munashpapish gentecunahuan parlanacunataca mancharcanimi. Pero ñuca cusami cai tucui huatacunata ayudashca”.

Febrero de 1959 huatapimi Gloriahuan cazararcani. Precursorcuna cashcamantami cushilla carcanchij. Testigo de Jehovacunapaj central mundial nishcapi sirvinata munashcamantami julio quillapi solicitudta cacharcanchij. Betelpi sirvij huauqui Simon Krakermi entrevistarca. Paica: “Betelpica cazadocuna sirvichunca mana saquicunchijchu” nircami. Shina nijpipish chaipi sirvina esperanzataca nunca mana chingachircanchijchu.

“Maipitaj huillai tucunchij” nishpami central mundialman cutin escribircanchij. Chaimi Arkansas llajtapi caj Pine Bluff pueblopi huillashpa ayudaichij nirca. Chaipica ishqui congregacionllami tiyarca. Shuj congregacionca blancocunapaj, cutin caishujca yana huauqui panicunapajmi carca. Ñucanchijtaca yana huauquicunapaj congregacionmanmi cacharca. Chaipica 14 publicadorcunallami tiyarca.

Chai tiempoca leypica blanco gentecuna, yana gentecunahuan tandanacuchunca mana saquijchu carca. Tandanacujpica llaquichijcunami carca. Chaimantami ñucanchijca separado tandanacuj carcanchij. Huaquin lugarcunapi Tandanacuna Huasicunata llaquichishcamantami achca huauquicunaca paicunapaj Tandanacuna Huasitapish llaquichinata mancharcacuna. Shinallataj Blanco gentecuna causan pushtupi yana huauqui panicuna huillacujta ricushpaca policiacunaca prezujcunami carca. Maipicarin macajcunami carca. Shinapish huillashpa catingapajca gobierno churashca leycunatami cazuj carcanchij. Chai ley ima horapish tucurichunmi munarcanchij.

Huillanaca sinchimi carca. Yana gentecuna causan ladopi huillacushpaca blanco gentecuna causan huasimanmi ñapish chayaj carcanchij. Paicunata ricushpaca Diospaj Shimita huillanata, mana cashpaca disculpata mañashpa rinatami utca yuyarina carcanchij.

Mantiniringapajca sinchitami trabajaj carcanchij. Casi tucui trabajocunapimi punllapica ashallata pagarcacuna. Gloriaca huaquin huasicunapimi trabajarca. Shuj huasipica ishquindij trabajachun saquishcamantami chaupi punllaca ña tucuchij carcanchij. Chai huasiyujcunaca almuerzachishpami cachaj carca. Cutin shujtaj huasipica tucui semanacunami Gloriaca planchaj carca. Ñucaca chai huasillapitajmi jardinta allichishpa, ventanacunata pꞌichashpa, shujtaj cosascunata ruraj carcani. Shinallataj shuj blanco runapaj huasipimi Gloriaca ucu ladomanta, ñucaca canlla ladomanta ventanacunata tucui punlla pꞌichaj carcanchij. Gloriaca chai huasi ucullapitaj cashpapish chai familiamanta separadomi carashcata mishqui micunata almuerzaj carca. Ñucaca carrocuna huaquichina ucupi micuj cashpapish mana llaquirijchu carcani. Chai familiaca shujtajcunapaj yuyaicunata catishcamantami chashna ruraj carca. Shuj  cutinca gasolinata churashca huashami chaipi atindijtaca: “¿Ñuca huarmi bañota utilizai tucunchu?” nijpi, paica colirashpa: “Bañoca huichcashcami can” nirca.

¡Huillanataca achcatami munarcanchij! Huauqui panicunahuanpish cushillami pasarcanchij. Pine Bluff puebloman chayashpaca shuj huauquipaj huasipimi causanaman rircanchij. Paica cunan tiempopi ancianocunata pushaj huauqui imata rurajtami ruraj carca. Paipaj huarmimanmi Gloriaca Bibliamanta yachachi callarirca. Cutin ñucaca paipaj ushushiman, hiernomanmi Bibliata yachachij carcani. Qꞌuipaca cai huauquipaj huarmipish, ushushipish bautizarircacuna.

Blanco huauquicunaca alli amigocunami carca. Paicuna micunaman invitajpi pi ama ricuchunmi tutacunalla rij carcanchij. Chai tiempopica Ku Klux Klan nishca organizacionca blancocuna paicuna laya mana cajcunata maltratashpa llaquichichunmi mandajcuna carca. Shuj tutaca shuj runami paipaj huasi pungupi tiyacurca. Paica chai organizacionpi caj runacuna shinami churarishca carca. Chashna gentecuna tiyajpipish huauqui panicunaca cꞌuyaita ricuchishpami catircacuna. Shuj punllaca asambleaman rinapaj cullquita minishtishcamantami shuj blanco huauquica ñucanchij carrota randirca. Shuj quilla qꞌuipaca yallitaj rupai punllapimi huillashpa, huaquin estudiocunata cushpa huasiman shaicushca tigramurcanchij. Huasiman chayashpaca ñucanchij carrota ricushpami mancharircanchij. Carro ventanapica: “Cancunapaj carrrota tigrachinimi. Shuj regalota shinami cuni” nishpami shuj notata saquishca carca.

1962 huatapica Nueva York llajta South Lansing nishca pueblopimi Escuela del Ministerio del Reino nishcaman invitarcacuna. Chaipica superintendentes de circuito, de distrito y congregacioncunata pushajcunami shuj quillata cursota chasquijcuna carca. Chai tiempopica imapi mana trabajacurcanichu. Shuj punllaca Pine Bluff pueblopi shuj empresapi trabajachunmi entrevistarcacuna. Contratajpica ñucami punta yana runa chai empresapi trabajagrircani. Trabajota cujpimi imata ruranata mana yacharcani. Pero ashalla cullquita charishcamantami chai cursoman mana rishpa trabajota chasquinata yuyarircani. Chaimi mana ri tucunichu nishpa shuj cartata escribigrircani. Pero shuj pani cꞌuyaita ricuchishcatami mana cungarini.

Shuj tutamantaca cai panimi shuj sobrepi achca cullquita curca. Paipaj cusaca mana testigochu carca. Ñucanchijta ayudangapajca algodón yuracunapi mana alli qꞌuihuata llujchishpami paipaj huaquin huahuacunahuan cullquita ganashcacuna carca. Chaipajca paicunaca utcami jatarishpa campoman rijcuna carca. Chai panica: “Escuelaman rilla. Tigramushpaca tucui ima yachashcata ñucanchijman yachachingui” nircami. Shinallataj ‘¿cinco semana qꞌuipa trabajanaman ri tucunichu?’ nishpami empresapi tapurcani. Pero paicunaca ‘¡Mana!’ nircami. Chashna nijpipish Escuela del Ministerio del  Reino nishcaman rinatami decidircani. Chai empresapi mana trabajashcamantami cushilla sintirini.

Cunanca Gloriami Pine Bluff pueblopi ima shina causashcata parlanga. “Ñucapajca chai pueblopi Diosmanta huillanaca sumajmi carca. Tutamanta ladoca huasin huasinmi huillaj carcanchij. Cutin chishi ladoca estudiocunatami cuj carcanchij. Achca estudiocunata charishcamantami 11 de la nochecama maipica saquirij carcanchij. Huillanata demastij munashcamantami superintendente de circuito canataca mana tanto munarcanchij. Pero Jehová Diosca shujtaj asignaciontami ñucanchijmanca curca”.

Pine Bluff pueblopi cashpami precursores especiales canata munashpa shuj solicitudta jundachircanchij. Ñucanchij superintendente de distritoca Texas llajtapi precursores especiales shina sirvichunmi munarca. Chaimantami precursores especiales canata casi seguros carcanchij. Pero sucursalca Enero de 1965 huatapimi shuj cartata cachashpa superintendente de circuito cachun invitarcacuna. Chai tiempollapitajmi huauqui Leon Weavertapish superintendente cachun nombrarcacuna. Cunanca cai huauquica Estados Unidos llajtapi, Comité de Sucursalpi ayudajcunatami pushaj can.

Superintendente de circuito canataca achcatami mancharcani. Chai tiempoca huauqui James Thompsonmi superintendente de distrito carca. Paica shuj huata huashamanmi ñuca ima shina cashcata ricurca. Chaimi shuj alli superintendente cachun imapi mejoranata nirca. Asha tiempota superintendente shina sirvicushpami pai nishcacuna alli cashcata ricurcani. Huauqui Thompsonmi alli superintendente cachun punta cutin ayudarca. Diosta tucui shunguhuan sirvij cashcamantami paimantaca achcata yacharcani.

Chai huatacunaca ima shina superintendente canataca ashallatami yachachijcuna carca. Por ejemplo, shuj superintendente congregacionta visitajtami shuj semanata ricuj carcani. Cutin catij semanataca ñuca ima shina shujtaj congregacionta visitajta ricushpami chai superintendenteca imapi mejorana cashcata nirca. Cai huauqui rijpimi Gloriataca: “¿Imamantataj paica rina can?” nishpa tapurcani. Pero ñucanchij ayudachun saquijpica huauqui panicuna maipipish ayudaj cashcatami cuenta curcani. Huauqui James Brown, Fred Ruskpish ima shina ayudashcatami cunancama yuyarini. Huauqui Brownca superintendente shinami sirvij carca. Cutin huauqui Ruskca Betelpimi sirvij carca.

Chai punllacunapica blanco gentecunaca paicuna laya mana cajcunataca achcatami maltratajcuna carca. Shuj punllaca Tennessee llajtapi caj congregacionta visitacujpimi Ku Klux Klan nishca organizacionca shuj marchata rurarcacuna. Cutin  shujtaj punllaca huauqui panicunahuan huillacushpami shuj restaurantepi micunaman yaicurcanchij. Ñuca bañoman rijpimi shuj tatuado runa catirca. Chaita ricushpami shuj jatun blanco huauquica catishpa rishca carca. Paica: “Huauqui Herd ¿allichu cangui?” nishpami tapurca. Cai huauquita ricushpami chai runaca bañota mana utilizashpa chai rato rirca. Gentecunaca mana paicunapaj colorllamantachu shujtajcunata yalli cashcata sintincuna. Ashtahuanpish juchayujcuna cashcamantami chashna sintincuna. Chaitami cai tucui huatacunata ricushcani. Ñucanchij huauqui panicuna blanco o yana cashpapish ñucanchijta cꞌuyashcamantami imatapish ñucanchijmanta rurai tucungacuna.

33 huatacunata superintendente shina sirvishpaca sumaj experienciacunatami charishcanchij. Jehová Diospish ñucanchijtaca achcatami bendiciashca. Agosto de 1997 huatapimi Estados Unidos Betelpi sirvichun invitarcacuna. Shuj quilla qꞌuipami chaipi sirvi callarircanchij. Ñucanchijca 38 huatacuna huashamanmi Betelpi sirvinata munashpa shuj solicitudta jundachircanchij. Cai tucui huatacuna qꞌuipami Betelpi sirvina munaica pajtarirca. Betelpi cashpaca asha tiempopajllami invitashcanga nishpami yuyarcanchij.

Betelpica Departamento de Servicio nishcapimi ayudai callarircani. Chaipi trabajaj huauquicunaca tucui llajtamanta ancianocuna, superintendente de circuitocuna sinchi tapuicunata rurashcatami cutichijcuna carca. Paicunamantaca achcatami yacharcani. Pacienciahuan ñucaman yachachishcamantapish pagui ninimi. Departamento de Servicioman cutin cachajpica callaripi shinallatajmi yachashpa catiman.

Ñucanchijpajca Betelpi causanaca sumajmi. Betelpi sirvingapajca utcami jatarina can. Chaita ruranataca achcatami munanchij. Shuj huata qꞌuipaca Comité de Servicio de Cuerpo Gobernante nishcapimi ayudai callarircani. Cutin 1999 huatapica Cuerpo Gobernantepi sirvichunmi agllarcacuna. Chaipi sirvishpami congregacioncunataca Jesucristo pushacushcata yachashcani. Mana runacunachu pushacun.

Ñuca causaipi yuyashpaca Amós shinami sintirini. Amosca probrecuna micuna higocunatami pallashpa purij carca. Chai trabajotaca humildecunallami rurajcuna carca. Chashna humilde runatami Diosca paipaj profeta cachun agllarca. Achca bendicioncunatapishmi curca (Amós 7:14, 15). Ñucapish campopi trabajaj pobre runapaj huahuallami cani. Pero Diosca paita sirvichunmi agllashca. Shinallataj ima shina bendiciashcatapish mana tucuita huillai tucunichu (Proverbios 10:22). Pobremi huacharircani. Pero Jehová Dios espiritualmente achcata bendiciashcamantami cushilla cani. Cashna bendicioncunata charinataca mana nunca yuyashcanichu.