1, 2. ¿Apocalipsis libromantaca imamantataj yachana canchij?

 SHUJ punllaca cambaj amigopaj fotocunatachari ricucungui. Chai fotocunapica mana rijsishca gentecunatachari ricungui. Pero qꞌuipaca shuj fotopica canpish chaipi cashcatami ricungui. Chai fotota ricushpami chaita maipi llujchishcata, picunallahuan cashcata yuyaricungui. Canpish chaipi cashcamantami chai fotoca cambajca valishca can.

² Apocalipsis libromanta yachanaca shuj fotopi canpish cashcata ricuna layami can. ¿Imamantataj chashna ninchij? Ishqui yuyaicunata ricushun. Puntapica Apocalipsis libroca ñucanchijpajmi quillcashca carca. Apocalipsis 1:1-pica: “Caicunaca Jesucristo ricuchishcacunami. Caicunataca Diosta sirvijcunaman ricuchingapajmi Diosmanta chasquirca” ninmi. Apocalipsis nishcacuna ñucanchijpaj cashcata yachashpaca cushillami sintirinchij.

3, 4. a) ¿Apocalipsis nishca profeciacunaca ima horataj pajtari callarirca? b) ¿Chaita yachashpaca imatataj rurana canchij?

³ Ishquipica Apocalipsispi tiyaj profeciacunaca cunan punllacunapimi pajtaricun. Apóstol Juanca: “Diospaj espíritu yuyachijpimi Amitopaj punllapi carcani” nircami (Apocalipsis 1:10). Juanca Apocalipsis librotaca huata 96-pimi quillcarca. Pero chaipajca Jesuspaj punllaca manaraj chayarcachu (Mateo 25:14, 19; Lucas 19:12). Ashtahuanpish Jesuspaj punllaca 1914 huatapimi callarirca. Chai huatamantami Jesusca jahua pachapi mandai callarirca. Apocalipsispi tiyaj profeciacunapish chai huatamantami pajtari callarirca.

 ⁴ Cai tiempopi Apocalipsispi tiyaj profeciacuna pajtaricushcata yachashpaca, Apocalipsis 1:3-pi ima nishcatami pajtachina canchij. Chaipica: “Shinallataj chaipi quillcashca shimicunata uyajcunapish, cazujcunapish cushicunmi” ninmi. Caipi nishca shinaca Apocalipsis nishca profeciacunata yachana, cazunami canchij. Cunanca Apocalipsis libropi tiyaj valishca consejocunata ricushun.

5. ¿Apocalipsis libropi nishca shinaca Jesusca imamantataj huaquin congregacioncunamanca consejocunata curca?

⁵ Apocalipsis libropica Jesusca tucui congregacioncunata alli rijsishcatami ricuchirca (Apocalipsis 1:12-16, 20; 2:1). Paica Asia Menorpi tiyaj 7 congregacioncunata alli rijsishcamantami paicunamanca valishca consejocunata curca. Chai tiempopi causashca Jesusta punta catijcunaca Jehová Diosta alli adorangapajmi chai consejocunata pajtachina carca. Cunan punllacunapish Diosta alli adorangapajca chai consejocunallatatajmi pajtachina canchij. ¿Caita intindishpaca Jesusmantaca imatataj yachanchij? Jehová Diosta alli adorangapaj cada uno imapi mejorana cashcataca Jesucristoca allimi yachan. Chaimantami ñucanchijtaca ñaupajman pushacun. Cunanca Jesús nishca consejocunata ima shina pajtachina cashcatami ricushun.

6. a) Apocalipsis 2:3, 4-pi nishca shinaca ¿Efesopi causashca huauqui panicunaca imata ruranatataj saquircacuna? b) ¿Paicunamantaca imatataj yachai tucunchij?

⁶ (Apocalipsis 2:3, 4-ta liyipai). Jehová Diosta shungumanta cꞌuyashpa catishunchij. Efesopi causashca huauqui panicunaca achca llaquicunatami ahuantashpa catircacuna. Shinapish Jesusca paicunataca: “Canca callaripi charishca cꞌuyaitami saquishcangui” nishpami advirtirca. Chai discipulocunaca Jehová Diosta alli adorangapajca paitami shungumanta cꞌuyana carcacuna. Cunan punllacunapish ñucanchijca chꞌican chꞌican llaquicunatami ahuantacunchij. Pero Jehová Diosca chaicunata ahuantachunllaca mana munanchu. Ashtahuanpish paita cꞌuyachun, agradicichunmi munan (Proverbios 16:2; Marcos 12:29, 30).

7. a) Apocalipsis 3:1 al 3-pi nishca shinaca ¿Jesusca Sardispi causashca huauqui panicunataca imamantataj consejarca? b) ¿Paicunamantaca imatataj yachanchij?

⁷ (Apocalipsis 3:1-3-ta liyipai). Espiritualmente rijcharishca catishunchij. Sardispi causashca huauqui panicunaca Jehová Diostami alli sirvircacuna. Shinapish qꞌuipaca dormiricuj shinami saquirircacuna. Chaimantami Jesusca paicunataca: ‘Rijcharishca caichij’ nishpa advirtirca. ¿Caimantaca imatataj yachai tucunchij? Jehová Diosca paita ima shina sirvishcataca manataj cungarinchu (Hebreos 6:10). Shinapish dormiricuj shinaca mana saquirinachu canchij. Ñaupa laya Yayitu Diosta ña mana sirvi tucushpapish, tucui pudishcahuanmi paita sirvishpa catina canchij. Chashnami tucuri punllacunacama rijcharishca cashun (1 Corintios 15:58; Mateo 24:13; Marcos 13:33).

8. ¿Laodiceapi causashca huauqui panicunaman Jesús cushca consejomantaca imatataj yachanchij?

⁸ (Apocalipsis 3:15-17-ta liyipai). Yayitu Diosta cushilla, tucui shunguhuan sirvishpa catishunchij. Laodiceapi causashca huauqui panicunaca Yayitu Diosta cushilla, tucui shunguhuan sirvinatami saquircacuna. Chaimantami Jesusca paicunataca: ‘Cancunaca llaquinayaj, pobrecunami canguichij’  nirca (Apocalipsis 3:19). ¿Caimantaca imatataj yachai tucunchij? Yayitu Diosta cushilla, tucui shunguhuan sirvingapajca pai cushca bendicioncunamanta, paipaj organización ayudacushcamantaca agradecidomi cana canchij (Apocalipsis 3:18). Shinallataj achca cosascunata charinallapica mana yuyanachu canchij. Chaipaj randica Diosta sirvinatami punta lugarpi churana canchij.

9. ¿Pérgamo y Tiatira congregacioncunaman Jesús imata nishcamantaca imatataj yachanchij?

⁹ Pandachij apostatacuna yuyaicunamanta cuidarishunchij. Jesusca Pergamopi causashca huauqui panicunataca congregacionta chꞌicanyachicushcamantami consejarca (Apocalipsis 2:14-16). Cutin Tiatirapi causashca huauqui panicunataca “Satanasmanta shamuj llulla yachachishcacunata” mana catishcamantami felicitarca. Bibliamanta verdadta yachashpa catichunpishmi animarca (Apocalipsis 2:24-26). Shinapish huaquin discipulocunaca panda crishcacunata caticushcamantami arrepintirina carca. ¿Caimantaca imatataj yachai tucunchij? Ñucanchijpish panda crishcacunata, yanga yachachishcacunataca mana catinachu canchij. Apostatacunaca Yayitu Diosta caticuj shinami cancuna. Pero paicunaca Biblia ima nishcataca mana catincunachu (2 Timoteo 3:5). Chaimanta paicuna ñucanchijta ama pandachichunca Diospaj Shimita alli estudiashpa catishunchij (2 Timoteo 3:14-17; Judas 3, 4).

10. ¿Pérgamo y Tiatira congregacioncunamantaca imatataj ashtahuan yachanchij?

¹⁰ Huainayanamanta, mapa cosascunamanta caruyashunchij. Pérgamo y Tiatira congregacioncunapica huaquincunaca huainayashpa, mana alli cosascunata rurashpami causarcacuna. Chaimantami Jesusca paicunataca sinchita consejarca (Apocalipsis 2:14, 20). ¿Caimantaca imatataj yachai tucunchij? Yayitu Diosta achca huatacunata sirvicujpipish o ima responsabilidadta charijpipish Jehová Diosca huainayanamanta caruyachunmi munan (1 Samuel 15:22; 1 Pedro 2:16). Cai mundopi causaj achca gentecunaca Dios pꞌiñashcacunata rurashpami causancuna. Chashna cajpipish Jehová Diosca ñucanchijcuna paita siempre cazuchunmi munan (Efesios 6:11-13).

11. ¿Caicamaca imatataj yachashcanchij? (“ Valishca consejocuna” nishca recuadrota ricui).

 ¹¹ ¿Caicamaca imatataj yachashcanchij? Jehová Dios ñucanchij adorashcata chasquichunca huaquin consejocunata pajtachina cashcatami ricushcanchij. Imapi mejorana cashcata cuentata cushpaca rato cambiangapaj esforzarishunchij (Apocalipsis 2:5, 16; 3:3, 16). Cunanca congregacioncunaman Jesús ima ashtahuan nishcatami ricushun.

12. ¿Esmirna y Filadelfia congregacioncunaman Jesús ima nishcamantaca imatataj yachanchij?

¹² Cunanca Esmirna y Filadelfia congregacioncunaman Jesús ima nishcata ricushun. Jesusca chai discipulocunataca: ‘Llaquita apanataca ama manchaichijchu. Cancuna ahuantajpica Diosmi cancunata bendicianga’ nircami (Apocalipsis 2:10-ta liyipai; 3:10). ¿Caimantaca imatataj yachai tucunchij? Ñucanchijtapish contracunaca catirashpami llaquichinga. Chashna llaquichijpipish ahuantanami canchij (Mateo 24:9, 13; 2 Corintios 12:10).

13, 14. ¿Apocalipsis capítulo 12-pi nishcacuna pajtarijpica Diospaj pueblohuanca imataj tucushca?

¹³ Apocalipsis libropica cunan punllacunapi Diosta sirvijcunata catirashpa llaquichinatami parlan. Capítulo 12-pica jahua pachapi Diospaj Gobierno mandai callarijpi shuj jatun guerra tiyashcatami parlan. Miguelca paipaj angelcunandijmi Diablohuan, paipaj demoniocunahuanpish macanacurcacuna. Miguelca Jesucristomi can (Apocalipsis 12:7, 8). Chai macanacuipica Jesucristoca Diablotapish, demoniocunatapish jahua pachamantami cai Allpaman shitarca. Chaimantami cai Allpapi causaj gentecunaca achcata sufricushcacuna (Apocalipsis 12:9, 12). ¿Chai punllamantaca Diabloca ima shinataj Diosta sirvijcunata llaquichicushca?

¹⁴ Apocalipsis libropica Diablo imata rurashcatami parlan. Diabloca jahua pachaman ña mana ri tucushcamantami cai Allpapi caj ungido huauqui panicunataca catirashpa llaquichicushca. Chai ungido huauqui panicunaca Diospaj Gobiernopi mandangapajmi agllashcacuna can. Paicunaca Jesusmantapishmi tucuicunaman huillancuna (Apocalipsis 12:17; 2 Corintios 5:20; Efesios 6:19, 20). ¿Cai profeciaca ima shinataj pajtarishca?

15. a) ¿Apocalipsis capítulo 11-pi parlashca “ishqui testigocunaca” picunatataj ricuchin? b) ¿Paicunahuanca imataj tucurca?

¹⁵ Diabloca Diospaj contracunata utilizashpami predicacionta pushaj huauquicunata llaquichirca. Chai pushaj huauquicunami Apocalipsis 11-pi parlashca  “ishqui testigocunata” * ricuchircacuna. Apocalipsis libropica chai “ishqui testigocunata” huañuchishcatami parlan (Apocalipsis 11:3, 7-11). ¿Caica ima shinataj pajtarirca? 1918 huatapica autoridadcunaca predicacionta pushaj 8 huauquicunatami yangamanta juchachircacuna. Carcelpipish achca tiempotami churarcacuna. Chashna tucushcamantami predicacionca chaipi tucurishca laya carca.

16. a) ¿1919 huatapica carcelpi churashca huauquicunahuanca imataj tucurca? b) ¿Chai huatamantaca Diabloca imata rurashpataj caticun?

¹⁶ Apocalipsis capítulo 11-pica chai “ishqui testigocuna” rato causarina cashcamantami parlan. Chai profeciaca huauquicunata carcelpi churajpi, manaraj shuj huata tucujpimi pajtarirca. 1919 huatapi, marzo quillapimi chai 8 ungido huauquicunaca carcelmanta llujshircacuna. Chai huashacarin autoridadcunaca paicunata yangamanta juchachishcacunatami anchuchircacuna. Shinapish Diabloca Diosta sirvijcunataca jatun yacuhuan apachicuj shinami catirashpa llaquichicushca (Apocalipsis 12:15). Diablo chashna llaquichicushcamantami ñucanchijpish sinchi feta charinata, ahuantashpa catinata minishtinchij (Apocalipsis 13:10).

17. ¿Diablo llaquichisha nijpipish Diosta sirvijcunaca ima ayudatataj charishcacuna?

¹⁷ Apocalipsis 12:16-pica: “Shinapish huarmitaca allpami ayudarca. Allpa pascarishpami dragonpaj shimimanta shitashca yacutaca millpurca” ninmi (Apocalipsis 12:16). Cai profeciapica autoridadcuna maipica Diospaj pueblota ayudashcatami ricuchin. Por ejemplo, Testigocunaca achca cutincunami libremente predicangapaj achca juiciocunata ganashcacuna. Libremente predicachun saquijpica Diosta sirvijcunaca tucui pudishcahuanmi predicashpa caticushcacuna (1 Corintios 16:9).

18. ¿Cai tucuri punllacunapica ima obratataj pajtachina canchij?

¹⁸ Jesusca: “Ñucata catijcunaca Diospaj Gobiernomanta alli huillaicunatami, tucui llajtacunapi causajcuna yachaj chayachun muyundij allpapi huillangacuna. Chai qꞌuipami  cai pachapaj ruraicunaca tucuringa” nircami (Mateo 24:14). Jesús ima nishcata pajtachingapajca angelcunapaj ayudatami charinchij. Apocalipsis libropica shuj ángel tucuicunaman huiñaipaj alli huillaicunata huillacujtami parlan (Apocalipsis 14:6).

19. ¿Diosta sirvijcunaca imacunallatataj huillana canchij?

¹⁹ Diosta sirvijcunaca Diospaj Gobiernomanta alli huillaicunallataca mana huillancunachu. Apocalipsis capítulos 8 al 10-pi nishca shinaca, angelcunaca millai gentecunahuan ima tucunatami huillacuncuna. Chaimantami Diosta sirvijcunapish millai gentecunahuan llaqui tucunata huillacunchij. Chashna sinchi huillaicunaca millaicunataca rundu laya, nina layami llaquichin (Apocalipsis 8:7, 13). Tucui gentecunaca cai tucuri punllacuna quichquiyamucushcata yachanatami minishtincuna. Chaita yachashpami tiempo tiyajpiraj paicunaca cambiai pudingacuna (Sofonías 2:2, 3). Cashna sinchi huillaicunataca la mayoría gentecunaca mana uyasha nincunachu. Jatun llaqui punllacuna callarijpicarin ashtahuan sinchi huillaicunatami huillana tucunga. Chaimantami mana manchashpa predicashpa catina canchij (Apocalipsis 16:21).

20. ¿Catij ishqui yachaicunapica imacunallatataj yachashun?

²⁰ Apocalipsispi tiyaj profeciacunaca cai tiempopimi pajtaricun. Chaimantami cai libropi ima nishcacunataca pajtachina canchij (Apocalipsis 1:3). Pero ¿contracuna llaquichijpipish ahuantangapaj, predicashpa catingapajca imatataj rurana canchij? Catij ishqui yachaicunapimi cai tapuimanta yachashun. Puntaca Diospaj contracunahuan ima tucunatami ricushun. Chai huashaca ahuantashcamanta ima bendicioncunata charinatami yachashun.