1. ¿Apocalipsis libropi nishca shinaca Diabloca imatataj ruracun?

 APOCALIPSIS libroca jahua pachapi Diospaj Gobierno ña mandacushcata, Diablotapish cai Allpaman shitashcatami huillan (Apocalipsis 12:1-9). Cai tucushcacunaca jahua pachapi causajcunapajca allimi carca. Pero cai Allpapi causajcunapajca llaquimi cashca. ¿Imamanta? Diabloca cai Allpapi Diosta sirvijcunataca yallitaj pꞌiñashcamantami llaquichicun (Apocalipsis 12:12, 15, 17).

2. ¿Llaquicunata ahuantangapajca imatataj yachana canchij?

² ¿Diablo llaquichicujpipish ima shinataj Diosta sirvishpa cati tucunchij? (Apocalipsis 13:10). Diosta sirvishpa catingapajca shamuj punllacunapi ima tucunatami yachana canchij. Apocalipsis libropica Diosta sirvijcunaca achca bendicioncunata chasquinata, cutin Diospaj contracunaca tucurina cashcatami parlan. Cunanca Apocalipsis libropi Diospaj contracunahuan ima tucuna cashcata ricushun.

3. ¿Apocalipsis libropica Diospaj contracunataca imacunahuantaj chꞌimbapuran?

³ Apocalipsis libropica Diospaj contracunataca huaquin señalcunahuan chꞌimbapurashcatami parlan (Apocalipsis 1:1). Diospaj contracunataca yallitaj jiru animalcunahuanmi chꞌimbapuran. Por ejemplo, Apocalipsis 13:1-pica mama cucha chaupimanta canchis umacunayuj, chunga gachucunayuj animal llujshicujtami parlan. Chai qꞌuipaca shujtaj manchanai millai animal Allpamanta llujshicujtami huillan. Chai animalca dragón layami riman. Paica cielomantami allpa pachaman ninata tamyachin (Apocalipsis 13:11-13). Shinallataj chai huashaca pucanicuj jatun  animalpi shuj huarmi tiyacujtami parlan. Cai quimsa jiru animalcunaca Diospaj contracunatami ricuchin. Paicunaca ñaupa tiempomanta cunancamami Jehová Diospaj, paipaj Gobiernopaj contra tucushcacuna. Chaimantami paicuna picuna cashcata yachanaca importante can (Apocalipsis 17:1, 3).

4, 5. ¿Daniel 7:15 al 17-ta liyishpaca Apocalipsis libropi parlaj animalcunamantaca imatataj intindinchij?

⁴ Diospaj contracuna picuna cashcata, cai señalcuna imata nisha nishcata yachangapajca Bibliatami alli estudiana canchij. Apocalipsis libropi señalcunataca Bibliapaj shujtaj librocunahuanmi alli intindi pudinchij. Por ejemplo, profeta Danielpish muscuipimi mama cuchamanta chuscu jatun animalcuna llujshijta ricurca (Daniel 7:1-3). Danielllatajmi cai jiru jatun animalcunaca chuscu gobiernocunata ricuchishcata parlarca (Daniel 7:15-17-ta liyipai). Caita yachashpami Apocalipsispi parlaj jatun animalcunapish cai Allpapi tiyaj gobiernocunata ricuchishcata intindinchij.

⁵ Apocalipsis libroca huaquin señalcunamantami parlan. Shinapish Bibliapaj shujtaj librocunapimi caicuna ima nisha nishcataca ashtahuan alli intindishun. Cunanca cai jiru jatun animalcunamanta yachashpa callarishun. Cai animalcuna picunata ricuchishcata, caicunahuan ima tucuna cashcata, caicunamanta imata yachai tucushcatapishmi ricushun.

6. ¿Apocalipsis 13:1 al 4-pi parlashca canchis umacunayuj jatun animalca picunatataj ricuchin?

⁶ ¿Canchis umacunayuj jatun animalca imatataj ricuchin? (Apocalipsis 13:1-4-ta liyipai). Apocalipsispi parlashca cai jatun animalca leopardoman rijchajmi can ninmi. Shinallataj osopaj chaquicunata shina, leonpaj shimita shina y chunga gachucunatami charin ninmi. Daniel capítulo 7-pipish chuscu animalcunamantami parlan. Shujca leonman rijchajmi carca. Shujca osoman rijchajmi carca. Caishujca leopardoman rijchajmi carca. Caishujpish chunga gachucunayujmi carca. Cai chuscu animalcunaca chuscu jatun mandajcunatami ricuchirca. Shinaca Apocalipsispi parlashca jatun animalca Daniel parlashca chuscu animalcuna shinallatajmi huaquin gobiernocunata ricuchin. Chaimantami Apocalipsis libropica: ‘Chai millai animalca tucui familiacunata, tucui pueblocunata, tucui rimaicunata, tucui llajtacunata mandangapajmi autoridadta chasquirca’ nin (Apocalipsis 13:7). Caita ricushpami canchis umacunayuj jatun animalca cai Allpapi tiyaj tucui gobiernocunata ricuchishcata intindinchij * (Eclesiastés 8:9).

7. ¿Jatun animalpaj canchis umacunaca maijancunatataj ricuchin?

⁷ ¿Cai jatun animalpaj canchis umacunaca imatataj ricuchin? Apocalipsis 17:10-pica: ‘Chai umacunaca canchis mandajcunatami ricuchin: pichca mandajcunaca ñami urmashca. Shuj mandajca cunanmi mandacun. Caishuj mandajca manaraj shamushcachu. Shinapish pai shamushpaca asha tiempollatami mandanga’ ninmi. Cai canchis gobiernocunaca achca podertami charishca. Caicunaca Diospaj pueblotami mandashcacuna o llaquichishcacuna. Apóstol Juanpaj punllacunapajca cai canchis jatun mandajcunamanta pichcaca ña mana mandacurcacunachu. Paicunaca Egipto, Asiria, Babilonia, Medopersia y Greciami carcacuna. Pero cai sujta poderyuj gobiernoca Juan causacujpimi mandacurca. Caica Romami carca. ¿Canchis tucuri poderyuj mandajca maijantaj can?

8. ¿Jatun animalpaj canchis umaca maijan gobiernocunatataj ricuchin?

⁸ Daniel libropi tiyaj profeciacunami cai canchis tucuri mandaj pi cashcata intindichun  ayudan. ¿Tucuri punllacunapica maijan gobiernocunataj mandacushca? (Apocalipsis 1:10). Reino Unido y Estados Unidos gobiernocunami mandacushca. Cai ishqui poderyuj gobiernocunami jatun animalpaj canchis uma can (Apocalipsis 13:1-4).

9. ¿Oveja shina ishqui gachucunayuj animalca picunatataj ricuchin?

⁹ Apocalipsis capítulo 13-pica Reino Unido y Estados Unidos imata rurashcatami parlan. Chaipica: ‘Chai animalca malta ovejapaj shina ishqui gachucunayujmi carca. Shinapish shuj dragón shinami rimai callarirca. Gentecuna ricuchunpishmi jatun milagrocunata ruran. Shinallataj jahua pachamantami cai allpaman ninata uriyachin’ ninmi (Apocalipsis 13:11-15). Y Apocalipsis capítulos 16 y 19-pica cai gobiernocunamanta parlashpaca ‘llulla profetami can’ ninmi (Apocalipsis 16:13; 19:20). Daniel libropipish Reino Unido y Estados Unidosmanta parlashpaca ‘jatuntami llaquichingacuna’ nircami (Daniel 8:19, 23, 24). Chaica Segunda Guerra Mundialpimi pajtarirca. Estados Unidosmanta, Reino Unidomanta cientificocunaca jatun bombacunata rurashpami achca llaquita apamurcacuna. Chashnami cai poderyuj llajtacunaca cielomanta allpa pachaman ninata tamyachirca.

10. ¿Jatun puca animalca ima organizaciontataj ricuchin?

¹⁰ Cunanca shujtaj jatun animalmantami yachashun. Cai animalca ña parlashca canchis umacunayuj jatun animal shinami can. Pero caica pucami can. Apocalipsis libropica cai animalmanta parlashpaca ‘pusaj jatun mandajmi can’ ninmi * (Apocalipsis 13:14, 15; 17:8, 11-ta liyipai). Apocalipsis 17:8 pi nishca shinaca pusaj jatun mandajca callaripica tiyarcami. Qꞌuipaca chingarircami. Shinapish qꞌuipaca cutinmi ricurirca. Organización de las Naciones Unidashuanmi chaica tucurca. Cai organizacionca cai Allpapi tiyaj gobiernocunatami apoyan. Callaripica cai organizaciontaca Sociedad de Naciones nishpami rijsircacuna. Qꞌuipaca Segunda Guerra Mundial callarijpica ña mana tiyarcachu. Pero tiempohuanca cutinmi tiyai callarirca. Cunanca cai organizaciontaca organización de las Naciones Unidas nishpami rijsinchij.

11. a) ¿Gobiernocunaca imatataj rurancuna? b) ¿Imamantataj cai gobiernocunataca mana manchana canchij?

¹¹ Gobiernocunaca paicunapaj nishcacunahuan, ruraicunahuanmi Jehová Diospaj contra tucuchun, paipaj pueblopaj contra tucuchun gentecunataca animan. Chashna rurashpami Tucui poderta charij Diospaj Armagedón macanacuipaj cai pachapi tiyaj mandajcunata tandachicuj shina can (Apocalipsis 16:13, 14, 16). Pero ñucanchijca mana mancharinachu canchij. Jehová Diosca paipaj Gobiernota apoyajcunatami utca quishpichinga (Ezequiel 38:21-23).

12. ¿Gobiernocunahuanca imataj tucunga?

¹² ¿Tucui gobiernocunahuanca imataj tucunga? Apocalipsis 19:20-pica: “Caballo jahuapi tiyacujmi manchanai millai animaltapish, llulla profetatapish japirca. Chai llulla profetami manchanai millai animalpaj ñaupajpi milagrocunata rurashpa manchanai millai animalpaj señalta chasquijcunata, chai animalman rijchajta rurashca animalta adorajcunata pandachirca. Caballo jahuapi tiyacujca manchanai millai animaltapish, llulla profetatapish paicuna causacujpiraj japishpami azufrehuan rupacuj nina cuchapi shitarca” ninmi. Cai gobiernocuna mandacujpimi Yaya Diosca paicunataca para siempre tucuchinga.

13. ¿Gobiernocunaca imata rurachuntaj munancuna?

¹³ ¿Ñucanchijca caimantaca imatataj yachanchij?  Diosta sirvijcunaca Yaya Diosta, paipaj Gobiernotapishmi apoyana canchij (Juan 18:36). Chaipajca politicapica mana chagrurinachu canchij. Pero maipica caita ruranaca sinchimi can. Gobiernocunaca ñucanchij nishcacunahuan, ruraicunahuanmi apoyachun munancuna. Paicunata apoyajcunaca jatun animalpaj sellotami chasquincuna (Apocalipsis 13:16, 17). Pero chashna chasquishpaca Diospaj ñaupajpica mana alli ricurincunachu, huiñai causaitapish mana charingacunachu (Apocalipsis 14:9, 10; 20:4). Chaimantami politicapica mana chagrurina canchij.

14. ¿Apóstol Juanca imatataj ricurca? (Apocalipsis 17:3-5).

¹⁴ Apóstol Juanca pucanicuj manchanai millai animalpaj jahuapi shuj huarmi tiyacujtami ricurca (Apocalipsis 17:1, 2, 6). Cai huarmica achca poderta charij huainayaj huarmimi can. Paipaj shutica Babilonia Jatun llajtami can. Cai huarmica cai pachapi tiyaj gobiernocunahuanmi huainayan (Apocalipsis 17:3-5-ta liyipai).

15, 16. ¿“Babilonia jatun llajtaca” imataj can?

¹⁵ ¿“Babilonia Jatun llajtaca” pitaj can? Cai huarmica mana gobiernocunachu can. ¿Imamantataj chashna ninchij? Apocalipsis libropica cai huarmica cai mundopi tiyaj gobiernocunahuanmi huainayan ninmi (Apocalipsis 18:9). ‘Cai huarmica jatun animalpaj jahuapimi tiyacun’ ninmi. Chashna nishpaca cai huarmica gobiernocunata controlasha nishcatami nisha nin. Shinallataj cai huainayaj huarmica mundopi tiyaj jatun negociocunatapish mana ricuchinchu. Apocalipsis libropica “allpa pachamanta comerciantecuna” huainayaj huarmi cashcataca mana ninchu (Apocalipsis 18:11, 15, 16).

¹⁶ Maipica Bibliapica huainayanamanta parlashpaca Diosta traicionashpa yanga dioscunata adoranatami nicun. Mana cashpaca cai mundopaj millai ruraicunahuan chagrurinatami nin (1 Crónicas 5:25; Santiago 4:4). Cutin Bibliapica Diosta tucui shunguhuan sirvinamanta parlashpaca chuya cana cashcatami nin (2 Corintios 11:2; Apocalipsis 14:4). Ñaupa punllacunapica Babilonia llajtapica achca panda religioncunami tiyarca. Shinaca huainayaj huarmi Babilonia Jatun llajtaca tucui panda religioncunatami ricuchin (Apocalipsis 17:5, 18; caimanta ashtahuan yachangapajca “¿Qué es Babilonia la Grande?” nishca yachaita, jw.org paginapi ricui).

17. ¿Babilonia Jatun llajtahuanca imataj tucunga?

¹⁷ ¿Babilonia Jatun llajtahuanca imataj tucunga? Apocalipsis 17:16, 17-pica: “Can ricushca chunga gachucunapish, manchanai millai animalpish huainayaj huarmita pꞌiñashpami pai tucui imalla charishcacunata quichungacuna. Shinallataj lluchullatami saquingacuna. Paipaj aichataca micungacunami, paitapish ninapimi tucui rupachingacuna. Diosca paipaj munaita rurachunmi paicunapaj shungupica shuj yuyaita churashca. Tucuicunami shuj yuyaillata charincuna” ninmi. Muyundij Allpapi tiyaj tucui panda religioncunataca pucanicuj jatun animalmi o Naciones Unidasmi tucuchinga. Pero chaita rurachunca Jehová Diosmi yuyaita cunga (Apocalipsis 18:21-24).

18. ¿Babilonia Jatun llajtahuan ama chagruringapajca imatataj rurana canchij?

¹⁸ ¿Caimantaca imatataj yachanchij? Diosca “ima mapa illajlla” adorachunmi munan. Caita ruranaca importantemi can (Santiago 1:27). Babilonia Jatun llajta paipaj panda yachachishcacunahuan, panda costumbrecunahuan, maipish cachun causanahuan pandachichunca mana saquinachu canchij. Ashtahuanpish gentecunataca “chaimanta llujshichij” nishunchij. Chaita rurajpica Babilonia Jatun llajtapaj juchacunahuan mana chagrurij cashcatami Yaya Diosca ricunga (Apocalipsis 18:4).

19. ¿Pucanicuj jatun dragonca pitaj can?

¹⁹ Apocalipsis libropica pucanicuj jatun dragonmantapishmi parlan (Apocalipsis 12:3). Cai dragonca Jesushuan, paipaj angelcunahuanmi macanacun (Apocalipsis 12:7-9). Shinallataj gobiernocunaman poderta cushpami Diospaj pueblotapish catirashpa llaquichin (Apocalipsis 12:17; 13:4). ¿Cai dragonca pitaj can? Cai dragonca ‘ñaupa culebra, Diablo, Satanasmi’ can (Apocalipsis 12:9; 20:2). Paimi Diospaj tucui enemigocunataca controlacun.

20. ¿Dragonhuanca imataj tucunga?

²⁰ ¿Dragonhuanca imataj tucunga? Apocalipsis 20:1-3-pica shuj ángel Satanasta jatun jutcupi shitanatami huillan. Chaica shuj carcelpi churashca shinami canga. Chaipimi Satanastaca 1.000 huatacunata huichcanga. 1.000 huatacuna tucuringacamami llajtacunataca mana pandachinga. Chai qꞌuipaca Satanastaca demoniocunandijmi azufrehuan rupacuj nina cuchapi shitanga. Diablopish, demoniocunapish para siempre tucuchishcami canga (Apocalipsis 20:10). ¿Satanaspish, demoniocunapish illajpica ima shinashi causashun? Paicuna illajpica maravillatami causashun.

21. ¿Apocalipsis libromanta yachashpaca imamantataj cushilla sintirinchij?

²¹ ¿Apocalipsis libropi parlaj muscuicuna o señalcunata intindishpaca manachu animarinchij? Jehová Diospaj contracuna picuna cashcatami yachashcanchij. Shinallataj paicunahuan ima tucuna cashcatapishmi yachashcanchij. Bibliapica: ‘Cai profeciacunata sinchita liyij, uyajcunapish cushicunmi’ ninmi (Apocalipsis 1:3). Diospaj contracuna tucuchishca cajpica, ¿Diosta tucui shunguhuan sirvijcunaca ima bendicioncunatataj chasquingacuna? Chaitaca catij yachaipimi ricushun.