1. ¿Imamantataj tucuicuna yachaita minishtinchij? (Proverbios 4:7).

 ¿IMA VALISHCA decisionta agllashcanguichu? Alli decidingapajca de seguromi Jehová Diosta yachaita cuchun mañarcangui (Santiago 1:5). Rey Salomonca: “Tucui imata rurangapajpish alli yachaitaraj mashcangui” nircami (Proverbios 4:7-ta liyipai). Caipica Salomonca Dios cushca yachaimantami parlacurca (Proverbios 2:6). Pero ¿llaquicunahuan cajpica Diospaj yachaica ayudai tucunchu? Ari, cai yachaipica caimantami parlashun.

2. ¿Alli yachaj cangapajca imatataj rurana canchij?

² Diospaj yachaita chasquingapajca Bibliapi tiyaj consejocunatami yachana, pajtachina canchij. Bibliapica ishqui yachaj runacunapaj valishca consejocunami tiyan. Puntapica, Salomonmantami yachashun. Bibliapica: ‘Taita Diosca Salomonmanca yachaisapa canata, allita yuyarij canatami curca’ ninmi (1 Reyes 4:29). Ishquipica, Jesusmantami yachashun. Jesusca tucuicunamanta yalli yachaj runami carca (Mateo 12:42). Jesusmanta parlashpaca Bibliapica: ‘Mandaj Diospaj Espiritumi paipi causanga. Chai espirituca: Yachaisapa canata, yuyaisapa canata cuj espiritumi canga’ ninmi (Isaías 11:2).

3. ¿Cai yachaipica imatataj yachashun?

³ Jehová Dios yachaita cushcamantami Salomonpish, Jesuspish valishca consejocunata ñucanchijman curca. Cai yachaipica cullquillapi, trabajollapi ama yuyangapaj, ama jatun tucungapaj, imapaj mana valij shina ama sintiringapajpish valishca consejocunatami ricushun.

4. ¿Salomonpish, Jesuspish mashna cullquitataj charircacuna?

⁴ Salomonca achca cullquita, achca cosascunatami charirca (1 Reyes 10:7, 14, 15). Cutin Jesusca mana achca cosascunata charircachu, paipaj propio huasitapish mana charircachu (Mateo 8:20). Pero Salomonpish, Jesuspish Diospaj yachaita charishcamantami mana cullquillapi yuyarcacuna.

5. ¿Salomonca cullquimantaca imatataj yuyarca?

⁵ Salomonca: ‘Cullquica shuj escudo shina ñucanchijta huaquichijmi’ nircami (Eclesiastés 7:12). Chaica ciertomi can. Cullquihuanca ñucanchij minishtirishca, munashca cosascunatami chari tucunchij. Shinapish Salomonca ‘cullqui valishca cajpipish ashtahuan valishca cosascunami tiyan’ nircami. Por ejemplo, paica: “Alli nishca canaca jatun charij canatapish yallimari” nircami (Proverbios 22:1). Shinallataj Salomonca cullquita yalli cꞌuyajcuna mana cushilla causashcatami cuentata curca (Eclesiastés 5:10, 12). Ashtahuancarin Salomonca cullqui chingarijlla cashcamantami chaipi ama confiachun nirca (Proverbios 23:4, 5).

6. ¿Jesusca charishca cosascunamantaca imatataj yuyarca? (Mateo 6:31-33).

⁶ Jesusca micunata, ubyanatami munaj carca (Lucas 19:2, 6, 7). Shuj cutinca paica achca yacutaca alli vinotami rurarca. Chaimi Jesús rurashca punta milagro carca (Juan 2:10, 11). Shinallataj pai huañugrishca punllapica achcata valij churanatami churarishca carca (Juan 19:23, 24). Pero Jesuspajca charishca cosascunaca mana ashtahuan importantechu carca. Jesusca paipaj discipulocunataca: ‘Ishqui amotaca ni pi mana sirvi tucunchu. Diostapish, charinacunatapish ishquindijtaca mana sirvi tucunguichijchu’ nircami (Mateo 6:24). Ashtahuancarin Jesusca: ‘Diospaj Gobiernota punta lugarpi churajpica Jehová Diosca cancuna ima minishtishcatami cunga’ nircami (Mateo 6:31-33-ta liyipai).

7. ¿Cullquillata mana mashcashcamantaca shuj huauquica ima bendicioncunatataj charishca?

 ⁷ Achca huauqui panicunaca cullquillapi ama yuyangapaj Jehová Dios cushca consejocunata pajtachishcamantami beneficiarishcacuna. Daniel shuti soltero huauquipi yuyashunchij. Paica: “Ñucaca jovenraj cashpaca ñuca causaipi Jehová Diosta sirvinami ashtahuan importante canga nishpami decidircani” ninmi. Danielca minishtirishca cosascunallahuan causashcamantami paipaj tiempohuan, paipaj yachashcacunahuan labores de socorropi, Betelpipish ayudai tucushca. Danielca: “Imata decidishcamantaca mana arrepintirinichu. Cullquillata mashcashca cashpaca alli amigocunataca mana charinmanchu carcani. Shinallataj Diospaj Gobiernota punta lugarpi churashcamantami cunanca cushilla sintirini. Dios cushca bendicioncunaca cullquita charinata yallimi valishca can” ninmi. Ñucanchijpish cullquillata mashcanapaj randica Diosta sirvinata punta lugarpi churashpaca cushillami causashun.

8. ¿Salomón trabajollapi mana pasashcataca ima shinataj yachanchij? (Eclesiastés 5:18, 19).

⁸ Salomonca: “Quiquin alli trabajashcamanta cushicunaca, Diosmantami shamun” nircami (Eclesiastés 5:18, 19-ta liyipai). Shinallataj paica: “Tucui yuyaihuan imatapish rurajpica, japinapish tiyanmi” nircami (Proverbios 14:23). Salomonca cai shimicuna cierto cashcataca allimi yacharca. Paica sinchita trabajashpami huaquin huasicunata, ciudadcunata shayachirca. Chagracunatapish, huertacunatapishmi tarpurca, jatun tanquecunatapishmi rurarca (1 Reyes 9:19; Eclesiastés 2:4-6). Salomonca chashna sinchita trabajashcamantami alli sintirishca canga. Pero de verastij cushilla causangapajca mana chaillachu minishtirirca. Salomonca Yayitu Diosta adorangapajmi shuj alaja templota shayachirca. Chaita ruranataca canchis huatacunapimi tucuchirca (1 Reyes 6:38; 9:1). Salomonca chꞌican chꞌican cosascunata rurashpapish Yayitu Diosta sirvinami ashtahuan valishca cashcata cuentata curca. Chaimantami paica: “Cai tucuita yachachishca qꞌuipa, ña tucuchingapajca caitami nini: Diostaca manchashpa cazungui, pai mandashcacunatapish pajtachingui” nirca (Eclesiastés 12:13).

9. ¿Jesusca trabajashpapish imapajtaj tiempota surcuj carca?

⁹ Jesuspish sinchitami trabajarca. Paica jovenraj cashpaca carpinteromi carca (Marcos 6:3). Jesusca paipaj familiata ayudangapajmi trabajarca. Chaimi paipaj yaya mamaca agradecidos cashcanga. Shinallataj Jesusca jucha illaj cashcamantami sumaj trabajocunata ruraj carca. Chaimantami achca clientecunatapish charishcanga. De seguro Jesusca sinchita trabajashcamantami cushilla sintirirca. Pero sinchita trabajashpapish Yayitu Diosta sirvingapajmi tiempota surcuj carca (Juan 7:15). Paica tiempo completota Yayitu Diosta sirvicushpaca: “Chingarijlla micunamantaca ama trabajaichijchu, ashtahuanpish huiñai causaiman apaj mana tucurij micunamanta trabajaichij” nircami (Juan 6:27). Urcupi yachachicushpapish cashnami nirca: ‘Jahua pachapi charinacunata huaquichishpa catichij’ (Mateo 6:20).

10. ¿Alli trabajajcuna cashpapish imata ruranatataj mana cungarina canchij?

¹⁰ Dios cushca yachaita charishpaca trabajollapi mana pasashunchu. Caipi yuyashunchij. Bibliapica ñucanchijtaca: “Allita rurashpa sinchita trabajachunmi” nin (Efesios  4:28). Chashna alli trabajajpi, honrados cajpica ñucanchij jefeca ñucanchijtami felicitanga. Pero ñucanchij jefe, testigo de Jehovacuna alli cashcata ricuchunca ashtahuan trabajanatachari munanchijman. Chaita rurashpaca ñucanchij familiahuan pasanata, Jehová Diosta sirvinatami saquishun. Chaimi rato cambiangapaj esforzarina canchij.

11. ¿Huauqui Williamca shuj ancianomantaca imatataj yachacurca?

¹¹ William shuti shuj joven huauquica mana yallitaj trabajana cashcatami intindirca. Paica congregacionta pushaj shuj ancianopajmi trabajaj carca. Chai ancianomanta parlashpaca Williamca: “Chai ancianoca clientecunapaj alli trabajocunatami ruraj carca. Sinchitami trabajaj carca. Pero trabajo qꞌuipaca paipaj familiahuan pasangapaj, Yayitu Diosta sirvingapajmi tiempota surcuj carca. Chaita rurashcamantami paica dimastaj cushilla causarca” ninmi. *

12. a) ¿Salomonca ima shinataj humilde cashcata ricuchirca? b) ¿Pero qꞌuipaca imatataj rurarca?

¹² Salomonca Jehová Diosta sirvishpaca mana jatun tucurcachu. Paica jovenraj cashpaca pailla imatapish mana rurai tucushcataca allimi intindirca. Chaimantami Jehová Diostaca paiman yachaita cuchun, paita ayudachun mañarca (1 Reyes 3:7-9). Shinallataj Salomonca mandai callarishpaca jatun tucunamanta cuidarina cashcatami intindirca. Paica: “Manaraj llaqui tucushpaca, jatun tucushcami causancuna” nircami (Proverbios 16:18). Pero qꞌuipaca paillatajmi cai consejotaca mana pajtachirca. Ña Salomonca huaquin huatacunata mandacushpaca jatun tucushpami Yayitu Diosta mana cazui callarirca. Por ejemplo, leypica reycunataca: “Taita Diosmanta paipaj shunguta ama anchuchingapajca chai jatun mandajca mana achca huarmicunata charinachu can” nishpami mandashca carca (Deuteronomio  17:17). Pero Salomonca caita mana cazushpami 1.000 huarmicunata charirca. Chai huarmicunapuramanta achcacunaca yanga dioscunatami adorajcuna carca (1 Reyes 11:1-3). Salomonca “Diosta mana cazushpapish mana ima tucushachu” nishpachari yuyashcanga. Shinapish Diosmanta caruyashcamantami achca llaquicunapi urmarca (1 Reyes 11:9-13).

13. ¿Jesús humilde cashcamantaca imatataj yachacui pudinchij?

¹³ Jesusca humildemi carca. Paica manaraj cai Allpaman shamushpaca paipaj Yayahuanmi achca cosascunata rurarca. Colosenses 1:16-pica: “Tucui ima shujtaj tiyashcacunatapish paipaj Churipaj cachunmi paillahuantaj rurarca” ninmi. Jesusca bautizarishpaca jahua pachapi paipaj Yayahuan imacunallata rurashcatami yuyarishcanga (Mateo 3:16; Juan 17:5). Pero chai tucuita yuyarishpapish paica shujtajcunata yalli cashcataca mana yuyarcachu. Jesusca paipaj discipulocunataca: ‘Ñucaca sirvishca cangapajca mana shamurcanichu. Ashtahuanpish shujtajcunata sirvingapaj, ñuca causaita cushpa achcacunata randishpa quishpichingapajmi shamurcani’ nircami (Mateo 20:28). Ashtahuancarin Jesusca paipaj munaimanta imatapish mana rurai tucushcatami intindirca (Juan 5:19). ¿Manachu ñucanchijpish Jesús shinallataj humildes casha ninchij?

14. ¿Jesús ima nishcata yuyarishpaca ima shinataj sintirinchij?

¹⁴ Jesusca paipaj discipulocunataca Yayitu Diospaj valishca cashcata intindichunmi ayudarca. Jesusca: ‘Cancunapaj umapi mashna ajchacuna tiyashcatapish Diosca allimi yachan’ nircami (Mateo 10:30). Maipica ñucanchijca imapaj mana valij shinami sintirishcanchij. Pero Jesús ima nishcata yuyarishpami Jehová Diospajca ñucanchijpish valishca cashcata intindinchij. Jehová Diosca ñucanchijtaca paita sirvichunmi saquishca. Ashtahuancarin Paraíso Allpapi causachunmi munan. Caicunata intindishpaca Yayitu Diospajca valishca cashcatami yuyarina canchij.

15. a) ¿Shuj Atalaya revistapica imatataj nirca? b) Página 24-pi tiyaj fotocunapi ricushca shinaca ¿ñucanchijllapi yuyashpaca ima bendicioncunatataj chingachishun?

 ¹⁵ 15 huatacuna huashamanca, La Atalaya revistapica cashnami nirca: “Ñucanchijcunaca mana orgullososchu tucuna canchij. Shinallataj imapaj mana valinichu nishpapish mana yuyanachu canchij. Chashna yuyanapaj randica shuj pani ima nishcatami yuyarina canchij. Paica: ‘Ñucaca ni dimastij alli cani, ni dimastij mana allichu cani. Tucuicuna shina alli cualidadcunata charishpapish maipica pandarinimi’ ninmi”. *

16. ¿Jehová Diosca imamantataj ñucanchijmanca valishca consejocunata cun?

¹⁶ Jehová Diosca ñucanchijta achcata cꞌuyashcamantami cushilla causachun munan. Chaimantami Bibliapica valishca consejocunataca ñucanchijman cushca (Isaías 48:17, 18). Huaquin gentecunaca cullquillapi yuyashcamanta, trabajollapi pasashcamanta o jatun tucushcamantami llaquipi urmashcacuna. Pero ñucanchijca Diospaj yachaita charishcamanta, paita sirvinata punta lugarpi churashcamantami cushilla causashun. Chashnami Jehová Diospaj shunguta cushichishun (Proverbios 23:15).