1, 2. ¿Ñucanchij causaipi cambiocuna tiyajpica huaquinpica imata ruranatataj minishtinchij?

 SHUJ novio, shuj noviaca paicunapaj boda punllapimi huauqui conferenciata cushcataca atentos uyancuna. Paicunaca chaipi nishca consejocunataca allimi rijsincuna. Shinapish chai punllamantapachami chai yachashcacunataca pajtachinata callarina can.

² Cazadocunapish huahuacunata ima shina huiñachinamantaca huaquin discursocunatami uyashcacuna. Pero ña huahuacunata charishpaca chai rijsishca consejocunataca pajtachinatajmi can. Yaya mamacunaca huahuacunata huiñachina responsabilidadtami charincuna. Cai ejemplocunapi ricushca shinaca, ñucanchij causaipi ima cambio tiyajpica ña rijsishca versocunataca pajtachinatami minishtishun. Chaimantami Diosta sirvijcunaca Israel llajtata mandajcuna shina cada punlla Bibliata estudiana, liyina canchij (Deuteronomio 17:19).

3. ¿Cai yachaipica imatataj yachashun?

³ Yaya mamacuna, cancunaca huahuacunamanca Jehová Diosmantami yachachina canguichij. Caita ruranaca dimastij valishcami can. Shinapish huahuacunamanca mana solo Diosmanta yachachinallachu canguichij. Ashtahuancarin Jehová Diosta cꞌuyachunmi yachachina canguichij. ¿Caitaca ima shinataj pajtachi tucunguichij? Cai yachaipica chuscu consejocunamantami parlashun (2 Timoteo 3:16). Cai consejocuna tauca yaya mamacunata ima shina ayudashcatami ricushun.

4. ¿Huahuacuna Jehová Diosta cꞌuyachun yachachingapajca yaya mamacunaca ima consejotataj pajtachina can? (Santiago 1:5).

⁴ Puntapica: Jehová Diosta yachaita cuchunmi mañana canguichij. Huahuacunaman Jehová Diosta cꞌuyachun yachachingapajca Dios cushca yachaitami minishtinguichij (Santiago 1:5-ta liyipai). Jehová Diosmi valishca consejocunataca charin. ¿Imamanta? Paica unai unaita causashcamantami achca experienciata charij Yaya can (Salmo 36:9). Chaimantami paipaj consejocunaca ñucanchijtaca siempre ayudan (Isaías 48:17).

5. a) ¿Yaya mamacunamanca ima ayudacunallatataj Jehová Diosca cushca? b) ¿Videopica Amorim nishca yaya mamamantaca imatataj yachacurcangui?

⁵ Yaya mamacuna huahuacunaman alajata yachachichunca Jehová Diosca Bibliatapish, shujtaj ayudacunatapishmi cushca (Mateo 24:45). Por ejemplo, Rijchari nishca revistapi, jw.org paginapipish valishca consejocunami tiyan. JW.ORG paginapicarin huaquin videocunapi, entrevistacunapimi huahuacunata ima shina huiñachinata yachachin * (Proverbios 2:4-6).

6. ¿Joe shuti yayaca Diospaj organización cushca ayudacunataca ima shinataj utilizan?

⁶ Achca yaya mamacunaca Diospaj organización tauca ayudacunata cushcamantami agradecidos sintirincuna. Joe shuti shuj yayaca: “Ñucanchij huahuacunata Jehová Diosmanta yachachinaca mana jahuallachu cashca. Chaimantami ñucapish, ñuca huarmipish Yayitu Diosta ayudachun siempre mañanchij. Chaimi Jehová Diosca ñucanchij minishtishca informacionta o shuj alaja videota cushca. Chashnami ñucanchij huahuacunataca alli huiñachi tucushcanchij” ninmi. Joepish, paipaj huarmipish cai ayudacunahuanca paicunapaj huahuacuna Jehová Diospaj amigocuna tucuchunmi ayudashcacuna.

7. ¿Yaya mamacunaca huahuacunamanca imamantataj alli ejemplota cuna can? (Romanos 2:21).

⁷ Ishquipica: Huahuacunapajca alli ejemplomi cana canguichij. Huahuacunaca imata  ricushcatami rurancuna. Chaimantami yaya mamacunaca juchayujcuna cashpapish huahuacunapajca alli ejemplo cana can (Romanos 3:23; Romanos 2:21-ta liyipai). Shuj yayaca: “Ima shinami shuj esponjaca yacuta tucui chupan. Chashnallatajmi huahuacunaca tucui ima ricushcata rurancuna. Yaya mamacuna paicuna imata yachachishcata mana pajtachijpica huahuacunaca cuentata cuncunami. Chaimi huahuacunapish chaitaca mana rurangacuna” ninmi. Chaimantami yaya mamacunaca huahuacuna Jehová Diosta cꞌuyachunca paicunaraj Jehová Diosta cꞌuyashcata ricuchina can.

8, 9. ¿Andrew y Emma nishcacunamantaca imatataj yachanchij?

⁸ Yaya mamacuna huahuacunaman ima shina alli ejemplota cui tucushcata ricushunchij. 17 huatacunata charij huauqui Andrewca: “Ñuca yaya mamaca Yayitu Diosta mañana importante cashcatami yachachirca. Cada tutapica Diosta ñuca ña mañashca cajpipish ñuca yayaca ñucahuanmi siempre Jehová Diosta mañaj carca. Ñuca yaya mamaca Yaya Diosta siempre mañai tucushcatami yachachircacuna. Chaimantami Jehová Diosta mañashpaca cushilla sintirini. Jehová Dios ñucata cꞌuyaj Yaya cashcataca allimi intindini” ninmi. Yaya mamacuna, cancuna Jehová Diosta cꞌuyajpimi cancunapaj huahuacunapish Diosta cꞌuyangacuna.

⁹ Pani Emma ima nishcapipish yuyashunchij. Paipaj yaya familiata saquijpica paipaj mamaca achca dibicunahuanmi saquirirca. Pani Emmaca: “Ñuca mamitaca maipica ñucanchijta mantiningapajca mana suficiente cullquitachu charirca. Pero Jehová Dios paita sirvijcunataca siempre cuidanatami ñucanchijman yachachij carca. Ñuca mamita, Jehová Diosta siempre punta lugarpi churashcata ricushpaca Diospi confiashcatami cuentata curcani” ninmi. ¿Caimantaca imatataj yachanchij? Llaquicunahuan cashpapish yaya mamacunaca huahuacunapajca alli ejemplomi cana can (Gálatas 6:9).

10. ¿Israelita yaya mamacunaca huahuacunaman yachachingapajca ima oportunidadcunatataj charircacuna? (Deuteronomio 6:6, 7).

¹⁰ Quimsapica: Cancunapaj huahuacunahuanmi parlana canguichij. Jehová Diosca israelita yaya mamacunataca: “Cancunapaj huahuacunamanca ñucamantami cada punlla yachachina canguichij” nircami (Deuteronomio 6:6, 7-ta liyipai). Chai tiempopica yaya mamacunaca huahuacunaman yachachingapajca achca oportunidadcunatami charircacuna. Por ejemplo, cꞌari huahuacunaca paicunapaj yayahuanmi tarpushpa o cosechashpa pasajcuna carca. Cutin huarmi huahuacunaca paicunapaj mamahuanmi huasipi ayudashpa o sirashpa pasajcuna carca. Yaya mamacunaca huahuacunahuan chashna tiempota pasashpaca Jehová Dios paicunata cꞌuyashcata, paicunata cuidashcatami yachachijcuna carca.

11. ¿Yaya mamacuna, cancunapaj huahuacunahuan parlangapajca imatataj rurana canguichij?

¹¹ Cunan tiempopica huaquin llajtacunapica yaya mamacuna trabajopi cashcamanta, huahuacuna escuelapi cashcamantami mana igual pasancuna. Chaimantami yaya mamacunaca huahuacunahuan pasangapaj, paicunahuan parlangapaj, paicunahuan Bibliamanta yachangapajpish tiempota surcuna can (Efesios 5:15, 16; Filipenses 1:10). Alexander shuti shuj jovenca: “Ñuca yayaca tucuita saquishpa cada semana ñucanchijhuan  Bibliamanta yachangapajmi tiempota surcun. Chashna estudiashca huashaca tucuicunami parlanacushpa saquirinchij” ninmi

12. ¿Huahuacunaman yachachicushpaca yaya mamacunaca imatataj mana rurana can?

¹² ¿Yaya mamacunaca huahuacuna Bibliamanta yachana munaita charichunca imatataj rurana can? Tal vez Cushilla causai nishca librohuan huahuacunaman yachachijpica paicunaca yachana munaitami charingacuna. Imata yuyashcata, ima shina sintirishcatapismi parlangacuna. Shinapish yaya mamacuna, huahuacunahuan yachana horaspica mana sinchita rimanachu canguichij. Huahuacuna pandata nijpipish mana rato pꞌiñarinachu canguichij. Chaipaj randica paicuna imata yuyashcata huillashcamantami agradicina canguichij. Cancunapaj huahuacuna imata yuyashcata parlajpica paicunatami alli ayudai tucunguichij.

13. ¿Yaya mamacuna, imacunallata rurashpataj huahuacunaman yachachi tucunguichij?

¹³ Yaya mamacuna, cancunapaj huahuacunaman Diosmanta yachachingapajmi tiempota surcuna canguichij. Pero Diosmanta yachachingapajca mana Bibliallahuanchu yachachina canguichij. Lisa shuti shuj mamaca: “Ñuca huahuacunaman Diosmanta yachachingapajca Jehová imata rurashcata ricuchishpami yachachijcuna carcanchij. Por ejemplo, ñucanchij allquitu ñucanchijman asichijpica Jehová Dios ñucanchijta cꞌuyashcata, cushi Dios cashcatapishmi yachachijcuna carcanchij” ninmi.

14. ¿Huahuacuna alli amigocunata charichunca imamantataj yaya mamacunaca ayudana can? (Proverbios 13:20).

¹⁴ Chuscupica: Cancunapaj huahuacuna alli amigocunata charichunmi ayudana canguichij. Bibliapi nishca shinaca ñucanchij amigocunaca allita rurachun o mana allita rurachunmi animancuna (Proverbios 13:20-ta liyipai). Yaya mamacuna, ¿cancunapaj huahuacunapaj amigocunata rijsinguichijchu? ¿Paicunahuan tiempota pasashcanguichijchu? ¿Cancunapaj huahuacuna  alli amigocunata charichunca ima shinataj ayudai tucunguichij? (1 Corintios 15:33). Diosta sirvij huauqui panicunahuan tiempota pasangapajmi huasiman invitana canguichij (Salmo 119:63).

15. ¿Yaya mamacunaca huahuacuna alli amigocunata charichunca imatataj rurana can?

¹⁵ Tony shuti shuj yaya, paipaj huarmipish paicunapaj huahuacunata ima shina ayudashcata ricushun. Huauqui Tonyca: “Ñuca huarmihuanca chꞌican chꞌican edadta charij, chꞌican chꞌican culturamanta caj huauqui panicunatami ñucanchij huasiman siempre invitashcanchij. Paicunahuanmi micunchij. Bibliamantapishmi tandalla estudianchij. Maipicarin superintendente de circuitota, misionerocunata, shujtaj huauqui panicunatapishmi puzachishcanchij. Cai tucui huauqui panicuna cushicuihuan Diosta sirvicushcata ricushpaca ñucanchij huahuacunaca paicunapaj fetami sinchiyachishcacuna” ninmi. Yaya mamacuna, cancunapaj huahuacunapish alli amigocunata charichunmi ayudana canguichij.

16. ¿Shuj huahua Diosmanta caruyajpipish yaya mamacunaca imatataj yuyarina can?

¹⁶ Cancunapaj huahuacunaman Diosta cꞌuyachun yachachishpa catichij. Pero shuj huahua Diosta sirvinata saquijpica mana alli yaya mama cashcataca mana yuyanachu canguichij. Jehová Diosca tucuicunatami paita sirvinata o mana sirvinata agllachun saquishca. Cambaj huahua Diosta sirvinata saquijpica pai cutin Diospajman tigrai tucushcatami yuyarina cangui. Jesús parlashca chingarishca jovenhuan ima tucushcata yuyari (Lucas 15:11-19, 22-24). Chai jovenca mana allita ruranatami decidirca. Pero qꞌuipaca Diospajmanmi tigrarca. Quizás canca: “Chaica shuj cuentollami can. Chashna mana nunca tucungachu” nishpachari yuyangui. Pero cambaj huahuaca Yayitu Diospajmanmi cutin tigrai tucun. Cunanca Elie shuti jovenhuan ima tucushcata ricushun.

17. ¿Eliepaj experienciamantaca imatataj yachacunchij?

¹⁷ Elieca: “Ñuca yaya mamaca Diosta cꞌuyachun,  paimanta yachachingapajpishmi esforzarircacuna. Shinapish ñuca ña joven cashpaca chaitaca mana munarcanichu” ninmi. Elieca pacallami mana allicunata rurai callarirca. Paipaj yaya mama ayudasha nijpipish paica mana uyasha nircachu. Qꞌuipacarin huasimanta rishpami Diosmanta caruyarca. Pero huaquinpica paica shuj amigohuanmi Bibliamanta parlaj carca. Elieca: “Ñuca amigoman Diosmanta parlashpaca Jehová Diostami yuyarij carcani. Ñuca yaya mama imata yachachishcatapishmi cutin yuyarircani” ninmi. Tiempohuanca Elieca Jehová Diospajmanmi cutin tigrarca. * Eliepaj yaya mamaca huahuamantapacha paiman yachachishcamantami cushilla sintirincuna (2 Timoteo 3:14, 15).

18. ¿Yaya mamacuna huahuacunaman yachachingapaj esforzarishcataca imamantataj valorangui?

¹⁸ Jehová Diosca yaya mamacunamanca huahuacunata paimanta yachachichunmi mingashca (Salmo 78:4-6). Caita pajtachinaca mana jahuallachu can. Chaimantami cancuna tucui shunguhuan esforzarishcamanta achcata felicitanchij. Cancunapaj huahuacuna Jehová Diosta cꞌuyachun, Dios cushca consejocunata yachachunmi yachachishpa catina canguichij. Chaita rurajpica Jehová Diosca cushillami sintiringa (Efesios 6:4).