1. ¿Jahua pachapi charinacunamantaca Jesusca imatataj nirca?

YALLITAJ valij regalocunataca mana ricui tucunchijchu. Jesusca Sermón del Montepi yachachicushpaca jahua pachapi charinacunaca tucui charinacunamanta yallimi can nircami. Paica: “Cancunapaj charishcacuna maipimi can, cancunapaj shungupish chai yuyaillami canga” nircami (Mateo 6:19-21). Ñucanchij shungupi imapish valishca shina ricurijpica chaita charingacamami mashcashun. Diospaj ñaupajpi alli ricuringapaj esforzarishpaca jahua pachapi charij tucunapajmi mashcashun. Jesús nishca shinaca cai charinacunataca ni pi mana tucuchi o shuhuai tucungacunachu.

2. a) 2 Corintios 4:17, 18-pi nishca shinaca ¿Pabloca imata rurachuntaj animan? b) ¿Cai yachaipica imallatataj yachashun?

² Apóstol Pabloca: “Mana ricushcacunapi yuyaimi canchij” nishpami animarca (2 Corintios 4:17, 18-ta liyipai). Cai mana ricushcacunaca Dios cusha nishca Allpapi tiyaj bendicioncunatami ricuchin. Cai yachaipimi mana ricui tucushca chuscu regalocunamanta yachashun. Cunan punllacunallapitajmi cai sumaj regalocunataca ña charinchij. Por ejemplo, Dioshuanmi alli apanacunchij, paitami mañai tucunchij, paipaj espíritu santotami chasquinchij. Shinallataj huillangapajca Jehovapaj, Jesuspaj, angelcunapaj ayudatami charinchij. Cai mana ricui tucushca regalocunamanta ima shina pagui ninatapishmi yachashun.

3. a) ¿Maijan regalotaj ashtahuan valishca can? b) ¿Imamantataj Dioshuanca alli apanacui tucunchij?

³ Jehová Dioshuan alli apanacunami ashtahuantajca valishca can (Salmo 25:14). Pero Diosca juchayujcunapaj amigo  cashpapish ¿ima shinataj paica jucha illaj cashpa cati tucun? Jesús huañushpaca ñucanchij juchacunatami anchuchirca. Chaimi jucha illaj Diosca ñucanchij amigo cai tucun (Juan 1:29). Jehová Diosca paipaj Churi gentecunata quishpichingapaj huañungacama paita tucuipi cazunatami yacharca. Chaimantami paica Jesús manaraj cai Allpaman shamujpi ñaupa punllacunapi causajcunahuanpish alli amigo carca (Romanos 3:25).

4. ¿Jesús manaraj cai Allpaman shamujpica Diospaj maijan amigocunallataj causarca?

⁴ Diospaj huaquin amigocunamanta yachashun. Paicunaca Jesús manaraj cai Allpaman shamujpimi causarcacuna. Abrahamca Diospimi tucui shunguhuan crirca. Pai huañushca mil huatacuna pasajpipish Yayitu Diosca “ñucahuan alli apanacuj” nircami (Isaías 41:8). Paita sirvijcuna huañujpipish Jehová Diosca paipaj alli amigocuna cashcata yuyarishpami catin. Chaimantami Jehová Diosca Abrahamtaca manataj cungarishca (Lucas 20:37, 38). Jobpish Diospaj alli amigomi carca. Shuj cutinca angelcuna jahua pachapi tandanacushca cajpimi Diosca Jobpi confiashcata ricuchirca. Paimanta parlashpaca Diosca: “Paica ima pandata mana ruraj, allita ruraj, ñucatapish manchaj, millaita ruranatapish pꞌiñajmi” nircami (Job 1:6-8). Danielca 80 huatacunatami yanga dioscunata adorajcunapaj chaupipi Diosllata sirvishpa causarca. ¿Diosca Danielmantaca imatataj yuyarca? Daniel ña mayorlla cajpica quimsa cutinmi angelcunaca, Diospajca “canca yallitaj cꞌuyashcami cangui” nishpa animarca (Daniel 9:23; 10:11, 19). Jehová Dios paipaj amigocuna causarichun shungumanta munashcatami yachanchij (Job 14:15).

5. ¿Jehová Dioshuan alli apanacungapajca imallatataj rurana canchij?

⁵ Cunan punllacunapipish achca gentecunaca juchayujcuna cashpapish Dioshuanmi alli apanacui tucuncuna. Muyundij Allpapimi achca cꞌaricunapish huarmicunapish huahuacunapish paicunapaj ruraicunahuan Diospaj alli amigocuna cashcata ricuchincuna. Bibliapica: ‘Diosca cashcata rurajcunahuanca, tandallami causan’ ninmi (Proverbios 3:32). Jesús huañushcata tucui shunguhuan crishpami Diospaj amigocuna cai tucunchij. Shinallataj pai huañushcamantami Diosman mingarishpa bautizari tucunchij. Caicunata pajtachishpaca muyundij Allpapi Diospaj amigocunahuanmi Yayitu Diosta tandalla sirvishun.

6. ¿Diosta agradicishcataca ima shinataj ricuchina canchij?

⁶ ¿Diospaj amigocuna cachun saquishcamantaca ima shinataj agradicishcata ricuchishun? Abrahampaj, Jobpaj ejemplotami catina canchij. Paicunaca 100 huata yallicunatami Diostaca tucuipi cazurcacuna. Ñucanchijpish cai millai mundopi mashna tiempota Diosta sirvicushpapish paicuna shinallatajmi tucuipi cazuj cana canchij. Huañuna cashpapish Daniel shinami Dioshuan alli apanacunataca manataj saquina canchij (Daniel 6:7, 10, 16, 22). Diospaj ayudahuanmi ima llaquicunata charishpapish chꞌimbapurai tucunchij. Shinami paipaj alli amigocuna cashpa catishun (Filipenses 4:13, NWT ).

7. a) Proverbios 15:8-pi nishca shinaca ¿Jehová Diosca paita mañajpica ima shinataj sintirin? b) ¿Jehová Diosca ñucanchij mañashcacunataca ima shinataj cutichin?

⁷ Mana ricui tucushca shujtaj regaloca Diosta mañanami can. Alli amigocunaca paicuna ima shina sintirishcata, imata yuyashcata parlanatami munancuna. Chashnallatajmi Yayitu Diospish paihuan alli apanacuchunca Bibliata cushca. Bibliapimi Jehová Dios ima shina sintirishcata, imata yuyashcata yachanchij. Shinallataj ñucanchijca shuj mañaita rurashpami paihuan parlai tucunchij.  Mañacushpaca imata yuyashcata, ima shina sintirishcatami shungumanta parlana canchij. Jehová Diosca ñucanchij mañashcataca uyanatami munan (Proverbios 15:8-ta liyipai). Paica ñucanchijta cꞌuyaj amigomi can. Chaimantami ñucanchij mañashcacunata cutichin. Huaquinpica utcami cutichin. Pero maipica pai cutichingacamami mañashpa catina canchij. Paica ima hora cutichinata, ima shina cutichinataca allimi yachan. Tal vez ñucanchij yuyashca shinaca manachari cutichinga. Por ejemplo, llaquicunata anchuchinapaj randica llaquicunata ahuantangapajchari yachaita, fuerzata cunga (1 Corintios 10:13).

8. ¿Jehová Dios paita mañachun saquishcamantaca ima shinataj agradicinchij?

⁸ ¿Jehová Dios paita mañachun saquishcamantaca ima shinataj agradicishcata ricuchinchij? ‘Taita Diosta mañanata’ manataj saquishpami paita agradicishcata ricuchinchij (1 Tesalonicenses 5:17). Jehová Diosca paita mañachunca mana obliganchu. Ashtahuanpish paita mañangapaj cada uno decidichunmi saquin. Shinapish paipaj Shimipica: “Diostaca mañaracuichijlla” ninmi (Romanos 12:12). Diosta agradicishcata ricuchingapajca punllapica achca cutinmi mañana canchij. Paita mañacushpaca paita agradicinata, jatunyachinataca manataj cungarinachu canchij (Salmo 145:2, 3).

9. a) ¿Yayitu Diosta mañashpaca Chris shuti huauquica ima shinataj sintirin? b) ¿Canca Diosta mañanamantaca imatataj yuyangui?

⁹ Yayitu Diosta achca tiempota sirvicushpa, pai ñucanchij mañashcacunata ima shina cutichijta ricushpaca paita mañanatami ashtahuan munashun. Chris huauquica tiempo completotami 47 huatacunata sirvicushca. Paica: “Ñucaca utca jatarishpa Yayitu Diosta mañanatami munani. Inti llujshimucun horas, tucui sumaj cajpi paihuan parlanatami munani. Caita rurashpami Yayitu Diostaca tucuita cushcamanta pagui nini. Paita mañachun saquishcamantapish achcatami agradicini. Ña tutayajpica Diosta mañashca huashami tranquilo dormi tucuni” ninmi.

10. ¿Jehová Dios cushca espíritu santotaca imamantataj valorana canchij?

¹⁰ Dios cushca espíritu santotami achcata valorana canchij. Jesusca siempremi espíritu santota mañachun animarca (Lucas 11:9, 13). Jehová Diosca paipaj espíritu santotaca ‘tucuita rurai tucuj cashcata’ ñucanchijpi ricuchingapajmi utilizan (2 Corintios 4:7; Hechos 1:8). Paipaj espíritu santohuan ayudajpimi ima problemacunatapish chꞌimbapurai tucushun.

11. ¿Espíritu santoca ima shinataj ayudai tucun?

¹¹ Yayitu Dios paipaj espíritu santota cujpimi pai ima mingashcataca pajtachi tucunchij. Imata ruranata yachajpica chaita ashtahuan alli rurachunmi ayudanga. Ñucanchijllaca imatapish mana pajtachi tucunchijchu. Diospaj espíritu santota chasquishpallami paipajtaca alli rurai tucunchij.

12. Salmo 139:23, 24-pi nishca shinaca ¿Diosta mañacushpaca imatataj mañana canchij?

¹² ¿Espíritu santota valorashcata ricuchingapajca imatataj rurana canchij? Ñucanchij shungupi, yuyaipi ima mana alli munaicuna o yuyaicuna tiyashcata cuentata cungapajca Jehová Diostami mañana canchij (Salmo 139:23, 24-ta liyipai). Yaya Diosca paipaj espíritu santota cushpami imapi cambiana cashcata ricuchinga. Mana alli yuyaicunata, mana alli munaicunata charishpaca chaicunamanta jarcaringapajmi Diostaca paipaj espíritu santohuan ayudachun mañana canchij. Chashnami mana alli ruraicunata mana rurasha nishcata ricuchishun. Chaipica Jehová Diosca paipaj espíritu santohuanmi ayudashpa catinga (Efesios 4:30).

13. ¿Espíritu santota valorangapajca imallatataj yuyarina canchij?

¹³ Cunan punllacunapi Yayitu Dios paipaj espíritu santohuan imallata ruracujta yuyarishpami ashtahuan valoranchij. Jesusca jahua pachaman manaraj rishpaca paipaj discipulocunamanca: ‘Jucha illaj espíritu cancunapaj jahuaman shamujpimi, imatapish rurai tucuj canguichij. Chashna cashpami cai pachapi tiyaj tucui llajtacunapi huillanguichij’ nircami  (Hechos 1:8). Cai nishcacunaca tucuimi pajtarishca. Dios paipaj espíritu santohuan ayudajpimi muyundij Allpapica 8 millón y medio gentecuna Diosta sirvijcuna tucushcacuna. Espíritu santo ñucanchijta ayudajpimi cꞌuyaj canata, cushi canata, mana utca pꞌiñarij canata, alli shungu canata, crij canata yachashcanchij. Shinallataj sumaj causaita charinata, manso shungu canata, quiquinllataj jarcarij canatami yachashcanchij. Shinami Diosta sirvijcunaca tandalla, sumajta causacunchij (Gálatas 5:22, 23). Chaimantami espíritu santoca shuj sumaj regalo can.

14. ¿Huillacujpica picunataj ñucanchijta ayudan?

¹⁴ Jehová Dioshuan, Jesushuan, angelcunahuan tandalla trabajana sumaj regalotapishmi chasquishcanchij (2 Corintios 6:1). Huillacushpaca paicunapaj ayudatami chasquinchij. Pabloca Diosta sirvijcunamanta, paimanta parlashpaca: “Diospajta paihuan rurajcunami” canchij nircami (1 Corintios 3:9). Predicacushpaca Jesustapish apoyacushcatami ricuchinchij. Jesusca paita catijcunata “tucui cai pachata richij, ñuca yachacujcunata ruraichij” nishca qꞌuipaca: ‘Cancunahuanmi casha’ nircami (Mateo 28:19, 20). Angelcunapish huillachun ayudashcamantami agradicinchij. Paicunaca ‘Allpapi causajcunaman huiñaipaj alli huillaita’ huillachunmi ayudashcacuna (Apocalipsis 14:6).

15. ¿Jehová Dios huillachun ayudashcataca ima shinataj yachai tucunchij? Shuj ejemplomanta parlai.

¹⁵ Diospaj gobiernomanta huillacushpaca allpapi muyucunata tarpucuj shinami canchij. Gentecuna Diosmanta uyajpica muyucuna alli allpapi urmashpa huiñacuj shinami can (Mateo 13:18, 23). ¿Gentecuna Diosmanta yachachun, Diosta sirvichunca pitaj ayudan? Jesusca: “Yaya mana pushamujpica, ñucapajmanca pi mana shamui tucunchu” nircami (Juan 6:44). Caimanta yachangapajca Bibliapi shuj ejemplota ricushun. Shuj cutinca Pabloca Filipos llajtamanta llujshishpami huaquin huarmicunaman predicarca. Bibliapica Lidiamanta parlashpaca: “Jehová Diosmi Pablo huillacushcata alli uyachun cai huarmipaj shunguta pascarca” ninmi (Hechos 16:13-15, NWT ). Lidia huarmita shinallatajmi Jehová Diosca achca gentecunataca paipaj puebloman yaicuchun ayudacushca.

16. ¿Huillacujpi tucui alli llujshijpica pitataj jatunyachina canchij?

¹⁶ ¿Huillacujpi tucui alli llujshijpica pitataj jatunyachina canchij? Pabloca Corinto llajtapi causaj huauqui panicunaman quillcacushpaca: “Ñucaca tarpurcanimi, Apolosca yacutami churarca, ashtahuanpish huiñachijca Diosmari. Chashnami tarpujpish, yacuta churajpish mana ima canchij, ashtahuanpish huiñachijca Diosmari” nircami (1 Corintios 3:6, 7). Huillacujpi tucui alli llujshijpica Pablo shinallatajmi Jehová Diosllata jatunyachina canchij.

17. ¿Jehová Diospish, Jesuspish, angelcunapish paicunata ayudachun saquishcamantaca ima shinataj agradicishcata ricuchinchij?

¹⁷ ¿Jehová Diospish, Jesuspish, angelcunapish paicunata ayudachun saquishcamantaca ima shinataj agradicishcata ricuchinchij? Paicunata agradicishcataca gentecunaman huillangapaj tucui pudishcata rurashpami ricuchinchij. Chaipajca achca gentecuna tiyan ladocunapi, huasin huasin rishpami huillana canchij (Hechos 20:20). Achca huauqui panicunaca maipi cashpapish, imata ruracushpapish huillanatami munancuna. Mana rijsishcacunahuan tupashpaca paicunata cushilla saludashpa paicunahuanmi parlai callarincuna. Gentecunapish parlanata munajpica  Diospaj gobiernomantami alli huillaicunata paicunaman asha asha parlai callarincuna.

18, 19. a) ¿Plantapi yacuta churaj shina Bibliamanta yachasha nijcunataca ima shinataj ayudana canchij? b) ¿Sudáfrica llajtamanta shuj huauquitaca Yayitu Diosca ima shinataj ayudarca?

¹⁸ ‘Diospajta paihuan rurajcuna’ cashcata ricuchingapajca muyuta tarpuj shinallaca mana saquirinachu canchij. Ashtahuanpish plantapi yacuta churaj shinami Diosmanta uyanata munajcunataca cutin visitana canchij. Mana cashpaca paicunata Bibliamanta yachachichunmi shuj huauquita o panita mañana canchij. Bibliamanta estudiajcunata paicunapaj yuyaipi, shungupi cambiachun Jehová Dios ayudacushcata ricushpaca cushillami sintirinchij.

¹⁹ Sudáfrica llajtamanta shuj huauquica manaraj testigo de Jehová cashpaca brujomi carca. Bibliata estudiai callarishpaca Bibliapi ima yachachishcacunatami yachanata munarca. Pero huañushcacunahuan mana parlana cashcatami Bibliapi liyirca. Chaita saquinaca paipajca sinchimi carca (Deuteronomio 18:10-12). Shinapish Jehová Dios paipaj yuyaita cambiashpa catichunmi saquirca. Chai trabajollata charishpapish tiempohuanca brujo canatami saquirca. Cai huauquica cunanca 60 huatacunatami charin. Paica: “Testigo de Jehovacuna ñucata achcata ayudashcamanta, shuj alli trabajota japichun ayudashcamantami achcata agradicini. Pero ashtahuantajca Jehová Diosmi ñuca causaipi cambiachun ayudashca. Testigo de Jehová cashcamantami cunanca shujtajcunamanpish predicai tucuni. Caicunamantami Yayitu Diosta shungumanta agradicini” ninmi.

20. ¿Imacunallatataj valorashcata ricuchisha ninchij?

²⁰ Cai yachaipica mana ricui tucushca chuscu regalocunamantami yachashcanchij. Caicunamanta ashtahuan valishcaca Dioshuan alli apanacunami can. Chaimantami shujtaj mana ricui tucushca regalocunatapish chari tucunchij. Por ejemplo, Diostami mañai tucunchij, paipaj espíritu santotami chasqui tucunchij. Huillangapajpish Jehovapaj, Jesuspaj, angelcunapaj ayudatami chasquinchij. Cai mana ricui tucuipaj regalocunataca tucui shunguhuan valorashcatami ricuchisha ninchij. Shinallataj Jehová ñucanchij alli amigo cashcamantami paita agradicinataca manataj saquisha ninchij.