Sara * shuti panica: “Shujtajcunahuan parlanatami manchani. Chaimantami rato pꞌiñarijcunahuan, paicuna munashca shina imatapish rurasha nijcunahuanca mana tandanacunata munani. Pero manso shungucunahuan, humildecunahuan tandanacushpaca cushillami sintirini. Paicunahuan cashpaca ima shina sintirishcata, ñuca problemacunamantami parlani. Paicunami ñucapaj alli amigocuna can” ninmi.

Sara nishca shinaca manso shungu cajpica shujtajcunapish ñucanchijhuanmi tandanacunata munangacuna. Manso shungucunatami Jehová Diosca cꞌuyan. Bibliapica: ‘Manso shungu canata churarichij’ ninmi (Colosenses 3:12). ¿Manso shungu canaca imataj can? ¿Caitaca Jesusca ima shinataj ricuchirca? ¿Manso shungu canaca ima shinataj cushilla causachun ayudan?

Tranquilo causaj gentecunaca manso shungu cashcatami ricuchincuna. Paicunaca shujtajcunatami respetohuan, cꞌuyaihuan tratancuna. Problemacuna ricurijpipish mana rato pꞌiñarincunachu.

Bibliapica griego shimita manso shungu nishpaca urcupi causaj caballota mansashcamanta parlangapajmi utilizajcuna carca. Caballoca mansajpipish mana irquiyanchu. Ashtahuanpish fuerzata charishpami catin. Manso shungu gentecunapish mana irquicunachu can. Ashtahuanpish cꞌari cꞌari gentecunami can. ¿Imamantataj chashna ninchij? Manso shungucunaca mana alli ruraicunamantami jarcarin. Shujtajcunahuanpish allimi apanacuncuna.

Mana manso shunguta charishcatami yuyai tucunchij. Rato pꞌiñarijcunahuan, paicuna munashca shina imatapish rurasha nijcunahuan causashcamantami maipica manso shungu canaca sinchi can (Romanos 7:19). Pero manso shungu cangapajca tucui pudishcatami rurana canchij. Jehová Diosmi paipaj espíritu santota cushpa ayudanga (Gálatas 5:22, 23). ¿Manso shungu cangapajca imamantataj esforzarina canchij?

Manso shungu cajpica shujtajcunami ñucanchijhuan pasanata munangacuna. Sara nishca shinami manso shungucunahuan tandanacushpaca cushilla sintirinchij. Jesusca manso shungu, llaquij cashcamantami rijsishca carca (2 Corintios 10:1). Chaimantami Jesusta mana tanto rijsij huahuacunapish paihuan pasanata munarcacuna (Marcos 10:13-16).

Manso shungu canaca ñucanchijpajpish shujtajcunapajpish allimi can. Manso shungu cashpaca mana rato pꞌiñarishunchu. Imatapish mana rurai tucushpaca mana colerashunchu (Proverbios 16:32). Ashtahuanpish cꞌuyashca amigocunata,  familiacunatapish mana llaquichishunchu. Chashnami tranquilos sintirishun. Mana rato colerajpica shujtajcunapish tranquilomi sintiringacuna.

Jesusca ima ruraicunapi achca ocupado cashpapish paica siempremi manso shungu carca. Achca gentecunaca llaquicunahuan, problemacunahuanmi causajcuna carca. Chaimantami paicunaca pi ayudachun minishtircacuna. Jesusca: ‘Ñucapajman shamuichij manso, mana jatun tucushca shungu cashcata yachaichij’ nircami. Cai shimicunata uyashpaca llaquicunata charijcunaca cushillami sintirishcanga (Mateo 11:28, 29).

Jesuspaj ejemplota catishunchij. Gentecunata Jesús ima shina tratashcata, problemacunata ima shina chꞌimbapurashcata yachangapajca Bibliatami estudiana canchij. Problemacunata charishpaca pai shinami chꞌimbapurana canchij (1 Pedro 2:21). ¿Jesusca imamantataj manso shungu carca? Cunanca quimsa yuyaicunata ricushun.

Jesusca humildemi carca. Paillatajmi: ‘Manso, mana jatun tucushca shungumi cani’ nirca (Mateo 11:29). Bibliapica manso shungu canamanta parlashpaca, humilde canamantapishmi parlan. Manso shungu cashpaca humilde cashcatami ricuchishun (Efesios 4:1-3).

Humilde cashpaca pi ñucanchijmanta imata nijpipish mana rato pꞌiñarishunchu. Gentecunaca Jesustaca yangamanta juchachishpami: ‘Paica achcata micujmi, vinotapish ubyajmi’ nircacuna. Pero Jesusca paipaj alli ejemplohuanmi chai mana cierto cashcata ricuchirca. Paica humildemi carca. Chaimantami mana pꞌiñarishpa: “Alli yuyaita charishcataca ruraicunahuanmi ricuchi tucunchij” nirca (Mateo 11:19, NWT ).

Ñucanchij ima raza cashcamanta o maimanta cashcamantachari burlaringacuna. Chaipica mana pꞌiñarishpa, manso shunguhuanmi cutichina canchij. Sudáfrica llajtamanta Peter shuti shuj ancianoca: “Pi imata nijpi ñucata pꞌiñachijpica Jesusca imatashi ruranman carca nishpami yuyani. Chashnami mana rato resintirinata yachashcani” ninmi.

Jesusca gentecuna juchayuj cashcataca allimi yacharca. Paipaj discipulocunaca allita rurana yuyaillami carcacuna. Pero juchayuj cashcamantami huaquinpica pandarircacuna. Por ejemplo, Jesús huañunapaj shuj tuta faltajpica Pedro, Santiago, Juanpish paita mana cazushpami dormircacuna. Chaimi Jesusca: “Espirituca mañanata yuyanmi, ashtahuanpish aichaca shaicushcami” nirca (Mateo 26:40, 41). Jesusca paipaj discipulocuna juchayuj cashcata yachashpami paicunahuanca mana pꞌiñarirca.

Mandy shuti panimanta yachashun. Paica shujtajcuna tucuita alli rurachunmi munaj carca. Pero cunanca Jesús shina manso shungu cangapajmi tucui pudishcata ruran. Paica: “Tucuicuna juchayuj cashcataca siempremi yuyarini. Chaimantami paicunapaj alli ruraicunataca Jehová Dios shina ricungapaj esforzarini” ninmi. Mandyca Jesuspaj ejemplota catishpami tucuicuna pandarijlla cashcata intindirca. Ñucanchijpish chaita alli intindishpaca shujtajcunataca allimi tratashun

Jesusca tucui imatapish Jehová Diospaj maquipimi saquirca. Pai cai Allpapi cajpica contracunaca pai nishcacunata mana intindishpami yangamanta juchachircacuna. Shinallataj paita mana ricunayachishpami llaquichircacuna. Gentecuna chashna tratajpipish paica siempremi manso shungu cashcata ricuchirca. Jesusca “tucui imatapish cashcata ricuchij Diospaj maquipimi mingarca” (1 Pedro 2:23). Paica Jehová cuidanataca allimi yacharca. Shinallataj mana alli trataj gentecunataca pai agllashca horaspi castiganatapishmi yacharca.

Pi ñucanchijta mana alli tratajpica ratomi colerai tucunchij. Chashna colerashpaca llaquipimi urmashun. Chaimantami Bibliapica: “Pꞌiñarijlla runaca, Diospaj munaitaca mana rurai tucunchu” nin (Santiago 1:20). Mana yangamanta colerashpapish juchayuj cashcamantami maipica mana alli comportari tucunchij.

Alemania llajtamanta Cathy shuti panica: “Ñucallataj mana difindirijpica ¿pitaj difindingayari?” nishpami yuyaj carca. Pero Jehovapi confianata yachashpaca chashna yuyanatami saquirca. Paica: “Ñucallataj difindirinataca ña mana minishtinichu. Tucui mana allicunataca Jehová Dios allichinatami yachani. Chaita yachashcamantami manso shungu canaca jahualla can” ninmi. Huaquinpi ñucanchijtapish  mana alli tratajpica Jesús shinami Yayitu Diospi confiana canchij. Caita yuyaipi charishpami manso shungu tucushun.

Jesusca cushilla cangapajca manso shungumi cana canchij nircami. Paica: ‘Manso shungucunaca, cushichishcami canga’ nircami (Mateo 5:5). Manso shungu cana imamanta alli cashcata ricushun.

Manso shunguta charishpami cusa huarmica alli causai tucuncuna. Australia llajtamanta huauqui Robertca: “Yallitaj pꞌiñarishcamantami ñuca huarmitaca llaquichij shimicunahuan rimaj carcani. Chaita ninataca mana munarcanichu. Pero maipish cachun colera horas rimashcataca ña mana tigra allichi tucurcanichu. Ñuca huarmisitata llaquichishcata cuentata cushpaca dimastijmi llaquilla sintirircani” nishpami parlan.

Imata parlacushpaca “tucuicunami achca cutin pandarinchij”. Imatapish mana alli yuyashpa rimashpaca huarmita o cusatami llaquichi tucunchij (Santiago 3:2). Manso shunguta charinami mana yallitaj pꞌiñarichun, alli yuyashpa parlachun ayudan (Proverbios 17:27).

Robertca mana utca pꞌiñaringapaj, imamantapish jarcaringapajmi esforzarirca. Paica: “Ñuca huarmihuan imapi mana de acuerdo cashpaca paita alli uyangapaj, cꞌuyaihuan parlangapaj, mana utca pꞌiñaringapajmi esforzarini. Cunanca allimi apanacunchij” ninmi.

Manso shunguta charishpaca shujtajcunahuanmi alli apanacushun. Rato pꞌiñarijcunaca ashalla amigocunatami charincuna. Pero manso shungucunaca tucuicunahuanmi sumajta causancuna (Efesios 4:2, 3). Alemania llajtamanta pani Cathyca: “Maijancunahuan alli apanacunaca asha sinchimi can. Shinapish manso shungu cashcamantami shujtajcunahuan cashpaca cushilla sintirini” ninmi.

Manso shunguta charishpaca tranquilomi sintirishun. Bibliapica ‘jahua pacha yachaimanta’ parlashpaca, manso shungu canamanta, tranquilo causanamantapishmi parlan (Santiago 3:13, 17). Manso shungu gentecunaca tranquilocunami can (Proverbios 14:30). Huauqui Martinca manso shungu cangapajmi achcata esforzarishca. Paica: “Cunanca ñuca munashca shina imatapish rurachunca pita mana obliganichu. Chaimantami tranquilo, cushilla sintirini” ninmi.

Ñucanchijpish manso shungu cangapajmi tucui pudishcata rurana canchij. Shuj huauquica: “Cunan punllacunapipish huaquinpica mana jahuallatami colerani” ninmi. Pero Jehová Diosmi ñucanchijtaca manso shungu cachun ayudanga (Isaías 41:10; 1 Timoteo 6:11). Paica ñucanchij alli tucungacamami yachachinga, sinchiyachinga (1 Pedro 5:10). Apóstol Pabloca ‘Cristo llaquij alli shungu cashca shinami’ carca. Tiempohuanca ñucanchijpish Pablopaj ejemplotami catishun (2 Corintios 10:1).