YACHAI 21
Jehová Diosmi ñucanchijmanca fuerzasta cushpa catinga
‘Chashna irquilla cashpami, ashtahuan sinchi tucuni’ (2 CORINTIOS 12:10).
CANTO 73 Ama manchangapaj ayudahuai
CAITAMI YACHASHUN *
1, 2. ¿Achca huauqui panicunaca ima llaquicunahuantaj chꞌimbapurancuna?
APÓSTOL Pabloca Diosta sirvijcunata, Timoteotami Diospaj mingashcacunata pajtachishpa catichun animarca (2 Timoteo 4:5). Sinchi cajpipish ñucanchijpish Dios mingashcata pajtachingapajmi esforzarinchij (2 Timoteo 4:2). Por ejemplo, huaquin lugarcunapica gobiernocunaca predicachunca mana saquincunachu. Pero huauqui panicunaca carcelman rinata mana manchashpami huillashpa catincuna.
2 Achca huauqui panicunaca chꞌican chꞌican llaquicunata charishcamantami desanimarincuna. Maijancunaca minishtirishca cosascunata familiaman cungapajmi achcata trabajancuna. Tucui semana trabajashcamantami huillangapajca sábado, domingotaca fuerza illaj sintirincuna. Cutin caishuj huauqui panicunaca ancha ungüita charishcamanta, mayorlla cashcamanta o huasimanta mana llujshi tucushcamantami huillanataca mana tanto pudincuna. Cutin maijancunaca imapaj mana valishca shinami sintirincuna. Pani Mariaca: * “Imapaj mana valishca shina ama sintiringapajmi achca tiempota, fuerzasta llujchina cani. Predicanapaj randi chaillapi yallitaj tiempota ocupashcamantami llaquilla sintirini” ninmi.
3. ¿Cai yachaipica imatataj ricushun?
3 Ñucanchij ima problemacunata charijpipish Jehová Diosca ahuantashpa catichun, paita sirvishpa catichunmi fuerzasta cushpa ayudanga. Cai yachaipimi Jehová Dios ima shinalla ayudanata ricushun. Pero caita manaraj yachashpaca apóstol Pablo, Timoteo llaquicunata charijpipish Jehová Dios paicunata ima shina ayudashcatami ricushun.
JEHOVÁ DIOSCA HUILLASHPA CATICHUNMI FUERZASTA CUN
4. ¿Apóstol Pabloca ima sinchi llaquicunahuantaj chꞌimbapurarca?
4 Apóstol Pabloca achca llaquicunahuanmi chꞌimbapurarca. Paita macajpi, rumicunahuan shitajpi, carcelpi churajpimi fuerzasta minishtirca (2 Corintios 11:23-25). Paica llaquilla sintirishpaca mana pingashpami pai ima shina sintirishcataca shujtajcunaman huillarca (Romanos 7:18, 19, 24). Ashtahuancarin apóstol Pabloca garrochahuan tujsicuj shina ñuca aichamanta jatun nanaita anchuchihuayari nishpami Diostaca mañarca (2 Corintios 12:7, 8).
¿Jehová Diosca apóstol Pablotaca pai mingashcata pajtachichunca ima shinataj ayudarca? (Párrafos 5 al 6-ta ricui). *
5. ¿Pabloca sinchi jarcaicunata charishpapish Jehová Diostaca ima shinataj sirvishpa catirca?
5 Jehová Diosca apóstol Pablo llaquicunahuan cajpipish pai mingashcata pajtachichunmi fuerzasta cushpa ayudarca. Por ejemplo, apóstol Pabloca Romapi prezu cashpaca Diospaj alli huillaicunatami achca gentecunapaj ñaupajpi, gobiernocunapaj ñaupajpi difindirca. Shinallataj guardiacunaman, paita visitajcunaman predicashpa catirca (Hechos 28:30, 31; Filipenses 1:13). Jehová Diosca Pablotaca carcelpi cajpimi huaquin cartacunata quillcachun ayudarca. Cai cartacunaca apostolcuna causashca punllacunapipish, cunan punllacunapipish Diosta sirvijcunataca achcatami beneficiashca. Paipaj alli ejemplomi Romapi saquirij huauqui panicunapish paicunapaj feta sinchiyachishpa Diospaj Shimita mana manchashpa huillachun ayudarca (Filipenses 1:14). Pabloca chꞌican chꞌican jarcaicunata charishpapish Jehová Diosta sirvingapajmi tucui pudishcata rurarca. Chaimantami paica: ‘Ñucata tucui laya llaquicuna japishcamantamari, maipipish ashtahuan huillai tucushcani’ nirca (Filipenses 1:12, NVI, 1999).
6. 2 Corintios 12:9, 10-pi nishca shinaca ¿Pabloca paiman mingashcacunataca imamantataj pajtachi tucurca?
6 Apóstol Pabloca Jehová Dios paipaj espíritu santohuan ayudajpimi contracuna llaquichijpipish, carcelpi cashpapish, problemacunata charishpapish Jehová Dios mingashcataca pajtachi tucurca. Chaimantami paica: ‘Ñuca irquilla cajpica Diosmi paipaj poderhuan ñucapi jundachinga’ nirca (2 Corintios 12:9, 10-ta liyipai).
¿Jehová Diosca Timoteotaca pai mingashcata pajtachichunca ima shinataj ayudarca? (Párrafo 7-ta ricui). *
7. ¿Timoteoca Dios mingashcata pajtachicushpaca ima laya llaquicunahuantaj chꞌimbapurarca?
7 Joven Timoteopish Jehová Dios ayudajllapimi paiman mingashcata pajtachi tucurca. Por ejemplo, Timoteoca Pablotaca huaquin llajtacunapi huillangapajmi acompañarca. Shinallataj Pabloca Timoteotaca huaquin congregacioncunata visitashpa animachunmi mingarca (1 Corintios 4:17). Chaimi Timoteoca tal vez cai mingashcacunataca mana pajtachi tucushachu nishpa yuyashcanga. Chaimantachari apóstol Pabloca: “Pajta cantaca, huambrami nishpa pi rimanman” nirca (1 Timoteo 4:12). Timoteoca chai punllacunapica casi siempremi ungushca pasaj carca (1 Timoteo 5:23). Pero paica cai llaquicunata, jarcaicunata charishpapish Dios mingashcacunata pajtachingapaj, huauqui panicunata animangapaj Jehová fuerzasta cunataca allimi yacharca (2 Timoteo 1:7).
LLAQUICUNAHUAN CAJPIPISH JEHOVÁ DIOSMI FUERZASTA CUNGA
8. ¿Cunan punllacunapish Jehová Diosca ima shinataj ñucanchijta sinchiyachin?
8 Cunan punllacunapica Jehová Diosca paita sirvijcuna llaquicunahuan cajpipish paita sirvishpa catichunmi fuerzasta cun (2 Corintios 4:7). Jehová Diosca ñucanchijta sinchiyachingapajca mañana regalotami cushca. Shinallataj Bibliata, huauqui panicunatapishmi cushca. Ashtahuancarin huillana regalotapishmi cushca. Cai chuscu regalocunamanta yachashpa catishunchij.
Jehová Dios fuerzasta cuchunca Diosta mañashunchij. (Párrafo 9-ta ricui).
9. ¿Imamantataj Diosta mañana canchij?
9 Pabloca: “Punllanta Diosta mañaichij” nircami (Efesios 6:18). Chaita rurajpica Jehová Diosmi ñucanchijtaca sinchiyachishpa catinga. Bolivia llajtamanta huauqui Jonnieca Jehová Dios ayudajpimi chꞌican chꞌican problemacunahuan chꞌimbapurarca. Paipaj yaya mama, paipaj huarmica tucuicunami chai tiempollataj ungushcacuna carca. Chaimi paicunata cuidanaca sinchi carca. Qꞌuipacarin paipaj mamami huañurca. Paipaj huarmi, paipaj yayaca achca tiempo qꞌuipami alliyarcacuna. Huauqui Jonnieca: “Cashna llaquicunahuan cashpaca ñuca ima shina sintirishcata, imapi ayudachun minishtishcatami Jehová Diosmanca mañarcani” ninmi. Cai huauqui llaquicunahuan chꞌimbapurashpa catichunca Jehová Diosmi fuerzasta curca. Chai llajtallapitaj congregacionta pushaj huauqui Ronaldpaj mamami cáncer ungüita japirca. Shuj quilla qꞌuipacarin huañurcami. ¿Ronaldca ñaupajman catingapajca imatataj rurarca? Paica: “Ñuca ima shina sintirishcataca shungumantami Jehová Diosman parlarcani. Jehová Diosca ñucanchij ima shina sintirishcataca ñami yachan” nircami. Maipica ima shina sintirishcata parlana sinchi cajpipish Jehová Diosmanca parlanallami canchij. Paica ñucanchij ima shina sintirishcata paiman parlachunmi munan (Romanos 8:26, 27).
Jehová Dios fuerzasta cuchunca Bibliata liyishunchij. (Párrafo 10-ta ricui).
10. Hebreos 4:12-pi nishca shinaca ¿imamantataj Bibliata liyishpa chaipi cutin cutin yuyana canchij?
10 Apóstol Pablo shinami Dios quillcachishcacunataca liyina canchij. Chashnami fuerzasta charishun. Tranquilopish sintirishun (Romanos 15:4). Bibliata liyicushpaca chaipi cutin cutin yuyashunchij. Jehová Diosca paipaj espíritu santohuanmi pai yachachishcacunata intindichun, llaquicunata chꞌimbapurachun ayudanga (Hebreos 4:12-ta liyipai). Párrafo 9-pi parlashca huauqui Ronaldca: “Ñucaca cada chishimi Bibliata liyingapaj, liyishcapi yuyangapajca tiempota surcuni. Chashnami Jehová Dios ñucanchijta cꞌuyaj, llaquij cashcata intindini. Caita intindishpaca ashtahuan animarishcami sintirini” ninmi.
11. ¿Shuj panica llaquicunahuan cashpa Bibliata liyishpaca ima shinataj sintirirca?
11 Bibliata liyishpa chaipi cutin cutin yuyashpaca ñucanchij charishca problemacunallapica mana yuyashunchu. Por ejemplo, shuj panica viudami saquirirca. Chaimi shuj ancianoca Job librota liyichun animarca. Job libromanta liyicushpaca cai panica ‘Jobca paipaj problemacunallapimi yallitaj yuyan’ nishpami yuyai callarirca. Qꞌuipaca paipish Job layallataj yuyacushcatami cuentata curca. Chaita intindishpaca problemacunapi ama yallitaj yuyangapajmi esforzarirca. Shinallataj paipaj cusa huañushcamanta chai llaquicunata chꞌimbapurangapajpish fuerzatami charirca.
Jehová Dios fuerzasta cuchunca huauqui panicunahuan pasashunchij. (Párrafo 12-ta ricui).
12. ¿Jehová Diosca ima shinataj huauqui panicunahuanca sinchiyachin?
12 Jehová Diosca ñucanchij llaquilla cajpica huauqui panicunahuanmi animan. Pabloca: ‘Caishujmanta chaishujmanta animanacungapajmi huauqui panicunata ricusha nini’ nircami (Romanos 1:11, 12). Párrafo 2-pi parlashca pani Mariaca huauqui panicunahuan pasanatami achcata munan. Paica: “Jehovami ñucataca turi ñañacunahuan ayudan. Turi ñañacunaca ñuca ima llaquicunahuan cajta mana yachashpapish sinchiyachishpami ayudashcacuna. Paicunaca alaja, animaj shimicunahuan o cartacunahuanmi ñuca minishtishca horaspi ayudancuna. Ñucaca ñuca layallataj llaquicunata charishca turi ñañacunahuanmi pasani. Paicunapaj experienciamantaca achcatami yachani. Ancianocunapish congregacionpaj valishca cashcatami ricuchincuna” ninmi.
13. ¿Ima shinataj tandanacuicunapica animanacuna canchij?
13 Tandanacuicunapimi huauqui panicunata cꞌuyashcata, paicunapaj alli ruraicunamantapish agradicishcata ricuchi tucunchij. Por ejemplo, tandanacui manaraj callarijpi congregacionta pushaj huauqui Peterca mana Testigo cusayuj panitaca: “Can tandanacuicunaman shamujpi siempre cambaj huahuacunapish alli prepararishca comentariocunata cujpica ñucanchijca achcatami animarinchij” nircami. Chaimi cai panica huiqui muyurishpaca: “Cashna cushichij shimicunahuan animachunmi minishtircani” nirca.
Jehová Dios fuerzasta cuchunca huillanata amataj saquishunchij. (Párrafo 14-ta ricui).
14. ¿Huillashpaca ima shinataj sintirishun?
14 Huillanaman llujshishpaca gentecuna uyajpipish, mana uyajpipish animarishcami sintirinchij (Proverbios 11:25). Por ejemplo, pani Stacypaj familiata congregacionmanta llujchijpica paica dimastij llaquillami sintirirca. Chaimanta Stacyca: “Ñuca familiata ayudangapajmi ashtahuan esforzarina carcani” nishpami yuyarca. ¿Pero cai llaquicunata ahuantashpa catingapajca imatataj rurarca? Paica huillanaman llujshishpaca gentecunata ayudangapajmi esforzarirca. Pani Stacyca: “Ñuca llaquilla cai horasca Jehová Diosmi shuj Bibliamanta yachacujta curca. Cai yachacuj Biblia yachachishcacunata paipaj causaipi pajtachijta ricushpaca achcatami animarircani. Ñucapajca huillanaman llujshinami tucuimanta valishca can” ninmi.
15. ¿Pani Mariamantaca imatataj yachanchij?
15 Maipica predicanapica mana tanto ayudai tucushachu nishpachari yuyanchij. Pero gentecunaman predicangapaj tucui pudishcata rurajpica Jehová Diosca cushillami sintiringa. Párrafo 12-pi parlashca pani Mariaca shujtaj shimita parlaj congregacionpimi sirvinaman rirca. Paica: “Callaripica gentecunamanca ashallata parlashpami predicaj carcani. Mana cashpaca shuj versollata o shuj tratadollatami saquij carcani” ninmi. Cai panica shujtaj huauqui panicuna shina chai shimita mana tanto parlai tucushcamantami imapaj mana valishca shina sintirirca. Pero qꞌuipaca chai shimita mana tanto parlai tucushpapish Jehová Dios ayudajllapi gentecunaman predicai tucushcatami cuentata curca. Paica: ‘Maipica gentecuna parlashca shimitaca mana tanto parlai tucunchijchu. Pero Biblia yachachishcacuna intindirinalla cajpimi gentecunaca Bibliamanta yachashpa paicunapaj causaipi cambiai tucuncuna’ ninmi.
16. ¿Huasimanta mana llujshi tucushpapish cushilla huillashpa catingapajca imatataj rurana canchij?
16 Huillangapaj huasimanta mana llujshi tucujpipish Jehová Diosca predicangapaj esforzarishcatami valoran. Chaimantami ungushca cajpica Diosca doctorcunaman o ñucanchijta cuidajcunaman predicachun ayudan. Maipica ñaupa laya mana huillai tucushcamantami desanimarinchij. Pero Jehová Dios ayudacushcata ricushpaca fuerzasta japishpami cushilla huillashpa catishun.
17. Eclesiastés 11:6-pi nishca shinaca ¿imamantataj huillashpa catina canchij?
17 Gentecunaman predicashpaca picuna Jehová Diosta sirvinataca mana yachanchijchu (Eclesiastés 11:6-ta liyipai). Por ejemplo, 80 huatacunata charij pani Barbaraca telefonomanta cayashpa, cartacunata quillcashpami predican. Paica shuj cartata cachacushpaca chai cartapica 1 de marzo de 2014-pi llujshishca shuj Atalaya revistatami churarca. Chai revistapica “¿Qué ha hecho Dios por usted?” nishca temami carca. Cai cartataca shuj cusa huarmimi chasquishcacuna carca. Paicunaca 27 huatacuna huashamanmi Jehová Diosta sirvinataca saquishcacuna carca. Pero paicunaca cai revistataca cutin cutinmi liyircacuna. Cusaca: “Cai revistata liyicushpaca Jehová Dios ñucahuan parlacushca shinami sintirircani” ninmi. Chai qꞌuipaca ishquindijmi tandanacuicunamanca cutin ri callarircacuna. Qꞌuipacarin Diospaj pueblomanmi tigrarcacuna. Pani Barbaraca chai cusa huarmi pai cushca cartata chasquishpa Jehová Diospajman tigrashcata yachashpaca cushillami sintirishcanga.
Jehová Dios fuerzasta cuchunca 1) Diosta mañashunchij, 2) Bibliata liyishunchij, 3) huauqui panicunahuan pasashunchij, 4) huillanata amataj saquishunchij. (Párrafos 9, 10, 12 y 14-ta ricui).
18. ¿Jehová Dios fuerzasta cushpa catichunca imallatataj rurana canchij?
18 Ña ricushca shinaca Jehová Diosca ñucanchij llaquicunahuan cajpica fuerzata cushpami ayudanga. Chaimanta Diosta mañangapaj, Bibliata liyingapaj, huauqui panicunahuan pasangapaj, huillanaman llujshingapaj esforzarishunchij. Caicunata rurashpaca Jehová Diospi confiashcata, pai ayudachun saquishcatami ricuchishun. Jehová Diosca paita tucui shunguhuan sirvijcunata ayudangapajmi siempre listo can (2 Crónicas 16:9).
CANTO 61 ¡Testigocuna, ñaupajman catishunchij!
^ par. 5 Sinchi punllacunapi causacujpipish Jehová Diosmi cai llaquicunata chꞌimbapurachunca ayudanga. Cai yachaipimi apóstol Pablota, Timoteota llaquicunahuan cajpipish Jehová Dios paita sirvishpa catichun ima shina ayudashcata ricushun. Shinallataj llaquicunata ahuantangapaj Jehová Dios chuscu ayudacunata cushcatami ricushun.
^ par. 2 Cai shutitami cambiashcanchij.
