YACHAI 19
Jehovata cꞌuyajcunapajca ima ñitcarinaca mana tiyanchu
“Quiquin cushca mandashcacunata cꞌuyajcunaca, sumajta causanatami achcata charincuna. Ima ñitcarinaca paicunapajca mana tiyanchu” (SALMO 119:165).
CANTO 122 ¡Tucuri punllacama amataj shaicurishunchij!
CAITAMI YACHASHUN *
1, 2. a) ¿Shuj yachaj runaca imatataj nirca? b) ¿Cai yachaipica imatataj yachashun?
CUNAN punllacunapica achca gentecunaca Jesuspimi crinchij nincunami. Pero Jesús yachachishcacunataca mana chasquincunachu (2 Timoteo 4:3, 4). Shuj yachaj runaca: ‘¿Cunan punllacunapish Jesús shinallataj shuj runa tiyajpi, pai layallataj yachachijpica gentecunaca chasquinmanchu? 2000 huatacuna huashaman ima shinami Jesusta mana chasquirca, chashnallataj mana chasquinmanchu’ nircami.
2 Jesús alajata yachachishcata, milagrocunata rurashcataca achca gentecunami ricurcacuna. Pero chashnapish paipica mana feta churarcacunachu. ¿Imamanta? Pasaj yachaipica caimantaca chuscu yuyaicunatami ricurcanchij. Cai yachaipipish chuscu yuyaicunahuanmi ricushun. Shinallataj cunan punllacunapish Jesusta catijcunata imamanta mana chasquishcata, ñucanchijpish ama ñitcaringapaj imata ruranatami ricushun.
1) JESUSCA TUCUICUNATAMI AYUDARCA
Jesús tucui laya gentecunata ayudajpimi shujtajcunaca paitaca mana catisha nircacuna. ¿Cunan punllacunapish huaquincunaca imamantataj ñitcarincuna. (Párrafo 3-ta ricui). *
3. ¿Imamantataj achca gentecunaca ñitcarishpa Jesusta mana catircacuna?
3 Jesús cai Allpapi cashpaca autoridadta charij gentecunahuan, pobrecunahuan, maltratashca gentecunahuanmi pasarca, micurca. Achca gentecunaca shujtajcunataca juchayujcuna nishpami mana alli tratajcuna carca. Pero Jesusca paicunamanmi cꞌuyaita ricuchirca. Chaimantami jatun tucushca gentecunaca ñitcarishpa Jesusta mana catircacuna. Paicunaca Jesuspaj discipulocunataca: “¿Ima nishpataj tributota japijcunahuan, juchayujcunahuanca micucunguichij, ubyacunguichij?” nishpami tapurcacuna. Chaimi Jesusca: “Mana ungushcacunaca jambijtaca mana mashcancunachu, ungushcacunallami mashcancuna. Ñucaca cashcata rurajcunataca mana cayaj shamurcanichu. Ashtahuanpish juchayujcuna Diosman cutirichunmi cayaj shamurcani” nishpa cutichirca (Lucas 5:29-32).
4. ¿Profeta Isaías nishca shinaca judiocunaca imatataj intindina carca?
4 ¿Mesiasmantaca Bibliapica imatataj yachachin? Mesías manaraj cai Allpaman shamujpimi profeta Isaiasca Mesiasmantaca: ‘Runacunapurapica yanganchishca, mana nishpa shitashcami carca. Tucuicunami mana ricunayachircanchij. Tucuicunami mana munarcanchij. Tucuicunami mana cꞌuyarcanchij’ nirca (Isaías 53:3). Cai profecía pajtarinata yachashpami judiocunaca achca gentecuna Jesusta mana catina cashcata intindina carca.
5. ¿Achca gentecunaca Diosta sirvijcunamantaca imatataj yuyancuna?
5 ¿Cunan punllacunapish gentecunaca imatataj yuyancuna? Iglesiata pushajcunaca charij gentecunata, rijsishca gentecunatami chasquisha nincuna. Chai gentecuna Biblia yachachishcacunata mana cazujpipish chasquincunallami. Iglesiata pushajcunaca Jehová Diosta sirvijcuna cai mundopaj mana importante cashcamantami pꞌiñancuna. Apóstol Pablo nishca shinaca Jehová Diosca cai pachapica gentecuna imapaj mana valishca shinatami paita sirvichunca agllarca (1 Corintios 1:26-29). Pero Jehová Diospajca paita alli sirvijcunaca achca valishcami can.
6. a) ¿Mateo 11:25 y 26-pica Jesusca imatataj nirca? b) ¿Ima shinataj paipaj ejemplota catina canchij?
6 ¿Ama ñitcaringapajca imatataj rurana canchij? (Mateo 11:25, 26-ta liyipai). Achca gentecuna Diosta sirvijcunata imapaj mana valishcata shina ricujpipish Jehová Dios paipaj munaita pajtachingapaj humilde gentecunata agllashcatami yuyarina canchij (Salmo 138:6). Shinallataj humilde gentecuna Diospaj ayudahuan paipaj munaita ima shina pajtachicushcatami yuyarina canchij.
2) JESUSCA RELIGIONTA PUSHAJCUNA PANDA YUYAICUNATA YACHACHISHCATAMI HUILLARCA
7. a) ¿Jesusca imamantataj fariseocunataca mishqui shimi jayaj shungu nirca? b) ¿Paicunaca chashna nijpica ima shinataj sintirircacuna?
7 Religionta pushajcuna mana allicunata rurashcamantami Jesusca paicunata sinchita rimarca. Por ejemplo, fariseocunaca micungapajca maquicunataca codocunacamami maillajcuna carca. Pero, paicunapaj yaya mamacunataca mana cuidajcunachu carca (Mateo 15:1-11). Chaimantami Jesusca paicunataca mishqui shimi jayaj shungumi canguichij nirca. Chashna nijpimi Jesuspaj discipulocunaca: “Cai shimicunata nishcamanta fariseocuna pꞌiñaricujtaca ¿yachanguichu?” nircacuna. Chaimi Jesusca: “Maijan yurapish jahua pachapi caj ñuca Yaya mana tarpushca cajca, sapimanta llujshichishcami canga. Chaicunataca saquichijlla. Paicunaca mana ricujcuna. Mana ricujcunallatataj pushajcunami. Mana ricujllataj caishuj mana ricujta pushajca, ishquindijtajmi jutcupi urmangacuna” nirca (Mateo 15:12-14). Religionta pushajcuna pꞌiñarijpipish Jesusca ima verdadtaj cashcata ninataca mana saquircachu.
8. ¿Jesusca Jehová Dios panda crishcacunata mana chasquishcataca ima shinataj ricuchirca?
8 Jesusca tucui panda yachachishcacunataca Diosca mana chasquinchu nishpami huillarca. Paica: ‘Achca gentecunaca ancho ñanpimi ringacuna. Chai ñanca chingarinamanmi apan. Cutin ashacunallami huiñai causaiman apaj ñanpica yaicungacuna’ nircami (Mateo 7:13, 14). Shinallataj Jesusca huaquin gentecuna jahua ñahuillahuan, ricuillahuan Diosta sirvinatami yacharca. Chaimantami paica: “Llullashpa yachachijcunamanta huaquichirichij. Paicunaca oveja shina churarishcami cancunapajmanca shamuncuna. Ashtahuanpish paicunapaj shunguca millai atujcuna shinami. Paicunataca granota p’ucujta ricushpa pi cashcata rijsinguichij” nirca (Mateo 7:15-20).
Jesús panda costumbrecunata mana alli cashcata ricuchijpimi huaquincunaca paitaca mana catisha nircacuna. ¿Cunan punllacunapish huaquincunaca imamantataj ñitcarincuna? (Párrafo 9-ta ricui). *
9. ¿Jesusca ima yachachishcacuna panda cashcatataj ricuchirca?
9 ¿Mesiasmantaca Bibliapica imatataj yachachin? Bibliapica: ‘Mesiasca Jehová Dios munashca shina adorachunmi difindinga’ nircami (Salmo 69:9; Juan 2:14-17). Chaimantami Jesusca panda yachachishcacunata Jehová Dios mana chasquij cashcata intindichirca. Por ejemplo, fariseocunaca: ‘Almaca mana huañunchu’ nishpami crijcuna carca. Pero Jesusca: ‘Huañushcacunaca ña mana causacunchu. Dormicuj shinami can’ nishpami yachachirca (Juan 11:11). Shinallataj saduceocunaca huañushcacuna causarinataca mana crijcunachu carca. Pero Jesusca paipaj amigo Lazarotami causachirca (Juan 11:43, 44; Hechos 23:8). Cutin fariseocunaca: ‘Diosmi ñucanchijtaca destinashca’ nishpami crijcuna carca. Pero Jesusca cada uno Jehová Diosta sirvinata decidichunmi yachachirca (Mateo 11:28).
10. ¿Diosta sirvijcuna Bibliahuan yachachijpica imamantataj huaquincunaca ñitcarincuna?
10 ¿Cunan punllacunapish gentecunaca imatataj yuyancuna? Ñucanchijca Bibliamanta yachachishpami huaquin crishcacuna panda cashcata ricuchinchij. Chaimantami predicajpica achca gentecunaca ñitcarishpa mana uyasha nincuna. Religionta pushajcunaca ‘Diosca gentecunataca infiernopimi castigan’ nishpami yachachincuna. Chashnami gentecunataca manchachishpa charincuna. Pero Diosta sirvijcunaca Jehová Dios cꞌuyaj cashcata, Yayitu Dios gentecunata infiernopi mana castigaj cashcatami Bibliahuan yachachinchij. Huaquin religioncunapica ‘almaca mana huañunchu’ nishpami yachachincuna. Pero chai cierto cajpica causarinaca mana minishtirinmanchu. Cutin ñucanchijca almaca huañunmi nishpami Bibliahuan yachachinchij. Shinallataj achca religioncunapica ‘Yaya Diosmi ñucanchijta destinashca’ nishpami yachachincuna. Pero ñucanchijca Jehová Diosta sirvingapajca cada uno decidi tucushcatami yachachinchij. Chashna yachachijpimi panda religionta pushajcunaca ñucanchijhuanca achcata pꞌiñarincuna.
11. Juan 8:45 al 47-pi nishca shinaca ¿Jehová Diosca paita sirvijcuna imata rurachuntaj munan?
11 ¿Ama ñitcaringapajca imatataj rurana canchij? Jehová Dios Bibliapi ima nishcata intindishpami crina, cazuna canchij. Pai yachachishcacunataca manataj saquinachu canchij (Juan 8:45-47-ta liyipai). Satanasca chaitaca mana rurarcachu (Juan 8:44). Pero Jehová Diosca paita sirvijcuna Jesuspaj ejemplota catichunmi munan. Chaimantami paica: “Millaitaca p’iñaichij, allitaca catichij” nirca (Romanos 12:9; Hebreos 1:9).
3) CONTRACUNACA JESUSTAMI LLAQUICHIRCACUNA
Jesús caspipi huañujpimi huaquincunaca paitaca mana catisha nircacuna. ¿Cunan punllacunapish huaquincunaca imamantataj ñitcarincuna? (Párrafo 12-ta ricui). *
12. ¿Judiocunaca imamantataj ñitcarishpa Jesusta mana catisha nircacuna?
12 ¿Judiocunaca imamantataj ñitcarishpa Jesusta mana catisha nircacuna? Apóstol Pabloca: “Ñucanchijca caspipi huañuchishca Cristomantami huillanchij. Caica judiocunapajca shuj ñitcachij rumi shinami can” nircami (1 Corintios 1:23, NWT ). Jesús shuj caspipi huarcushca huañujpimi judiocunaca: ‘¿Paica maitataj Mesías cangari? Paica juchayuj, millai runami canga’ nishpa yuyarcacuna (Deuteronomio 21:22, 23).
13. ¿Jesusta mana catijcunaca imatataj mana crisha nircacuna?
13 Jesusta mana catij judiocunaca Jesús ima culpata mana charishcata, paita yangamanta juchachishcataca mana crisha nircacunachu. Pushajcunaca Jesustaca leycunapi nishca shinaca mana juzgarcacunachu. Ashtahuanpish ratomi paicuna munashca shina juzgarcacuna (Lucas 22:54; Juan 18:24). Mandajcunaca leypi nishca shina pruebacunata mashcanapaj randica Jesusta huañuchingapajca yangamanta juchachijcunatami uyarcacuna. Yangamanta juchachijcuna caita chaita ninacujpimi sacerdotecunata mandajca Jesús pai nishcacunallahuantaj culpable tucuchun huaquin tapuicunata rurarca. Pero chaicunata rurachunca leypica mana mandarcachu (Mateo 26:59; Marcos 14:55-64). Shinallataj mandajcunaca Jesús causarishcata ama pi crichunmi Jesusta maipi pambashcata cuidaj soldadocunaman achca cullquita pagarcacuna. Chai soldadocunaca llullashpami Jesusca mana causarircachu nishpa crichircacuna (Mateo 28:11-15).
14. ¿Isaías 53:12-pica Mesiasmantaca imatataj huillarca?
14 ¿Mesiasmantaca Bibliapica imatataj yachachin? Jesuspaj punllacunapica judiocunaca Mesías huañunataca mana shuyacurcacunachu. Pero Isaías 53:12-pica: ‘Mesiasca huañuchichun paillataj japi tucushpamari, millaita rurajcunahuan huañuchishca carca. Juchayujcunapaj randi huañushpamari, achcacunapaj juchata aparca. Millaita rurajcunamantapish mañarcami’ nircami. Chaimanta Jesusta yangamanta juchachishpa huañuchijpipish judiocunaca mana ñitcarinachu carca. Cai profecía pajtarijta ricushpaca Jesús Mesías cashcatami cuentata cuna carcacuna.
15. ¿Testigo de Jehovacunataca imata nishpataj yangamanta juchachishcacuna?
15 ¿Cunan punllacunapish gentecunaca imatataj rurancuna? Ima shinami Jesusta yangamanta juchachirca, chashnallatajmi cunan punllacunapish Diosta sirvijcunataca yangamanta juchachincuna. Huaquin ejemplocunata ricushun. Estados Unidospi 1930-manta 1950-cama gobiernocuna Diosmanta ama huillachun jarcasha nijpimi huauqui panicunaca tribunalcunaman rina tucurca. Chai punllapica huaquin juezcunaca testigo de Jehovacunata pꞌiñashcatami ricuchircacuna. Canadá, Quebec llajtapimi iglesia catolicapish, gobiernocunapish testigo de Jehovacunapaj contra tucurcacuna. Testigo de Jehovacuna Diospaj Gobiernomanta huillashcamantami achcacunataca carcelpi churarcacuna. Alemania llajtapipish achca jovencunatami Diosta sirvishcamanta nazi soldadocunaca huañuchircacuna. Cai último punllacunapipish Rusia llajtapica Diosta sirvij huauqui panicunataca Bibliamanta huillashcallamantami carcelpi churashcacuna. Shinallataj paicunataca millaitami ruracunguichij nishpami yangamanta juchachishcacuna. Ashtahuancarin Traducción del Nuevo Mundo Bibliapi Jehová Diospaj shuti tiyashcamantami chai Bibliataca ama utilizachun jarcashcacuna.
16. ¿Testigo de Jehovacunamanta llullacunata nijpica imamantataj mana crina canchij?
16 ¿Ama ñitcaringapajca imatataj rurana canchij? Jesusca paita catijcunataca: ‘Achcacunami llullashpa, cꞌamishpa llaquichina yuyailla Diosta sirvijcunataca llaquichingacuna’ nircami (Mateo 5:11). Diabloca paita apoyajcunahuanmi Diosta sirvijcunamantaca achca llullacunata nincuna (Apocalipsis 12:9, 10). Pero tucui cai llullacunataca mana uyanachu canchij. Paicuna ñucanchijta manchachichun, ñucanchij feta chiriyachichunpish mana saquinachu canchij (1 Juan 4:1-ta liyipai).
4) JESUSTACA PAIPAJ AMIGOCUNAMI SAQUISHPA RIRCACUNA
Judas Jesusta huañuchichun entregajpimi huaquincunaca Jesustaca mana catisha nircacuna. ¿Cunan punllacunapish huaquincunaca imamantataj ñitcarincuna? (Párrafos 17 y 18-ta ricui). *
17. ¿Apostolcuna saquishpa rishcamantaca huaquin judiocunaca imatataj nishcangacuna?
17 Jesusta huañuchichunca 12 apostolcunapuramantaca shujmi paitaca entregarca. Cutin caishujca quimsa cutinmi Jesustaca mana rijsinichu nirca. Caishuj apostolcunacarin Jesustami saquishpa rircacuna (Mateo 26:14-16, 47, 56, 75). Pero Jesusca apostolcuna paita saquishpa rinataca allimi yacharca (Juan 6:64; 13:21, 26, 38; 16:32). Chaita ricushpaca huaquin judiocunaca: “Jesuspaj apostolcunallatajmi paitaca saquishpa rincuna. ¿Maitataj ñucanchijca paipaj apostolcuna cashunyari?” nishpami ñitcarishcangacuna.
18. ¿Jesús manaraj huañujpica ima profeciacunataj pajtarirca?
18 ¿Mesiasmantaca Bibliapica imatataj yachachin? Jesús manaraj cai Allpaman shamujpica Jehová Diosca: ‘Mesiastaca 30 cullquipimi cꞌatunga. Paita entregajca shuj amigomi canga’ nircami (Salmo 41:9; Zacarías 11:12, 13). Profeta Zacariaspish: “Can chai michijta chugrichijpica, ovejacunaca caita chaitami ringacuna” nircami (Zacarías 13:7). Alli shungu gentecunaca cai profeciacuna pajtarijta ricushpaca Jesús Mesías cashcapimi feta churanman carcacuna.
19. ¿Diosta sirvijcunaca imatataj alli yachanchij?
19 ¿Cunan punllacunapish gentecunaca imatataj rurancuna? Huaquin rijsishca Testigocunaca Jehová Diosta sirvinata saquishpami apostatacuna o contracuna tucushcacuna. Paicunaca Internetpi, televisionpi, radiocunapimi testigo de Jehovacunamantaca llullacunata nincuna. Diospaj organizacionta saquichunmi chashna rurancuna. Pero Diosta alli sirvijcunaca cashna pandachichunca mana saquinchijchu. Bibliapi nishca shina panda yachachijcuna tiyanataca allimi yachanchij (Mateo 24:24; 2 Pedro 2:18-22).
20. ¿Diosta sirvinata saquijcuna ñucanchijta ama pandachichunca imatataj rurana canchij?
20 ¿Ama ñitcaringapajca imatataj rurana canchij? Ñucanchij fe sinchi cachunca Bibliatami cada punlla estudiana canchij. Jehová Diostami mañana canchij. Dios mingashcapipish ocupadosmi pasana canchij (2 Timoteo 4:4, 5-ta liyipai). Ñucanchij fe sinchi cajpica ima llullacunata uyashpapish mana mancharishunchu (Isaías 28:16). Jehová Diosta, huauqui panicunata cꞌuyashpa, Diospaj Shimita cazushpaca contracuna llullacunata nijpipish Jehová Diosmantaca manataj caruyashunchu.
21. ¿Achca gentecuna mana uyasha nijpipish imatataj seguros cana canchij?
21 Jesús cai Allpapi cajpica achcacunami ñitcarishpa Jesusta mana catircacuna. Pero shujtajcunaca Jesustami catircacuna. Caicunamanta shujca Arimateamanta José shuti mandajmi carca. Caishujcunaca achca sacerdotecunami carca (Hechos 6:7; Mateo 27:57-60; Marcos 15:43). Cunan punllacunapish achca millón gentecunaca Biblia yachachishcacunata alli intindishcamantami Jesusta cati callarishcacuna. Bibliapica: “Quiquin cushca mandashcacunata c’uyajcunaca, sumajta causanatami achcata charincuna. Ima ñitcarinaca paicunapajca mana tiyanchu” ninmi (Salmo 119:165).
CANTO 124 Diosta cꞌuyashcamanta cazushunchij
^ par. 5 Pasaj yachaipica gentecuna imamanta Jesusta mana catishcata, cunan punllacunapish gentecuna imamanta Diosta mana sirvisha nishcatami ricurcanchij. Cai yachaipipish caimanta chuscu yuyaicunahuanmi ricushun. Shinallataj Diosta cꞌuyajcuna ama ñitcaringapaj imallata ruranatami yachashun.
