1. ¿Bibliamanta shujtajcunaman yachachi callarijpica paicunaca imatataj rurashcacuna?

BIBLIAMANTA yachai callarishpaca cushillami sintirircanchij. Biblia yachachishcacuna tucui achij cashcatami intindircanchij. Chaimantami ñuca amigocunapish, familiacunapish Bibliamanta yachashpaca cushillami causangacuna nishpa yuyarcanchij (Salmo 119:105). Ña yachai callarishpaca amigocunaman, familiacunamanmi ñucanchij ima yachashcacunataca parlarcanchij. Pero paicuna mana uyasha nijpica llaquillami sintirishcanchij.

2, 3. ¿Jesús cai Allpapi cajpica gentecunaca paimanta, paipaj yachachishcacunamantaca imatataj yuyarcacuna?

² Gentecuna mana uyasha nijpica mana mancharinachu canchij. Jesús cai Allpapi cashpaca Jehová Diospaj ayudahuanmi achca milagrocunata rurarca. Chaita rurajpipish achca gentecunaca mana Jesuspaj discipulocuna tucurcachu. Por ejemplo, Jesús Lazarota causachijpica paipaj contracunaca chai milagrota rurashcatami cuentata curcacuna. Chaita ricushpapish Jesús Mesías cashcataca mana crisha nircacunachu. Ashtahuancarin Jesustapish, Lazarotapishmi huañuchisha nircacuna (Juan 11:47, 48, 53; 12:9-11).

³ Jesusca pai Mesías cashcata achca gentecuna mana crinataca allimi yacharca (Juan 5:39-44). Chaimantami Jesusca bautizaj Juanpaj discipulocunamanca: “Maijanpish ñucapi mana ñitcarijca cushichishcami canga” nirca (Mateo 11:2, 3, 6). ¿Imamantataj achca gentecunaca Jesuspaj discipulocuna mana tucurca?

4. ¿Cai yachaipica imatataj yachashun?

 ⁴ Cai yachaipi, catij yachaipica Jesús causashca punllapi, Jesús yachachishcacunata gentecuna imamanta mana chasquishcatami ricushun. Shinallataj cunan punllacunapish gentecuna Biblia yachachishcacunata imamanta mana chasquisha nishcatami ricushun. Ashtahuancarin ama ñitcaringapaj, ñucanchij feta sinchiyachingapaj imata ruranatapishmi ricushun.

5. ¿Imamantataj huaquincunaca Jesús Mesías cashcata mana crircacuna?

⁵ Achca gentecunaca Jesús Nazaretpi huiñashcamantami paita mana catisha nircacuna. Jesús alli yachachij cajpipish, milagrocunata ruraj cajpipish paicunaca: “Chai pobre carpinteropaj churillami” nishpami yuyajcuna carca. Ashtahuancarin Nazaret llajtataca shujtajcunaca imapaj mana valishcata shinami ricujcuna carca. Natanaelca Jesuspaj discípulo manaraj tucushpaca: ‘¿Nazaretpica ima allitaj tiyangari?’ nircami (Juan 1:46). ¿Imamantataj paica chaita nirca? Tal vez paica Jesús huiñashca Nazaret llajtaca mana importantechu can nishpami yuyashcanga. Mana cashpaca Miqueas 5:2-pi Mesías Belenpi huacharinata yachashcamantami chashna nishcanga.

6. ¿Gentecunaca Jesús Mesías cashcata yachangapajca imatataj rurana carcacuna?

⁶ ¿Mesiasmantaca Bibliapica imatataj yachachin? Profeta Isaías nishca shinaca Jesuspaj contracunaca Mesías maimanta shamuna cashcata, ima familiamanta shamuna cashcataca mana yachasha nircacunachu (Isaías 53:8, NWT ). Mesiasmanta profeciacunata investigashpa, Jesuspaj causaimanta investigashpaca Jesuspaj contracunaca Jesús Belenpi huacharishcata, Davidpaj huahua huahuacunamanta shamushcatami intindinman carcacuna (Lucas 2:4-7). Miqueas 5:2-pi nishca shinaca Jesusca Belén llajtapimi huacharirca. Pero achca gentecunaca Dios Quillcachishcacunata mana alli investigashcamantami Jesús Mesías cashcataca mana crircacuna.

7. ¿Imamantataj cunan punllacunapish achca gentecunaca mana testigo de Jehová tucusha nincuna?

⁷ ¿Cunan punllacunapish gentecunaca imatataj yuyancuna? La mayoría Testigocunaca charijcuna, estudiadocuna mana canchijchu (Hechos 4:13). Chaimantami gentecunaca: “Testigo de Jehovacunaca jatun yachana escuelacunamanca mana rishcacunachu. ¿Maitataj Bibliamantaca yachachingacunayari?” nishpa yuyancuna. Cutin shujtajcunaca: “Testigo de Jehovacunaca Estados Unidosmanta shamuj religionmi can” nishpami yuyancuna. Pero chaica mana ciertochu can. Ashtahuanpish muyundij Allpapimi testigo de Jehovacunaca tiyan. Maijancunacarin: “Testigo de Jehovacunaca Estados Unidospaj chapajcunami can. Shujtajcunatami llaquichincuna” nishpami yuyancuna. Cashna llullacunata uyashpa, ñitcarishpami gentecunaca mana testigo de Jehová tucusha nincuna.

8. Hechos 17:11-pi nishca shinaca ¿cunan punllacunapi Diosta sirvijcuna picuna cashcata yachangapajca imatataj rurana cangui?

⁸ ¿Ama ñitcaringapajca imatataj rurana cangui? Biblia yachachishcacunatami alli investigana cangui. Apóstol Lucasca Lucas librota escribingapajca allimi investigarca. Chashnami chai librota liyijcuna Jesusmanta alli intindichun ayudarca (Lucas 1:1-4). Berea llajtapi causaj judiocunapish punta cutin Jesusmanta alli huillaicunata uyashpaca Diospaj Quillcachishcacunapimi alli investigarcacuna. Chashnami ciertotaj cashcata intindircacuna (Hechos 17:11-ta liyipai). Chashnallatajmi canpish testigo de Jehovacuna yachachishcataca cambaj Bibliallahuantaj comparana cangui. Shinallataj testigo de Jehovacuna ima shina cashcatapish canllatajmi yachana cangui.  Chaita rurashpaca Testigocunamanta mana allicunata nijpica mana cringuichu.

9. ¿Gentecunaca Jesús milagrocunata mana rurajpica imatataj rurarcacuna?

⁹ Huaquin gentecunaca Jesús alli yachachij cajpipish, pai Mesías cashcata cringapajca: ‘Jahua pachamanta cashpaca milagrocunata rurai’ nishpami mañarcacuna (Mateo 16:1). Tal vez paicunaca Daniel 7:13, 14-pi ima nishcata mana alli intindishcamantami chashna nishcangacuna. Pero Jehová Diospajca cai profeciata pajtachina tiempoca manaraj carcachu. Jesús alli yachachishcamantami paicunaca Jesús Mesías cashcataca cuentata cuna carcacuna. Pero paicuna munashca horas Jesús mana milagrocunata rurajpimi paicunaca ñitcarishpa Jesuspi mana crircacuna (Mateo 16:4).

10. ¿Isaías 42:1 y 2-pi nishcacunataca Jesusca ima shinataj pajtachirca?

¹⁰ ¿Mesiasmantaca Bibliapica imatataj yachachin? Mesiasmanta parlashpaca profeta Isaiasca: “Mana capariringachu. Mana jatun shimihuan rimangachu. Pai huillashcaca ñancunapica mana uyaringachu” nircami (Isaías 42:1, 2). Jesusca Dios mingashcata pajtachicushpaca paita jatunyachichunca mana munarcachu. Chaimanta jatun templocunata mana rurarcachu. Shinallataj fariseocuna shina manchanai, rijsishca churanacunatapish yachachingapajca mana churarircachu. Paica jatun yachachij nishca shuticunahuan cayachunpish mana munarcachu. Jesusca paipaj causai peligropi cajpipish mandaj Herodesta cushichingapajllaca mana milagrocunata rurarcachu (Lucas 23:8-11). Jesusca huaquinpi milagrocunata rurashpapish paipajca huillanami ashtahuan valishca carca. Chaimi paica paipaj discipulocunamanca ‘huillangapajmi shamushcani’ nirca (Marcos 1:38).

11. ¿Huaquincunaca imamantataj testigo de Jehovacunahuan Jehová Diosta mana adorasha nincuna?

¹¹ ¿Cunan punllacunapish gentecunaca imatataj yuyancuna? Achca gentecunaca jatun, adornashca iglesiacunapimi Diosta adoranata munancuna. Shinallataj iglesiata pushajcunatapish  jatun yachachij nishca titulocunahuanmi cayancuna. Diosta adorangapajpish mana alli fiestacunatami rurancuna. Pero chai tandanacuicunaman rijcunaca Diosmanta, Diospaj munai maijan cashcamantaca mana yachancunachu. Cutin testigo de Jehovapaj tandanacuicunaman rijcunaca Jehová Dios imata rurachun mañashcata, paipaj munai maijan cashcatami yachancuna. Ñucanchij Tandanacuna Huasicunaca mana manchanai jatun huasicunachu. Ashtahuanpish Jehová Diosta adorangapaj limpio, allimi can. Congregacionta pushajcunapish rijsishca manchanai churanacunataca mana churancunachu. Paicunata titulocunapi cayachunpish mana munancunachu. Shinallataj paicunaca Diospaj Shimi nishca shinami yachachincuna. Testigo de Jehovacuna chashna yachachijpi, shujtaj religioncunapi shina mana manchanai fiestacunata rurajpimi huaquincunaca Jehová Diosta sirvinataca mana munancuna.

12. Hebreos 11:1 y 6-pi nishca shinaca ¿sinchi feta charingapajca imatataj rurana canchij?

¹² ¿Ama ñitcaringapajca imatataj rurana canchij? Apóstol Pabloca Romapi caj Diosta sirvijcunamanca: “Crinaca huillashcata uyashcamantami shamun, chai uyashcaca Diospaj Shimimanta huillashcami” nircami (Romanos 10:17). Panda religioncunapi alaja, manchanai fiesta cajpipish mana participanachu canchij. Ñucanchijca alli religionpi cashcata cringapajca jahua pachapi señalcuna ricurichun mana minishtinchijchu. Ashtahuanpish ñucanchij fe sinchi cachunca cada unomi Bibliata alli estudiana canchij. Chashnami ima dudacunatapish mana charishun, Jehová Diostapish cushichishun (Hebreos 11:1, 6-ta liyipai).

13. ¿Achca gentecunaca imamantataj Jesusta mana catircacuna?

¹³ Jesuspaj discipulocuna mana ayunajpimi bautizaj Juanpaj discipulocunaca: ‘¿Imamantataj cambaj discipulocunaca mana ayunancuna?’ nishpa tapurcacuna. Chaimi Jesusca: ‘Ñuca causacujpirajca mana ayunangacunachu’ nishpa intindichirca (Mateo 9:14-17). Fariseocuna, shujtaj contracunacarin Jesustaca:  ‘¿Imamantataj mana ñucanchij costumbreta catingui?’ nishpami rimarcacuna. Sábado punllapi Jesús ungushcacunata jambijpicarin achcatami paicunaca pꞌiñarircacuna (Marcos 3:1-6; Juan 9:16). Cai millai runacunaca sábado punllapi leyta pajtachishcamantami jatun tucujcuna carca. Pero Diospaj templo huasipica negociocunata rurashpami pasajcuna carca. Chaimi Jesús paicunata sinchita rimajpica achcata pꞌiñarircacuna (Mateo 21:12, 13, 15). Nazaretpi tiyaj sinagogapi israelitacuna Diosta mana cazushcamanta, paicunapaj fepish imamanta mana sinchi cashcamanta yachachijpicarin ashtahuanmi pꞌiñarircacuna (Lucas 4:16, 25-30). Judiocunapaj costumbrecunata Jesús mana catijpimi achcacunaca ñitcarishpa paita mana catircacuna (Mateo 11:16-19).

14. ¿Jesusca mana alli costumbrecunata mana catina cashcataca imamantataj yachachirca?

¹⁴ ¿Mesiasmantaca Bibliapica imatataj yachachin? Jehová Diosca judiocunamanta parlashpaca: “Cai gentecunaca ñucataca jahua shimillami yuyarincuna. Jahua shimillahuanmi ñucataca allimari cangui nincuna. Ashtahuanpish paicunapaj shunguca ñucamanta carupimari. Ñucata manchanchij nishpapish, gentecuna yachachishpa mandashcacunallatami rurancuna” nircami (Isaías 29:13). Chaimantami Jesusca judiocunapaj costumbrecunata mana catina cashcata yachachirca. Judiocunapaj costumbrecunata catijcunaca Diospaj Shimita, Jesús Mesías cashcatapish mana chasquisha nircacunachu.

15. ¿Testigo de Jehovacuna imata mana rurajpitaj gentecunaca pꞌiñarincuna?

¹⁵ ¿Cunan punllacunapish gentecunaca imatataj yuyancuna? Achca gentecunaca testigo de Jehovacuna cumpleaños fiestata, navidadta, shujta fiestacunata mana rurajpimi pꞌiñarincuna. Shujtajcunaca cada llajtapaj fiestacunata mana rurajpi, huañushcacunata pambangapaj costumbrecunata mana catijpimi pꞌiñarincuna. Tal vez cai panda costumbrecunata catijcunaca Diosmi caitaca chasquinga nishpami yuyangacuna. Pero Biblia yachachishcacunata mana catijpica Jehová Diosca paicunataca mana chasquingachu (Marcos 7:7-9).

16. Salmo 119:97, 113 y 163 al 165-pi nishca shinaca ¿imatataj rurana canchij?

¹⁶ ¿Ama ñitcaringapajca imatataj rurana canchij? Jehová Diosta, paipaj mandashcacunatami cꞌuyana canchij (Salmo 119:97, 113, 163-165-ta liyipai). Jehová Diosta shungumanta cꞌuyashpaca mana alli costumbrecunapica manataj participashunchu. Ashtahuancarin Jehová Diosllata sirvina tucuimanta valishca cashcata ricuchishun.

17. ¿Mesías imata rurachuntaj huaquin gentecunaca shuyarcacuna?

¹⁷ Jesús causashca punllacunapica achca judiocunami Romata mandajmanta Mesías cacharichichun shuyacurcacuna. Pero Jesusta mandaj cachun agllasha nijpica Jesusca chaitaca mana chasquisha nircachu (Juan 6:14, 15). Cutin sacerdotecuna, shujtajcunaca: ‘Jesús mandai callarijpica ñucanchijman cushca autoridadtami Romanocuna quichunga’ nishpami yuyajcuna carca. Chaimantami achca judiocunaca ñitcarishpa Jesustaca mana catircacuna.

18. ¿Judiocunaca Mesiasmantaca ima profeciacunatataj mana yachanata munajcuna carca?

¹⁸ ¿Mesiasmantaca Bibliapica imatataj yachachin? Bibliapica Diospaj pueblota cacharichingapajca Mesías shuj macanacuipi mishanatami yachachin. Pero, chai shimicuna manaraj pajtarijpimi Mesiasca ñucanchij juchacunamanta puntaca huañuna carca (Isaías 53:9, 12). Pero judiocunaca problemacunata chai rato allichichunmi munajcuna carca. Chaimanta paicunaca chai punllacunapi tiyaj problemacuna  tucurinamanta parlaj profeciacunallatami yachanata munajcuna carca. Shamuj punllapaj profeciacunata yachanataca mana munajcunachu carca (Juan 6:26, 27).

19. ¿Imamantataj achca gentecunaca ñitcarincuna?

¹⁹ ¿Cunan punllapish gentecunaca imatataj yuyancuna? Achca gentecunaca testigo de Jehovacuna politicacunapi mana chagrurijpi, gobiernocunata agllangapajpish votocunata mana cujpimi ñitcarincuna. Pero ñucanchijca cai Allpapi mandaj gobiernocunata apoyashpaca Jehová Diospaj Gobiernota mana apoyacushcatami ricuchishun (1 Samuel 8:4-7). Cutin shujtajcunaca: “Testigo de Jehovacunaca hospitalcunata, escuelacunatami shayachina can. Mana cashpaca shujtaj ruraicunahuanmi gentecunata ayudana can” nishpami ñitcarincuna. Shinallataj ñucanchij predicanallata punta lugarpi churajpi, cai mundopi tiyaj problemacunata allichingapaj mana chagrurijpimi paicunaca ñitcarincuna.

20. Mateo 7:21 al 23-pi nishca shinaca ¿imata ruranataj ashtahuan importante can?

²⁰ ¿Ama ñitcaringapajca imatataj rurana canchij? (Mateo 7:21-23-ta liyipai). Jesús mingashcata pajtachina tucuimanta yalli valishca cashcatami yuyarina canchij (Mateo 28:19, 20). Testigo de Jehovacunaca gentecunataca achcatami cꞌuyanchij. Paicunapaj problemacunamantapishmi preocuparinchij. Pero ñucanchijca cai mundopi tiyaj problemacunata allichinapaj randica Jehová Dioslla paipaj Gobiernohuan allichinatami huillanchij. Chashnami gentecuna Jehová Diospaj amigocuna cachun ayudanchij.

21. ¿Imata rurangapajtaj decididos cana canchij?

²¹ Cai yachaipica gentecuna Jesusta imamanta mana catishcata, cunan punllacunapish gentecuna Diosta sirvijcunata imamanta mana chasquisha nishcatami ricushcanchij. Catij yachaipica caimanta shujtaj chuscu yuyaicunahuanmi yachashun. Pero tucuicunami ñucanchij feta sinchiyachina canchij. Imapish ñitcachichunca manataj saquinachu canchij.