¿Yacharcanguichu?
Ñaupa punllacunapica papiro nishca yuramantami barcocunata rurajcuna carca.
Papiro yura.
ÑAUPA punllacunapica Egiptopi causaj gentecunaca papiro nishca yuratami paicunapaj quillcacunata rurangapajca utilizajcuna carca. Shinallataj griegocunapish, romanocunapish paicuna quillcacunata rurangapajca chai yurallatatajmi utilizajcuna carca. * Pero asha gentecunallami yachashca cai papiro yura quillcacunata rurangapajlla mana cashcata. Ashtahuanpish barcocunata rurangapajpish cashcata.
Papiromanta rurashca ishqui barcocunataca egipciocunata pambana jutcupimi japircacuna.
2.500 yalli huatacuna huashamanca profeta Isaiasca: ‘Etiopía llajtapi causajcunaca paicunapaj mensajerocunata cachangapajca papirohuan rurashca barcocunapimi paicunataca cachajcuna carca’ nircami. Shinallataj asha tiempo qꞌuipaca profeta Jeremiaspish: ‘Medopersacunami Babiloniata tucuchinga. Babiloniocuna ama maita richunmi papirohuan rurashca barcocunataca rupachinga’ nishpami huillarca (Isaías 18:1, 2; Jeremías 51:32).
Arqueologocunaca papiro yuramanta investigashpaca Biblia nishcacuna ciertotaj cashcatami cuentata cushcacuna. Pero Biblia Diospaj Shimi cashcamantami Bibliata estudiajcunaca caita yachashpaca mana mancharinchij (2 Timoteo 3:16). Cunanca Egipto llajtapi papirohuan rurashca barcocunata japishcata ricushun.
¿IMA SHINATAJ BARCOCUNATACA PAPIRO YURAMANTA RURAJCUNA CARCA?
Huañushca egipciocunata pambana jutcucunapimi pintashca dibujocunata japircacuna. Chai dibujopica papirocunata ima shina cosechashcata, barcocunata ima shina rurashcatami japishcacuna. Cꞌaricunami cai papiro yuracunataca cꞌuchujcuna cashca. Shinallataj asha ashami tandachishpa sinchita huatajcuna cashca. Racu caspi cashcamanta, sinchi cashcamantami sinchita huatajpica mana ima tucuj cashca. Shuj libropica papiromanta rurashca barcocunaca 17 metros yallitami medij carca. Shinallataj barcocuna yacupi richunca barcocunapaj cada ladopimi 10 o 12 caspicuna tiyaj carca ninmi (A Companion to Ancient Egypt).
Shuj patapica papiromanta barcocunata ima shina rurashcatami ricuchin.
¿IMAMANTATAJ PAPIRO YURACUNAHUANCA BARCOCUNATA RURAJCUNA CARCA?
Río Nilo cꞌuchullapimi achca papiro yuracunaca huiñaj carca. Cai papiro yuracunahuan barcocunata ruranaca jahuallami carca. Jatun barcocuna maderacunahuan rurashca tiyajpipish pescadocunata japijcuna, ima animalcunata cazajcunaca cai papiro yuramanta rurashca uchilla barcocunatami utilizajcuna carca.
Papirohuan rurashca barcocunataca achca huatacunatami utilizashpa catijcuna carca. Por ejemplo, historiamanta yachaj Plutarco shuti runaca apostolcuna causashca punllacunapimi causarca. Pai nishca shinaca chai punllacunapi causaj gentecunaca papiro yuramanta rurashca barcocunapimi purijcuna carca.
^ par. 3 Cai papiro yuraca yacucuna tiyan lugarpimi huiñan. Casi 5 metros altomi can. Cai yurapaj caspica casi 15 centímetros racumi can.
