Huaquinpica shuj autoridad o shuj respetashca runa imata regalajpica, chai regaloca valishcami can. Achca cullqui mana valishca cajpipish shuj cꞌuyashca familia o shuj alli amigo cushcamantami, chai regaloca ñucanchijpajca valishca can. Chashnallatajmi Russell regalashca sacapuntaca Jordanpajca valishca carca. Paicunamantaca ñaupa yachaipimi leyircanchij. ¿Jesús paipaj causaita cushcamantaca cai ejemplocunaca imatataj yachachin?

Bibliapica cashnami nin: “Diosca paipaj shujlla Churimanta ñucanchij quishpirichunmi cai pachaman cacharca” ninmi (1 Juan 4:9). Dios layaca pi shujtajca mana tiyanchu. Chaimantami pai cushca regaloca yallitaj valishca can. Salmota quillcaj shuj runaca cashnami nirca: “Cambaj shuti Jehová cashcata gentecuna yachachun. Canllami ashtahuan Jatun Dios cangui” nircami (Salmo 83:18, NM). Diosllamantami cashna regalocunataca chasqui tucunchij.

Diosca ñucanchij ‘Yayami can’ (Isaías 63:16) ¿Imamantataj Diosca ñucanchij Yaya can? Paica causaitami ñucanchijman cushca. Shinallataj paica shuj cꞌuyaj yaya shinami ñucanchijta cuidan. Ñaupa punllacunapi tiyashca Efraín pueblomanta parlashpaca Diosca cashnami nirca: “Efrainca mana ñuca cꞌuyashca huahua cajpichu, mana ñuca cushicuna huahua cajpichu mana llaquishari”. “Paitaca llaquishatajmi” nircami (Jeremías 31:20). Cunanpish paita servijcunataca chashnallatajmi llaquin. Diosca mana ñucanchijta rurajllachu can. Ashtahuanpish paica ñucanchij Yaya, ñucanchij amigomi can. Chaimantami ima regalota cujpipish achca valishca can.

Maijan regalocunaca cꞌuyaihuan cushcamantami achca valishca can. Pi shungumanta cushpaca, chashnallataj cuchunca mana shuyanchu.

Diosca ñucanchijta cꞌuyashcamantami paipaj Churita huañuchun curca. Chaimantami Bibliapica cashna nin: “Diosca paipaj shujlla Churimanta ñucanchij quishpirichunmi cai pachaman cacharca. Chashnami pai cꞌuyaj cashcataca ricuchirca” ninmi (1 Juan 4:9). Diosca pai munashcamantami Jesuspaj causaita cushpa ñucanchijta quishpichirca. Chashnami Diosca ‘mana cꞌuyaipajta cꞌuyashcata’ ricuchishca (Romanos 3:24).

¿Jesuspaj causaita cushpaca Diosca ima shinataj mana cꞌuyaipajta cꞌuyashcata ricuchishca? Bibliaca cashnami nin: ‘Ashtahuanpish ñucanchijca juchayujcuna cajpiraj Cristo ñucanchijmanta huañujpimi, Diosca ñucanchijta cꞌuyaj cashcataca ricuchirca’ ninmi (Romanos 5:8). Ñucanchijcunaca Diosmanta caruyashca, juchayuj, cungarishca shinami carcanchij. Pero Diosca ñucanchijta achcata cꞌuyashcamantami quishpichirca. Chashna quishpichishpami tucuicunamanta yalli cꞌuyashcata ricuchishca. Cashna cꞌuyaita ricuchishcamantaca paiman mana pagai tucunchijchu.

Huaquinpica shuj regalota cungapajca achca sacrificiocunatami rurana can. Chaimantami chai regalocunaca achca valishca can. Huaquincunaca paicunapaj ima ashtahuan valishcatami ñucanchijman regalancuna. Chaimantami chai regaloca ñucanchijpajca achca valishca can.

Diosca paipaj ashtahuan cꞌuyashca, ‘shujlla Churitami cacharca’ (Juan 3:16). Diosca achca millón huatacunapimi tucui imalla tiyashcacunataca rurarca. Jesusca paipaj ladopimi trabajarca, chaimantami ‘punllanta Dioshuan cushicurca’ (Proverbios 8:30). Jesusca Taita Diospaj cꞌuyashca Churimi, “mana ricuipaj Dios ima shina cashcata ricuchijmi” can (Colosenses 1:13-15). Yaya Diospish paipaj Churi Jesuspish allimi apanacuj carca. Pi chashna laya apanacujca mana tiyashcachu.

Jesusta huañuchun cushpaca Taita Diosca paipaj ashtahuan valishcatami ñucanchijman curca (Romanos 8:32).

Huaquincunaca ñucanchij minishticushcatatajmi regalancuna. Chaimantami chai regalocunaca valishca can. Yuyashun: Quiquinca shuj ungüita charishcanguiman. Mana huañungapajmi utca jambirina cangui. Pero jambicunaca yallitajmi valin, mana randi tucunguichu. Shinapish shuj runa ricurishpami ñuca pagashallami nin. ¿Manachu paita achcata agradicinguiman?

“Ima shinami Adanmantaca tucuicuna huañun, chashnallatajmi Cristopi cajcunaca tucuicuna causachishca canga” (1 Corintios 15:22). Adanpaj huahua huahuacunaca ungüicunamanta, huañuimantapish mana quishpiri tucunchijchu. Diosmantapish caruyashcami canchij. Juchayuj runacuna cashcamantaca ni pita mana “causachi” tucunchijchu. Bibliapica: ‘Shujllapish paipaj huauquitaca mana quishpichingachu’ ninmi (Salmo 49:7, 8). Juchamanta ñucanchijta quishpichichunca mana pagai tucunchijchu. Tucuicunami pi ayudachun utca minishtinchij.

Jehová Diosca ñucanchijta yallitaj cꞌuyashpami chai “jambicunata” pagaj shina, Jesushuan ñucanchijta quishpichirca. ¿Ima shinataj quishpichishca  canchij? “Jesuspaj yahuarmi, ñucanchij tucui juchacunataca pꞌichan”. Ñucanchij juchacunata perdonachunpish, huiñai causaita charingapajpish Jesús paipaj yahuarta ñucanchijmanta jichashcatami crina canchij (1 Juan 1:7; 5:13) Tucui huañushcacunapish Jesusmantami causaringacuna. Chaimantami Bibliapica cashna nin: “Ima shinami shuj runallamanta huañunaca cai pachapi callarishca, shinallatajmi huañushcacunapaj chaupimanta causachishca canapish shuj runallamanta callarirca” ninmi (1 Corintios 15:21). *

Diosca paipaj Churita cachashpami ñucanchijman yallitaj valishca regalota curca. Cai regalotaca ñucanchijta achcata cꞌuyashcamantami curca. Dios shinaca ñucanchijmantaca ni pi mana chashna rurashcachu. Shujtaj regaloca juchacunamanta huañuimantapish mana quishpichi tucunchu. Cai tucuimantami Jesuspaj causaica yallitaj valishca regalo can.