Canta mana pꞌiñajpipish tal vez shujtajcunata pꞌiñashcatami ricushcangui. Shinallataj noticiacunapica shujtaj llajtamanta cashcamanta, shujtaj razata charishcamanta o cꞌaricunapura, huarmicunapura causajcuna cashcamantami paicunataca pꞌiñashpa yallitaj llaquichishcata ricushcangui. Chaimantami gobiernocunaca chai laya gentecunata ama llaquichichun huaquin leycunata churashca.

Achca gentecunaca paicunata pꞌiñashpa llaquichishcamantami paicunapish chashnallataj shujtajcunata pꞌiñashpa achcacunata llaquichishcacuna. Chashnami gentecunaca ashtahuan ashtahuan shujtajcunata pꞌiñashpa catincuna.

Quizás cantaca yanganchishpami rimashcangacuna o canmanta burlarishpami malpi quedachishcangacuna. Pero shujtajcunata pꞌiñajcunaca mana chaillatachu rurancuna. Ashtahuanpish shujtajcunata macashpa, violashpa, huañuchishpami llaquichincuna.

Cai revistapica shujtajcunata ama pꞌiñangapaj imata rurana cashcatami yachashun. Shinallataj cai catij tapuicunatapishmi ricushun:

• ¿Gentecunaca imamantataj shujtajcunata pꞌiñancuna?

• ¿Shujtajcunata ama pꞌiñangapajca imatataj rurai tucunchij?

• ¿Shujtajcunata pꞌiñanaca ima horas tucuringachu?