1. ¿Cantashpaca ima shinataj sintirinchij?

MUSICATA escribij shuj runaca: ‘Imata uyashpaca yuyashpami saquirinchij. Shuj musicata uyashpaca llaquilla o cushillami sintirinchij. Cutin ñucanchijllataj cantashpaca ñucanchij shungupi ima tiyashcatami ricuchinchij’ nircami. Cantocunata cantashpaca Jehová Diosta cꞌuyashcatami ricuchinchij. Shinallataj paipaj cꞌuchullapimi sintirinchij. Ñucanchijlla cashpapish o tandanacuicunapi cashpapish cantashpami Jehová Diosta jatunyachinchij.

2, 3. a) ¿Tandanacuicunapi cantana horasca ima shinataj huaquincunaca sintirin? b) ¿Ima tapuicunatataj yachashun?

² Tandanacuipi cashpaca ¿sinchitachu cantangui o pingaitachu charingui? Huaquin llajtacunapica cꞌaricunaca gentecunapaj ñaupajpi cantanataca mana munancunachu. Congregacionpipish shinallatajmi pasai tucun. Ashtahuantajca ancianocuna mana tucui shunguhuan cantajpi o cantacun rato shujtaj cosascunapi ocuparijpimi caishujcunapish chashnallataj rurasha ningacuna (Salmo 30:12).

 ³ Tandanacuipi cantashpaca Jehová Diostami jatunyachinchij. Chaimantami tandanacuipi cantana horasca mana puricuna canchij. Tucuicunami: “¿Tandanacuicunapi cantanamantaca imatataj yuyani? ¿Cushilla cantangapajca ima shinataj manchaita saqui tucuni? ¿Tucui shunguhuan cantangapajca imatataj rurana cani?” nishpa tapurina canchij.

4, 5. ¿Diosta cantashpa alabangapajca israelitacunaca imatataj rurarca?

⁴ Diosta sirvijcunaca ñaupa punllacunamantami cantocunahuan Diosta alabashcacuna. Israelitacunapish Jehová Diostaca cantashpami alabajcuna carca. Rey Davidca Diospaj templopi instrumentocunata tocachun, cantachunmi 4.000 levitacunata agllarca. Chaicunamanta 288 cꞌaricunaca alli cantajcunami carca (1 Crónicas 23:5; 25:7).

⁵ Diospaj templota tucuchishpaca tocashpa, cantashpami cushicurcacuna. Bibliapica: ‘Tucuicuna chaipi cashpaca trompetacunatapish, cimbalocunatapish, shujtaj tocanacunatapishmi shuj shinalla tocashpa, cantashpa, Mandaj Diostaca pagui nishpa alabarcacuna. Paicuna chashna cantacujpica caishujcunaca: Mandaj Diosta cantaichij, paica allimi. Pai llaquij canaca huiñai huiñaipajmi nishpami cantarcacuna. Chashna cantacujpimi Mandaj Diospaj huasipica pꞌuyu jundarca’ ninmi. Chai tucuita ricushpami israelitacunaca Diospi ashtahuan crishcacuna canga (2 Crónicas 5:13, 14; 7:6).

6. ¿Jerusalén pircacunata cutin shayachishca qꞌuipaca Nehemiasca imatataj rurarca?

⁶ Israelitacuna Jerusalén pircacunata cutin shayachijpimi Nehemiasca cantachun tocachun levitacunata pushamurca. Ishqui grupo levitacunami ‘Taita Diosta cantashpa alabarcacuna’. Shuj grupoca alli lado pirca jahuata, cutin caishuj grupoca lluqui lado pirca jahuata purishpami templo cꞌuchupi tupanacungapaj rircacuna. Paicuna sinchita cantashcaca carucamami uyarirca (Nehemías 12:27, 28, 31, 38, 40, 43). Levitacuna tocashcata cantashcata uyashpami israelitacunaca ashtahuan cushicurcacuna. Jehová Diospish chaita uyashpami achcata cushicushcanga.

7. ¿Jesusca ima shinataj cantashpa Diosta alabana cashcata ricuchirca?

⁷ Jesuspaj punllacunapipish cantashpa Jehová Diosta adoranaca importantemi carca. Ñuca huañushcata yuyaringuichij nishca qꞌuipaca Jesusca paipaj discipulocunahuanmi Taita Diosta cantarca (Mateo 26:30-ta leyipai).

8. ¿Jesusta punta catijcunamantaca imatataj yachanchij?

⁸ ¿Jesusta punta catijcuna Diosta cantashpa alabashcamantaca imatataj yachanchij? Paicunaca mana jatun templopi tandanacushpapish huasicunapi tandanacushpami tucui shunguhuan cantajcuna carca. Apóstol Pablopish paipaj huauqui panicunamanca: ‘Cancuna tucui imalla yachashcata caishuj chaishuj yachachinacuichij yuyachinacuichij. Salmocunata, cantanacunata, Diosta yuyarishpa sumaj cantocunatapish Diosta pagui nishpa tucui shunguhuan cantaichij’ nircami  (Colosenses 3:16, Nuevo Testamento en Quichua Chimborazo, 1973). Ñucanchijcunapish chashnallatajmi Jehová Diostaca tucui shunguhuan cantana canchij. Cai cantocunata rurashpapishmi ‘alli cazuj, alli yuyaiyuj sirvij’ huauquicunaca ñucanchijta Jehovamanta yachachin (Mateo 24:45, QC, 1989).

9. a) ¿Maijancunaca imamantataj congregacionpipish jatun tandanacuicunapipish cantanata manchancuna? b) ¿Ima shinataj Jehová Diosman cantana canchij? (Página 3-pi tiyaj fotota ricui). c) ¿Picunataj congregacionpica cantashpa ejemplota cuna can? (Página 3-pi tiyaj fotota ricui).

⁹ Huaquinpica ñucanchij familiahuan o ñucanchij llajtapi mana cantaj cashcamantami manchaita charinchij. Shinallataj televisionpi o radiopi alli cantajcunata ricushpa, uyashpami mana paicuna shina cantashpa pingaita charinchij. Chashnapish Jehová Diosta cantanataca mana saquinachu canchij. Ñucanchij cantana librota alzashpa, umata jatarichishpami tucui shunguhuan cantana canchij (Esdras 3:11; Salmo 147:1-ta leyipai). Achca congregacioncunapica cantocunapaj letrataca shuj pantallapimi ricuchincuna. Chashnami sinchita cantai tucunchij. Cunanca Escuela del Ministerio del Reino para ancianos nishca cursopipish cantangapaj partemi programapi tiyan. Chashnami ancianocunaca congregacionpi tucuicuna alli cantachunca paicunaraj alli ejemplota cuna cashcata intindincuna.

10. ¿Mana alli cantai tucushpapish imatataj yuyarina canchij?

¹⁰ Huaquincunaca yalli caparirishpa cantanata manchashpa o mana alli vozta  charishcamantami cantanata manchancuna. Yuyashun, parlacushpaca “tucuicunami achca cutin pandarinchij”. Pero chaimanta parlanataca mana saquinchijchu ¿nachu? (Santiago 3:2). Chashnallatajmi mana alhajata cantashpapish Diosta cantanataca mana saquina canchij.

11, 12. ¿Tucui fuerzahuan alli cantangapajca imatataj rurana canchij?

¹¹ Ima shina cantanata mana yachashcamantachari manchaita charinchij. Ashtahuan alli cantangapaj imata ruranata ricushun * (urapi tiyaj notata ricui).

¹² ¿Tucui fuerzahuan alli cantangapajca imatataj rurana canchij? Yuyashun, shuj focota japichingapajca corrientetami minishtinchij. Shinallatajmi fuerzahuan cantangapajca samaita alli aisanata minishtinchij * (urapi tiyaj notata ricui). Allimanta cantanapaj randica sinchitami cantana canchij. Bibliapica Diosman cantacushpaca caparishpa cantaichij ninmi (Isaías 24:14).

13. ¿Mana manchashpa cantangapajca imatataj rurana canchij?

¹³ Familiahuan Diosta adoracushpa o ñucanchijlla Bibliata yachacushpaca caita rurashun: Puntapica shuj munashca cantota agllashpa sinchita leyishun. Qꞌuipaca samaita aisashpa shuj yuyaita ama shayarishpa sinchita leyishun. Chai huashaca chai leyishca yuyaillatataj tucui fuerzahuan cantashun (Salmo 33:1-3). Chashnami mana pingashpa sinchita cantashun.

14. a) ¿Cantacushpaca imamantataj ñucanchij shimita alli pascana canchij? ( Página 5-pi tiyaj dibujocunata ricui). b) ¿Alli vozta charingapajca imatataj rurana canchij?

¹⁴ Ñucanchij voz alli uyarichunca ñucanchij shimitami alli pascana canchij. Cantacushpaca parlacushcata yallimi shimitaca pascana canchij. ¿Ñucanchij voz mana alli uyarijpica imatataj rurashun? Caimanta yachangapajca Benefíciese de la Escuela del Ministerio Teocrático libropi, página 184-pi “Cómo superar problemas específicos” nishca cuadrota ricui.

15. a) ¿2016 huatapi Stephen Lett huauquica imatataj shuj tandanacuipica huillarca? b) ¿Imamantataj canto librotaca allichina minishtirirca?

¹⁵ Testigo de Jehovacunaca cada huatami octubre quillapi Estados Unidos llajtapi shuj tandanacuita charin. 2016 huatapica chai tandanacuipimi Cuerpo Gobernantemanta Stephen Lett huauquica shuj mushuj canto libro llujshishcata huillarca. Cai libroca Jehová Diosta cushicushpa cantashunchij nishcami can. Huauqui Lettca imamanta cai mushuj libro llujshishcatami huillarca. Inglés shimipi tiyaj Traducción del Nuevo Mundo de las Santas Escrituras Bibliapica huaquin palabracunata, yuyaicunata allichishpami shuj mushujta rurarcacuna. Chaimantami ña tiyashca canto libropipish palabracunata yuyaicunata cambiashpa shuj mushujta rurarcacuna. Cai canto libropica mushuj cantocunapishmi tiyan. Chai cantocunaca huillanamanta, Jesús huañushcamantapishmi parlan. Ñucanchij cantocunaca Diosta alabangapajmi can. Chaimantami Cuerpo Gobernantemanta huauquicunaca cai cantana librota alli ruranata nircacuna. Cai canto libroca 2013 huatapi llujshishca Biblia shinallatajmi puzu tapahuan, brillacuj filocunahuan alli rurashca can.

16, 17. ¿Ima cambiocunatataj mushuj canto libropica rurashcacuna?

 ¹⁶ Cai canto libropaj callari paginacunapimi shuj lista tiyan. Chai listapi ricurij cantocunaca grupocunapimi chꞌicanyachishca can. Por ejemplo, callari 12 cantocunaca Jehovamantami parlan. Catij 8 cantocunaca Jesusmantami parlan. Cai listapi ricushpami conferenciata cuj huauquicunapish shuj cantota agllai tucun.

¹⁷ Tucui shunguhuan cantangapajmi huaquin letracunaca jahualla, intindinalla can. Huaquin cantocunapaj titulocunapish letracunapishmi cambiashca. Por ejemplo, “Kanpa shunkuta cuiday” cantoca cunanca “Ñucanchij shunguta cuidashunchij” nishcami can. Ñaupaca cai cantota cantacushpaca shujtajcunata rimacushca shina uyarishpami mana alli sintichirca. Cai cambiocunataca panicunata, jovencunata, mushujcunata cꞌuyashpami chashna rurashcanchij.

18. ¿Cantocunapaj tonotapish letracunatapish imamantataj alli rijsina canchij? (Notatapish ricui).

¹⁸ Jehová Diosta cushicushpa cantashunchij mushuj libropica huaquin cantocunaca Jehová Diosta mañacushca shinami uyarin. Chashnami ñucanchij shungupi ima shina sintirishcata Diosman cantai tucunchij. Shujtaj cantocunaca ñucanchij huauqui panicunata animachun, cꞌuyaita ricuchichun, alli cosascunata rurachunmi yachachin (Hebreos 10:24). Chaimantami cantocunapaj tonotapish letracunatapish alli rijsina canchij. Cantocunata huasipi repasashpaca tucui shunguhuan cantanatami yachashun * (urapi tiyaj notata ricui).

19. ¿Ima shinataj tucuicuna Jehová Diosta adorai tucunchij?

¹⁹ Cantocunata cantashpami Jehová Diostaca alabanchij. Chashnami paita mashnata cꞌuyashcata, pagui nishcata ricuchinchij (Isaías 12:5-ta leyipai). Cushicushpa cantajpica shujtajcunapish chashnallatajmi cantangacuna. Joven cashpa, yuyaj cashpa, mushuj cashpapish tucuicunami cantashpa Jehová Diosta adorai tucunchij. Salmo 96:1-pi nishcata cazushunchij. Chaipica: “Mandaj Diostaca mushuj cantohuan cantaichigari. Mandaj Diostaca tucui cai pachapi causajcuna cantaichigari” ninmi. Chaimanta Jehová Diosta cushicushpa cantashunchij.