1, 2. a)  ¿Diosta sirvijcunaca imata japinatataj shuyacunchij? b) ¿Diosta sirvijcunaca imatataj mana cungarina canchij? (Jahuapi tiyaj dibujota ricui).

APÓSTOL Pablo layallatajmi ungidocunaca “jahua pachapi” Dios cusha nishcata japinata shuyacuncuna (Filipenses 3:14). Ungidocunaca jahua pachapi Jesushuan mandanatami shuyacuncuna. Chashnami cai Allpapi gentecuna jucha illaj cachun ayudangacuna (Apocalipsis 20:6). Jehová Diosca paicunamanca shuj sumaj bendiciontami cunga. Cutin, cai Allpapi causagrijcunaca huiñai huiñaita causanata yachashpami cushilla sintirincuna (2 Pedro 3:13).

² Pablopaj tiempopi ungidocunaca Diospaj bendicioncunata chasquingapajca achcatami esforzarina carcacuna (Colosenses 1:4, 5). Chaimantami ungidocuna chai bendicioncunata chasquichun ayudasha nishpa Pabloca: “Jahua pachapi tiyajcunallata yuyaichij. Cai pachapi tiyajcunataca ama yuyaichijchu” nirca (Colosenses 3:2). Jahua pachapi causana cashpapish cai Allpapi causana cashpapish Jehová Dios cusha  nishca bendicioncunapimi yuyana canchij (1 Corintios 9:24).

3. ¿Ima ruraicunamantataj cuidarichun Apóstol Pabloca advertirca?

³ Pabloca huauqui panicuna mana alli ruraicunapi urmashpa Diospaj bendicioncunata mana japinamantami advertirca. Por ejemplo, Colosas llajtapi huauqui panicuna panda yachachijcunamanta cuidarichun nishpami advertirca. Panda yachachijcunaca Jesuspi crinapaj randica Moisesman cushca leycunallatami pajtachishpa causacurcacuna (Colosenses 2:16-18). Shinallataj huainayana juchapi ama urmanamanta, huauqui panicunahuan, familiahuan ama pꞌiñanacunamantami cuidarichun cunarca. Chashna shina llaquicunaca cunan punllapipishmi tiyashpa catin. Apóstol Pablo cushca consejocunapish cunancamami valishca can. Chaimanta Pablo Colosas huauquicunaman cushca huaquin consejocunamanta yachashun.

4. ¿Huainayana munaicunaca ima llaquipitaj churai tucun?

⁴ Apóstol Pabloca huauqui panicunamanca sumaj bendicionta japigrishcatami yuyachirca. Chai qꞌuipaca: “Cancunapi tiyaj mana alli munaicunataca tucuita saquichij. Ama huainayanguichij, ama ima millaita ruranguichij. Millai yuyaicuna millai munaicuna shamujpipish, ama chaita ruranguichij. Ama imatapish ashtahuan charina yuyailla canguichijchu” nircami (Colosenses 3:5, QC, 1989). Huainayana munaicunamanta jarcarinaca sinchimi cai tucun. Chai mapa munaicunapi urmashpaca Diosmanta caruyashpami chai sumaj bendicioncunata chingachi tucunchij. Shuj huauquica mapa munaicuna juchapi urmachijpimi Diosmanta caruyarca. Congregacionman tigrashca qꞌuipaca paica, ‘chai mapa munaicunata saquinaca sinchimi carca. Ña juchapi urmashpa qꞌuipami yuyaita japircani’ ninmi.

5. ¿Maipi cashpapish imata ruracushpapish imacunamantataj cuidarina canchij?

⁵ Maipi cashpapish imata ruracushpapish juchapi ama urmangapajmi Jehová Diospaj mandashcacunata yuyarina canchij. Por ejemplo, ¿noviocuna rijsinacui callarishpaca imacunamantataj parlanacuna can? Ugllanacunamanta, muchanacunamanta, isquindijlla saquirinamanta Bibliapi imata nishcatami ricuna can. Chashnami juchapi mana urmangacuna (Proverbios 22:3). Trabajopica callarimantami testigo de Jehová cashcata huillana canchij. Shinallataj viajeman rishpa, shuj cꞌarihuan o huarmihuan trabajana cashpaca mapa ruraicunapi ama urmangapajmi cuidadota charina canchij (Proverbios 2:10-12, 16). Shinallataj pihuanpish asirishpa, pugllarishpaca llaquipimi urmai tucunchij. Llaquilla cashpa o ñucanchijlla sintirishpapish cuidadotami charina canchij. Chashna llaquilla cashpaca maijanpish cꞌuyaita ricuchichunchari munashun. Chaipica Jehová Diostami ‘ayudahuai’ nishpa mañana canchij. Shinallataj hermanocunapaj ayudatami mashcana canchij. Chashnami mana juchapi urmashpa bendicioncunata japishun (Salmo 34:18; Proverbios 13:20-ta leyipai).

6. ¿Diversioncunata agllagrishpaca imatataj yuyarina canchij?

⁶ Mapa munaicunata ama charingapajca mana alli diversioncunamantami jarcarina canchij. Cunan tiyashca mana alli diversioncunaca  ñaupa Sodoma Gomorra llajtacunatami yuyachin (Judas 7). Divertiringapaj tucui imallata rurajcunaca huainayanaca alli cashcata shinami ricuchincuna. Ñucanchijcunaca allita shina ricushpa chaipi urmanamantami cuidarina canchij. Ñucanchij pugllaicunapi mana cuidarishpaca Diospaj bendiciontami perdi tucushun (Proverbios 4:23).

7. ¿Congregacionpica ima problemacunataj tiyai tucun?

⁷ Huauqui panicunahuan Diosta tandalla sirvinaca shuj jatun bendicionmi can. Tandanacuicunapimi huauqui panicunahuan Diospaj Shimita yachanchij. Paicunaman cꞌuyaita ricuchishpami Diospaj bendicioncunata japina yuyailla causashun. Shinapish huaquinpica llaquirinacui tiyangami. Chaicunata mana utca allichishpaca resintirishcami saquirishun (1 Pedro 3:8, 9-ta leyipai).

8, 9. a) ¿Bendicioncunata japingapajca ima shinataj cana canchij? b) ¿Shuj huauqui o pani llaquichijpica imatataj rurashun?

⁸ Resintirishca saquirishpaca Diospaj bendicioncunataca mana japi tucushunchu. Chaimantami Apóstol Pabloca: ‘Dios agllashca jucha illajcuna, pai cꞌuyashcacuna cashcamanta shungumanta llaquij canata, cuj canata, mana jatun tucushca canata, manso shungu canata, mana pꞌiñarij canata churarichij. Maijan caishujta pꞌiñashpa juchachijpica, caishuj chaishuj ahuantanacushpa, ima shinami cancunata Jehová Dios perdonarca, chai shinallataj caishuj chaishuj perdonanacuichij. Tucuimanta yallica cꞌuyaj canata churarichij. Cꞌuyaimi tucuicunata shujllata rurajtajca’ nirca (Colosenses 3:12-14).

⁹ Cꞌuyajcuna cashpami shujtajcunata perdonashun. Por ejemplo, shuj huauqui o pani ñucanchijta llaquichijpica, ñucanchijpish huaquinpi pandarishcatami yuyarina canchij. Ñucanchij pandarijpipish shujtajcuna perdonashcamantami pagui ninchij (Eclesiastés 7:21, 22-ta leyipai). Ashtahuantajca tucuicuna tandalla causangapaj Jesús ayudacushcamantami pagui ninchij (Colosenses 3:15). Tucuicunami shuj solo Diosta cꞌuyanchij, alli huillaicunata huillanchij, chai shina llaquicunallatataj chꞌimbapuranchij. Huauqui panicunata cꞌuyashpami imapi pandarijpipish paicunataca perdonanchij. Chashnami tucuicuna tandalla Jehová Diospaj bendicioncunata japinata shuyanchij.

10, 11. a) ¿Envidiaca imamantataj mana alli can? b) ¿Diospaj bendicioncunata japingapaj envidia ama jarcachunca imatataj rurana canchij?

¹⁰ Envidioso cashpaca Diospaj bendicionta mana japi pudishunchu. Bibliaca huaquin runacuna envidioso cashpa llaquipi urmashcatami parlan. Por ejemplo, Cainca paipaj huauquitami envidiamanta huañuchirca. Coré, Datán, Abirampish Moisesta envidiashpami paipaj contra tucurcacuna. Rey Saulpish envidiamantami Davidta huañuchisha nirca. Chaimantami Bibliapica: “Shujtajcuna shina casha nishpa quiquinpajlla imatapish rurajca, maipish cachun tucui mana allita rurashpallami causan” nin (Santiago 3:16).

¹¹ Ñucanchij shungupi cꞌuyaita charishpaca pitapish mana envidiashunchu. Bibliaca: “Cꞌuyaita charijca llaquita apajmi, alli shunguyujmi, cꞌuyaita charijca mana shujtajpajta munanchu” ninmi (1 Corintios 13:4). Ñucanchij shungupi ama envidia tiyachunca  Jehová Dios shinami cana canchij. Congregacionpica tucuicuna shuj shinalla cashcatami yuyarina canchij. Chashnami shuj huauquita o panita alli nijpica, mana envidiashpa tucuicuna paihuan cushicushun (1 Corintios 12:16-18, 26). Rey Saulpaj churi Jonatanpi yuyashun. Paica Jehová Dios rey cachun Davidta agllajpipish mana pꞌiñarircachu. Ashtahuanpish Davidta llaquishpami tucuipi ayudarca (1 Samuel 23:16-18). ¿Jonatán shina cai tucunchijchu?

12. ¿Bibliapaj maijan consejocunataj familiacuna bendicionta japichun ayudanga?

¹² Familia ucupi Dios mandashcata pajtachishpami alli causaita charishun. Chashnallataj Jehová Dios cusha nishca bendicioncunatapishmi japishun. Apóstol Pabloca: ‘Cazadacuna Mandaj Jesús munashca shina, cancunapaj cusacunata cazuichij. Cusacuna, cancunapaj huarmicunata cꞌuyaichij. Paicunahuanca ama millaicuna caichijchu. Huahuacuna, cancunapaj yaya mamacunata tucuipi cazuichij. Mandaj Jesusca chaitami munan. Yayacuna, cancunapaj huahuacunata ama pꞌiñachichijchu’ nircami (Colosenses 3:18-21). ¿Pablopaj consejocunata catishpaca cambaj familiaca ima shinataj causacun?

13. ¿Shuj panica ima shinataj paipaj cusata ayudai tucun Diosta sirvichun?

¹³ Shuj panica, ‘ñuca mana crij cusaca mana alli tratanchu’ nishpachari yuyan. ¿Chai panica imatataj rurai tucun? ¿Paihuan chꞌimbapurashpachu tucuita allichinga? Mana. Cusa paita alli tratai callarishpapish manachari Jehová Diosta sirvisha ninga. Pero paipaj cusa familiata pushaj cashcamanta respetashpami familia alli causachun, Diostapish sirvichun ayudanga. Chashna rurashpaca ishquindijcunachari  Diospaj bendicionta japingacuna (1 Pedro 3:1, 2-ta leyipai).

14. ¿Shuj huauquica paipaj huarmi mana respetajpica imatataj rurana can?

¹⁴ Shuj huauquica, ‘ñuca mana crij huarmica ñucataca mana respetanchu’ nishpachari yuyan. ¿Chai huauquica imatataj ruranga? ¿Huarmita sinchita rimashpachu huasipi pai mandaj cashcata ricuchinga? Mana. Cusaca Jesuspaj ejemplota catishpami huarmita cꞌuyaihuan tratana can (Efesios 5:23). Jesucristoca congregaciontaca cꞌuyaihuan, pacienciahuanmi pushan (Lucas 9:46-48). Cusaca Jesuspaj ejemplotami catina can. Chashna rurajpica huarmica Diosta sirvisha ningachari.

15. ¿Cusaca ima shinataj paipaj huarmita cꞌuyashcata ricuchina can?

¹⁵ Bibliaca: “Cusacuna, cancunapaj huarmicunata cꞌuyaichij. Paicunahuanca ama millaicuna caichijchu” ninmi (Colosenses 3:19). Cusaca paipaj huarmi ima nishcata alli uyashpa, valorashpami cꞌuyashcata ricuchin (1 Pedro 3:7). Huarmi tucui ima nishcata mana rurai tucushpapish pai imata yuyashcatami tapuna can. Chashnami alli decisioncunata japinga (Proverbios 15:22). Cusaca paipaj huarmitaca, ‘ñucataca respetanatajmi cangui’ nishpa mana rimanachu can. Ashtahuanpish cꞌuyaihuan tratajpica huarmillatajmi respetota ricuchinga. Shuj cusa paipaj huarmita huahuacunata cꞌuyaihuan alli tratajpica tucuicunachari cushilla Jehová Diosta sirvisha ningacuna. Shinami paicunapish Dios cusha nishca bendicioncunata japingacuna.

16, 17. ¿Jovencunaca ima shinataj yaya mamapaj disciplinata chasquina cancuna?

¹⁶ Joven, uchillamantachari cambaj yaya  mamacunaca Jehová Diosmanta yachachirca. Huaquinpica: “Ñuca yaya mamaca ima shina sintirishcataca mana intindincunachu, imata rurachunpish mana saquinchu” nishpachari yuyangui. Llaquilla sintirishpaca: “Jehová Diosta sirvinata saquishpami alli causaiman” nishpachari yuyangui. Pero Diosta sirvinata saquijpica cantaca pi mana valorangacunachu. Cambaj yaya mama, congregacionpi huauqui panicunallami cantaca tucui shunguhuan valorancuna.

¹⁷ Tucuicunami imapi pandarijpica disciplinachun minishtinchij. Cambaj yaya mama can munashcata rurachun saquishpa mana disciplinajpica, canmanta mana preocuparishcatami yuyanguiman ¿nachu? (Hebreos 12:8, NM). Canca yaya mama ima shina disciplinajtachari mana munangui. Yangamanta disciplinashcata yuyanapaj randica imapi can pandarishcatami ricuna cangui. Utca pꞌiñarinapaj randica ‘alli yuyashpa’, alli shimicunahuan parlai (Proverbios 17:27). Cambaj yaya mama consejocunata cujpica alli chasquingapaj esforzari. Ima shina disciplinashcata ricunapaj randica canta imapi ayudai tucushcata yuyai (Proverbios 1:8). Jehová Diosta sirvij yaya mamata charinaca achcatami benefician. Paicunami Diospaj bendicioncunata japichun canta ayudanga.

18. ¿Imamantataj Jehová Diospaj bendicioncunata japinata munangui?

¹⁸ Tucuicunami Jehová Diospaj bendicioncunata japi tucunchij. Ashacunaca jahua pachapimi causangacuna, shujtajcunaca huiñaitami paraisopi causangacuna. Cai bendicioncunaca mana shuj muscuillachu can. Jehová Diosmi cusha nin. Chaica pajtaringatajmi. Bibliaca: “Mama cucha yacuhuan junda caj shinami tucui cai pachaca Mandaj Diosta rijsishcahuan junda canga” ninmi (Isaías 11:9). Tucui cai Allpapi causajcunami Jehová Diosmanta yachangacuna. Chaimantami chai bendicioncunata japingapaj esforzarina canchij. Jehová Dios cusha nishca bendicioncunata ama cungarishunchij. Ñucanchij japinata pi quichuchun ama saquishunchijchu.