1, 2. a) ¿Dios mandashcacunataca Jesusca ima shinataj ricurca? b) ¿Mandashcata quillcajcunapish fariseocunapish ima shinataj leycunata pajtachijcuna carca?

MOISESMANCA Jehová Diosmi leycunata curca. Chai leycunatami Jesuspish achcata valichij carca. Salmo 40:8-pica: “Ñuca Dioslla, ñuca cushicunaca quiquinpaj munaita ruranami. Quiquin mandashcaca ñuca shungu ucupimari” ninmi. Cai versopi huillashca shinami chai leycunaca Jesuspajca achca valishca cana carca. Chaimantami pai nishcacunahuan, rurashcacunahuan Dios cushca leycunaca allipaj cashcata ricuchirca. Shinallataj Bibliapi tucui nishcacunaca pajtarinatami ricuchirca (Mateo 5:17-19).

² Mandashcacunata quillcajcunapish fariseocunapish tucui leycunatami uchilla cajpipish pajtachijcuna carca. Chaimantami Jesusca, mentata, eneldota, cominotapish chungamantaca shujta cujcunami canguichij nirca. Shinapish paicunaca Dios mandashcataca mana alli pajtachicurcacunachu. Chaimantami Jesusca: ‘Cashcata ruranata, llaquij canata, crinatapish, chai ashtahuan alli mandashcatarajmi saquishcanguichij’ nirca (Mateo 23:23). Fariseocunaca Dios mandashcacunata mana alli intindijcunachu carca. Shinallataj shujtajcunamanta yalli cashcatapishmi yuyajcuna carca. Pero Jesusca chai mandashca leycunaca ima  nisha nishcata, Jehová Diosmanta imata yachachishcatami alli intindirca.

3. ¿Cunanca imatataj yachashun?

³ Cunan punllacunapica Moisesman cushca ley ucupica ña mana canchijchu (Romanos 7:6). Pero ¿imamantataj Jehová Diosca chai leycuna Bibliapi tiyachun saquishca? Dios imamanta chai leycunata cushcata alli intindishpami ñucanchij causaipi imata ruranata yachashun. Por ejemplo, ¿miticuna llajtacunamantaca imatataj ashtahuan yachai tucunchij? Ñaupa yachaipica mana munaimanta huañuchij runa Dios llaquishpa paita perdonachun imata rurana cashcatami yacharcanchij. Cai yachaipica miticuna llajtacunamanta yachashpami Jehová Diosta ashtahuan rijsishun. Shinallataj Jehová Dios llaquij cashcata, tucuita alli ruraj cashcata, ñucanchij causaipish paipajca achca valishca cashcatami intindishun. Ashtahuanpish pai shina cangapaj imata ruranatami yachashun (Efesios 5:1-ta leyipai).

4, 5. a) ¿Mana munaimanta huañuchij runa miticuna llajtaman utca chayachunca Diosca imatataj mandashca carca? b) ¿Diosca imamantataj chaita mandarca? c) ¿Caica imatataj Jehová Diosmanta yachachin?

⁴ Miticuna llajtacunaca quimsaca río Jordán cai ladoman, cutin caishuj quimsaca río chꞌimba ladomanmi carca. Chai llajtacunaman rina ñancuna jahualla chayana cachunmi Diosca mandashca carca. Chashnami mana munaimanta huañuchijcunaca utca chai llajtacunaman chayai tucurca (Números 35:11-14). Israelitacunaca miticuna llajtaman apaj ñancunataca allichishpami charijcuna carca (Deuteronomio 19:3). Judiocunapaj huaquin librocunapica: ‘Miticuna llajtaman chayachunca ñanpi señalcunami tiyarca’ ninmi. Chai llajtacuna tiyashcamantami maijan runa mana munaimanta pita huañuchishpaca caru llajtacunaman mana rina carca. Caru llajtaman rishpaca yanga dioscunata adoranapimi urmanman carca.

⁵ Jehová Diosca maijan runata pꞌiñashpa huañuchijpica paitapish huañuchichunmi mandarca. Pero mana munaimanta huañuchishca cajpica paita llaquishpa juzgachun, cuidachunpishmi mandarca. Bibliamanta yachaj shuj runaca: “Dios cushca leycunaca tucuimi claro, jahualla, intindinalla carca. Cai leycunami Jehová Dios llaquij cashcata ricuchirca” nircami. Jehová Diosca imapi pandarishcamantaca mana llaquichina yuyaillachu can. Ashtahuanpish paica yallitaj llaquishpami pitapish juzgan (Efesios 2:4).

6. ¿Fariseocunaca ima shinataj carca?

⁶ Jehová Diosca llaquijmi can. Pero fariseocunaca  mana chashna carcacunachu. Por ejemplo, pi quimsa cutin cama chaillapitaj pandarijpica ña mana perdonasha nijcunachu carca. Chashna rurana mana alli cashcata ricuchingapajmi Jesusca shuj parlota nirca. Paica: ‘Ishqui runami Taita Diosta mañacurca. Shujca fariseo, caishujca impuestota japijmi carca. Impuestota japijca paipaj juchacunamanta llaquirishpami Taita Diostaca perdonahuai nishpa mañarca. Cutin, fariseoca: Taita Dioslla, cantami pagui nini. Ñucaca mana shujtaj runacuna shina: Shuhuaj, cashcata mana ruraj, huainayaj mana canichu. Impuestota japij cai runa shinapish mana canichu nishpami mañarca’ nircami. Fariseocunaca shujtajcunataca mana llaquijcunachu carca. Paicunaca shujtajcunamanta ashtahuan yalli cashcatami yuyajcuna carca (Lucas 18:9-14).

7, 8. a) ¿Shujtajcuna ñucanchijta llaquichijpica ima shinataj Jehová laya cai tucunchij? b) ¿Shujtajcunata perdonangapajca imamantataj humildes cana canchij?

⁷ Fariseocuna shina ama cashunchijchu. Ashtahuanpish Jehová Dios shina cꞌuyajcuna, llaquijcuna cashunchij (Efesios 4:32-ta leyipai). ¿Ima shinataj chaita rurashun? Pi ñucanchijta pꞌiñachishcamanta perdonta mañachun saquinallami canchij (Lucas 17:3, 4). Chaimantami: “¿Achca cutincuna pꞌiñachijpipish mana pꞌiñarishpa tucui shunguhuan perdonanichu? ¿Ñucata pꞌiñachijcunahuan alli tucunata munanichu?” nishpa tapurina canchij.

⁸ Fariseocunaca shujtajcunata yalli cashcata sintishpami mana perdonasha nijcuna carca. Pero Jesusta catijcunaca shujtajcuna ñucanchijta yalli cashcata shina ricushpami paicunata perdonana canchij. Chashnami humildes cashcata ricuchinchij (Filipenses 2:3). ¿Jehová Dios shina humildechu canchij? Humilde cajpica shujtajcunaca ñucanchijta perdonta mañai tucungami. Ñucanchijpish tucui shungumantami paicunata perdonashun. Llaquijcuna cashunchij, shujtajcuna pandarijpipish ama jahualla paicunahuan pꞌiñarishunchijchu (Eclesiastés 7:8, 9).

9. ¿Diosca ima shinataj causaica valishca cashcata israelitacunaman ricuchirca?

⁹ Shuj israelita mana munaimanta pita huañuchishpaca ama juchachishca cangapajmi miticuna llajtaman rina carca (Deuteronomio 19:10). Causaica Jehová Diospajca valishcami can. Chaimantami shuj runata yangamanta huañuchijtaca pꞌiñan (Proverbios 6:16, 17). ¿Diosca ima shinataj causaica valishca cashcata israelitacunaman ricuchirca? Jehová Diosca cashcata ruraj, jucha illaj Diosmi can. Chaimantami shuj israelita mana munaimanta huañuchijpipish Diospaj ñaupajpica culpayuj carca. Culpayuj cashpapish quishpiri tucurcami. Pero quishpiringapajca ancianocunahuanmi parlana carca. Ancianocuna mana munaimanta huañuchishcata ricujpimi  paica miticuna llajtapi causagri tucurca. Chaipimi pai huañungacama o sumo sacerdote huañungacama saquirina carca. Jehová causaita cuj cashcamantami israelitacunaca imata ruracushpapish shujtajcunapaj causaita respetana carca.

10. ¿Mandashcata quillcajcunapish fariseocunapish ima shinataj shujtajcunapaj causaita mana respetashcata ricuchircacuna?

¹⁰ Mandashcata quillcajcunapish fariseocunapish mana Jehová Dios shina carcacunachu. Shujtajcunapaj causaitapish mana valishcata layami ricujcuna carca. Chaimantami Jesusca: “Taita Diosmanta yachana yuyaitaca huichcashpami cancunaca mana yachashun nircanguichij. Cancunallataj mana yachashun nij cashpami, shujtajcuna yachashun nijpipish mana saquinguichij” nirca (Lucas 11:52). Paicunaca Diospaj Shimita intindichishpa huiñai causaita charichunmi gentecunata ayudana carca. Chaita ruranapaj randica ‘Mandaj Jesusta’ catinatami jarcarcacuna (Hechos 5:31). Paicuna jarcashcamantami gentecunaca mana huiñai causaita chari tucurcacuna. ¡Mandashcata quillcajcunapish fariseocunapish yallitaj millaimi carcacuna! Jatun tucushca cashcamantami shujtajcunapaj causai mana importashcata ricuchircacuna.

11. a) ¿Apóstol Pabloca ima layataj Jehová shina cashcata ricuchirca? b) ¿Ñucanchijpish ima shinataj gentecunapaj causaica valishca cashcata ricuchishun?

¹¹ Mandashcata quillcajcunapish fariseocunapish shujtajcunapaj causaitaca mana respetarcacunachu. Ñucanchijca Jehová shina cangapajmi shujtajcunapaj causaita respetana, valorana canchij. Apóstol Pablopish chaitami rurarca. Chaimantami tucui laya gentecunaman huillarca. Paica: ‘Tucuicunapaj yahuarmantaca ima juchachina illajmi cani’ nircami (Hechos 20:26, 27-ta leyipai). Pabloca mana Jehová mandashcallamanta o huillana cashcallamanta huillarcachu. Paica gentecunata cꞌuyashpa paicunapaj causaica valishca cashcata intindishpami huillarca (1 Corintios 9:19-23). Jehová Diosca “tucuicuna arrepintirichunmi munan” (2 Pedro 3:9). ¿Jehová shinachu causaica valishca cashcata ricunchij? Gentecunapaj causai valishca cashcata ricushpaca cushicushpami huillanaman llujshishun.

12. ¿Ñucanchijcunaca imamantataj causaita cuidana canchij?

¹² Jehová Dios shina cashcamantami ñucanchij causaitapish cuidana canchij. Chaimantami trabajacushpa, carrota manejacushpa o ima shujtaj cosascunata ruracushpapish cuidadohuan rurana canchij. Chashnallataj huasichicushpa, huasita allichicushpa, tandanacuiman ricushpapish yuyaihuanmi tucuita rurana canchij. Ñucanchij causaita cuidana, saludta cuidanami cullquitapish ima charishcacunatapish yalli valishca can. Jehová Diosca cashcata ruraj cashpami tucuita alli charin. Ñucanchijcunapish pai shinami casha ninchij. Puntapica ancianocunami paicunapaj causaita cuidana can. Shinallataj shujtajcuna ama llaqui tucuchunpishmi ricuna can (Proverbios 22:3). Chaimantami shuj anciano ñucanchij causaita cuidangapaj imata rurachun nijpica cazuna canchij (Gálatas 6:1). Jehová shina causaita valorashpaca mana shujtajcunapaj causaita llaquichishunchu.

13, 14. ¿Jehová shina cangapajca Israelmanta ancianocunaca imatataj rurana carcacuna?

¹³ Israelmanta ancianocunaca Jehová Dios churashca leycunata cazushpami pai shina cashcata ricuchina carcacuna. Puntapica ancianocunaca imalla pasashcatami tucuita alli yachanaraj carcacuna. Qꞌuipaca huañuchij runa chaita rurashcamanta ima shina sintirishcata, ñaupa ima shina comportarishcata, ima  nishpa chaita rurashcatami alli ricuna carcacuna. Chaita rurashpami huañuchij runata quishpichinata o mana quishpichinata decidi tucurcacuna. Chashnami ancianocunaca Jehová Dios shina cashcata ricuchijcuna carca (Números 35:20-24-ta leyipai). Ima shina huañuchijta ricujcuna tiyajpica ishquillatapishmi tapuna carcacuna (Números 35:30).

¹⁴ Ancianocuna tucuita alli yachaj chayashca qꞌuipaca huañuchij runapimi yuyana carcacuna. Chaita rurangapajca alli yuyaita charinatami minishtircacuna. Chashnami mana pandarishpa tucuita alli ricuna carcacuna. Ashtahuantajca Jehová Dios paipaj espirituta cushpa tucuita alli rurangapaj ayudachunmi minishtircacuna (Éxodo 34:6, 7).

15. a) ¿Jesusca imatataj juchayujcunamanta yuyaj carca? b) ¿Fariseocunaca imatataj juchayujcunamanta yuyaj carca?

¹⁵ Fariseocunaca maijan juchata rurashpa pandarishcallatami ricujcuna carca. Paicunaca shungupi ima shina cajtaca mana ricujcunachu carca. Jesuspaj punllacunapi ima tucushcata ricushun. Jesusca impuestota japij Mateo runapaj huasipimi micunaman rishca carca. Chaimi fariseocunaca Jesusta catijcunataca: “¿Ima nishpataj cancunata Yachachijca impuestota japijcunahuan, juchayujcunahuan micucunchu imamí?” nircacuna. Jesús chaita uyashpaca: ‘Sanocunaca jambijtaca mana mashcanchu, ungushcacunallami mashcancuna. Sacrificiocunataca mana ninichu. Ashtahuanpish llaquij cachunmi munani’ nircami (Mateo 9:9-13). Shinashpaca ¿Jesusca juchata rurashpa causanalla cashcatachu nicurca? Mana. Jesusca juchata rurajcuna arrepintirichunmi munarca. Chaimantami paica, ‘Diospajman cutirichij’ nishpa gentecunaman huillaj carca (Mateo 4:17). Jesusca impuestota cobraj huaquin runacuna, juchayujcuna cambiasha nishcatami cuenta japirca. Mateopaj huasimanca mana micunallaman rishcacunachu carca. Ashtahuanpish Jesús yachachishcata uyangapajmi rishcarcacuna (Marcos 2:15). Casi tucui fariseocunaca mana Jesús shinachu shujtajcunata llaquijcuna carca. Paicunaca juchayujcunataca mana valishcata shinami ricurcacuna. Mandashcata quillcajcuna, fariseocunaca Jehovata adoranchij nishpapish mana pai shina llaquij, allita ruraj carcacunachu.

16. ¿Comité judicialpi ayudaj ancianocunaca imatataj rurana can?

¹⁶ Jehová Diosca ima pandata mana ruranchu. Cunan punllacunapish ancianocunaca Jehová Dios shina cangapajmi esforzarina can (Salmo 37:28). Por ejemplo, shuj huauqui o pani juchata rurashcata o mana juchata rurashcata ricungapajmi tucuita alli yachanaraj can. Jatun juchata rurashcataj cajpica imata ruranata yachangapajmi Biblia ima nishcata catina can (Deuteronomio 13:12-14). Comité judicialpi ayudaj ancianocunaca juchata ruraj arrepintirishcata o mana arrepintirishcataca allimi ricuna can. Chaita ruranaca mana jahuallachu. Chaimantami juchata rurashcamanta ima shina sintirishcata, paipaj shungupi imata yuyashcata ancianocunaca alli ricuna can (Apocalipsis 3:3). Maijanpish juchata rurashca cashpaca Dios perdonachunmi tucui shunguhuan arrepintirina can * (urapi tiyaj notata ricui).

17, 18. ¿Ancianocunaca ima shinataj juchata ruraj tucui shunguhuan arrepintirishcata ricui tucuncuna? (Página 15-pi tiyaj fotota ricui).

¹⁷ Jehová Diospish Jesuspish ñucanchij shungupi ima tiyashcataca tucuitami yachancuna. Pero ancianocunaca ñucanchij  shungutaca mana yachai tucuncunachu. Shinashpaca ¿juchata ruraj nij tucushpalla o tucui shunguhuan arrepintiricushcata yachangapajca ancianocunaca imatataj rurana can? (2 Corintios 7:10, 11). Puntapica Diostami alli yuyaita cuhuai nishpa mañana can (1 Reyes 3:9). Qꞌuipaca de verdad arrepintirishcata ricungapajmi Bibliata, publicacioncunata yachana can. Bibliapica maijan runacuna juchata rurashcamanta arrepintirishcata o mana arrepintirishcatami parlan. Chai runacuna ima shina sintirishcata, imata yuyashcata, ima shina comportarishcata ricushpami ancianocunaca yachai tucun.

¹⁸ Chashnallataj ancianocunaca imamanta juchapi urmashcata, ima jarcaicunata charishcata, ñaupaman ima shina cashcatami ricuna can. Jesusmi congregacioncunata pushacun. Paimanta parlashpami Isaías 11:3, 4-pica: “Pai mandacushpaca ñahuita ricushpallaca mana llaquichingachu. Paica shujtajcuna huillashcata uyashcallahuanca mana allichingachu. Ashtahuanpish paica piman mana tucushpami, huajchacunataca cashcata rurashpa allichinga. Llajtapi causaj mana mitsari tucucujcunataca piman mana tucushpami allichinga” nin. Jesusmi congregacioncunata cuidachun, pi juchapi urmajpipish pai shina juzgachun ancianocunata churashca (Mateo 18:18-20). Cꞌuyaj, llaquij ancianocunata charishcamantami cushi sintirinchij. Paicunaca congregacionpi llaquij, cꞌuyaj cachunmi ejemplota churancuna.

19. ¿Caipi yachashcacunamantaca imatataj pajtachisha ningui?

¹⁹ Moisesman cushca leycunaca Jehová Dios ima shina cashcata, pai ima shina causachun munashcatami ricuchin. Chaimantami Bibliaca ‘ima shina yachanatapish, mana llulla mandashcatapishmi charin’ nin (Romanos 2:20). Miticuna llajtacunamanta yachashpami Jehová munashca shina ancianocunaca juzganata yachai tucuncuna. Ñucanchijpish llaquishpa, cꞌuyaita ricuchinatami yachai tucunchij (Zacarías 7:9). Ñucanchijcunaca ña mana chai leycuna ucupi canchijchu. Pero allita rurana, llaquij canaca Diospajca huiñaipajmi valishca can. Jehová Diosca mana cambiashcachu. Chaimantami ñucanchijpish pai shina llaquij, cashcata ruraj cana canchij. Jehová Diospi miticushpa paita cushilla sirvishpa causashunchij.