1. ¿Imamantataj tucuicuna cushichichun minishtinchij?

TUCUICUNAMI cushichichun minishtinchij. Pero punllantami preocupacioncunata, ima atrazocunata charinchij. O imapish mana ñucanchij munashca shina llujshijpimi llaquirinchij. Por ejemplo, mayorlla cashcamanta, ungushca cashcamanta o cꞌuyashca familia, amigo huañujpichari llaquilla canchij. Huaquincunaca shujtajcuna mana alli tratajpichari ahuantana canchij. Millai gentecunapish ashtahuanmi millaicuna tucucun. Cashna ‘llaqui punllacunapi’ cashcamantami ‘tucuri punllacunapi’ causacushcata crinchij. Cai Allpa ñalla shuj paraíso tucuna cashcatapishmi crinchij (2 Timoteo 3:1). Caita yachashpapish Dios nishcacuna pajtarichunca achca huatacunatachari shuyacunchij. ¿Pitaj ñucanchijmanca cushicuita cui tucun?

2, 3. a) ¿Habacucmantaca imatataj yachanchij? b) ¿Habacuc librotaca imamantataj yachashun?

² Cai tapuita yachangapajca Habacuc librota yachashunchij. Bibliapica profeta Habacucpaj causaimantaca  ashallatami huillan. Pero cai libroca ñucanchijmanca achca animotami cun. Habacucpaj shutica “Familiata shina ugllarina” nisha nishcangami. Caica ishqui yuyaitami cun. Shujca llaquilla cajta Jehová Dios cushichingapaj ugllashcata, caishujca Diosta sirvij paipi sinchita charirishcatami ricuchin. Habacucca Dioshuan parlanacushpami sinchi tapuicunata rurarca. Chaimi Jehová Diosca cutichirca. Shinallataj imalla parlanacushcatapish escribishpa churachunmi paipaj espíritu santota curca. Chai parlanacushcacuna ñucanchijta beneficiana cashcata yachashpami escribichirca (Habacuc 2:2, NM).

³ Bibliapica Habacucmanta parlashpaca pai Jehovahuan chai parlanacuita charishcallatami huillan. Chai libroca Diospaj Shimipimi tiyacun. “Ñucanchijta yachachingapajmi quillcashca” can. “Mana pꞌiñarishpalla, cushijlla, shuyana yuyailla canata yachachingapajmi quillcachirca” (Romanos 15:4). Habacuc libroca Jehová Diospi confiana ima nisha nishcatami intindichin. Shinallataj llaquicunata charishpapish tranquilo sintirichunmi ayudan.

4. ¿Imamantataj Habacuc runaca llaquilla carca?

⁴ (Habacuc 1:2, 3-ta liyipai). Habacuc runaca sinchi punllacunapimi causarca. Tucui gentecuna millaicuna, llaquichijcuna tiyashcamantami dimastij llaquilla carca. ¿Ima horataj llaquichijcunaca tucurina carca? ¿Diosca ima nishpataj mana imata rurarca? Cai profetaca israelcunapurallataj llaquichinacushpa imatapish mana cashcata rurajcuna cajta ricushpami mana imata rurai tucurca. Chaimi ima tucucushcaca Diospajca mana importantechu yuyachin, ayudangapajpish qꞌuipayacunmi nishpa yuyashcanga. Shinapish Yaya Diostaca ricuhuai nishpami mañarca. Ñucanchijpish ¿huaquinpica cai profeta shinachu sintirishcanchij?

5. ¿Habacuc libropica imatataj ñucanchijman yachachin? (Página 15-pi tiyaj fotota ricui).

⁵ ¿Habacuc runaca Jehová Diospi confianata pai nishcacunapi crinata saquishcachu canga? Mana. Habacuc runaca problemacunata, dudacunata charishcamantami Diostaca ayudahuai nishpa mañacurca. Shinami Diospi confiashcata, esperanzatapish charishcata ricuchirca. Pero Yaya Dios mana imata rurashcamanta, ashtahuanpish llaquicuna tiyachun saquishcamantami preocupado carca. Habacuc runa paipaj preocupacioncunata quillcachun Jehová Dios saquishcamantaca ¿imatataj yachacunchij? Ñucanchij preocupacioncunata, dudacunatapish Diosman huillanataca mana manchanachu canchij (Salmo 50:15; 62:8). Proverbios 3:5-pica shuj animachij consejotami cun. Chaipica: “Mandaj  Diospi cambaj tucui shunguta churangui. Ama can alli yuyaiyuj cashcallapi shunguta churanguichu” ninmi. Habacucca cai shimicunataca paipaj causaipimi pajtachirca.

6. ¿Imamantataj Diosta mañanaca importante can?

⁶ Habacuc runaca Yaya Diospimi confiarca. Chaimantami paillapi confiashpa dimastij preocuparinapaj randica ima shina sintirishcata Diosman huillarca. Shinami ñucanchijman shuj alli ejemplota saquirca. Mañashcacunata uyaj Jehová Diosca paipi confiashpa ñucanchij preocupacioncunata huillachunmi mañan (Salmo 65:2). Chaita rurajpica Dios ñucanchijta ugllaj shina mañashcacunata cutichijtami ricushun (Salmo 73:23, 24). Ima llaquicunata charijpipish pai ricushca shina ricuchunmi ayudanga. Shinaca Jehová Diosta tucui shunguhuan mañashpaca paipi confiashcatami ricuchicunchij.

7. ¿Habacuc preocupado cajpica Jehová Diosca imatataj rurarca?

⁷ (Habacuc 1:5-7-ta liyipai). Habacuc runaca paipaj preocupacioncunataca Diospaj maquipimi saquirca. Qꞌuipaca Diosca imatashi ruranga nishpami tapurishcanga. Pero Diosca shuj cꞌuyaj yaya shinami Habacuc ima shina sintirishcata intindirca. Habacuc sufricushcamanta ayudahuai nishpa mañacushcatapish allimi yacharca. Chaimantami mana rimarca. Pero mana cazuj israelitacunata ñalla imata rurana cashcatami huillarca. Diosca chaitaca paimanmi puntaca huillashca canga.

8. ¿Jehová Dios cutichijpica imamantataj Habacucca preocuparirca?

⁸ Diosca Habacucmanca Judapi causaj millai gentecunataca ñallami llaquichisha nircami. ‘Cancuna causai punllacunapi’ nishpaca cai profeta, judiocunapish causan punllacunapi llaquichinatami nisha nicurca. Habacucca ¿chai respuestatachu shuyacurca? Mana. Dios nishcacunaca judiocunataca ashtahuanmi llaquichina carca. Judiocunaca Diosta adorajcunami canchij nishpapish millaicunami carca. Pero babiloniocuna o caldeocunaca paicunata yalli animal millaicunami carca. ¿Imamantataj Diosca paipaj llajtata babiloniocuna llaquichichun saquina carca? Can Habacuc cashpaca ¿ima shinataj sintiringuiman?

9. ¿Ima tapuicunatataj Habacucca rurarca?

⁹ (Habacuc 1:12-14, 17-ta liyipai) * (urapi tiyaj notata ricui). Habacuc runaca millai judiocunata babiloniocuna castigachun Dios saquishcata intindishpapish preocupadomi carca. Pero chashnapish humilde cashcamantami Diostaca ñuca miticuna “jatun Rumimari” nirca (Deuteronomio 32:4; Isaías 26:4). Habacucca Yayitu Dios cꞌuyaj, alli Dios cashcamantami paipi confiashpa catirca. Chaimantami paitaca: ¿Ima nishpataj Judá llajtapi achca llaquicuna tiyachun saquingui? ¿Ima nishpataj chai rato mana imata rurangui? Tucui poderta charij cashcamantaca ¿ima nishpataj ashtahuan llaquicuna  tiyachun saquingui? nishpa tapurca. Yaya Diosca ‘jucha illajmi’ can. Paica ‘millaitaca manataj ricunachinchu’.

10. ¿Imamantataj ñucanchijpish maipica Habacuc shina sintirinchij?

¹⁰ Jehová Diosta uyashpa, paipi confiashpa, Bibliata liyishpa, liyishcapi yuyashpami shuj esperanzata charinchij. Dios nishcacunatapish paipaj organizacionpimi yachanchij. Chashna jahuapish llaquicunahuan cashpaca huaquinpica Habacuc shinami sintirinchij. Chaimantami: “¿Ima horataj llaquicuna illaj causashun?” nishpa tapurinchij. Cunanca Habacuc runa imata rurashcata, ñucanchijpish paimanta imata yachai tucushcatami ricushun.

11. ¿Diosta uyashca qꞌuipaca Habacucca imatataj rurasha nirca?

¹¹ (Habacuc 2:1-ta liyipai). Jehová Dioshuan parlanacushcamantami Habacucca shungupi tranquilo sintirirca. Chaimi Diosllataj imata rurana cashcata shuyarca. Qꞌuipapish paica sustarishca cashpaca Diospimi shuyashpa catisha nirca (Habacuc 3:16, NM). Diosta alli sirvij shujtajcunapish chashnallatajmi pacienciahuan paipi shuyarcacuna. Paicunapaj ejemplocunami ñucanchijtapish Yaya Dios imata rurana cashcata shuyashpa catichun animan (Miqueas 7:7; Santiago 5:7, 8).

12. ¿Habacucmantaca imatataj yachacunchij?

¹² ¿Habacucmantaca imatataj yachacunchij? Ima llaquicunata charishpapish Diosta mañanataca manataj saquinachu canchij. Shinallataj Bibliapi ima nishcata, paipaj organizacionpi ima nishcatapishmi cazuna canchij. Chashnallataj ñucanchij llaquicunata Dios agllashca horaspi allichichunmi pacienciahuan shuyana canchij. Chaita rurashpaca Habacuc shinami ñucanchijpish llaquicunata ahuantashpa shungu ucupi tranquilo sintirishun. Shinallataj esperanzata charishpami ima problemacunahuan cashpapish cushilla cashun, pacienciatapish charishun (Romanos 12:12).

13. ¿Diosca Habacucmanca imatataj nirca?

¹³ (Habacuc 2:3-ta liyipai). Jehová Diosca Habacuc paipi shuyashcamantami cushilla sintirishcanga. Tucui poderta charij Diosca Habacuc preocuparishpa sufricushcataca allimi yacharca. Chaimi paipaj tapushcacunata cutichishatajmi nishpa cushichirca. “Ñucapi shunguta churashpa pacienciahuan shuyai. Qꞌuipayaj shina ricurijpipish cutichishami” nicuj layami carca. Diosca pai nishcacuna shuj punlla pajtarinatami yuyachirca. Shinallataj shuyashpa catichunmi animarca.

14. ¿Problemacunata charishpaca imatataj rurana canchij?

¹⁴ Ñucanchijpish Jehová Diosllataj pai nishcacunata pajtachichunca pacienciahuanmi  shuyana canchij. Pai nishcacunatapish allimi uyana canchij. Shinami ima problemacuna ricurijpipish Diospi confiashun, shungu ucupipish tranquilo sintirishun. Jesusca “ima huata, ima punlla pajtarinata” Dios mana huillajpipish mana dimastij sustarinachu canchij nircami (Hechos 1:7). Jehová Dios pai agllashca horaspi imata ruranatami tucui shunguhuan crina canchij. Chaipajca mana shaicunachu canchij. Ashtahuanpish pacienciahuan humilde shunguhuanmi shuyana canchij. Diospi feta charishcatapishmi ricuchina canchij. Chaicamaca pudirishcahuanmi Diosta sirvishpa catina canchij (Marcos 13:35-37; Gálatas 6:9).

15, 16. a) ¿Habacuc 2:4-pica Diosca imallatataj cusha nin? b) ¿Habacuc 2:4-pi Dios nishcacunamantaca imatataj yachacunchij?

¹⁵ Diosca cashcata rurajca “crishcallamantami” causanga nircami. Shinallataj ‘cai pachapi causajcunaca Mandaj Dios jatun cashcata rijsina yuyaihuanmi junda cangacuna’ nircami (Habacuc 2:4, 14). Diosca paipi shunguta churajcunaman, pacienciata charijcunamanca huiñai causaitami cusha nin.

¹⁶ Habacuc 2:4-pi Dios imata nishcapi yuyashunchij. Chai nishcaca apóstol Pablopaj importante cashcamantami paica chai versota quimsa cutin nirca (Romanos 1:17; Gálatas 3:11; Hebreos 10:38). Ima  llaquicunata, problemacunata charishpapish Diospi feta churashpa, paimanta ama caruyashunchij. Chaimi pai nishcacuna shamuj punllapi pajtarishcata ricushun. Diosca llaquicunapi ama yallitaj yuyaichijchu. Shamuj punlla sumaj esperanza tiyagrishcapi yuyaichij ninmi.

17. ¿Jehová Diospi confiajpica paica imatataj ñucanchijmanta ruranga?

¹⁷ Tucuri punllapi causajcunaca Habacuc libromantaca achcatami yachai tucunchij. Diosca paita cazujcunaman, paipi confiajcunamanca huiñai causaitami cusha nin. Chaimantami ima problemacunata, preocupacioncunata charishpapish Diospi tucui shunguhuan crishpa catina canchij. Diosca Habacucman nishca shinami ñucanchijpaj lado tucushpa quishpichinga. Shinallataj pai churashca Mandana cai Allpata mandai callaringacama pacienciahuan shuyachun ninmi. Chai punllaca cai Allpapica cushillami paitaca shuj shinalla adorashun (Mateo 5:5; Hebreos 10:36-39).

18. ¿Jehová Dios nishcacunaca ima shinataj Habacuc runataca animarca?

¹⁸ (Habacuc 3:16-19-ta liyipai). Jehová Dios nishcacunaca Habacuctaca achcatami animarca. Paica israelitacunamanta ñaupa punllacunapi Dios imata rurashcata yuyarishpami paipi ashtahuan confiarca. Chashnallataj Dios ñalla imata ruragrinatami tucui shunguhuan crirca. Chaimi llaquicunahuan asha tiempota sufrina cashpapish cushilla sintirirca. Habacuc runaca dudacunata ña mana charircachu. Ashtahuanpish Dios paipaj poderhuan quishpichinapimi crirca. Verso 18-pi Habacuc nishcacunaca Diospi ashtahuan confianzata charishcatami ricuchin. Chai nishcacunaca sumajmi can. Huaquin Bibliamanta yachaj gentecunaca cai versomanta parlashpaca Habacuc runaca Dios nishcacunata uyashpaca cushicushpa, muyushpa bailasha nishcatami ricuchin nincunami. Verso 16 al 19-pi tiyaj yuyaicunaca ñucanchijmanca achcatami yachachin. Diosca shamuj punllacunapi imata rurasha nishpallaca mana saquirinchu. Ashtahuanpish pai nishcacunataca ñallami pajtachinga.

19. ¿Habacuc shina cushilla sintiringapajca imatataj rurana canchij?

¹⁹ Habacuc libropica Jehová Diospi confiana importante cashcatami yachachin (Habacuc 2:4). Paipi confiashpa catingapajca ñucanchij crishcacunatami sinchiyachina canchij. Chaipajca punta, Diostami punllanta mañashpa tucui ñucanchij preocupacioncunata huillana canchij. Ishqui, Bibliapi imalla yachachishcacunata, Diospaj organización imalla nishcacunatami uyashpa cazuna canchij. Quimsa, pai nishcacunata pajtachingacamaca tucui shunguhuan crishpa, pacienciahuanmi shuyana canchij. Habacuc runaca chaitami rurarca. Callaripica Dioshuan parlanacushpa dimastij preocupado cashcatami ricuchirca. Pero ultimotaca animarishpami cushilla sintirirca. Habacuc runa shina cashunchij. Chashnami Jehová Diosca shuj yaya shina paipaj rigra ucupi ugllacushcata sintishun. Paillami cai millai mundopi ñucanchijtaca animai tucun.