1, 2. a) ¿Imataj ñucanchij causaipica ashtahuan valishca can? b) ¿Ima yachaitataj achcata valichinchij, imamanta? (Jahuapi tiyaj fotota y dibujocunata ricui).

¿ÑUCANCHIJ causaipica imataj ashtahuan valishca can? Diosta sirvijcunapajca paipaj amigo canami ashtahuan valishca can. Paipaj amigo canataca imahuan mana cambiashunchu. Bibliapi yachashcacunapishmi ñucanchijpajca achca valishca can. Cai yachaicunami Diospaj ñaupajpi alli cachun ayudan (Colosenses 1:9, 10).

² Jehová Diosca paipaj mana llullaj shimipimi ñucanchijmanca tucuita yachachin. Por ejemplo, paipaj shutita, paipaj shuti ima nisha nishcata, pai ima shina cashcatami yachachin. Shinallataj paipaj Churita cachashpa ñucanchijta achcata cꞌuyashcatami intindichin. Jesús jahua pachamanta mandanata, ungidocuna jahua pachapi causanata, cai Allpapipish “shujtaj ovejacuna” causanatami huillan (Juan 10:16). Chashnallataj ñucanchij ima shina causanata, ima shina comportarinatami yachachin. Cai tucui  yachaicunaca mai sumajmi can. Chaimantami Diospajman cꞌuchuyashpaca cushi causaitapish chari tucunchij.

3. ¿Mana llullaj shimitaca cullquihuanchu randina canchij?

³ Bibliapi mana llullaj shimita o Dios yachachishcacunata randingui nishpaca ¿cullquita cuna cashcatachu nicun? Mana. Jehová Diosca shungumanta cuj cashpami paipaj Churipaj causaitapish ñucanchijman gratis curca. Pipish paimanta yachanata munajpica Diosca cullquita mana mañashpami ayudan. Ñaupa tiempopi Simón shuti runaca shujtajcunaman espíritu santota cungapajmi apóstol Pedroman cullquita cusha nirca. Chaimi Pedroca: “Taita Dios cꞌuyashpalla cushcata cullquihuan randisha yuyashcamanta cambaj cullquindij chingarigri” nirca (Hechos 8:18-20). Shinashpaca ¿‘mana llullaj shimita randinaca’ imatataj nisha nin?

4. ¿Cai yachaipica mana llullaj shimimantaca imatataj yachashun?

⁴ (Proverbios 23:23-ta liyipai). Diospaj Shimimanta yachangapajca achcatami esforzarina canchij. Ima sacrificiocunata rurana cashpapish utcami rurana canchij. Proverbios librota quillcaj runa nishca shinaca, mana llullaj shimita ña charishpaca ama tigra cꞌatungapaj o ama saquingapajmi cuidadota charina canchij. Cunanca mana llullaj shimita randina ima nisha nishcata, chaimanta imata pagana cashcatami yachashun. Chaimi mana llullaj shimita charishcata valorangapaj, ama nunca tigra cꞌatungapaj decidido cachunpish ayudanga. Shinallataj Jehová Diospaj mana llullaj shimita charina tucuimanta yalli valishca cashcatami intindishun.

5, 6. a) ¿Mana llullaj shimitaca ima shinataj sin cullqui randishun? Shuj ejemplomanta parlai. b) ¿Mana llullaj shimita randishpaca ima shinataj beneficiarishun?

⁵ Imata gratis cujpica ñucanchijca tigrami imallatapish rurana o cuna canchij. Proverbios 23:23-pi hebreo rimaipi “randina” nishca shimica “japina” o “charina” nisha ninmi. Cai shimicunaca imata charingapajpish esfuerzota rurana o tigra imata cuna cashcatami ricuchin. Caipi yuyashun. Shuj tiendapi gratismi guineocunata cumbidacunchij nijpica ¿imatataj ruranchijman? ¿Chai guineocunaca ñucanchij mesapi ñapish ricuringallachu? Mana. Ashtahuanpish guineocunata apamungapajca shuj esfuerzota rurashpami tiendaman rina canchij. Chai shinallatajmi mana llullaj shimita randingapajca mana cullqui minishtirin, pero imallatapish ruranami canchij.

⁶ (Isaías 55:1-3-ta liyipai). Isaías libropimi Jehová Diosca mana llullaj shimita randina imata nisha nishcata intindichin. Cai versocunapica Diosca paipaj Shimitaca yacuhuan, lechehuan, vinohuanmi comparan. Diospaj yachachishcacunaca chuya yacu shinami can. Huahuacunaca lecheta ubyashpaca sinchimi huiñancuna. Chai shinallatajmi Diospaj yachachishcacunapish espiritualmente sinchi cangapaj ayudan. Cutin ¿ima shinataj Diospaj yachachishcacunaca vino shina can? Bibliapica vinoca cushicuitami cun ninmi (Salmo 104:15). Chaimantami Diosca vinota randichun nin. Shina nishpaca pai mandashcacunata cazushpa cushilla causana cashcatami nicun (Salmo 19:8). Cai chꞌimbapuraicunahuanmi Yaya Diosca paipaj Shimimanta yachashpa, imata yachashcatapish causaipi pajtachishpaca achca beneficiocunata charina cashcata intindichin. Chaimanta, mana  llullaj shimita randingapaj imallata saquishcata yachashun.

7, 8. a) ¿Diosmanta yachangapajca mashna tiempotaj minishtirin? b) ¿Shuj estudianteca imatataj rurarca, chaimanta ima resultadocunatataj charirca?

⁷ Tiempo. Dios churashca Mandanamanta yachangapaj, Bibliata liyingapaj, publicacioncunata liyingapajca tiempomi minishtirin. Shinallataj quiquinllataj Bibliata yachangapaj, tandanacuicunapaj prepararingapaj, tucui tandanacuicunaman ringapajpish tiempomi minishtirin. Chaicunata rurangapajca mana tanto importante cosascunataca ladomanmi saquina canchij (Efesios 5:15, 16-ta liyipai). ¿Bibliamanta minishtirishca yuyaicunata yachangapajca mashna tiempotaj minishtirin? Mana tucuicunachu igual yachai tucunchij. Pero Jehová Diosmanta, pai ima shina cashcamanta, pai rurashcacunamantaca mana nunca yachanata saquishunchu (Romanos 11:33). Inglés shimipi punta cutin llujshishca cai laya revistapica mana llullaj shimita yachanataca shuj “uchilla sisahuanmi” chꞌimbapurarca. Qꞌuipaca: “Shuj sisallahuanca ama saquirichijchu. Diosmanta yachana shujlla sisa shina suficiente cajpica Diosca mana achca yachaitaca cunmanchu. Chaimanta, sisacunata mashcaj shina japishpa catichij” nircami. Tapurishunchij: ¿Mashnatataj Diosmantaca yachashcani? nishpa. Huiñaita causashpapish Jehová Diosmantaca ashtahuanmi yachashpa catishun. Cunan punllacunapica mana llullaj shimita ashtahuan yachangapajmi tiempotaca mana desperdiciana canchij. Shuj huarmica Diospaj Shimimanta yachanatami munarca. Paimanta yachashun.

⁸ Japonmanta Mamiko * (urapi notata ricui) shuti shuj huarmica Nueva York (Estados Unidos) llajtapi estudiangapajmi rishca carca. Chai tiempopajca Japón llajtamanta shuj religionhuanmi paica chagrurishca carca. Shuj punllaca shuj precursorami huasin huasin huillacushpa paihuan tuparca. Mamikoca Bibliamanta yachai callarishpaca cushillami sintirirca. Chaimi semanapi ishqui cutin yachachichun mañarca. Estudiacushcamanta, trabajacushcamanta mana tanto tiempota charishpapish tandanacuicunamanmi ri callarirca. Diosmanta yachangapaj ashtahuan tiempota surcusha nishpami huaquin ruraicunata saquirca. Chashna sacrificiocunata rurashpami Mamikoca Diospajman ashtahuan cꞌuchuyarca. Chaimantami manaraj shuj huata tucujpi bautizarirca. Sujta quillacuna qꞌuipa 2006 huatapica precursorami tucurca. Paica cunancamami precursora shina sirvishpa caticun.

9, 10. a) Mana llullaj shimimanta yachashpaca ¿charijyana cosascunamantaca imatataj yuyashun? b) ¿Shuj panica imatataj saquirca, chaimantaca ima shinataj sintirin?

⁹ Charishca cosascuna. Mana llullaj shimita yachashpa catingapajca shuj alli trabajota o shuj alli profesiontachari saquina carcanchij. Jesusta catij Pedro y Andrespi  yuyashun. Paicunaca pescadocunata japingapajmi dedicarijcuna carca. Jesusca paicunataca ‘pescadocunata japijta shinallataj, gentecunata pushamujcunatami rurasha’ nircami. Chaimi tucuita saquishpa Jesusta catircacuna (Mateo 4:18-20). Pero Diospaj Shimita yachai callarishpa trabajanata saquina cashcataca mana nisha ninchu. Micunapaj, churanapaj, familiata cuidanapajca trabajanami canchij (1 Timoteo 5:8). Shinapish causaipi ima ashtahuan importante cashcata, charina cosascunata ima shina ricuna cashcatami yuyarina canchij. Jesuspish cai pachapi charijyanata ama mashcaichijchu. Ashtahuanpish jahua pachapi charijyanata mashcaichij nishpami yachachirca (Mateo 6:19, 20). Cunanca shuj joven imata rurashcata yachashun.

¹⁰ Mariaca manaraj escuelaman yaicushpami golf nishca pugllaita pugllaj carca. Cutin colegiopi cajpica alli pugllaj cashcamantami universidadpi estudiachun shuj becata curcacuna. Paipajca chai pugllaimi ashtahuan importante carca. Chaimantami alli pugllaj tucushpa achca cullquita ganana munaita charirca. Shinapish Bibliamanta yachai callarishpaca imata yachashcatami pajtachi callarirca. Paica: “Bibliapi mandashca shina causashpa, alli decisioncunata japishpaca cushillami carcani” ninmi. Pero Diosta sirvinatapish, charina cosascunata mashcanatapish ishquindijtaca mana rurai pudina cashcatami cuentata curca (Mateo 6:24). Chaimantami chai pugllaitapish famosa canata, cullquiyuj tucunatapish saquinata decidirca. Cunanca precursorami can. Paica, “cushillami causacuni” ninmi.

11. ¿Bibliata yachai callarijpica ima shinataj shujtajcunaca ñucanchijta ricunga?

¹¹ Amigocunahuan familiacunahuan tandanacuna. Dios yachachishcacunata pajtachi callarishpaca huaquincunahuanca mana tantochari tandanacushun. ¿Imamanta? Jesusca paipaj catijcunamanta parlashpami Yaya Diostaca: “Mana llullaj cambaj shimihuan chꞌicanyachipai. Cambaj shimica mana llullajchu” nishpa mañarca (Juan 17:17, QC, 1989). Dios yachachishcacunata pajtachishpaca cai mundomantami chꞌicanyarinchij. Chaimantami gentecunaca paicuna shina ña mana yuyajpi ñucanchijtaca shujtajta shina ricuncuna. Ñucanchijca mana pita chꞌicanyachisha ninchijchu. Pero huaquin familiacuna, amigocuna ñucanchijmanta caruyajpi o Diosta sirvichun jarcajpica mana mancharinachu canchij. Jesusca chashna pꞌiñajcunaca quiquin huasi ucupurallatajmi canga nircami (Mateo 10:36). Shinapish mana llullaj shimita randinamanta tucuita saquijpica Diosca chaitapish maihuan yallitami bendicianga nircami (Marcos 10:28-30-ta liyipai).

12. ¿Mana llullaj shimita charingapajca shuj judío runaca imatataj rurarca?

¹² Shuj judío runa Aarón shutica uchillamantami Diospaj shutita mana parlana cashcata crishpa causarca. Pero Diosmanta alli yachanataca achcatami munarca. Shuj punlla shuj testigo de Jehová paihuan  parlashpaca: “Hebreo shimipi Diospaj shutica chuscu letracunatami charin, chai letracunapi vocalcunata churajpica ‘Jehová’ shutimi saquirin” nircami. Caita yachashpami Aaronca achca cushilla sintirishpa sinagogapi yachachijcunaman huillanaman rirca. Pero paicunaca Diospaj shutita yachashcamanta cushicunapaj randica Aarontaca chꞌucashpami chaimanta llujchishpa cacharcacuna. Familiacunapishmi paihuanca colerarca. Pero chaicunamanta Jehová Diosta rijsishpa catinataca mana saquircachu. Qꞌuipaca bautizarishpami Diostaca tucui paipaj causaipi sirvishpa catirca. Ñucanchijpish Bibliamanta yachai callarijpica familiacuna o shujtaj gentecunaca tal vez ña mana ñucanchijhuan apanacusha ningacunachu.

13, 14. Dios yachachishcacunata pajtachingapajca ¿imamantataj huaquinpica ñucanchij yuyaicunata, ñucanchij ruraicunata cambiana canchij? Shuj experienciamanta parlai.

¹³ Mana alli yuyaicuna, mana alli ruraicuna. Mana llullaj shimita o Dios yachachishcacunata pajtachingapajca ñucanchij yuyaicunata, ruraicunatami cambiana canchij. Apóstol Pedrota yuyarishun. Paica: “Alli cazuj huahuacuna shina caichij. Ñaupa manaraj yachashpa ruracushca mapa munaicunataca ama ruraichijchu”. “Cancunapish tucui causaipi ima jucha illajlla caichij” nircami (1 Pedro 1:14, 15). Por ejemplo, ñaupa Corinto llajtapi causaj gentecunaca Dios yachachishcacunata chasquishpaca achca cambiocunatami paicunapaj causaipica rurana carcacuna (1 Corintios 6:9-11). Shinallataj Apóstol Pedroca pai causan punllacunapi Jesusta catijcunataca: “Diosta mana rijsijcuna munashcata ruranataca, ñami sarunman yallitaj rurarcanguichij. Aicha munashcata rurashpa, aichata cushichishpa, machashpa, maipish cachun fiestacunata rurashpa, mana alli yuyaicunallahuan cushicushpa, millanayaj rurashcalla dioscunata adorashpami purircanguichij” nircami (1 Pedro 4:3). Cunan punllacunapish achca gentecunami Dios yachachishcacunata pajtachingapaj mana alli causaita saquina cashcacuna.

¹⁴ Devynn y Jasmine shuti cusa huarmica achca huatacunatami ubyashpalla causajcuna carca. Devynn runaca contabilidadpimi alli trabajaj carca, pero machador cashcamantami chai trabajocunataca pirdijlla carca. Cutin paipaj huarmi Jasmineca jatuntaj jirizami carca. Shuj punllaca Jasmineca machashcami ñanta ricurca. Chaipimi ishqui misionerocunahuan tupashpa Bibliamanta yachangapaj saquirirca. Catij semanata misionerocuna huasipi visitanaman rijpica paicunaca ishquindijmi machashcacuna carca. Paicunaman Bibliamanta huasipi yachachinaman rinata mana shuyashcacunachu carca. Cutin ña catij visitapica ña mana chashnallataj carcacunachu. Bibliamanta yachai callarishpaca ishquindijmi tucui yachashcacunata pajtachi callarircacuna. Manaraj quimsa quilla tucujpimi trago ubyanata saquishun nircacuna, shinallataj leypi mandashca shinapishmi cazararcacuna. Paicuna causan comunapica tucuicunami cai cusa huarmi alli causai callarishcata yachaj chayarcacuna. Chaimantami taucacuna Bibliamanta yachai callarircacuna.

15. ¿Imata saquinataj ashtahuan sinchi ricuri tucun, imamanta?

¹⁵ Mana alli costumbrecuna. Maijancuna Diosmanta yachai callarishpa, huaquin costumbrecuna Diospaj ñaupajpi mana alli cashcata intindishpaca utcami saquincuna. Pero shujtajcunapajca mana facilchu can. Maijancunaca paicunapaj familiacuna, amigocuna, trabajopi compañerocuna chai costumbrecunata  rurachun obligajpimi chaita saquinataca dudancuna. Ashtahuancarin maijan huañushca familiacunata yuyarina costumbre cajpimi chaicunata saquinaca mana jahualla canga (Deuteronomio 14:1). Pero shujtaj huauqui panicuna chaicunata ima shina saquishcata yachashpami, ñucanchijpish mana alli costumbrecunataca saqui pudishun. Punta siglopi Éfeso llajtapi causajcuna imata rurashcata yachashun.

16. ¿Efesopi causajcunaca imatataj rurarcacuna?

¹⁶ Ñaupa Éfeso llajtapica achcacunami brujeriata rurajcuna carca. ¿Chaipi causaj gentecunaca Jesusta catijcuna tucushpaca imatataj rurarcacuna? Bibliapica: “Chashnallatajmi yumbocunapish brujianata yachachij librocunata apamushpa tucui gentecunapaj ñaupajpi rupachircacuna. Chai librocunata rupachishca qꞌuipa yupajpica, pichca chunga huaranga cullquimi cana cashca carca. Chashnami Jatun Diospaj Shimica, tucuita ruraj cashca, tucuipi uyarishpa mirarishpa catirca” ninmi (Hechos 19:19, 20). Tucui shungumanta Diosta sirvijcunaca, achca cullqui valijpipish tucui chai mana alli librocunatami rupachircacuna. Chaimantami Yaya Diosca paicunata achcata bendiciarca.

17. a) Mana llullaj shimita charingapajca ¿tal vez ima sacrificiocunatataj rurana cashcanchij? b) ¿Catij yachaipica ima tapuicunatataj ricushun?

¹⁷ ¿Mana llullaj shimita charingapajca ima sacrificiocunatataj rurana cashcanchij? Mana llullaj shimita charingapajca tucuicunami tiempota surcuna cashcanchij. Huaquincunaca charijyana cosascunata saquishpapish familiahuan amigocunahuanpishmi ña mana tanto tandanacui pudincuna. Cutin achcacunaca paicunapaj yuyaicunata, ruraicunatami cambiana cashcacuna. Mana alli costumbrecunatapishmi saquina cashcacuna. Mana llullaj shimita charinaca tucuita saquishcatapish yalli valishcami can. Chaita rurajpica Diosmi ñucanchijta chasquinga. Mana llullaj shimita charinaca maravilla bendicioncunatami cun. Chaita yuyarishpaca mana nunca saquishunchu. ¿Pero ima shinataj saquinata pudinchijman? ¿Ama chai atraso tucungapajca imataj ayudanga? Catij yachaipimi ricushun.