1, 2. a) Apóstol Pedro: “Amito, can quiquinta llaqui” nijpica ¿imatataj Jesusca cutichirca? (Jahuapi tiyaj dibujota ricui). b) ¿Jesusca imamantataj chashna contestarca?

DISCIPULOCUNACA Jesús Israel llajtata mandana cashcatami yuyarcacuna. Pero Jesusca pai llaquicunata apashpa huañuna cashcatami huillarca. Chashna nijpimi paicunaca mana crircacuna. Apóstol Pedroca: “Amito, ashtahuanpish can quiquinta llaqui. Chashna tucunataca Dios ama munachun” nircami. Chaimi Jesusca: “¡Ñuca ñaupajmanta anchui, Satanás! Ñuca ñitcanami tucungui. Dios imata pajtachisha nicushcataca mana intindi tucunguichu. Ashtahuanpish runacunapaj yuyaillatami intindi tucungui” nircami (Mateo 16:21-23; Hechos 1:6).

² Chashna nishpaca Jesusca Yaya Diospaj yuyaihuan cai mundopaj yuyaihuan mana igual cashcatami intindichirca (1 Juan 5:19). Apóstol Pedro nishcaca cai mundopaj yuyaicunatami ricuchin. Pero Yaya Diosca chai yuyaita mana charircachu. Ashtahuanpish Jesús llaquinaita sufrishpa huañungapaj allichirichunmi shuyarca. Chaitaca Jesusca allimi  yacharca. Jesús nishcacunaca cai pachapaj yuyaicunata mana chasquishcata ashtahuanpish Dios shina yuyaj cashcatami ricuchirca.

3. ¿Imamantataj Dios yuyashca shina yuyanaca sinchi can?

³ ¿Ñucanchijpish Dios shinachu yuyanchij o cai mundo shina? De seguromi Dios munashca shina causacunchij. Pero, Dios yuyashca shina yuyangapajca achca esfuerzotami rurana canchij. Chaita rurajpipish cai mundopaj espirituca tucui partecunapimi can. Ñucanchijllapi yuyachunmi munan (Efesios 2:2). Chaimantami cai mundo shina yuyanaca jahualla can.

4. a) ¿Cai mundo shina yuyashpaca imatataj rurashun? b) ¿Cai temapica imatataj yachagrinchij?

⁴ Cai mundo shina yuyashpaca ñucanchijllapimi yuyashun. Ima alli o ima mana alli cashcatapish ñucanchijllataj agllanatami munashun (Marcos 7:21, 22). Chaimantami Dios yuyashca shina yuyanaca importante can. Cai temapica imatapish Dios ricushca shina ricushpaca ñucanchijpajllataj alli cashcatami yachashun. Shinallataj cai mundo shina ama yuyangapaj imata rurana cashcatami ricushun. Cutin catij temapica imacunallapi Dios yuyashca shina yuyana cashcatami yachashun.

5. ¿Huaquincunaca imamantataj paicunapaj yuyaita cambiachun mana munancuna?

⁵ Huaquin gentecunaca paicunapaj yuyaicunata cambiachunca mana munancunachu. Paicunaca: “Ñucapaj randi yuyarishpa cuchunca mana munanichu” nincunami. Chashna nishpaca ima decisioncunata paicuna agllana cashcata, chaita rurangapajpish derechota charishcatami ricuchincuna. Chaimantami shujtajcuna imata nichun o shujtaj gentecuna laya yuyana cashcata nichunpish mana munancuna * (urapi tiyaj notata ricui).

6. a) ¿Jehová Diosca imatataj rurachun saquin? b) ¿Ñucanchij munashcallatachu rurashpa causana canchij?

⁶ Jehová Dios shina yuyashpaca ñucanchij propio yuyaita o ñucanchij ima shina cashcata saquinataca mana nicunchu. 2 Corintios 3:17 Traducción del Nuevo Mundo Bibliapica: “Jehová Diospaj espíritu maipi cajpica huatashca shinamanta cacharichinmi” ninmi. Tucuicunami imata yuyangapaj, imata rurangapajpish libres canchij. Jehová Diosmi ñucanchijtaca chashna rurarca. Pero chaica ñucanchij munashcallata rurana cashcataca mana nicunchu (1 Pedro 2:16-ta liyipai). Jehová Diosca paipaj Shimipi ricushpa ima alli cashcata o ima mana alli cashcata agllachunmi nin. Chashna nishpaca ¿ñucanchij munashcata mana rurana cashcatachu nicun o ñucanchijpajllataj alli cashcatachu nicun?

7, 8. ¿Jehová Diospaj yuyaica imamantataj cai mundopaj yuyaicunamanta ashtahuan yalli alli can? Shuj ejemplota churashpa parlai.

⁷ Shuj ejemplota ricushun. Yaya mamacunaca huahuacuna honrados cachun, trabajadores cachun, shujtajcunamantapish preocuparichunmi alli consejocunata cun. ¿Chai consejocunaca huahuacuna mana  libres cashcatachu ricuchin? Mana. Ashtahuanpish huahuacuna alli causachunmi chashna yachachishpa huiñachincuna. Huahuacuna huiñashpa huasimanta rishpaca paicunami ima shina causanata agllangacuna. Pero, yaya mama yachachishcata cazushpaca ima decisioncunata agllashpapish mana llaquiringacunachu. Shinallataj problemacunamanta, preocupacioncunamantapishmi libraringacuna.

⁸ Jehová Diosca alli yaya shinami paipaj huahuacuna cushilla causachun munan (Isaías 48:17, 18). Chaimantami ima shina comportarinata yachangapaj, shujtajcunata ima shina tratanata yachangapajpish Bibliapi alli consejocunata cun. Diosca pai yuyashca shina yuyachun, pai munashca shina causachunpishmi mandan. Cashna shina causanaca mana sinchichu can. Ashtahuanpish imapipish alli yuyashpa alli decisioncunata agllangapajmi can (Salmo 92:5; Proverbios 2:1-5; Isaías 55:9). Ñucanchijllatajmi ima decisioncunatapish agllai tucunchij. Pero Diosca cushilla causachun nishpami alli decisioncunata agllachun ayudan (Salmo 1:2, 3). Chaimantami pai shina yuyanaca ñucanchijpajllataj alli cashcata ricunchij.

9, 10. ¿Imamantataj Diospaj yuyaicunaca cai mundopaj yuyaicunatapish ashtahuan yallimi can ninchij?

⁹ ¿Imamantataj Dios yuyashca shina yuyasha ninchij? Diospaj yuyaica cai mundopaj yuyaita ashtahuan yallimi can. Shinapish cai mundopi caj huaquin gentecunaca ima shina comportarinata, familiahuanpish ima shina apanacunata, trabajopipish ima shina cushilla canata yachachingapajmi consejocunata cuncuna. Shinallataj ñucanchijllapi yuyana, huainayanallapi yuyanaca allimi can nincunami. Divorciarishpa, separarishpapish cushillami causanchij nincunami. Pero chai consejocunaca mana Dios yuyashca shinachu can. Chashna cajpipish mundopaj consejocunaca Bibliapi tiyaj consejocunatapish ashtahuan alli ricurij layami can.

¹⁰ Jesusca: “Alli yuyaita charishcataca ruraicunahuanmi ricuchi tucunchij” nircami (Mateo 11:19, NM). Cai mundoca achca tecnologiatami llujchishca. Pero cushilla causangapaj jatun problemacunataca mana tucuchi pudishcachu. Por ejemplo, guerracuna, shuhuacuna, huañuchijcunapish tiyashpami catin. Huaquincunapish ñucanchij razami ashtahuan yalli can nishpami catincuna. Shinallataj huainayanatapish alli cashcata shinami ricuncuna. Achca gentecunaca cai ruraicunamantami familia ucupica ashtahuan problemacuna, ungüicuna, shujtaj problemacunapish tiyan nincunami. Pero Jehová Diosta sirvijcunaca pai yuyashca shina yuyashcamantaca familiahuanpish cushillami causancuna.  Huainayanapi mana urmashcamantami ungüicunamantapish librarincuna. Tucui ladopi tiyaj huauqui panicunahuanpish allimi apanacuncuna (Isaías 2:4; Hechos 10:34, 35; 1 Corintios 6:9-11). Caica ¿manachu Diospaj yuyaicuna cai mundopaj yuyaicunatapish ashtahuan yalli cashcata ricuchin?

11. ¿Moisesca pi layataj yuyarca, chaimanta paica imatataj rurarca?

¹¹ Ñaupa tiempopi Diosta sirvijcunaca Jehová Diospaj yuyaicuna runacunapaj yuyaicunata yalli alli cashcatami yacharcacuna. Por ejemplo, Moisesmanca Egipto llajtapaj tucui yachanacunatami yachachishca carca. Pero paica alli yachaica Diosmanta shamuj cashcatami yacharca (Hechos 7:22; Salmo 90:12). Chaimantami Diostaca: “Cambaj ñanta ricuchichunmi rogani” nirca (Éxodo 33:13). Moisesca Dios shina yuyashcamantami paipaj munaita pajtachirca. Bibliapipish Moisestaca sinchi crij runa cashcatami nin (Hebreos 11:24-27).

12. ¿Apóstol Pabloca decisioncunata agllangapajca imatataj ruraj carca?

¹² Apóstol Pabloca yachaisapami carca. Paica achca estudiocunatapishmi chasquirca. Ishqui idiomacunatapishmi yacharca (Hechos 5:34; 21:37, 39; 22:2, 3). Pero paica mana mundopaj yachachishca shinachu ruraj carca. Sino Diospaj Shimipi ricushpami ima decisiontapish agllaj carca (Hechos 17:2, 3; 1 Corintios 2:6, 7, 13-ta liyipai). Chaimantami Diospaj Shimimanta alli yachachij carca. Shamuj punllapi huiñai causaita chasquinatapishmi shuyarca (2 Timoteo 4:8).

13. ¿Dios shina yuyanataca pitaj agllana can?

¹³ Ima shinami ricushcanchij Diospaj yuyaicunaca cai mundopaj yuyaicunata yallimi can. Dios mandashcacunata pajtachishpaca cushilla, allimi causashun. Pero Jehová Diosca pai shina yuyachunca mana obliganchu. “Alli cazuj alli yuyaiyuj” sirvij huauquicunapish, ancianocunapish mana obligancunachu (Mateo 24:45, QC, 1989; 2 Corintios 1:24). Cada unomi Dios shina yuyangapaj esforzarina canchij. ¿Chaitaca ima shinataj rurashun?

14, 15. a) Dios shina yuyangapajca ¿imatataj cutin cutin yuyarina canchij? b) Romanos 12:2-pi nishca shinaca ¿imamantataj cai mundopaj yuyaicunata saquina canchij? Shuj ejemplomanta parlai.

¹⁴ Romanos 12:2-pica: “Cai pachapaj cajcuna shina rurashpa ama cushicuichijchu. Ashtahuanpish cancunapaj yuyaita mushujyachirashpa, shujtaj causaita causaichij. Chashna cashpami Diospaj munai ima cashcata, ima mana paipaj munai cashcata, ima shina cashcatataj alli agllai tucunguichij” ninmi. ¿Cai versoca imatataj ñucanchijmanca yachachin? Manaraj Diosta rijsishpaca imatapish shujtaj layami yuyaj carcanchij. Pero Bibliata yachai callarishpaca Dios shinami yuyai callarircanchij. Chashnapish ¿huaquin ruraicunapica imamantataj chashna yuyanchij? Maijan familiamanta shamushcamanta o ima experienciacunata charishcamantami chashna yuyanchij. Pero ñucanchij yuyaicunaca cambiai tucunmi. Imallacunapi ashtahuan yuyashpa catijpimi ñucanchij yuyaicunaca cambianga. Dios nishcacunata cutin cutin yuyarishpaca pai yuyashcacuna alli cashcatami  cuentata cushun. Chaimantami pai shina yuyanata munashun.

¹⁵ Jehová Dios shina yuyangapajca cai mundopaj yuyaicuna ñucanchij umaman yaicuchunca mana saquinachu canchij. Pero ¿ima shinataj chaitaca rurashun? Dios mana munashca uyanacunata, ricunacunatami saquina canchij. Caita alli intindingapajca shuj ejemplota ricushun. Maijan alli saludta charisha nishpaca sano micunata micungapajmi esforzarin. Pero dañado micunata micushpaca paipaj esfuerzocunaca mana imapaj valingachu. Chai shinallatajmi ñucanchijpish Dios shina yuyasha nishpa paimanta yachangapaj esforzarinchij. Pero cai mundopaj yuyaicunata ñucanchij umapi yaicuchun saquishpaca chai esfuerzocunaca mana imapaj valingachu.

16. ¿Imamantataj cuidarina canchij?

¹⁶ Cai mundopaj yuyaicunamantaca mana caruyai tucunchijchu. ¿Imamanta? Cai mundollapitaj causacushcamanta (1 Corintios 5:9, 10). Por ejemplo, huillacushpaca gentecunapaj panda yuyaicunatami uyanchij. Chashna panda yuyaicunamanta mana caruyai tucushpapish chaipica mana yuyashpa catinachu canchij. Diabloca panda yuyaicunapi yuyashpa catichunmi munan. Pero ñucanchijca Jesús shinami Diablopaj yuyaicunata chai rato anchuchina canchij. Shinallataj cai mundopi tiyaj ricunacunamanta, uyanacunamantami cuidarina canchij (Proverbios 4:23-ta liyipai).

17. ¿Cai mundopaj yuyaicunamanta anchuringapajca imatataj rurana canchij?

¹⁷ Amigocunatapish alli ricushpami agllana canchij. Bibliapica Diosta mana adorajcunahuan amigos tucushpaca paicuna shinami yuyai callarishun ninmi (Proverbios 13:20; 1 Corintios 15:12, 32, 33, QC, 1989). Diversioncunatapish alli ricushpami agllana canchij. Huaquin peliculacunapi, librocunapica evolucionmanta, macanacunamanta, huainayanamantami ricuchin  o parlan. Caicunamanta anchurishpaca Dios mana ricunayachishca yuyaicuna ñucanchij umaman yaicuchunca mana saquishunchu (2 Corintios 10:5).

18, 19. a) ¿Imamantataj cai mundopaj huaquin yuyaicunamanta cuidarina canchij? b) ¿Imatataj tapurina canchij, imamanta?

¹⁸ Huaquinpica cai mundoca ñucanchij mana yuyashcapimi pandachisha nin. Por ejemplo, maijan noticiacunapica politicata apoyachun nishpami imatapish nincuna. Shujtajcunaca shuj persona paipaj causaipi ima carrerata pajtachishcatami parlancuna. Cutin peliculacunapi o librocunapica familiapaj causai o ñucanchijpaj causaimi ashtahuan importante can nishpami yachachincuna. Pero cai yuyaicunaca mana Dios yachachishca shinachu can. Bibliapica tucuimanta yalli Diosta cꞌuyashpami ñucanchijpish, familiacunapish cushilla causashun ninmi (Mateo 22:36-39). Shinallataj huaquin librocunata o peliculacunataca huahuacunapajmi rurashca can. Pero chai librocunapi o peliculacunapica huainayana yuyaicunatami churancuna. Chaimantami huahuacunaca mana cuentata cushpa huainayana alli cashcata shina ricuncuna.

¹⁹ Chaihuanca sano diversioncunapi participana mana alli cashcataca mana nicunchu. Chashna jahuapish ¿huaquin ruraicuna cai mundopaj yuyaicunata charishcataca jahuallachu cuentata cuni? ¿Ñuca huahuacuna, ñucapish imata ricunamanta o imata liyinamanta cuidaricunchijchu? ¿Ñuca huahuacuna cai mundo shina ama yuyachunca Jehovapaj yuyaicunatachu yachachicuni? nishpami tapurina cangui. Jehová Diospaj yuyai, cai mundopaj yuyai maijan cashcatami alli intindina canchij. Chashnami Diospaj yuyaita charishun.

20. ¿Jehová Dios shina yuyangapajca imatataj rurana canchij?

²⁰ Ishqui yuyaimi tiyan. ¿Maijancunataj can? Shujca Diospaj yuyaimi can. Caishujca Diablopaj yuyaimi can. ¿Pi layataj yuyasha ninchij? Pitami yalli uyanchij chashna shinami yuyai callarishun. Cai mundopaj yuyaicunata chasquishpaca gentecuna shinami ñucanchijllapi yuyashpa imatapish rurashun. Chaimantami imata ricunata, imata liyinata, imata uyanata, imata yuyanatapish alli agllana canchij.

21. ¿Catij temapica imatataj yachashun?

²¹ Cai temapica Dios shina yuyangapajca cai mundopaj yuyaicunata saquina cashcatami yachashcanchij. Shinallataj Dios nishcacunata cutin cutin yuyarina cashcatami yachashcanchij. Catij temapica chaita ima shina pajtachina cashcatami yachashun.