1-3. a) ¿‘Mana llullaj shimitaca’ ima shinataj ricuna canchij? Shuj ejemplohuan parlai (Jahuapi tiyaj fotocunata ricui). b) ¿Cai yachaipica ima tapuicunatataj contestashun?

CUNAN punllacunapica gentecunaca negociocunapi imata randishpapish qꞌuipamanca tigrachinatami yachancuna. Ashtahuantajca Internetpi randijcunami chaita rurancuna. Pero ¿imamantataj tigrachinata yachancuna? Chai cosascuna mana paicuna munashca shina cajpi o ima dañado cajpimi tigrachincuna. Chaimantami caishuj cosascunahuan cambiachun o cullquita tigrachichun mañancuna.

² Pero Bibliamanta ‘mana llullaj shimita’ o Dios yachachishcacunata chasquishcahuanpish mana nunca chaita rurasha ninchijchu. Mana llullaj shimita ña randishpa o yachashpaca mana tigra cꞌatuna o saquinachu canchij (Proverbios 23:23-ta liyipai; 1 Timoteo 2:4). Pasaj semana yachashca shinaca mana llullaj shimita charingapajca achca tiempotami minishtishcanchij. Huaquincunaca alli profesionta, achca cullquita gananata, familiahuan o amigocunahuan ña mana tanto tandanacunatami saquishcanchij. Cutin shujtajcunaca ñucanchij ruraicunata yuyaicunatami cambiana cashcanchij. Mana alli costumbrecunatapishmi saquina cashcanchij. Pero mana llullaj  shimita charingapaj tucuita saquishpapish achca bendicioncunatami chasquishcanchij.

³ Dios churashca Mandanamanta yachana achca valishca cashcata intindichingapajmi Jesusca alli perlata mashcashpa purij runamanta parlarca. Chai runaca tucuimanta yalli alli perlata tarishpaca, “paipaj tucui charishcacunata cꞌatushpami” chai perlata randirca (Mateo 13:45, 46). Dios churashca Mandanamanta alli yachanapish, Bibliamanta shujtaj yachaicunapish chai alli perla shinallatajmi achca valishca can. Chaimantami chaicunata charingapaj imata saquina cashpapish enseguida saquircanchij. Caicunata valorashpa catishpaca nunca mana tigra cꞌatushunchu. Pero huaquin huauqui panicunaca mana llullaj shimita valorashpa catinatami saquishcacuna o cꞌatushcacuna. Pero chaitaca amataj rurashunchijchu. Ashtahuanpish Bibliapi nishca shinaca “mana llullapi” purishpa catishunchij (3 Juan 2-4-ta liyipai). Chaipajca Yaya Diostami punta lugarpi churana canchij. Shinallataj Bibliapi yachashca shinami comportarina canchij. Cai yachaipica cai tapuicunatami contestashun: ¿Imamantataj huaquincunaca mana llullaj shimita cꞌatushcacuna, ima shinataj chaitaca rurashcacuna? ¿Ama chashna pandaringapajca imatataj rurana canchij? ¿Mana llullapi purishpa catingapajca imataj ñucanchijta animanga?

4. ¿Jesuspaj punllacunapica imamantataj Diosmanta yachanata saquircacuna?

⁴ Jesuspaj punllacunapica huaquincunaca pai yachachishcacunatami chasquircacuna. Pero qꞌuipataca ña mana uyasha nircacunachu. Por ejemplo, shuj punllaca achca gentecunami Jesusta catircacuna. Chai gentecunamanmi Jesusca shuj milagrota rurashpa cararca. Qꞌuipaca paicunaca Galilea cucha chꞌimba ladomanmi Jesushuan cruzarcacuna. Chaipimi Jesusca: “Runa Aichayujpaj aichata mana micushpa, paipaj yahuarta mana ubyashpaca, cancunaca huiñai causaitaca mana charinguichijchu” nirca. Chaita uyashpami gentecunaca mancharircacuna. Paicunaca chai shimicuna ima nisha nishcata intindichihuai nishpa mañanapaj randica: “Cai yachachishcaca sinchimari. ¿Pitaj uyasha ningari?” nircacunami. “Chai punllamantami paipaj yachacujcunaca achcacuna huashaman tigrashpa, ña mana paihuan purircacuna” (Juan 6:53-66).

5, 6. a) ¿Huaquincunaca imamantataj Diosmanta caruyashcacuna? b) ¿Maijancunaca ima shinataj Diosmanta caruyashcacuna?

⁵ Cunan punllacunapi huaquincunaca mana llullaj shimita cꞌatushpami Diosmanta caruyashcacuna. ¿Imamanta? Bibliamanta shuj yuyaita achijyachijpi o shuj rijsishca huauqui imata nijpimi paicunaca ñitcarishcacuna. Shujtajcunaca Bibliamanta shuj consejota chasquishcamanta o shuj huauquihuan mana alli apanacushcamantami resintirishcacuna. Cutin maijancunaca apostatacunapaj parte o ñucanchij crishcacunata jarcaj partemi tucushcacuna. Ima shina cashpapish tucui paicunami Jehová Diosmanta, congregacionmantapish ‘anchurishcacuna’ (Hebreos 3:12-14). Paicunaca apóstol Pedro shina Jesuspi tucui shunguhuan confiashca cashpaca allitami ruranman carcacuna. Jesusca apostolcunataca ¿cancunapish ñucata saquishpa risha ninguichijchu? nircami. Chaimi Pedroca: “Mandaj Jesús ¿pipajmantaj rishunri? Canmari huiñai causaita cuj shimicunataca charingui” nirca (Juan 6:67-69).

 ⁶ Huaquincunapish asha ashami mana cuentata cushpa Diosmanta caruyashcacuna. Bibliapica chai gentecunataca shuj barco yacu manyamanta asha asha caruyashpa chingarij shinami can ninmi (Hebreos 2:1). Paicunaca Diosmanta mana caruyasha nishpapish asha ashami paihuan alli canata saquishcacuna. Ñucanchijcunapish paicuna shina Diosmanta ama caruyangapajca ¿imatataj rurana canchij?

7. ¿Dios yachachishcacunata amataj cꞌatungapajca imatataj rurana canchij?

⁷ Mana llullapi puringapajca Dios yachachishcacunatami tucuipi cazuna canchij. Paitami punta lugarpi churashpa causana canchij. Shuj cutinca rey Davidca Jehová Diosmanca: “Quiquinpaj mana llullapimi purisha” nircami (Salmo 86:11). Mana llullaj shimipi puringapajca David shinami decididos cana canchij. Mana chaita rurashpaca Diospaj Shimita yachangapaj imata saquishcapimi yuyai tucushun. Ashtahuancarin imallata saquishcata tigra charinatami munai callarishun. Ñucanchijca Dios yachachishcacunamanta caitaca cazushami pero caishujtaca mana cazushachu nishpaca mana agllai tucunchijchu. ¿Imamanta? ‘Tucui imatapish cashcata rurashpami’ causana canchij (Juan 16:13, QC, 1989). Punta yachaipica Diospaj Shimita yachangapaj, chaipi ima nishcata pajtachingapaj pichca cosascunata saquina cashcatami yacharcanchij. Chai cosascunaman ama tigraringapajca imata rurana cashcatami ricushun (Mateo 6:19).

8. ¿Dios yachachishcacunataca ima shinataj mana cuentata cushpa saqui tucunchij? Shuj ejemplomanta parlai.

⁸ Tiempo. Dios yachachishcacunata ama saquingapajca ñucanchij tiempotami alli utilizana canchij. Mana cuidarishpaca diversioncunapi, Internetpi, televisionpimi yallitaj dedicari tucunchij. Caita rurana mana malo cajpipish Bibliata estudiangapaj, Diospajta rurangapajmi tiempota quichui tucun. Emma shuti pani ima tucushcata ricushun * (urapi tiyaj notata ricui). Huambra cashpaca caballopi montanatami achcata munaj carca. Cada tiempo tiyashca horaspimi chaita ruraj carca. Pero chaipi yallitaj tiempota dedicaricushcamantami huaquin cambiocunata paipaj causaipi rurarca. Shinallataj pani Cory Wellspaj historiata ricushpami cambiocunata rurangapaj animarirca. Pani Cory Wellsca caballocunapi ima shina montashpa, pugllaicunata rurashpami trabajaj carca * (urapi tiyaj notata ricui). Cunan punllacunaca Emmaca Diospajta ruranapimi ocuparin. Paica Diosta sirvij familiahuanpish amigocunahuanpish ashtahuan pasangapajmi tiempota surcun. Chashnallataj Jehová Diosman ashtahuan cꞌuchuyashpami shungu ucupipish tranquilo sintirin. Tucui  tiempopi Diosta sirvicushcamantami chashna cushilla sintirin.

9. ¿Imamantataj charishca cosascuna ñucanchij causaipi importante cashcata yuyai tucunchij?

⁹ Charishca cosascuna. Mana llullaj shimipi puringapajca charishca cosascuna ashtahuan importante cachunca mana saquinachu canchij. Bibliamanta yachai callarishpaca charishca cosascunatapish yalli Diosta sirvina ashtahuan importante cashcatami intindircanchij. Chaimantami Diosta sirvingapajca tucui imatapish cushilla saquircanchij. Pero huatacuna pasajpica huaquinpica shujtajcuna mushuj aparatocunata randishcata o cunanlla llujshishca cosascunahuan cushilla causajtachari ricunchij. Chaimi ñucanchijpish chai cosascunatami minishtinchij nishpa yuyai callarinchij. Chashna yuyashpaca Diospajta ruranata ladoman saquishpami charina cosascunallapi dedicarishun. Demas runa ima tucushcapimi yuyai tucunchij. Paica “cai pachapi tiyajcunata” munashcamantami apóstol Pablohuan sirvinata saquirca (2 Timoteo 4:10). Bibliapica Demas runa Diostapish yalli charishca cosascunata cꞌuyashcata o apóstol Pablohuan sirvingapaj ña mana sacrificiocunata rurasha nishcataca mana huillanchu. ¿Caimantaca imatataj yachanchij? Ñaupa charishca cosascunapica mana cutin tigra yuyanachu canchij. Chaipi yalli yuyashpaca Diosta sirvinatami saqui tucunchij.

10. ¿Huaquin familia o amigocuna Diosta sirvichun jarcajpica imatataj rurana canchij?

¹⁰ Familiacunahuan amigocunahuan tandanacuna. Mana llullaj shimipi catingapajca shujtaj gentecuna jarcachunca mana saquinachu canchij. Diospaj Shimita yachai callarijpica mana Testigo familiacunahuan, amigocunahuanca mana tantochari tandanacurcanchij. Huaquincunaca ñucanchij crishcacunataca respetarcacunami, pero shujtajcunaca Diosta ama sirvichunmi jarcarcacuna (1 Pedro 4:4). Ñucanchijca familiacunahuan alli apanacungapaj, alli tratangapajmi esforzarinchij. Pero paicunata cushichina raiculla Dios mandashcacunata huashaman saquinamantami cuidarina canchij. Corintios libropi yachashca shinaca Diosta cꞌuyajcunallahuanmi amigos cana canchij (1 Corintios 15:33, QC, 1989).

11. ¿Mana alli yuyaicunamanta mana alli ruraicunamanta jarcaringapajca imatataj rurana canchij?

¹¹ Mana alli yuyaicuna, mana alli ruraicuna. Dios yachachishcacunata pajtachijcunaca tucuipimi chuya cana canchij (Isaías 35:8; 1 Pedro 1:14-16-ta liyipai). Bibliamanta yachai callarishpaca tucuicunami ñucanchij causaipi cambiocunata rurarcanchij. Huaquincunaca tucuipimi cambiana carcacuna. Ñucanchij limpio causaita cai mundopaj mapa ruraicunahuan ama cambiangapajmi cuidarina canchij. Tentacioncunapi ama urmangapajca ¿imatataj rurana canchij? Yayitu Diosca paipaj Churita cushpami ñucanchij causaitaca chuyayachirca. Dios chaita rurashcataca mana cungarinachu canchij (1 Pedro 1:18, 19). Jesús paipaj causaita cushcata ñucanchij shungupi yuyaihuan cashpaca Diospaj ñaupajpimi chuya ricurishun.

12, 13. a) ¿Imamantataj huaquin fiestacunataca Jehová ricushca shina ricuna canchij? b) ¿Catij parrafocunapica imatataj yachagrinchij?

¹² Mana alli costumbrecuna. Trabajopi, escuelapi compañerocuna o ñucanchij familiacunachari huaquin fiestacunaman invitangacuna. Dios mana munashca fiestacunapi o costumbrecunapi ama participangapajca ¿imatataj rurana canchij? Dios  imamanta chai fiestacunata mana munashcatami alli intindina canchij. Shinallataj ñucanchij publicacioncunapimi chai fiestacuna o costumbrecuna ima shina tiyai callarishcata repasana canchij. Imamanta chai fiestacunapi mana participana cashcata yuyarishpaca Dios munashca shina causacushcatami seguros cashun (Efesios 5:10, NM). Jehová Diospi, paipaj Shimipi confiashpaca shujtajcuna imata ninamantaca mana manchashunchu (Proverbios 29:25).

¹³ Mana llullapi huiñai huiñaicamami purisha ninchij. Mana llullapi ashtahuan sinchiyashpa catingapajca ¿imatataj rurana canchij? Caita alli intindingapajca quimsa yuyaicunata ricushun.

14. a) ¿Mana llullaj shimita ama nunca saquingapajca imamantataj Bibliata yachashpa catina canchij? b) ¿Alli yachaita, alli yuyaita, disciplinata charinaca imamantataj importante can?

¹⁴ Punta yuyai, Diospaj Shimitaca punllanta yachangapajmi tiempota llujchina canchij. Yachashcatapish yuyarinami canchij. Ashtahuan yachashpaca Dios mandashcacunataca ashtahuanmi cꞌuyashun. Shinami Diosta mana nunca saquinata munashun. Pero yachashcacunallahuanca mana saquirinachu canchij. Proverbios 23:23-pica mana llullaj shimita randishpa ama tigra cꞌatungui ninmi. Chai jahuapish ‘alli yachaita, alli yuyaita, disciplinatapish’ randinami cangui ninmi. Alli yachaita randinaca imata yachashcata practicapi churana nisha ninmi. Cutin alli yuyaita charishpaca cunanlla yachashcahuan ña yachashcahuan tandachishpami ashtahuan alli intindishun. Shinallataj Dios yachachishcacunaca huaquinpica ñucanchij causaipi cambiocunata rurachunmi disciplinan. Bibliapi disciplinamanta parlashpaca cullquitapish yalli valishcami can ninmi. Chaimantami ñucanchijta disciplinajpica utca cazuna canchij (Proverbios 8:10).

15. ¿Dios yachachishcacunaca ima shinataj shuj cinturón shina cuidan?

¹⁵ Ishqui yuyai, tucui punllacuna Dios yachachishcacunata cazuna munaita charishunchij. Bibliapica Dios yachachishcacunata o mana llullaj shimitaca shuj soldadopaj cinturonhuanmi chꞌimbapuran (Efesios 6:14). Ñaupa punllacunapica shuj soldadoca cinturonta alli churarishpami macanacuipica huijsa mana ima tucuj carca. Pero cinturonta mana alli huatarishpaca mana macanacui pudinmanchu carca. Dios yachachishcacunaca ¿ima shinataj shuj cinturón shina cuidan? Dios yachachishcacunata punllanta yuyaipi charishpaca panda yachachishcacunamantami cuidarishun. Alli decisioncunatapishmi agllashun. Shinallataj problemacuna o tentacioncuna ricurijpica allita ruranatami munashun. Shuj soldadoca macanacunaman ringapaj cinturón illaj rinataca mana nunca yuyajchu carca.  Chai shinallatajmi Dios yachachishcacunataca mana nunca ladoman saquina canchij. Ashtahuanpish punllantami pai mandashca shina causana canchij. Cutin huaquinpicarin cinturonca espadata apangapajpishmi valij carca. Ñucanchijpish chashna shinallataj imata rurana cashcata ricushun.

16. Dios yachachishcacunata shujtajcunaman huillashpaca ¿imatataj ashtahuan ruranata munashun?

¹⁶ Quimsa yuyai, Dios yachachishcacunata shujtajcunaman huillangapaj achcata esforzarishunchij. Ima shinami shuj soldadoca espadata charirana carca. Shinallatajmi ñucanchijpish Diospaj Shimitaca charirana canchij (Efesios 6:17). Tucuicunami alli yachachijcuna cangapaj, ‘mana llulla shimitapish ima shina cashcata alli yachachingapaj’ esforzari tucunchij (2 Timoteo 2:15). Shujtajcunata Bibliahuan yachachishpaca ñucanchij shungupi, yuyaipimi imata yachachishcata huaquichishun. Shinami mana llullapi purishpa catinata munashun.

17. ¿Canca imamantataj Diospaj yachachishcacunataca valorangui?

¹⁷ Yaya Diosca paipaj mana llullaj shimitaca shuj sumaj regalota shinami cushca. Chai mana llullaj shimica Diospaj ñaupajpi alli ricurichunmi ayudan. Tucui pai yachachishcacunaca callarillami can. Diosca huiñai huiñaicamami paimanta yachachishpa catinata munan. Chaimantami Dios yachachishcacunataca shuj perlata shina valorana canchij. Mana llullaj shimita randishpa ama nunca tigra cꞌatushunchijchu. Shinami David laya “quiquinpaj mana llullapimi purisha” nishcata ñucanchijpish pajtachishun (Salmo 86:11).