ACHCA huauqui panicunami huaquin huatacuna huashamanca ashitohuan cullquita ganasha nishpa shujtaj llajtaman rishcacuna. Pero, cunanca paicuna huacharishca llajtamanmi tigrashcacuna. Jehová Diostapish, gentecunatapish cꞌuyashcamantami ashtahuan huillajcuna minishtirishca lugarcunapi predicangapaj tigrashcacuna (Mateo 22:37-39). ¿Paicunaca imalla esfuerzocunatataj rurashcacuna? ¿Jehová Diosca paicunataca ima shinataj bendiciashca? África ladopi saquirij Camerún llajtamanta parlashun.

Onésime shuti huauquica 1998 huatapimi Camerunmanta shujtaj llajtaman rishpa chaipi 14 huatacunata causarca. Shuj punlla tandanacuna huasipica shuj huauquimi predicanamanta cai chꞌimbapuraita churarca. Chai huauquica: “Ishqui amigocunami yacupi pescadota japicuncuna. Chaimi shuj amigoca, caishuj amigo ashtahuan pescadocunata japicujta ricun. Chai amigoca, ¿nachu pescadocunata ashtahuan japicuj amigopaj ladoman rinman?” nircami.

Cai chꞌimbapuraita uyashpami Onésime huauquica Camerún llajtaman tigranata yuyarca. Chaipica achca gentecuna Bibliamanta yachasha nishcamantami publicadorcunaca achca ayudata minishtircacuna. Pero Onesimeca shujtaj llajtapi achca huatacunata causacushcamanta paipaj llajtaman cutin tigrashpa mana amañarinatami mancharca. Shinapish sujta quillacunata Camerunta visitagrinatami decidirca, y 2012 huatapica chaipi causanamanmi ña tigrarca.

Huauqui Onesimeca: “Calorpi causanata, chai llajtapi causajcuna shina cutin causanata, tandanacuna huasipipish sinchi asientocunapi tiyarinatami amañarina carcani. Pero chaipi yachachishcacunata atento uyashpaca alaja asientocunapi tiyarij cashcataca ña mana yuyarijchu carcani” ninmi.

Onesimeca 2013 huatapimi Géraldine shuti panihuan cazararca. Geraldineca 9 huatacunata Franciapi causashca qꞌuipami Camerún llajtaman tigrarca. ¿Paicuna Diosta sirvinata puntapi churashcamantaca ima bendicioncunatataj chasquirca? Onesimeca: “Ishquindijmi Escuela para Evangelizadores del Reinoman rircanchij, Betelpipishmi sirvircanchij. Pasaj huata ñucanchij congregacionpica 20 Bibliamanta yachacujcunami bautizarirca. Cai lugarpimi gentecunataca Jesuspaj discipulocuna tucuchun ayudai tucunchij” ninmi (Marcos 1:17, 18). Geraldineca: “Cashna bendicioncunata chasquinataca nunca mana yuyashcanichu” ninmi.

Judithca Estados Unidospi causanamanmi rishca carca. Shinapish ashtahuan predicanatami munarca. Paica: “Camerún llajtapi ñuca familiata visitanaman rishpaca achcacunamanmi Bibliamanta yachachi callarircani. Pero paicunata  saquina tucushcamantami huacaihuan tigraj carcani” ninmi. Judithca Estados Unidospi alli trabajota charishcamanta, paipaj yayatapish Camerún llajtapi jambirichun cullquihuan ayudacushcamantami paipaj llajtaman tigranataca ashata mancharca. Pero, Jehová Diospi confiashpami Camerunman tigrarca. Paica Estados Unidospi alajata causanata ashata extrañashpapish paipaj llajtapi cutin amañaringapajmi Diosta ayudachun mañarca. Paitaca shuj superintendente de circuito huauqui, paipaj huarmipishmi animashpa ayudarcacuna.

Judithca: “Quimsa huatacunapica chuscu gentecunatami Diosman mingarishpa bautizarichun ayudarcani” ninmi. Shinallataj paitaca precursora especial cachunmi nombrarcacuna. Paipaj cusaca Sam-Castel shutimi can. Cunanca paica paipaj cusa superintendente de circuitohuanmi sirvicun. ¿Judithpaj yayaca imanacuntaj? Judithpish, paipaj familiapish shujtaj llajtapi saquirij hospitalpimi jambichircacuna. Chai hospitalmantami paipaj yayapaj operacionmanta gastocunahuan ayudarca. Tucuimi alli llujshirca.

Huauqui Victorca Canadapi causanamanmi rishca carca. La Atalaya revistapi universidadpi estudianamanta shuj yachaita liyishca qꞌuipami universidadta saquinata decidirca. Chai qꞌuipaca shuj oficiota yachangapajmi shuj cursota catirca. Paica: “Chai cursota catishcamantami shuj trabajota rato japircani. Chashnami precursor shina sirvi tucurcani” ninmi. Qꞌuipaca Caroline shuti panihuan cazarashpami Camerún llajtaman rircacuna. Chai llajtapi cashpami sucursalta visitarcacuna. Sucursalpi sirvij huauquicunaca Camerún llajtapi sirvichunmi animarcacuna. Victorca: “Chai invitacionta chasquichunca mana ima jarcarcachu. Minishtirishcallahuan causacushcamantami ari nircanchij” ninmi. Caroline asha ungushca cajpipish chai llajtapi sirvinatami decidircacuna.

Bibliamanta yachanata munaj gentecunata ayudangapajmi Victor y Carolineca precursor regular tucurcacuna. Asha tiempotaca ahorrashca cullquihuanmi mantinirishpa causarcacuna. Pero qꞌuipaca Canadapi huaquin quillacunata trabajangapajmi tigrarcacuna. Chaipi trabajashca qꞌuipami Camerún llajtapi precursor regular shina sirvishpa catingapaj tigrarcacuna. ¿Jehová Diosca ima shinataj paicunata bendiciarca? Paicunaca Escuela para Evangelizadores del Reinomanmi rircacuna. Qꞌuipaca precursores especiales shinami sirvircacuna. Cunanca tandanacuna huasicunata shayachishpami sirvincuna. Victorca: “Canadapi alli causanata saquishpami Jehová Diospi confianata yacharcanchij. Paimi ñucanchijtaca cuidashca” ninmi.

Alain shuti huauquica 2002 huatapimi Alemaniapi saquirij shuj universidadpi estudiacurca. Shuj punllaca paica “Joven, ¿que harás con tu vida?” nishca tratadotami liyirca. Chaimantami paipaj causaihuan imata ruranata yuyarirca. 2006 huatapica Escuela de Entrenamiento Ministerial nishcamanmi rirca. Chai qꞌuipaca pai huacharishca Camerún llajtamanmi cacharcacuna.

Alainca Camerún llajtapica medio tiempotami trabajai callarirca. Qꞌuipaca shujtaj trabajotami japirca. Chaipica ashtahuan cullquitami pagarca. Pero, Diosmanta ña mana tanto huillai tucushachu nishpami sustarirca. Chaimi precursor especial cachun invitajpica chai rato chasquirca. Paipaj jefeca trabajota ama saquichunmi ashtahuan sueldota pagasha nirca. Pero Alainca ‘mana’ nircami. Asha tiempo qꞌuipaca Stéphanie shuti panihuanmi cazararca. Stephanieca achca huatacunatami Franciapi causashca carca. Pero,  ¿Camerún llajtaman tigrashpaca ima jarcaicunahuantaj chꞌimbapurarca?

Stephanieca: “Saludpi asha ungüicunata, alergiacunatami chari callarircani. Pero alli tratamientocunata catishpami ña alli sintirircani” ninmi. Jehová Diosmi cai cusa huarmipaj esfuerzocunata bendiciashca. Alainca: “Caruman saquirij Katé pueblopi predicanaman rijpimi achca gentecunaca Bibliamanta yachasha nirca. Paicunamanca telefonopi cayashpami yachachi callarircanchij. Ishquimi bautizarircacuna. Qꞌuipaca shuj grupomi tiyai callarirca” ninmi. Stephanieca: “Gentecuna Jehová Diosta rijsichun, paiman mingarichun achca cutin ayudashpami cushilla sintirircanchij” ninmi. Alaintaca superintendente de circuito cachunmi nombrarcacuna. Cunanca paipaj huarmihuanmi congregacioncunata visitashpa sirvicuncuna.

Gisèle shuti panica Italiapi medicinata estudiacushpami bautizarirca. Paiman Bibliamanta yachachij cusa huarmi minishtirishcallahuan causajta ricushpami, paipish ashtahuan predicanata munarca. Chaimi universidadpi estudiacushpapish precursorado regularta japirca.

Giseleca Camerún llajtaman tigrashpa Diosta ashtahuan sirvinatami munarca. Pero asha manchaihuanmi carca. Paica: “Italia llajtapi causana permisota, amigocunata, familiacunatami saquina carcani” ninmi. Shinapish mayo de 2016 huatapimi Camerún llajtaman tigrarca. Qꞌuipaca Léonce shuti huauquihuanmi cazararca. Chai llajtamanta sucursalca ashtahuan predicana minishtirishca Ayos nishca ciudadpi huillanaman richunmi animarca.

¿Ayos ciudadpica causaica ima shinataj carca? Giseleca: “Tauca cutinmi achca semanacunata luz illaj saquirircanchij. Telefonocunaca luz mana tiyashcamantami huañushca pasaj carca. Yantahuan yanunatami yachana carcani. Yacuta apanamanca carretillata, linternacunata apashpami tuta lado pugyuman rij carcanchij. Tuta ladomi mana tanto gentecuna tiyaj carca” ninmi. Giseleca: “Jehová Dios paipaj espíritu santohuan ayudajpi, ñucanchijpish caishuj chaishuj ayudanacushpami ñaupajman cati tucurcanchij. Familiacunapish amigocunapish achcatami animarcacuna. Cullquihuanpishmi ayudarcacuna” ninmi.

¿Giseleca paipaj llajtaman tigrashpaca ima shinataj sintirirca? Paica: “Cushillami sintirircani. Pero, callaripica huaquin problemacunahuan, desanimohuanmi chꞌimbapurarcanchij. Shinapish allita ruranata decidishcatami cuentata curcanchij. Jehovapimi confianchij, paipaj cꞌuchullapimi sintirinchij” ninmi. Leoncepish paipaj huarmi Giselepish Escuela para Evangelizadores del Reinomanmi rircacuna. Cunanca precursores especiales temporales cachunmi nombrarcacuna.

Pescadota japijcunaca ima jarcaicuna tiyajpipish pescadocunata japingacamami tucui esfuerzota rurancuna. Chai shinallatajmi huauqui panicunaca paicunapaj llajtaman tigrashpaca Diosmanta shungumanta yachasha nijcunata ayudangapaj esforzarincuna. Jehová Diosca cai huauqui panicuna tucui pudishcata rurashcataca manataj cungaringachu. Paipaj shutipi cꞌuyaihuan trabajashcamantaca achcatami bendicianga (Nehemías 5:19; Hebreos 6:10). Canpish shujtaj llajtapichari causangui. Pero ¿can huacharishca llajtapi ashtahuan Diosmanta huillajcuna minishtirishcata yachashpaca tigrai tucunguichu? Can chaita rurajpica Jehová Diosca achcatami bendicianga (Proverbios 10:22).