1. ¿Shamuj punllacunapi ima tucunata yachashpaca imatataj tapurishcanchij?

ÑALLAMI panda religionca tucuchishca canga. Shinallataj Magog llajtata mandaj Gogpish Diospaj pueblotami llaquichisha ningacuna. Armagedón macanacuipishmi tiyanga. ¿Caicunata yachashpaca Diosta sirvinataca ahuantashachu? nishpa tapurishcanchijchu. Manchaita charishpaca cai yachaipi Jesús ima nishca versopimi yuyarina canchij. Jesusca paipaj discipulocunamanca: ‘Cancunapaj shungupica ama yallitaj sustarichijchu. Ashtahuanpish Diospi feta churashcata ricuchichij’ nircami (Juan 14:1, NWT ). Ñucanchij fe sinchi cajpica shamuj punllacunapi llaquicuna ricurijpipish ahuantashunmi.

2. a) ¿Ima shinataj ñucanchij feta sinchiyachina canchij? b) ¿Cai yachaipica imatataj yachashun?

² Shamuj punllacunapi sinchi pruebacunata ahuantangapajca cunan punllacunapi tiyaj pruebacunata ahuantashpami fetaca sinchiyachina canchij. Chashnami ñucanchij feta imapi ashtahuan sinchiyachina cashcata yachashun. Ima pruebacunata chꞌimbapurashpa, chaita ahuantashpaca qꞌuipa punllacunapi sinchi pruebacuna ricurijpipish ahuantai tucushunmi. Jesuspaj discipulocunaca ashtahuan feta charinatami minishtircacuna. Cai yachaipimi chaimanta chuscu yuyaicunata yachashun. Shinallataj cunan punllacunapi llaquicunata ahuantashpaca, shamuj punllacunapi llaquicuna tiyajpipish chaita ima shina ahuantai tucushcatami ricushun.

3. Mateo 6:30 y 33-pi nishca shinaca ¿Jesusca femantaca imatataj ashtahuan intindichirca?

³ Cusacunaca paicunapaj familiacuna micunata, ropata, maipi saquirinata charichunmi munan. Pero maipica cai tiempocunapi causacushcamantami mana fácil can. Huaquin huauquicunaca  trabajotami mana charincuna. Cutin shujtajcunaca mashcashpapish mana japincunachu. Maijancunacarin Yayitu Dios mana munashca trabajotaca saquishcacunami. Pero paicunaca cashna sinchi pruebacunata charishpaca Jehová Dios paicunata manataj saquinata, siempre cuidanatami tucui shunguhuan crina can. Jesusca paipaj discipulocunataca Sermón del Montepimi Jehová Diospi confiachun yachachirca (Mateo 6:30, 33-ta liyipai). Ñucanchijta Dios cuidanata yachashpaca paipaj Gobiernotami punta lugarpi churana canchij. Minishtirishca cosascunahuan ayudajpica Diospajmanmi ashtahuan cꞌuchuyashun, ñucanchij fepish ashtahuanmi sinchiyanga.

4, 5. ¿Shuj familiaca minishtirishca cosascunapi ama yallitaj preocuparingapajca imatataj rurarcacuna?

⁴ Venezuela llajtamanta familia Castromanta yachashun. Paicunataca Jehová Diosmi minishtirishca cosascunata charichun, ima sinchi pruebacunatapish chꞌimbapurachun ayudashca. Cai familiaca paicunapaj propio allpatami charircacuna. Chaipimi trabajashpa, mantiniringapajca suficiente micunitata charijcuna carca. Pero shuj punllaca shuhuajcunaca familia Castropaj allpata japishpami paicunataca chai allpamanta llujchishpa cacharcacuna. Huauqui Miguelca: “Cunanca shuj mañachishca ashalla allpitapimi tarpunchij. Pero cada punllami Yayitu Diostaca chai punllapaj minishtirishca cosascunata charingapaj mañani” ninmi. Familia Castropaj causaica sinchimi can. Pero paicunaca Jehová Dios minishtirishca cosascunata cunapimi confiashcacuna. Chaimantami tandanacuicunaman rinata, huillanaman llujshinataca manataj saquishcacuna. Ashtahuancarin Diospaj Gobiernotami punta lugarpi churashcacuna. Chaimantami Jehová paicunata cuidanataca manataj saquishca.

⁵ Huauqui Miguel, paipaj huarmi Yurai, paipaj ushushi Yoselin Jehová Dios paicunata ima shina cuidashcatami ricushcacuna. Huaquinpica Diosca paicunata ayudangapajca huaquin huauqui panicunahuanmi minishtirishca cosascunata cushpa ayudashca. Shinallataj huauqui Miguel trabajota charichunpish mashcashpami ayudashcacuna. Maipicarin sucursalmanta huauquicunami minishtirishca cosascunahuan ayudashca. Yayitu Diosca chashnami paicunataca manataj saquishca. Dios ima shina paicunata ayudajta yachashpaca paicunapaj feca ashtahuanmi sinchiyashca. Pani Yoselinca: “Jehová Diosca ñucanchijtaca manataj saquishcachu. Chaimantami paitaca shuj amigota shina ricuni. Shinallataj cunan punllacunapi ñuca familiahuan charishca problemacunaca shamuj punllacunapi sinchi llaquicunata ahuantangapajmi ayudan” ninmi.

6. ¿Mantiniringapaj cullquita mana charishpaca ima shinataj cambaj feta sinchiyachina cangui?

⁶ Minishtirishca cosascunata mana charishpapish cambaj fetami sinchiyachi tucungui. Chaipajca Jehová Diosta mañashpa Mateo 6:25-34-pi Jesús ima nishcapimi yuyai tucungui. Shinallataj huauqui panicuna Diospaj Gobiernota punta lugarpi churajpi Dios paicunata ima shina cuidashcapipishmi yuyai tucungui (1 Corintios 15:58). Chashnami cambaj feta sinchiyachingui. Yayitu Diosca ima shinami shujtajcunata ayudarca chashnallatajmi cantapish  ayudanga. Paica allimi yachan imata minishtishcata chaimanta minishtirishca cosascunata cunga nin. Yayitu Dios cambaj causaipi ima shina ayudashcata ricushpaca cambaj fetami sinchiyachingui. Shinallataj shamuj punllacunapipish sinchi pruebacunatami chꞌimbapurangui (Habacuc 3:17, 18).

7. Mateo 8:23 al 26-pi nishca shinaca ¿Jesuspaj discipulocunaca ima shinataj sinchi feta charishcata ricuchina carcacuna?

⁷ Shuj cutinca Jesusca paipaj discipulocunahuanmi barcopi carca. Ñapish achcatami sinchi huaira jatarirca. Chaipimi Jesusca paipaj discipulocuna ashtahuan sinchi feta charichun ayudarca (Mateo 8:23-26-ta liyipai). Achca huaira, tamya tiyashcamantami barcotaca casi taparca. Chai ratoca Jesusca dormicurcami. Ñapish discipulocunaca achcata mancharishpami paicunaca Jesusta rijchachishpa ñucanchijta quishpichihuai nircacuna. Chaimi Jesusca: “¿Ima nishpataj mancharinguichij? Cancunaca ashallata crijcunami canguichij” nircami. Jesuspaj discipulocunaca allimi yachana carcacuna Jesustapish, paihuan cajcunatapish Jehová Dios cuidanata. ¿Caimantaca imataj yachanchij? Maipica jatun huaira, tamya shinami ima problemacunaca ricurin. Chaita ahuantangapajca sinchi fetami charina canchij.

8, 9. a) ¿Pani Anelca ima pruebacunahuantaj chꞌimbapurarca? b) ¿Paica yallitaj ama preocuparingapajca imatataj rurarca?

⁸ Puerto Rico llajtamanta pani Anel ima shina sinchi llaquicunata charishpa paipaj feta sinchiyachishcatami ricushun. 2017 huatapica pai causan llajtapimi shuj jatun acapana tiyarca. Chaimi cai panica paipaj huasi illaj, trabajo illaj saquirirca. Pani Anelca: “Chai punllacunapica dimastij preocuparishcami sintirircani. Pero Jehová Diosta mañashpami paipi confiarcani. Chashnami mana yallitaj preocuparishca sintirircani” ninmi.

⁹ Pani Anelca Jehová Diostami tucuipi cazurca. Paica: “Jehová Diospaj organización ima nishcata cazushpaca mana yallitaj sustarircanichu. Turi ñañacuna animajpi, minishtirishca cosascunata cujpica Yayitu Dios ñucata ima shina ayudacushcatami cuentata curcani. Shinallataj Diosca ñuca mana yuyashca achca cosascunahuanmi bendiciarca. Chaita ricushpaca ñuca fetaca Yayitu Diospimi ashtahuan sinchiyachircani” ninmi.

10. ¿Sinchi problemacunata charishpaca imatataj rurana canchij?

¹⁰ Tal vez cambaj causaipica achca llaquicunahuanchari chꞌimbapurangui. Jatun terremoto o acapana tiyashcamantachari maipica chaicunahuan chꞌimbapurangui. Mana cashpaca ungushca cashcamantachari yallitaj preocuparishpa imata ruranata mana yachangui. Pero cashna llaquicunahuan chꞌimbapuracushpapish Diospi confianata amataj saquingui. Can ima shina sintirishcataca paiman tucuita huillai. Yayitu Dios canta ñaupa punllacuna ima shina ayudashcapi yuyashpapish cambaj feta sinchiyachi (Salmo 77:11, 12). Chaita rurashpaca cunan punllapish, shamuj punllacunapish Jehová Dios canta cuidanatami tucui shunguhuan cringui.

11. ¿Imamantataj congregacionta pushajcunataca cazuna canchij?

 ¹¹ ¿Sinchi pruebacunata chꞌimbapurangapajca imallatataj rurana canchij? Párrafo 8-pi parlashca pani Anelca Yayitu Diostami siempre cazurca. Ñucanchijpish Jehová Diospi, Jesuspi confiajcunapimi confiana canchij. Maipica congregacionta pushaj ancianocunaca mana shuyashca instruccioncunatami cunga. Pero ñucanchij paicunata cazujpica Jehová Diosmi bendicianga. Diosta cazujcunapaj experienciacuna, Bibliapi tiyaj yuyaicunaca ñucanchijpish quishpirichunmi ayudan (Éxodo 14:1-4; 2 Crónicas 20:17). Cashna ejemplocunapi yuyashpaca cunan punllapish, shamuj punllacunapish Jehová Diospaj organizacionpi ima instruccioncunata cujpica cazunaca mana sinchichu canga (Hebreos 13:17). Ashtahuancarin shamuj punllacunapi sinchi problemacuna tiyajpipish chaitaca jahuallami chꞌimbapurashun (Proverbios 3:25).

12. Lucas 18:1 al 8-pi nishca shinaca ¿pi ñucanchijta mana alli tratajpi sinchi feta charingapajca imatataj rurana canchij?

¹² Jesusca allimi yacharca paipaj discipulocunata shujtajcuna mana alli tratanata. Chaimi paicuna ahuantachunca Lucas libropi tiyaj shuj chꞌimbapuraimanta parlarca. Jesusca shuj viuda huarmica paita pꞌiñajcunata corregichunmi shuj jueztaca cutin cutin mañarca. Juezca paitaca ayudarcami. ¿Caimantaca imatataj yachanchij? Jehová Diosca cashcata rurajmi can. Chaimantami Jesusca: “Taita Dioscarin tutapish punllapish pai agllashcacuna caparijpica, ¿manachu imatapish mana uniyashpalla paicuna mañashcata cutichinga?” nircami (Lucas 18:1-8-ta liyipai). Shinallataj paica: ‘Runa aichayuj shamushpaca ¿cai pachapica chashna crijtaca japingachu imashi?’ nircami. Pi ñucanchijta mana alli tratajpica pacienciatami charina canchij. Chashnami ñucanchijpish cai viuda huarmi shina sinchi feta charishun. Sinchi feta charishpaca Dios ayudanataca manataj cungarishunchu. Chaimanta Diosta mañanata amataj saquishunchij. Caita rurajpica ñucanchij mañashcacunataca mana yuyashcapimi Jehová Diosca cutichinga.

13. ¿Pani Vero, paipaj familiahuan sinchi pruebacunata chꞌimbapurachunca imataj ayudarca?

¹³ Pani Veroca República Democrática del Congo llajtamantami can. Paipaj cusaca mana Testigochu can. Cutin paipaj ushushica 15 huatacunatami charin. Paicunapaj llajtaman chayashpami militarcunaca paicunata llaquichisha nircacuna. Chaimi paicunaca chai llajtamanta llujshishpa rircacuna. Ña ñanta ricujpica militarcunaca ‘cai ñantaca mana pasanachu canguichij. Pasajpica huañuchishunmi’ nircacunami. Chaimi pani Veroca huacai callarirca. Pero paipaj ushushica Jehová Diostami voz altapi mañarca. Shinallataj Yayitu Diospaj shutitaca achca cutinmi nirca. Ña Diosta mañashpa tucuchishca qꞌuipaca militarcunata mandajca “¿jovencita cantaca pitaj Diosta mañanata yachachirca?” nishpami tapurca. Chaimi paica: “Ñuca mamitami Mateo 6:9 al 13-pi nishca shina mañanata yachachirca” nirca. Chaimi chai runaca: “Jovencita cambaj yaya mamacunahuan rilla. Cambaj Jehová Dios cancunata cuidachun nirca” ninmi.

14. ¿Ñucanchij mañashcacunata Yayitu Dios mana utca cutichijpica imatataj rurashpa catina canchij?

 ¹⁴ Cai experienciacunamanta yachashpami Jehová Diosta mañana importante cashcata yachanchij. Pero maipica Diosca ñucanchij mañashcacunataca mana chai rato cutichingachu. Chaimanta ñucanchijpish Jesús parlashca viuda huarmi shina Yayitu Diosta mañanata amataj saquishunchij. Chaita rurajpica Jehová Diosca manataj saquingachu. Paica ñucanchij mañashcacunataca ima horapish cutichingami. Chaimanta Yayitu Dios paipaj espíritu santota cuchun mañashunchij (Filipenses 4:13, NWT ). Jehová Diosca ñallami achca bendicioncunata cunga. Chaipica llaquicunatapish ña mana yuyarishunchu. Sinchi pruebacunata Diospaj ayudahuan ahuantashpaca shamuj punllacunapipish sinchi pruebacunatami ahuantai tucushun (1 Pedro 1:6, 7).

15. Mateo 17:19, 20-pi nishca shinaca ¿Jesuspaj discipulocunaca ima jarcaicunahuantaj chꞌimbapurarcacuna?

¹⁵ Jesusca paipaj discipulocunamanca ima pruebacunata chꞌimbapurangapajca sinchi feta minishtishcatami yachachirca (Mateo 17:19, 20-ta liyipai). Shuj cutinca Jesuspaj discipulocunaca gentecunamantami demoniocunata llujchishcacuna carca. Qꞌuipaca chaitaca mana rurai tucurcacunachu. Chaimi Jesusca cancunaca ashtahuan feta charinatami minishtinguichij nirca. Jesusca: ‘Uchilla mostaza muyu shinallatapish crinata charishpaca, cai urcutapish, caimanta chaiman ri nijpica rinmanllami’ nircami. Ñucanchijpish problemacunata chꞌimbapurangapajmi sinchi feta minishtinchij.

16. ¿Pani Geydica paipaj cusa huañujpica ima shinataj chai llaquicunataca ahuantai tucurca?

¹⁶ Guatemala llajtapi causaj pani Geydipaj ejemplopi yuyashun. Paipaj cusa Edihuanmi tandanacui tucurishca qꞌuipaca huasiman tigracurca. Ñapish tigracujpimi paipaj cusataca huañuchircacuna. Pani Geydica sinchi feta charishcamantami chai llaquicunataca chꞌimbapurai tucurca. Paica: “Ñuca ima shina sintirishcatami Diosman tucuita huillani. Chashnami tranquila sintirini. Jehová Diosca ñuca familiahuan, turi ñañacunahuanmi ñucataca cuidashca. Shinallataj Jehovata sirvinapi ocuparishpaca animarishcami sintirini. Chashnami caya punlla ima tucunapica mana yallitaj preocuparini. Cashna sinchi pruebacunata charishpami shamuj punllacunapi sinchi pruebacuna ricurijpipish Jehová Diospaj, Jesuspaj, Diospaj organizacionpaj ayudahuanca chaicunata chꞌimbapurai tucusha” ninmi.

17. ¿Sinchi problemacunata charishpaca imatataj rurana canchij?

¹⁷ ¿Shuj cꞌuyashca familiata huañuipica imatataj rurana cangui? Cambaj feta sinchiyachingapajca Jehová Dios huañushcacunata causachishcatami Bibliapi liyina cangui. ¿Shinallataj shuj familiata congregacionmanta llujchijpica imatataj rurana cangui? Chaipajca Yayitu Dios paita mana cazujcunata imamanta corregishcatami Bibliapi estudiana cangui. Ima laya problemacunata charishpapish cambaj feta sinchiyachingapaj esforzari. Ima shina sintirishcatapish Jehová Diosman huillai. Huauqui panicunamantapish  amataj caruyai (Proverbios 18:1, NWT ). Llaquicunata charishpapish Jehová Diosta sirvishpa cati (Salmo 126:5, 6). Tandanacuicunaman rinata, huillanaman llujshinata, Bibliatapish liyinata amataj saqui. Shamuj punllacunapi Yayitu Dios sumaj bendicioncunata cunapipish yuyai. Pai ima shina ayudacushcata yachashpaca cambaj feca ashtahuanmi sinchiyanga.

18. ¿Cambaj fe mana sinchi cashcata yachashpaca imatataj rurana cangui?

¹⁸ Canca pruebacunata charishpaca chai pruebacunata ahuantangapaj mana sinchi feta charishcatachari cuentata cungui. Chaita cuentata cushpaca cambaj feta ashtahuan sinchiyachingapaj esforzari. Canpish Jesuspaj discipulocuna ashtahuan crina yuyaita cuhuai nishca shina mañai (Lucas 17:5). Shinallataj cai yachaipi huaquin experienciacunamanta yachashcapipish yuyai. Huauqui Miguelta, pani Yuraita Jehová Dios ima shina ayudashcapi yuyai. Shinallataj pani Veropaj ushushi shina, pani Anel shina sinchi pruebacunahuan cashpaca Jehová Diosta shungumanta mañangapaj esforzari. Pani Geydi shina familiacunapaj, huauqui panicunapaj ayudatapish chasqui. Pruebacunata chꞌimbapurangapajca Diospaj ayudata chasquishunchij. Chashna rurashpaca shamuj punllacunapi ima pruebacuna tiyajpipish Jehová Dios ayudanapimi confiashpa catishun.

19. a) ¿Jesusca paita catijcunamantaca imatataj alli yacharca? b) ¿Ñucanchijpish imatataj alli yachanchij?

¹⁹ Jesusca paita catijcunatami ashtahuan feta charichun ayudarca. Pero paica allimi yacharca paipaj catijcuna Jehová Diospaj ayudahuan shamuj punllacunapi sinchi pruebacunahuan chꞌimbapurai tucushcata (Juan 14:1; 16:33). Achcacunaca sinchi feta charishcamanta jatun llaqui punllapipish quishpirinatami alli yacharca (Apocalipsis 7:9, 14). Canpish cunanmanta cambaj feta sinchiyachishpaca jatun llaqui punllapi quishpirishpami huiñai causaita chari tucungui (Hebreos 10:39).