1, 2. a) Salmo 37:3, 4-pi nishca shinaca ¿cunanlla cazarashcacunaca ima shinataj Jehová Diospi confiai tucuncuna? b) ¿Cai yachaipica imatataj yachashun?

TAL VEZ canca cunanllachari cazarashca cangui o mana cashpaca cazaranatachari yuyacungui. Chashna cashpaca cambaj cꞌuyashcahuanmi cushilla causanata munangui. Pero maipica matrimonio ucupica llaquicunami ricurin. Chaimantami callarimanta alli decisioncunata agllana importante can. Jehová Diospi confiashpa alli decidishpaca matrimoniopica ashtahuanmi sinchiyanguichij. Shinallataj cushillami sintiringuichij. Pero Jehová Dios munashca shina mana decidishpaca causaipimi llaquicunata charinguichij (Salmo 37:3, 4-ta liyipai).

² Cai yachaipica cunanlla cazarashcacunamantami yachashun. Achca matrimoniocunapishmi caimanta yachai tucuncuna. Bibliapimi ñaupa punllacuna huaquin cꞌaricunapish, huarmicunapish Jehová Diosta ima shina sirvishcata ricushun. Paicunamanta yachashpa ñucanchij causaipi ima shina pajtachi tucushcata, matrimoniopi ima shina pajtachi tucushcatami yachashun. Shinallataj cunan punllacunapi Diosta alli sirvij matrimoniocunamantapishmi ashtahuan yachashun.

3, 4. ¿Cunanlla cazarashcacunaca ima jarcaicunahuantaj chꞌimbapurancuna?

³ Cunanlla cazarashca cusa huarmitaca maipica yaya mamacuna o familiacunaca cazarashcahuanmi huahuacunata charina canguichij nishpami tal vez animancuna. Shinallataj amigocuna,  familiacunaca recienlla cazarashcacunataca huasitami randina canguichij, alaja cosascunatami charina canguichij nishpapishchari animancuna.

⁴ Cunanlla cazarashcacunaca ashtahuan cosascunata charinata munashpa mana alli decidishpaca achcatami dibi tucuncuna. Maipica dibita pagangapajca achca horascunatachari trabajana tucunga. Shinallataj Bibliata estudiangapaj, cusahuan o huarmihuan Yayitu Diosmanta ashtahuan yachangapaj, huillanaman llujshingapajca tiempotapish manachari charingacuna. Huaquincunacarin trabajota ama pirdingapaj, cullquita ashtahuan ganangapajmi achca horascunata trabajancuna. Chaimantami maipica tucui tandanacuicunaman mana rincuna. Jehová Diosta ashtahuan sirvina privilegiotapishmi pirdingacuna.

5. ¿Huauqui Klaus, paipaj huarmi Marisapaj ejemplomantaca imatataj yachangui?

⁵ Achcacunami achca cosascunata charishpaca mana cushilla causai tucushcata cuentata cushcacuna. Huauqui Klaus, pani Marisaca * yallitaj cosascunata charishpa mana cushilla causai tucushcatami cuentata curcacuna. Paicuna recienlla cazarashpaca ishquindijmi tiempo completota trabajarcacuna. Chashna trabajashcamantami paicunaca achca cosascunata charircacuna. Pero cushillaca mana causarcacunachu. Huauqui Klausca: “Achca cosascunatami charircanchij. Pero Jehová Diosta sirvingapajca ima metacunata mana charircanchijchu. Ashtahuan charinallapi ocuparishcamantami shaicushca, preocuparishca sintirircanchij” ninmi. Tal vez canpish achca cosascunata charishpaca mana cushilla causai tucushcatachari cuentata cushcangui. Pero ama desanimarichu, shujtajcunapaj alli ejemplomi ayudai tucun. Cai yachaipica puntaca cusacuna mandaj Josafatmanta imata yachai tucushcatami ricushun.

6. Proverbios 3:5, 6-pi nishca shinaca ¿mandaj Josafatca sinchi llaquicunataca ima shinataj chꞌimbapurarca?

⁶ Maipica cusacunaca achca responsabilidadcunata charishcamantami shaicushca sintirincuna. Pero cusacunataca mandaj Josafatpaj ejemplomi ayudai tucun. Mandaj Josafatca Judá llajtata mandajmi carca. Chaimantami paica Judá llajtapi causajcunata cuidangapajca jatun torrecunata shayachirca. Shinallataj 1.160.000 soldadocunatapishmi tandachirca (2 Crónicas 17:12-19). Tiempo qꞌuipaca paica sinchi jarcaicunahuanmi chꞌimbapurarca. Paita, paipaj familiata, Judá llajtapi causajcunatami Amón, Moab, Seír llajtamanta mandajcunapaj soldadocunaca paicunata llaquichisha nircacuna (2 Crónicas 20:1, 2). ¿Josafatca imatataj rurarca? Paica Jehová Diostami fuerzasta cuchun mañarca (Proverbios 3:5, 6-ta liyipai). Pai ima shina Jehová Diosta mañashcataca 2 Crónicas 20:5 al 12-pimi ricui tucunchij. Chaipimi Yayitu Diospi tucui shunguhuan Josafat confiashcata yachai tucunchij. ¿Diosca pai mañashcacunataca ima shinataj cutichirca?

7. ¿Jehová Diosca mandaj Josafat mañashcataca ima shinataj cutichirca?

 ⁷ Jehová Diosca Josafat mañashcata cutichingapajca levita aillumanta Jahazielhuanmi cutichirca. Diosca: “Cunanpica mana cancuna macanacunachu canguichij, ashtahuanpish casijlla shayanguichijlla. Chashnami ñucataj cancunata quishpichijta ricunguichij” nircami (2 Crónicas 20:13-17). Huaquincunaca cai shimicunata uyashpaca mancharishcami saquirishcangacuna. Pero paicunaca cai nishcacuna mana runacunamanta cashcata, ashtahuanpish Jehová Diosmanta cashcatami cuentata cushcangacuna. Mandaj Josafatca contracunahuan macanacungapajca alli allichishca soldadocunataca mana ñaupachishpa cacharcachu. Ashtahuanpish Mandaj Diosta alabashpa cantajcunatami ñaupachishpa cacharca. Josafatca Diospi tucui shunguhuan confiashcamantami contracunataca misharca (2 Crónicas 20:18-23).

8. ¿Cusacunaca mandaj Josafatmantaca imatataj yachai tucuncuna?

⁸ ¿Cusacunaca Josafatpaj ejemplomantaca imatataj yachai tucuncuna? Familiata mantiningapaj, paicunata cuidangapajmi esforzarina canguichij. Chaimanta ima problemacuna ricurijpica cancunalla allichinapica ama yuyaichijchu. Ashtahuanpish Jehová Diosta mañashpa paipaj ayudata mashcaichij. Shinallataj cambaj huarmihuanpish Yayitu Diosta mañaichij. Imata decidingapajpish Bibliapi, publicacioncunapi Diospaj organizacionpi mashcaichij. Consejocunata tarishpaca cancunapaj causaipi pajtachichij. Maipica huaquin gentecunaca cancuna Biblia nishca shina decidijpica paicunaca mana de acuerdo cangacunachu. Tal vez paicunaca familiata cuidangapajca achca cullquita, achca cosascunatami charina canguichij ningacunachari. Pero Jehová Diospi mandaj Josafat confiashcamanta paita ima shina Dios ayudashcatami yuyarina canguichij. Diosca mandaj Josafattaca manataj saquircachu. Cancunatapish chashnallataj manataj saquingachu (Salmo 37:28; Hebreos 13:5). ¿Cazarashcacunaca cushilla causangapajca imatataj rurana can?

9. ¿Profeta Isaiasmanta, paipaj huarmimantaca cazarashcacunaca imatataj yachai tucuncuna?

⁹ Isaiasca paipaj huarmihuanmi Jehová Diosta tucui causaipi sirvircacuna. Isaiasca profetami carca. Paipaj huarmitapish Bibliapica profetami carca ninmi. Tal vez paipaj huarmica profeta layallatajmi huaquin trabajocunata rurashcanga (Isaías 8:1-4). Paicunapajca Jehová Diosta punta lugarpi churanami importante carca. Cunan punllacunapish cazarashcacunaca Isaías, paipaj huarmihuan Diosta ima shinami punta lugarpi churarca, chashnallatajmi paicunapish sirvi tucuncuna.

10. ¿Cusa huarmica Diosta ashtahuan sirvingapajca imamantataj Bibliapi tiyaj profeciacunata estudiana can?

¹⁰ ¿Ima shinataj cazarashcacunaca Isaiaspaj, paipaj huarmipaj ejemplota cati tucuncuna? Jehová Diosta ashtahuan sirvingapajmi esforzari tucuncuna. Shinallataj cancunapaj fetapish sinchiyachishpa, ishquindij Bibliapi tiyaj profeciacunamanta estudiashpa, ima shina chai profeciacuna pajtarijtapishmi yachana canguichij (Tito 1:2). * Shinallataj Bibliapi tiyaj profecías ima shina pajtarichun chaipi imata rurai tucushcatapishmi yachana can. Por ejemplo, Jesusca manaraj cai shina causai tucurijpica tucui llajtacunapimi Diosmanta alli huillaicunaca huillashca canga nircami (Mateo 24:14). Bibliapi tiyaj profeciacuna ima shina  pajtaricujta yachashpaca cancunapish Jehová Diosta sirvingapajmi tucui pudishcata ruranguichij.

11. ¿Cunanlla cazarashcacunaca imatataj Priscilamanta, Aquilamantaca yachai tucuncuna?

¹¹ Cunanlla cazarashcacunaca Priscilamanta, Aquilamantami yachai tucuncuna. Paicunaca Roma llajtapi causacushpami Jesusmanta yachashpa Jehová Diosta sirvi callarircacuna. Yayitu Diosta rijsishcamantaca paicunaca cushillami sintirishcangacuna. Pero shuj cutinca Roma llajtata mandaj Claudioca judiocunataca Roma llajtamanta richunmi obligarca. Áquila, Priscilaca paicunaca Romamanta llujshishpami Corinto llajtaman rircacuna. Corinto llajtapica maipi causanatami mashcashcangacuna. Shinallataj imapi trabajanatami ricushcangacuna. ¿Cashna cambiocunata charishpaca paicunaca Diosmanta huillanata saquircacunachu? Mana. Paicunaca Corinto llajtapica huauqui panicunata ayudangapaj, apóstol Pablota, caishuj huauqui panicunatapish sinchiyachingapajmi esforzarircacuna. Tiempo huashacarin paicunaca maipimi Diosmanta ashtahuan huillana minishtirin lugarman rishpami Diospaj Gobiernomanta predicashpa catircacuna (Hechos 18:18-21; Romanos 16:3-5). Chashna Yayitu Diosta sirvingapaj ocupados cashcamantaca paicunaca cushillami sintirishcangacuna.

12. ¿Cunanlla cazarashcacunaca imamantataj Diosta ashtahuan sirvingapajca metacunata churana can?

¹² Cunan punllacunapica cazarashcacunaca Priscilamanta, Aquilamantami Yayitu Diospaj Gobiernota punta lugarpi churangapajca yachai tucuncuna. Manaraj cazarashpa Yayitu Diosta sirvingapaj metacunata churajpica chai metacunata pajtachichunca Jehová Diosllatajmi paipaj espíritu santohuan ayudanga (Eclesiastés 4:9, 12). Huauqui Russell pani Elizabethmanta yachashun. Huauqui Russellca: “Manaraj cazarashpami Yayitu Diosta sirvingapaj ima metacunata charishcata parlanacurcanchij” ninmi. Pani Elizabethca manaraj cazarashpami: “Jehová Diosta ashtahuan sirvingapaj ima metacunata charishcata parlanacurcanchij. Cazarashca qꞌuipapish chai metacunata ima shina pajtachinatami decidircanchij” ninmi. Tiempo huashaca  paicunaca Micronesia llajtapi maipimi huillana minishtirin lugarpi predicanaman rircacuna.

13. ¿Jehová Diospi confiashpaca ima shinataj sintiringuichij?

¹³ Cunan punllacunapish cazarashca huauqui panicunaca huauqui Russell, pani Elizabeth shinallatajmi minishtirishca cosascunahuan causanata decidishcacuna. Chashnami paicunaca ashtahuan predicangapaj, gentecunaman yachachingapaj tiempota charincuna. Cusa huarmi shungumanta sirvingapaj metacunata churashpa chaita pajtachingapaj esforzarijpica Jehová Diosca achcatami bendicianga. Dios cancunata ima shina cuidajta yachashpaca paipimi ashtahuan confianguichij. Shinallataj cushillapishmi sintiringuichij (Salmo 28:7-ta liyipai).

14. ¿Apóstol Pedro, paipaj huarmica Mateo 6:25, 31 al 34-pi Dios cusha nishcacunapi ima shina confiashcatataj ricuchircacuna?

¹⁴ Apóstol Pedro, paipaj huarmipish cazarashcacunapajca alli ejemplomi can. Pedroca 6 quillacunata yalli Jesusta rijsishca huashaca paica shuj importante decisiontami agllarca. Pedroca pescadocunata japishpami trabajaj carca. Pero Jesús paita tiempo completopi sirvichun invitajpica paipaj huarmita ima shina mantininapimi yuyashcanga (Lucas 5:1-11). Bibliapica Jesús causarishca qꞌuipaca Pedropaj huarmica Pedrohuan Yayitu Diosta sirvingapaj viajashcatami huillan. Chashnami Pedro predicashpa catichun paipaj huarmi apoyashcata yachanchij. (1 Corintios 9:5). Pedropaj huarmica alli ejemplomi carca. Chaimantami Pedroca cazarashcacunamanca alli consejota cui tucurca (1 Pedro 3:1-7). Pedroca, paipaj huarmihuan Yayitu Diospaj Gobiernota punta lugarpi churajpi Dios paicunata bendicianatami yacharcacuna (Mateo 6:25, 31-34-ta liyipai).

15. ¿Huauqui Tiago, pani Estherpaj experienciamantaca imatataj yachai tucuncuna?

¹⁵ ¿Achca huatacunata cazarashca cashpapish Jehová Diosta ashtahuan sirvingapajca imatataj rurana canguichij? Yayitu Diosta ashtahuan sirvijcunapaj experienciamanta yachashpaca Diosta ashtahuan sirvichunmi animanga. Huauqui Tiago, pani Esthermi chaita rurarcacuna. Paicunaca Brazilmantami can. Huauqui Tiagoca: “Diosta ashtahuan sirvingapaj decidishca huauqui panicunamantami publicacioncunapi liyircanchij. Chaimantami Jehová ñucanchijtapish cuidanapi, ayudanapi yuyarcanchij” ninmi. Tiempo qꞌuipaca paicunaca Paraguaypimi ashtahuan sirvinaman rircacuna. 2014 huatamantaca portugués shimita parlaj congregacionpimi apoyacuncuna. Pani Estherca: “Ñucanchijca Efesios 3:20 versotami achcata munanchij. Yayitu Diosta sirvicujpi cai shimicuna ima shina ñucanchijpi pajtarishcatami ricushcanchij” ninmi. Apóstol Pabloca efesiocunaman cartata quillcacushpaca Yayitu Diosta punta lugarpi churashpa ima shina bendicioncunata chasquinatami quillcarca. Cai shimicunaca cunan punllacunapipishmi pajtarishca.

16. ¿Cunanlla cazarashcacunaca Diosta sirvingapaj metacunata churashpaca pajtachingapajca picunapaj ayudatataj mashcana can?

¹⁶ Cunanlla cazarashcacunaca Jehová Diosta achca huatata sirvijcunapaj experienciamantami yachai tucuncuna. Huaquin cusa huarmicunaca achca huatacunatami tiempo completopi sirvishcacuna. Cunanlla cazarashcacunaca Yayitu Diosta ashtahuan sirvingapaj, metacunata pajtachingapajca paicuna consejachunmi mañana canguichij. Chashnami cancunaca Diospi confiashcata ricuchinguichij (Proverbios 22:17, 19). Shinallataj ancianocunapish  cunanlla cazarashca huauqui panicuna metacunata churashpa, chaita pajtachichunmi ayudai tucunguichij.

17. ¿Huauqui Klaus, pani Marisapaj experienciamantaca imatataj yachanchij?

¹⁷ Maipica Jehová Diostaca ñucanchij munashca shinami ashtahuan sirvisha ninchij. Pero Diosmi mana yuyashca metacunata pajtachichunca ayudan. Párrafo 5-pi parlashca huauqui Klaus, pani Marisapi yuyashun. Quimsa huatacuna cazarashca qꞌuipaca, paicunaca huasita saquishpami Finlandia sucursalman rircacuna. Chaipica construccionpi ayudangapajmi decidircacuna. Pero paicunaca seis quillacamalla saquirinatami yachaj chayarcacuna. Chashna yachaj chayashpaca llaquillami sintirircacuna. Pero asha tiempo qꞌuipaca paicunataca árabe shimipi yachachunmi invitarcacuna. Cunanca árabe shimita parlaj gentecunata ayudashpami shujtaj llajtapi cushilla sirvicuncuna. Pani Marisaca: “Ñucanchij causan Iugarmanta llujshishpa Jehová Diospi confianaca maipica sinchimi carca. Pero Jehová Diosca ñucanchij mana yuyashca bendicioncunatami cushca. Cashna bendicioncunata chasquishpami Jehová Diospi confianata yachashcanchij” ninmi. Ña ricushca shinaca Jehová Diospi tucui shunguhuan confiajpica paica bendiciangami.

18. ¿Cazarashcacunaca Jehová Diospi confiashpa catingapajca imatataj rurana can?

¹⁸ Cazarashpa causanaca Jehová Diospaj regalomi can. Paica cusa huarmi cushilla causachunmi munan (Proverbios 5:18; Mateo 19:5, 6). Cunanlla cazarashcacunaca paicunapaj causaihuan imata ruranatami yuyarina can. Shinallataj Jehová Dios paicunaman huaquin bendicioncunata cushcamantapish agradicishcatami ricuchina can. Chaimanta Diosta mañangapaj imata alli decidingapajpish Diospaj Shimipi consejocunata mashcaichij. Chaita pajtachingapajpish esforzarichij. Jehovata punta lugarpi churashpaca cazarashcacunaca cushillami causangacuna.