1. ¿Jehová Diosca imatataj rurachun animan?

JEHOVÁ DIOSPAJCA cꞌuyaj canata manataj saquinami importante can (Oseas 6:6). Shinallataj paita sirvijcunatapish cꞌuyaj canata amataj saquichunmi mandan. Jehová Diosca profeta Miqueashuanmi cꞌuyaj, llaquij canata amataj saquichun animarca (Miqueas 6:8). Caita pajtachingapajca cai cualidad ima cashcatami alli intindina canchij.

2. ¿Cꞌuyanata manataj saquinaca imatataj nisha nin?

² Cꞌuyanata manataj saquinamantaca La Biblia. Traducción del Nuevo Mundo Bibliapica casi 230 cutinmi ricurin. Huaquin Bibliacunapica cꞌuyanata manataj saquinataca “llaquij o cꞌuyaj” nishpami traducishcacuna. Cai yachaipi, catij yachaipi cꞌuyaj, llaquij shimicuna ricurijpica cꞌuyanata manataj saquinamantami parlashun. ¿Cꞌuyanata manataj saquinaca imatataj nisha nin? Huaquincuna shujtajcunata cꞌuyashpaca paicunata cꞌuyashpa catinata, paicunamanta manataj caruyanatami nisha nin. Cꞌuyaita ricuchinata manataj saquinamanta parlashpaca Jehová Diosca casi siempre gentecunata cꞌuyashcamantami parlan. Pero maipica gentecunapish shujtajcunaman cꞌuyaita ricuchinata manataj saquinamantami parlan. Diosmi shujtajcunaman cꞌuyaita ricuchinata manataj saquichunca alli ejemplota cun. Cai yachaipimi Diosca paita alli sirvijcunaman cꞌuyaita ricuchinata manataj saquishcata ricushun. Cutin catij yachaipica Diosta sirvijcunapish ima shina cꞌuyaita ricuchinata manataj saquinatami yachashun.

3. ¿Jehová Diosca Moisesmanca imatataj huillarca?

³ Jehová Diosca israelitacuna Egiptomanta llujshishca qꞌuipaca Moisesmanmi paipaj shuti, paipaj cualidadcunata huillarca.  Diosca: “Tucuita rurai tucuj Dios, llaquij, cꞌuyaj shungu, mana utca pꞌiñarij, yallitaj llaquij, mana llullaj Diosmi cani. Millaita rurashcata, cꞌariyashcata, juchallishcata perdonajmi cani” nircami (Éxodo 34:6, 7). Chashnami Diosca cꞌuyanata manataj saquinata alli intindichun ayudarca. Caimanta ashtahuan yachashun.

4, 5. a) ¿Jehová Diosca paillamantatajca imatataj nirca? b) ¿Cai yachaipica ima tapuicunatataj ricushun?

⁴ Jehová Diosca cꞌuyaita charishcallataca mana nircachu. Ashtahuanpish paica huiñaipaj cꞌuyaita charishcatami nirca. Bibliapica cai shimicunaca achca cutinmi ricurin (Números 14:18; Nehemías 9:17; Salmo 86:15; 103:8; Joel 2:13; Jonás 4:2). Cai shimicunata nishpaca Jehová Diosca paillamantami parlan. Bibliapica Diospaj cualidad importante cashcata ricuchingapajmi achca cutin quillcachishca. Chaimantami Davidca: “Mandaj Dios quiquinpaj llaquij cashcaca jahua pachacunacamami chayan. ¡Taita Dioslla, quiquin llaquij cashcaca yallitaj sumajmari! Chaimantami huañujlla aichayujcunaca, quiquinpaj alas ucupi miticuncuna” nirca (Salmo 36:5, 7). Ñucanchijpish David shinallatajmi cai cualidadtaca valorana canchij.

⁵ Cꞌuyanata manataj saquina cualidadmanta ashtahuan intindingapajca cai ishqui tapuicunatami yachashun: ¿Jehová Diosca picunamantaj cꞌuyaita ricuchinataca manataj saquin? ¿Dios cꞌuyaita ricuchinata manataj saquishcamantaca ima shinataj beneficiarinchij?

6. ¿Jehová Diosca picunamantaj cꞌuyaita ricuchinataca manataj saquin?

⁶ ¿Jehová Diosca picunamantaj cꞌuyaita ricuchinataca manataj saquin? Bibliapica huaquin cosascunata cꞌuyai tucushcatami nin. Por ejemplo, chagracunata, correginata, yachaj canata, vinota, aceiteta (2 Crónicas 26:10; Proverbios 12:1; 21:17; 29:3). Pero cꞌuyaita ricuchinata manataj saquinaca cosascunapajca mana canchu. Ashtahuanpish gentecunaman cꞌuyaita ricuchinata manataj saquinami can. ¿Shinaca Diosca tucui gentecunamanchu cꞌuyaita ricuchinataca manataj saquin? Mana. Paica paihuan mana alli apanacujcunamanca cai cualidadtaca mana ricuchinchu. Ashtahuanpish paipaj amigocunallamanmi cꞌuyaita ricuchinataca manataj saquin. Shinallataj paicunapajca sumaj causaitami cusha nin.

7. ¿Jehová Diosca ima shinataj tucui gentecunaman cꞌuyaita ricuchishca?

⁷ Jehová Diosca tucui gentecunamanmi cꞌuyaita ricuchishca. Jesusca Nicodemo runamanca: ‘Taita Diosca, cai pachapi causajcunataca c’uyashpami, paipaj shujlla Churita cacharca. Pipish paita crijca ama chingarishpa,  ashtahuanpish huiñai causaita charichunmi cacharca’ nircami (Juan 3:1, 16; Mateo 5:44, 45).

8, 9. a) ¿Jehová Diosca ima shinataj paita sirvijcunaman cꞌuyaita ricuchinataca manataj saquin? b) ¿Cunanca imatataj yachagrinchij?

⁸ Jehová Diosca paihuan alli apanacujcunallamanmi paipaj cꞌuyaita ricuchinataca manataj saquin. Caitaca mandaj David, profeta Danielmi Jehová Diospaj ayudahuan parlarca. Davidca: ‘Quiquinta rijsijcunamanca quiquin llaquij cashcata ricuchihuayari. Mandaj Dios llaquij cashcaca paita manchajcunapajca huiñaimanta huiñaicamami’ nircami. Cutin profeta Danielca: ‘Jatun Dios quiquinca manchashca cana jatun Taita Diosmi cangui. Quiquinta cꞌuyajcunata, quiquinpaj mandashcacunata huaquichijcunapajca, llaquij canatapish pajtachijmi cangui’ nircami (Salmo 36:10; 103:17; Daniel 9:4). Cai versocunapi nishca shinaca Jehová Diosca paita rijsijcunaman, cꞌuyajcunaman, paipaj mandashcata pajtachijcunamanmi cꞌuyaita ricuchinataca manataj saquin.

⁹ Jehová Diosta manaraj sirvi callarishpami paipaj cꞌuyaitaca tucuicuna chasquishcanchij (Salmo 104:14). Pero paita sirvi callarishca horasmantami pai cꞌuyanata manataj saquinataca chasquishcanchij. Diosca paipaj pueblomanca: “Ashtahuanpish ñuca canta cꞌuyashcamantaca manataj saquishachu” nircami (Isaías 54:10). Mandaj Davidmi Yayitu Diospaj shimicunaca paipaj propio causaipi pajtarishcata ricurca. Davidca: “Mandaj Diosca, imatapish chaitataj ruraj cajpi paipajlla cachun agllaj cashcata yachaichij” nircami (Salmo 4:3). ¿Jehová ñucanchijta cꞌuyanata manataj saquinata yachashpaca imatataj rurana canchij? Salmo librota quillcaj shuj runaca: “Maijanpish yachaisapa cashpa chaicunata huaquichijca, Mandaj Dios llaquij cashcatami intindinga” nircami (Salmo 107:43). Cai consejocunaca Jehová Diosmantami shamun. Dios cꞌuyanata manataj saquishcamantaca tucuicunami beneficiarishcanchij. Cunanca ima shinalla beneficiaringapaj quimsa yuyaicunata ricushun.

10. Salmo 31:7-pi nishca shinaca ¿Jehová paipaj pueblota cꞌuyanata manataj saquishcamantaca ima shinataj beneficiarinchij?

¹⁰ Jehová Diospaj cꞌuyanata manataj saquinaca huiñaipajmi can. Salmo 136-pica Diospaj cꞌuyaica  casi 26 cutinmi ricurin. Punta versopica: ‘Mandaj Diostaca alabaichigari, paica allimari. Pai llaquij o cꞌuyaj canaca huiñaipajmari’ ninmi (Salmo 136:1). Cutin versos 2-manta 26-cama tucuri partecunapica Jehová Diospaj cꞌuyaica huiñaipajmari nishcaca achca cutinmi ricurin. Cai versocunata liyishpaca Dios ñucanchijman chꞌican chꞌican siempre cꞌuyaita ricuchishcatami yachanchij. Jehová Diosca huiñaipaj cꞌuyajmari nishcaca paipaj pueblota cꞌuyashpa catinata mana nunca cambianatami ricuchin. Cai shimicunata yachashpaca Dios paita sirvijcunata manataj saquinatami intindinchij. Paica ñucanchij sinchi llaquicunahuan cai horaspish manataj saquingachu. ¿Caimantaca ima shinataj beneficiarinchij? Jehová ñucanchijhuan cashcamanta, problemacunata ahuantachun fuerzasta cushcamanta, huiñai causaiman apaj ñanpi pushacushcamantami cushilla sintirinchij (Salmo 31:7-ta liyipai).

11. Salmo 86:5-pi nishca shinaca ¿Jehová Diosca imamantataj perdonan?

¹¹ Jehová Diosca cꞌuyanata manataj saquishcamantami perdonaj can. Maijancuna juchacunamanta arrepintirishpa paipaj causaipi cambiangapaj esforzarijpica Diosca cꞌuyanata manataj saquishcamantami paicunataca perdonan. Salmos libropica Diosmantaca Davidca: “Ñucanchij millaita rurashcamantaca, llaquichina shinatajca mana llaquichircachu. Ñucanchij juchacunamantaca cuna cashca shinaca mana cushcachu” nircami (Salmo 103:8-11). Davidca juchapi urmashcamantami paipaj concienciapica mana alli sintirirca. Pero paica shungumanta arrepintirijpi Jehová Dios perdonangapaj listo cashcatami intindirca. Davidca Diosta mañacushpaca pai ima shina perdonaj cashcatami ricuchirca (Salmo 86:5-ta liyipai). Jehová Diosca paita mashcajcunataca paipaj cꞌuyaita ricuchinataca manataj saquinchu. Chaimantami paica perdonaj can.

12, 13. ¿Ñaupa punllacunapi jatun juchata rurashcamanta llaquilla sintirishpaca imatataj rurana canchij?

¹² Ima juchamanta llaquilla sintirinaca allimi can. Llaquilla sintirishpaca arrepintirishpa cutin ama pandaringapajmi cambiachun ayudanga. Maijan huauqui panicunaca ñaupa punllacunapi jatun juchacunata rurashcamantami llaquilla sintirincuna. Paicunaca ñucanchij arrepintirijpipish Diosca mana nunca perdonangachu nishpami yuyancuna. Pero can chashna sintirishpaca Jehová canta cꞌuyanata  manataj saquinatami intindina cangui. Chaita rurashpaca tranquilomi sintiringui.

¹³ ¿Caimantaca ima shinataj beneficiarinchij? Ñucanchijca juchayujcuna cashpapish ñucanchij yuyaipi chuya, cushillami Jehová Diosta sirvi tucunchij. Bibliapica: “Paipaj Churi Jesucristopaj yahuarmi, ñucanchij tucui juchacunataca pꞌichan” ninmi (1 Juan 1:7). Ñaupa punllacunapi ima juchata rurashca cashpaca ñucanchij chai juchacunamanta arrepintirijpi Yayitu Dios ñucanchijta perdonangapaj listo cashcatami intindina canchij. Davidca Dios cꞌuyanata manataj saquinamanta, pai perdonaj cashcamanta parlashpaca paica: “Paita manchajcunapajca, cai pachamanta jahua pachacamami, pai llaquij cashcataca jatunyachirca. Inti llujshinmanta, inti huashicuncamaca yallitaj carumari. Chai shinallatajmari ñucanchij mana cazushcacunatapish caruyachirca” nircami (Salmo 103:11, 12). Jehová Diosca ñucanchijta perdonangapajca listomi can (Isaías 55:7).

14. ¿Jehová Dios cꞌuyanata manataj saquij cashcamantaca Davidca imatataj nirca?

¹⁴ Jehová Diosca ñucanchijta cꞌuyanata manataj saquij cashcamantami paimanta ama pi caruyachichun cuidan. Davidca Jehová Diosta mañashpaca: ‘Mandaj Dioslla quiquinca ñuca miticunami cangui. Ñuca llaquihuan cajpipish huaquichinguimi. Llaquimanta llujshishca cashpa cantana cantocunahuanmi ñucataca muyunchingui. Mandaj Diospi shunguta churajcunapajca, Taita Diospaj llaquishcahuan muyunchishcami canga’ nircami (Salmo 32:7, 10). Ñaupa punllacunapica contracuna ama llaquichichunmi llajtacunapica pircacuna tiyarca. Chashnallatajmi Diospaj cꞌuyaica shuj pirca shina paita sirvinata amataj saquichun, pi ama pandachichunca ñucanchijta cuidan. Yayitu Dios cꞌuyanata manataj saquishcamantami paica ñucanchij paipajman cꞌuchuyachun ayudan (Jeremías 31:3).

15. ¿Jehová Dios cꞌuyanata manataj saquishcataca imacunahuantaj chꞌimbapuran?

¹⁵ Davidca Jehová Dios paipaj pueblota ima shina cuidashcata parlashpaca cashnami quillcarca: ‘Ñuca muyundij pircalla quiquintamari cantasha. Ñuca miticuna Taita Diosmari cangui’ nircami. Shinallataj: ‘Paica ñucata llaquijmi, ñuca miticuna jatun torremi. Ñucaman fuerzata cujmi, ñucata quishpichijmi, ñuca paca tucuna escudomi, paillapimi shunguta churani’ nircami (Salmo 59:17; 144:2). ¿Davidca Jehová Dios cꞌuyanata manataj saquinataca imamantataj muyundij pircahuan, jatun torrehuan chꞌimbapurarca? Diosta sirvijcuna maipi cajpipish Yayitu Diosmanta manataj caruyajpica Jehová Diosca ñucanchijta cuidanataca manataj saquingachu. Paihuan alli apanacuchunpish ayudangami. Salmo 91-ta quillcajpish: “Ñucaca Mandaj Diostaca, quiquinca ñuca shuyana, ñuca miticunami cangui” nircami (Salmo 91:1-3, 9, 14). Moisespish cai shimicunallatatajmi utilizarca (Salmo 90:1). Paica manaraj huañushpaca: ‘Huiñaipaj Taita Diosca, can miticunami. Paipaj rigracunaca huiñaipaj canta charirajmi’ nishpami quillcarca (Deuteronomio 33:27). ¿Paipaj rigracunaca huiñaipaj canta charirajmi nishca shimicunaca imatataj nisha nin?

16. Salmo 136:23-pi nishca shinaca ¿ima ishqui bendicioncunatataj charinchij?

¹⁶ Jehová Diosca ñucanchij miticuna Diosmi can. Chaimantami ñucanchijca seguros sintirinchij. Pero maipica llaquilla, desanimarishcami sintirinchij. ¿Chashna sintirijpica Jehová Diosca imatataj ruranga? (Salmo 136:23-ta liyipai). Yayitu Diosca paipaj rigracunahuanmi ñucanchijtaca cutin shayachij shina cuidanga, animanga (Salmo 28:9; 94:18). ¿Caimantaca ima shinataj beneficiarinchij? Puntaca, mai lugarpi ñucanchij cashpapish paipimi miticui tucunchij. Ishquipica, Yayitu Jehová  Diosca ñucanchij ima laya cajpipish paica cꞌuyanataca manataj saquinchu. Chaimantami siempre Jehovapi confiana canchij.

17. Salmo 33:18 al 22-pi nishca shinaca ¿imapitaj confiana canchij?

¹⁷ Pruebacunata chꞌimbapurashpa Jehová Diosta sirvishpa catichunca paillatajmi ñucanchijta ayudanga (2 Corintios 4:7-9). Profeta Jeremiasca: “Mandaj Dios llaquijllapimari, ñucanchijca mana tucuicuna chingarishcanchij. Ñucanchijta llaquinataca manataj saquishcachu” nircami (Lamentaciones 3:22). Dios paipaj cꞌuyaita ricuchinata manataj saquinapimi siempre confiana canchij. Salmo librota quillcaj runaca: “Mandaj Diosca paita manchajcunamantaca paipaj ñahuitaca mana anchuchinchu. Paipaj llaquij cashcapi shunguta churajcunamantaca paipaj ñahuitaca mana anchuchinchu” nircami (Salmo 33:18-22-ta liyipai).

18, 19. a) ¿Imatataj yuyarina canchij? b) ¿Catij yachaipica imatataj ricushun?

¹⁸ ¿Imatataj yuyarina canchij? Ñucanchijtaca callari punllamantami Jehová Diosca cꞌuyashca. Pero paita rijsishcamanta, paita sirvi callarishca horasmantami Yayitu Diosca ñucanchijta cꞌuyanataca manataj saquishca. Chashna cꞌuyashcamantami Jehová Diosca paimanta amataj caruyachun cuidanga. Paipaj munai maijan cashcatapish ñucanchijpaj pajtachinga. Shinallataj paica ñucanchij alli causachunmi ayudanga (Salmo 46:1, 2, 7). Chaimanta ima problemacunahuan chꞌimbapuracushpapish Yayitu Dios ñucanchijman fuerzata cunataca manataj cungarinachu canchij.

¹⁹ Jehová paita sirvijcunata cꞌuyanata manataj saquishcatami yachashcanchij. Chaimantami paica ñucanchijpish shujtajcunaman cꞌuyaita ricuchinata amataj saquichun munan. ¿Caita pajtachingapajca imatataj rurana canchij? Catij yachaipimi caimanta yachashun.