1. ¿Alli yuyaiyujcuna cashpaca imatataj rurashun?

 LLAQUICUNATA chari horasmi Diabloca Jehová Diosmanta, paipaj organizacionmanta caruyachisha nin. Pero ¿Diablo ñucanchijta ama pandachichunca imatataj rurana canchij? Ñucanchijca alli yuyaiyujcuna, rijcharishca, crishcapi sinchimi cana canchij (2 Timoteo 4:5-ta liyipai). Alli yuyaiyujcuna cashpaca mana rato pꞌiñarishunchu, resintirishca, llaquillapish mana saquirishunchu. Jehová Dios yuyashca shina yuyangapajpishmi esforzarishun.

2. ¿Cai yachaipica imallatataj yachashun?

² Pasaj yachaipica Diablo churashca quimsa trampacunamantami parlarcanchij. Cai yachaipica congregación ucupipish huaquinpica quimsa jarcaicuna tiyashcatami yachashun. Puntapica, shuj huauqui o shuj pani mana alli tratajpica imata rurana cashcatami yachashun. Ishquipica, Jehová Dios ñucanchijta disciplinajpica imata rurana cashcatami yachashun. Quimsapica, cambiocuna tiyajpica imata rurana cashcatapishmi ricushun.

3. ¿Shuj huauqui o shuj pani ñucanchijta llaquichijpica ima shinataj sintiri tucunchij?

³ ¿Maijan pani o shuj ancianoca cantachu llaquichishca? Tal vez chai huauquica cantaca mana llaquichisha nishcangachu (Romanos 3:23; Santiago 3:2). Pero canta llaquichishcamantami canca tal vez pꞌiñarircangui, dorminallatapish manachari pudircangui. Chai huauqui o pani chashna comportarijta ricushpaca “¿ciertochu cai organizacionca Diospaj can?” nishpachari tapurircangui. Diablomi chashna dudacunata charichun munan  (2 Corintios 2:11). Pero chashna yuyashpaca Jehová Diosmanta, paipaj organizacionmantapishmi caruyangui. Chaimanta ¿shuj huauqui o shuj pani canta llaquichijpica chai panda yuyaicunata ama charingapajca ima shinataj jarcarina cangui?

4. a) ¿Joseca paita llaquichijpipish alli yuyaiyuj cashcataca ima shinataj ricuchirca? b) ¿Josemantaca imatataj yachai tucunchij?

⁴ Ama resintirichu. Josepaj huauquicunaca paitaca achcatami pꞌiñarcacuna, huañuchinatapishmi munarcacuna (Génesis 37:4, 18-22). Chaimantami Josetaca esclavota shina cꞌatushpa cacharcacuna. Chashna llaquichishcamantami Joseca casi 13 huatacunata sinchi llaquicunata charirca. Shinapish Joseca Jehová Dios paita mana cꞌuyashcata, paita saquishcataca mana yuyarcachu. Resintirishcallapish mana carcachu (Génesis 45:4, 5). Ashtahuanpish alli yuyaiyuj cashcamantami paipaj huauquicunataca mana tigra llaquichirca. Ashtahuancarin paicunatami perdonarca. Joseca paillapi yuyanapaj randica Jehová Dios imata rurachun munashcataca allimi intindirca (Génesis 50:19-21-ta liyipai). ¿Josemantaca imatataj yachai tucungui? Cantapish llaquichijpica Jehová Dioshuanca mana resintirinachu cangui. Pai canta saquishcatapish mana yuyanachu cangui. Chaipaj randica llaquicunata ahuantachun Jehová Dios ima shina ayudacushcatami yuyana cangui. Shujtajcuna canta llaquichijpica cꞌuyaimantami paicunata perdonangapaj listo cana cangui (1 Pedro 4:8).

5. ¿Huauqui Miqueasca paita llaquichijpipish ama resintirishcalla saquiringapajca imatataj rurarca?

⁵ América del Surmanta Miqueas shuti ancianopi yuyashun. Paitaca shujtaj ancianocunami mana alli tratarcacuna. Huauqui Miqueasca: “Ñucataca mana nunca chashna tratashcacunachu carca. Chaimantami preocupado, dimastij llaquilla carcani. Tutapicarin manchanaita huacashpami dorminallatapish mana pudircani” ninmi. Chashna sintirishpapish Miqueasca mana resintirishcalla, mana llaquilla saquirircachu. Chaipaj randica Jehová Diostami paipaj espíritu santota cuchun, chaita ahuantangapajpish fuerzasta cuchun mañarca. Ñucanchij publicacioncunapipish ahuantashpa catingapajmi investigarca. ¿Huauqui Miqueasmantaca imatataj yachai tucungui? Cantapish shuj huauqui o shuj pani llaquichijpica mana rato pꞌiñarinachu cangui. Resintirishcalla o llaquillapish mana saquirinachu cangui. Huauqui o pani chai punllapi ima llaquita, ima problemata charishcataca mana yachanguichu. Chaimantami Jehová Diosta mañashpa chai huauquita o panita intindingapajca ayudachun mañana cangui. Chaita rurashpaca chai huauqui o pani canta mana llaquichisha nishcatami alli intindingui, paitapish shungumantami perdonangui (Proverbios 19:11). Jehová Diosca can ima shina sintirishcataca allimi yachan. Chaimantami canmanca chai llaquita ahuantashpa catichun fuerzasta cunga (2 Crónicas 16:9; Eclesiastés 5:8).

6. ¿Jehová Dios ñucanchijta cꞌuyashcamanta corregishcataca imamantataj yuyarina canchij?

⁶ Jehová Dios ñucanchijta corregijpica maipica dimastijmi llaquiri tucunchij. Pero llaquirishpalla saquirishpaca, chai corregishcacuna ñucanchijpaj mana alli cashcata o yangamanta ñucanchijta corregishcatami yuyashun. Chashna yuyashpaca Jehová Dios ñucanchijta cꞌuyashcamanta corregishcataca mana cuentata cushunchu (Hebreos 12:5, 6, 11-ta liyipai). Ashtahuancarin llaquilla saquirishcamantami Diabloca ñucanchijta ashtahuan llaquichisha ninga. Paica corregishcata ama chasquichun Jehová Diosmanta, paipaj organizacionmantapish caruyachunmi munan. Chaimanta ¿canta corregishca cajpica imatataj rurana cangui?

7. a) ¿Apóstol Pedro corregishcata chasquishcamantaca Jehová Diosca paimanca ima responsabilidadcunatataj mingarca? b) ¿Apóstol Pedromantaca imatataj yachai tucunchij?

 ⁷ Jehová Dios corregishcata chasqui. Jesucristoca huaquin cutincunami Pedrotaca shujtajcunapaj ñaupajpi corregirca (Marcos 8:33; Lucas 22:31-34). Chaimi Pedroca pingarishcanga. Shinapish paica Jesusta catinataca mana saquircachu. Chaipaj randica Jesús corregishcatami chasquirca, mejorashpa catingapajpishmi esforzarirca. Chaimantami Jehová Diosca Pedrotaca achcata bendiciarca, valishca responsabilidadcunatapishmi paiman mingarca (Juan 21:15-17; Hechos 10:24-33; 1 Pedro 1:1). ¿Pedromantaca imatataj yachai tucungui? Jehová Dios ñucanchijta corregijpica mana pingarishpami corregishcata chasquina cangui, mejorangapajpishmi esforzarina cangui. Chashnami Jehová Diosta, huauqui panicunatapish ashtahuan alli sirvingui.

8, 9. a) ¿Huauqui Bernardoca paita corregijpica ima shinataj sintirirca? b) ¿Corregishcata chasquingapajca imatataj rurarca?

⁸ Mozambiquemanta huauqui Bernardopi yuyashun. Paica ancianomi carca. Shinapish chai privilegiotami quichurcacuna. ¿Chaipica paica ima shinataj sintirirca? Huauqui Bernardoca: “Ñucata chashna corregichunca mana munarcanichu. Chaimantami dimastij llaquilla sintirircani” ninmi. Paica huauqui panicuna paimanta mana allicunata yuyanatami mancharca. Bernardoca: “Dios corregishcacuna ñucapaj alli cashcata intindingapaj, Jehová Diospi, paipaj organizacionpipish cutin confiangapajca huaquin quillacunatami minishtircani” ninmi. Pero ¿alli yuyaiyuj cangapajca Bernardoca imatataj rurarca?

⁹ Bernardoca corregishcatami chasquirca. Paica: “Ñuca anciano cai horasca huauqui panicuna corregishcata alli chasquichunca Hebreos 12:7-tami liyij carcani. Chaita yuyarishpami “¿cai versopi ima nishcacunataca manachu ñucapish pajtachina cani?” nishpa tapurircani. Chashna tapurishpaca ñucapish chaicunata pajtachina cashcatami intindircani” ninmi. Huauqui Bernardoca Jehová Diospi confiangapaj, Diospaj organizacionpi confiangapajca Bibliatami ashtahuan liyi callarirca, imata liyishcapipish ashtahuanmi yuyai callarirca. Huauqui panicuna paimanta mana allicunata yuyanata manchashpapish paicunahuanmi predicacionman llujshij carca, tandanacuicunapipish comentariocunatami cuj carca. Tiempohuancarin huauqui Bernardoca cutinmi anciano  tucurca. Cantapish huauqui Bernardota laya corregishca cajpica, pingarishpa saquirinapaj randica corregishcata chasquishpami cambiocunata rurana cangui (Proverbios 8:33; 22:4). b Chashnami Jehová Diosca paimanta, paipaj organizacionmantapish mana caruyashcamanta achcata bendicianga.

10. ¿Israelitacunapajca ima cambiocunata pajtachinataj sinchi ricurirca?

¹⁰ Diospaj organizacionpi ima cambio tiyajpica maipica chaita pajtachinaca sinchimi can. Chai cambiocunata mana catishpaca Jehová Diosmantami caruyashun. Ñaupa tiempopi causashca israelitacunapi yuyashun. Israelitacunapaj cada familiapaj pushajcunaca, paicunapaj familiamantami Jehová Diosman sacrificiocunata rupachishpa cujcuna carca (Génesis 8:20, 21; 12:7; 26:25; 35:1, 6, 7; Job 1:5). Pero ñapishmi shuj cambio tiyarca. Jehová Diosca Moisesman cushca leypica familiacunata pushajcuna sacrificiocunata ña mana rupachina cashcatami huillarca. Ashtahuanpish Jehová Diosca Aarontapish, paipaj familiamanta runacunatapishmi sacerdotecuna cachun nombrarca. Paicunallami tucui israelitacunamanta sacrificiocunata rupachishpa Diosman cuna carca. Maijanpish sacerdote mana cashcahuan sacrificiocunata rupachishpa Diosman cushpaca tal vez huañui tucurcami (Levítico 17:3-6, 8, 9). c ¿Coré, Datán, Abiram, 250 pushajcunapish cai cambiocuna tiyashcamantachu Moisespaj, Aaronpaj contra jatarircacuna? (Números 16:1-3). Chaitaca mana alli yachanchijchu. Ima laya cashpapish Corepish, paita apoyaj runacunapish cambiocunata mana catishpami Diospaj contra shayarircacuna. Pero ¿cambiocuna tiyajpi Jehová Diosmanta ama caruyangapajca canca imatataj rurana cangui?

11. ¿Cohatitacunamantaca imatataj yachanchij?

¹¹ Diospaj organizacionpi ima cambiocuna tiyajpipish chaicunata tucui shunguhuan apoyangapajmi esforzarina cangui. Israelitacuna chaquishca pambapi cajpica Cohatpaj familiamanta levitacunaca Diospaj Arcatami apajcuna carca (Números 3:29, 31; 10:33; Josué 3:2-4). Chaica shuj jatun privilegiomi carca. Pero israelitacuna Dios cusha nishca allpata japijpica shuj cambiomi tiyarca. Diospaj Arcata shujtaj ladoman apanaca ña mana minishtirircachu. Chaimantami rey Salomón mandacushpaca huaquin cohatitacunata cantachun, pungucunata cuidachun, israelitacuna cushca contribucioncunatapish cuidachun churarca (1 Crónicas 6:31-33; 26:1, 24). Pero cai cambiocuna tiyajpipish paicunaca mana quejarircacunachu. Ashtahuan valishca trabajota mingachunpish mana mañarcacunachu. ¿Cohatitacunamantaca imatataj yachai tucungui? Diospaj organizacionpi ima cambiocuna tiyajpi chai cambiocuna mana can munashca laya cajpipish chaicunata apoyangapajmi esforzarina cangui. Jehová Dios ima trabajota mingajpipish chaitaca tucui shunguhuanmi pajtachina cangui. Diospaj organizacionpi imata rurashpapish Jehová Diospajca valishcami canchij. Jehová Diosta tucuipi cazunami tucuimanta yalli ashtahuan importante can (1 Samuel 15:22).

12. ¿Pani Zainaca Betelpi sirvinata saquishpaca ima shinataj sintirirca?

¹² Oriente Mediomanta pani Zainapi yuyashun. Paica 23 huatacunata yallimi Betelpi sirvirca. Chaipi sirvinataca paica achcatami munarca. Shinapish qꞌuipaca paitaca precursora especial cachunmi nombrarcacuna. Paica:  “Cai cambio tiyajpica dimastij llaquillami sintirircani. Imapaj mana valishcatami yuyarcani. ‘¿Imatashi mana alli rurarcani?’ nishpapishmi tapurircani” ninmi. Huaquin huauqui panicunacarin cai panitaca: “Cambaj trabajota allita rurashca cajpica caiman mana cachaimanchu carca” nishpami desanimachircacuna. Pani Zainaca dimastij llaquilla cashcamantami tutacunapica huacai solo pasarca. Paica: “Chashna achca llaquilla sintirishpapish Jehová Dios, Diospaj organizacionpish ñucata achcata cꞌuyashcatami siempre yuyarircani” ninmi. ¿Cai panica ama llaquilla saquiringapajca imatataj rurarca?

13. ¿Pani Zainaca ama llaquilla sintiringapajca imatataj rurarca?

¹³ Pani Zainaca ama llaquilla saquiringapajca ñucanchij publicacioncunapimi achcata estudiarca. Por ejemplo, 1 de febrero de 2001-pi llujshishca La Atalaya revistapica “Usted puede afrontar el desánimo” nishca yachaimi paitaca achcata ayudarca. Chai yachaipica Marcospish pani Zaina shinallataj cambiocuna tiyajpi desanimarishcatami yachachin. Pani Zainaca: “Marcospaj ejemplomanta yachashpaca achcatami animarircani” ninmi. Paica paipaj amigocunahuan canata, huauqui panicunahuanpish canata mana saquishcamantami ña mana llaquilla sintirirca. Ashtahuanpish Jehová Diosllataj paipaj espíritu santohuan paipaj organizacionpi cambiocunata rurashcatami intindirca. Dios churashca pushaj huauquicunapish paimanta preocuparishcatapishmi intindirca. Diospaj organizacionpaj Dios mingashca obrata pajtachina ashtahuan importante cashcatapishmi intindirca.

14. a) ¿Huauqui Vladoca ima cambiocunatataj rurana carca? b) ¿Chai cambiocunata pajtachingapajca imatataj yuyarirca?

¹⁴ Eslovenia llajtamanta Vlado shuti ancianopi yuyashun. Paica 73 huatacunatami charin. Shuj cutinca sucursalpi trabajaj huauquicunaca paipaj congregacionta huichcachun, shujtaj congregacionpi sirvichunmi nircacuna. Chaicunata pajtachinaca huauqui Vladopajca sinchimi carca. Paica: “Ñuca Tandanacuna Huasica alajami carca. Cunanllami allichishca carcanchij. Ñuca carpintero cashcamantami Tandanacuna Huasipajca huaquin cosascunata rurashca carcani. Chaimantami chai Tandanacuna Huasita ña ama utilizachun nishcataca mana intindircani. Ashtahuancarin ñuca laya mayorlla huauqui panicunaca chai cambiocuna tiyashcamantami huaquin jarcaicunata chari callarircanchij”  ninmi. Pero ¿chai cambiocunata apoyangapajca huauqui Vladoca imatataj yuyarirca? Paica: “Diospaj organizacionpi cambiocunata pajtachijpi Jehová Dios ñucanchijta bendicianatami yuyarircani. Chai cambiocunata pajtachishpaca shamuj punllacunapajpishmi allichirishca cashun” ninmi. ¿Cantapish shujtaj congregacionman richun nijpi o shujtaj asignacionta mingajpica preocuparinachu cangui? Mana. Jehová Diosca can ima shina sintirishcataca allimi yachan. Can chai cambiocunata pajtachishpa Jehová Diosmanta, Diospaj organizacionmantapish mana caruyashpaca achca bendicioncunatami charingui (Salmo 18:25).

15. ¿Congregación ucupi jarcaicunata charishpaca imatataj rurana canchij?

¹⁵ Cai tucuri punllacuna quichquiyamucushcamantami maipica congregación ucupica jarcaicunata charinchij. Pero chai jarcaicunahuan chꞌimbapurangapajca alli yuyaiyujcunami cana canchij. Chaimanta shuj huauqui o shuj pani ñucanchijta llaquichijpica mana pꞌiñarishpalla, mana resintirishpalla saquirinachu canchij. Jehová Dios ñucanchijta corregijpipish pingarishpalla saquirinapaj randica, chai corregishcata chasquishpami cambiocunata rurana canchij. Diospaj organizacionpi cambiocuna tiyajpi, chai cambiocuna mana ñucanchij munashca laya cajpipish chaicunata tucui shunguhuan apoyangapajmi esforzarina canchij.

16. ¿Jehová Diospi, paipaj organizacionpi confiashpa catingapajca imatataj rurana cangui?

¹⁶ Ima jarcaicuna ricurijpipish Jehová Diospi, paipaj organizacionpimi confiashpa cati tucungui. Chaipajca alli yuyaiyujcunami cana canchij. Alli yuyaiyujcuna cashpaca mana pꞌiñarishpalla, mana resintirishpalla saquirishunchu. Ashtahuanpish Jehová Dios yuyashca shinami yuyashun. Bibliapica cai laya jarcaicunata charishca Diosta sirvijcunamantami yachai tucungui. Paicunamanta yachashcapipish cutin cutinmi yuyana cangui. Qꞌuipaca Jehová Diostapish ayudachunmi mañana cangui. Huauqui panicunamantapish manataj caruyanachu cangui. Caicunata rurajpica Diabloca Jehová Diosmanta, paipaj organizacionmantaca manataj caruyachi tucungachu (Santiago 4:7).