1, 2. a) ¿Cai yachaipica imacunallatataj ricushun? b) ¿Jehová Dios ñucanchijta ayudasha nishcataca ima shinataj yachanchij?

 JEHOVÁ DIOSCA llaquicunata ahuantachun, paita cushicuihuan sirvichunmi ayudasha nin. Cai yachaipica Jehová Dios ñucanchijta ima shina ayudashcata, paipaj ayudata chasquingapaj imata rurana cashcatapishmi yachashun. Pero puntapica Jehová Dios ñucanchijta ayudashataj nishcatami yachashun.

² Hebreos nishca cartapica apóstol Pabloca: “Jehová Diosmi ñucata ayudajca. Mana manchashachu. ¿Runaca imatataj rurai tucungari?” nircami (Hebreos 13:6). Cai versomanta parlashpaca huaquin diccionariocunapica: “Pi ayudata mañajpi chai rato volashpa ayudanaman chayajtami nisha nin” nincunami. Caipi nishca shinaca Jehová Diosmi volashpa ñucanchijta ayudanaman shamun, paica ñucanchijtaca shungumantami ayudasha nin. Chaimantami Jehová Dios ñucanchijhuan cajpica tucui laya llaquicunata ahuantai tucushun.

3. ¿Jehová Diosca cushilla ahuantashpa catichunca ima shinataj ñucanchijta ayudan?

³ ¿Jehová Diosca cushicuihuan ahuantachunca ima shinataj ñucanchijta ayudan? Isaías libropimi caita yachai tucunchij. Isaías libropi tiyaj nishcacunaca cunan punllacunapimi ñucanchijta ayudan. Chai libropica Jehová Dios ima shina cashcataca intindirinalla shimicunahuanmi yachachin.  Por ejemplo, capítulo 30-pica Jehová Dios paipaj pueblota ima shina ayudashcata yachachingapajca alaja chꞌimbapuraicunatami churan. Chai capitulopica Jehová Dios ñucanchij mañashcacunata alli uyaj, cutichij cashcata, ñucanchijman yachachij cashcata, bendiciaj cashcatapishmi yachachin. Cunanca cai yuyaicunamantami yachashun.

4. a) ¿Judiocuna mana cazushcamantaca imataj tucurcacuna? b) ¿Cazuj judiocunataca Jehová Diosca ima shinataj ayudarca?

⁴ Isaías capítulo 30, versos 1 y 9-pica Jehová Diosca judiocunataca: ‘Mandaj Diosmanta caruyajcunalla, cancunaca ashtahuan ashtahuanmi juchacunata ruracunguichij. Mandaj Dios mandashcatapish mana uyasha nicunguichijchu’ nircami. Paicuna mana cazushcamantami Isaiasca israelitacuna llaquipi urmachun Jehová Dios saquigrishcata huillarca (Isaías 30:5, 17; Jeremías 25:8-11). Y chaica pajtarircami. Babiloniocunaca judiocunatami esclavocunata shina aparcacuna (Isaías 30:18, 19-ta liyipai). Pero huaquin judiocunaca Diosta cazujcunami carca. Chaimantami profeta Isaiasca Jehová Dios paicunata ayudanata huillarca. Shinapish Jehová Diosca chai shimicunataca mana chai rato pajtachircachu. Profeta Isaiasca “Mandaj Diosca cancunata llaquingapaj shuyacunmi” nishcami carca. Chaimi 70 huatacuna qꞌuipaca Jehová Diosca huaquin judiocunata Jerusalenman tigrachun ayudarca (Isaías 10:21; Jeremías 29:10). Chai judiocuna Jerusalenman tigrashpaca cushicuimantami huacarcacuna.

5. ¿Isaías 30:19-mantaca imatataj yachanchij?

⁵ Profeta Isaiasca: ‘Yayitu Dios llaquishpa, cancuna caparishpa mañashcata uyaihuanmi cutichinga’ nircami (Isaías 30:19). Caipi nishca shinaca Jehová Diosca shungumantami ñucanchijta ayudasha nin. Caita yachashcamantami ima llaquicunata charishpapish cushicuihuan tucuita ahuantashpa catishun.

6. ¿Jehová Dios cada unopaj mañashcacunata uyashcataca ima shinataj yachanchij?

⁶ Isaías 30:19-pica Yayitu Dios ñucanchij mañashcacunata uyashcatami yachachin. Capítulo 30-paj callari versocunapica Jehová Diosca tucuicunamanta parlashpami “cancuna” nin. Pero ñaupa quillcachishcacunapica Isaías 30, verso 19-pica: ‘Jatun Dios canta llaquishpa, can caparishpa mañashcata uyaihuan cutichishcamantaca ña manataj huacanguichu’ ninmi. Caipi nishca shinaca Jehová Diosca canmantami preocuparin. Paimi canta cꞌuyaj Yaya can. Chaimanta can llaquicunahuan cajpica “cambaj huauqui laya o cambaj pani laya sinchimi cana cangui” nishpaca Jehová Diosca pihuan mana comparanchu. Ashtahuanpish paica canmanta preocuparishpami can mañashcacunataca alli uyan (Salmo 116:1; Isaías 57:15).

7. ¿Isaiaspish, Jesucristopish nishca shinaca imamantataj Jehová Diosta cutin cutin mañana canchij?

⁷ Ima llaquicunata ahuantachunca Jehová Diosca ñucanchijmanca fuerzasta cushpami ayudanga. Ñucanchij munashca shina chai llaquicuna mana tucurijpica, mana upallashpallami Jehová Diosta cutin cutin mañashpa catina canchij. Jehová Diosllatajmi ñucanchijmanca chashna mañachun yachachishca (Isaías 62:7). Jesucristopish Lucas capítulo 11, versos 8 al 10 y 13-pica huaquin chꞌimbapuraicunata churashpami espíritu  santota cuchun Jehová Diosta cutin cutin mañana cashcata yachachirca. Shinallataj alli decisioncunata agllangapajca mana upallashpallami Jehová Diosta cutin cutin mañashpa catina canchij.

8. ¿Isaías 30:20, 21-pi tiyaj shimicunaca ima shinataj pajtarirca?

⁸ (Isaías 30:20, 21-ta liyipai). b Babilonia llajtamanta soldadocunaca Jerusalén muyundijpimi shuj huata chaupita carcacuna. Chai tiempopica judiocunaca tandallata micucuj shina, yacullata ubyacuj shinami punllanta llaquirishpa, sustarishpa causarcacuna. Pero versículos 20 y 21-pica, Isaiasca judiocuna mana allicunata saquijpi Jehová Dios paicunata quishpichinata, paita alli adorachun yachachinatapishmi huillarca. Cai shimicunaca Babilonia llajtamanta judiocuna llujshina horaspimi pajtarirca. Jehová Diosca tucuimanta yalli Alli Yachachij cashcatami ricuchirca. Judiocunaman yachachishcamantami judiocunaca Diosta alli adorai tucurcacuna. Cunan punllacunapipish Jehová Dios ñucanchijta yachachicushcamantami cushilla sintirinchij.

9. ¿Cunan punllacunapica Jehová Diosca ima shinataj ñucanchijta yachachin?

⁹ Jehová Dios ñucanchijta yachachichun saquinaca allimi can. Isaiasca cai versocunapica Jehová Dios shuj Yachachij shina cashcata, cutin ñucanchijcuna yachacujcuna shina cashcatami yachachin. Chaimantami Jehová Diosca ñucanchijpaj ñaupajpi yachachicuj shina can. Chaitaca ñucanchij ñahuicunallahuantajmi ricucunchij. Cai tiempopica Jehová Diosca paipaj organizacionta utilizashpami ñucanchijta alajata yachachicun. Por ejemplo, tandanacuicunapi, asambleacunapimi ñucanchijtaca yachachin. Shinallataj publicacioncunahuan, videocunahuan, shujtaj ruraicunahuanpishmi ñucanchijtaca yachachin. Chai yachachishcacunata catishpaca llaquicunata cushicuihuanmi ahuantai tucushun.

10. ¿Jehová Dios ñucanchij huashamanta parlacujta uyangapajca imatataj rurana canchij?

¹⁰ Verso 21-pica Isaiasca Jehová Dios ñucanchij huashamanta yachachicujtami nirca. Jehová Diosca ñucanchijcuna alli ñanta  purichunmi ñucanchij huashamanta yachachicuj shina can. Cunan tiempopica Bibliata liyishpaca paita uyacuj shinami canchij. Bibliapica ñaupa tiempopi quillcashca alaja yuyaicunami tiyacun. Chaicunata liyijpica Jehová Diosca ñucanchijpaj huashamanta yachachicuj shinami can (Isaías 51:4).

11. ¿Cushicuihuan ahuantangapajca imatataj rurana canchij?

¹¹ Isaías 30:21-pica: “Caimari ñan, paillapi purichij” ninmi (Isaías 30:21). ¿Cai versopi ima nishcataca ima shinataj pajtachina canchij? Dios ricuchishca ñanpi puricuj shinami pai yachachishcacunata pajtachina canchij. Bibliapi, Diospaj organización cushca publicacioncunapipish Jehová Dios imata rurachun munashcata, chaicunata ima shina pajtachinatami yachanchij. Caicunata rurashpaca llaquicunataca cushicuihuanmi ahuantashun, Jehová Dios ñucanchijta bendicianatapishmi seguros cashun.

12. Isaías 30:23-26-pi nishca shinaca ¿Jehová Diosca paipaj pueblotaca ima shinataj bendiciarca?

¹² (Isaías 30:23-26-ta liyipai). ¿Cai profeciaca ima shinataj pajtarirca? Babilonia llajtamanta llujshishca huashaca Jehová Diosca judiocunamanmi achca bendicioncunata curca. Jehová Diosca paicunamanca achca micunacunatami cararca, paita cutin alli sirvichunpishmi alajata yachachirca. Chai tiempopi causaj judiocunaca Diospaj yachachishcacunataca mana charishcacunachu carca. Pero Yayitu Diosca paipaj yachachishcacunahuanmi paicunamanca yallitaj achijyachirca (Isaías 60:2). Chai bendicioncunata chasquishcamantami judiocunaca dimastij cushilla sintirircacuna, Diosta sirvingapajpish fuerzasta charircacuna (Isaías 65:14).

13. ¿Isaías 30:23 al 26-pi tiyaj profeciaca ima shinataj pajtarishca?

¹³ ¿Cunan punllacunapica cai profeciaca ima shinataj pajtarishca? 1919 huatamantami achca millón gentecunaca Babilonia llajtamanta israelitacuna llujshishca shina panda religioncunamanta llujshircacuna. Paicunaca Jehová Diosta sirvicushcamantami shuj paraisopi causacushca laya Diosta tandalla sirvicuncuna (Isaías 51:3; 66:8).

14. ¿Shuj paraisopi caj shinaca ima shinataj Jehová Diosta adoranchij? (Notata ricui).

¹⁴ 1919 huatamantami ungido huauqui panicunaca shuj paraisopi cashca shina  Jehová Diosta tandalla sirvicushcacuna. c Shujtaj ovejacunamanta huauqui panicunapishmi shuj paraisopi cashca shina Jehová Diosta tandalla sirvicushcacuna. Paicunapish achca bendicioncunatami Jehová Diosmanta chasquishcacuna (Juan 10:16; Isaías 25:6; 65:13).

15. ¿Chꞌican chꞌican llajtacunapi causacushpapish imamantataj Jehová Diosta tandalla adorai tucunchij?

¹⁵ Cai tiempopica Diosta sirvijcunaca chꞌican chꞌican llajtacunapimi Jehová Diosta sirvicunchij. Chashna chꞌican chꞌican llajtacunapi causacushpapish shuj paraisopi causacuj shinami Jehová Diosta tandalla sirvi tucunchij. Chaipajca Dios munashca shinami paita adorana canchij.

16. ¿Shuj paraisopi caj shina huauqui panicunahuan tandalla sirvishpa catingapajca imatataj rurana canchij?

¹⁶ Shuj paraisopi causacuj shina huauqui panicunahuan tandalla sirvishpa catingapajca, paicunapaj pandarishcacunallataca mana ricunachu canchij. Ashtahuanpish paicunapaj alli cualidadcunatami ricuna canchij (Juan 17:20, 21). Cai catij ejemplopi yuyashun. Shuj bosquepica tucui laya alaja yuracunami tiyan. Pero huaquin yuracunaca ashalla huishtumi cashcanga. Shinapish chashna ashalla huishtu cashcata ricunapaj randica tucui bosque alaja cashcatami ricuna canchij. Chai shinallatajmi ñucanchij huauqui panicunapish chai alaja yuracuna laya can (Isaías 44:4; 61:3). Paicunapaj pandarishcacunallata ricunapaj randica, paicunapaj alli ruraicunata valorashpami Diospaj pueblopi cashcamantaca agradecidos sintirina canchij.

17. ¿Huauqui panicunahuan tandalla cangapajca imatataj ashtahuan rurana canchij?

¹⁷ Tucui huauqui panicunahuan alli apanacungapajmi esforzarina canchij (Mateo 5:9; Romanos 12:18). Chaita rurashpaca shuj paraisopi caj shina paicunahuanmi  tandalla Diosta sirvishun. Jehová Diosca tucui huauqui panicunatami achcata cꞌuyan. Chaimantami paicunataca paipaj puebloman pushamushca (Juan 6:44). Ñucanchij huauqui panicunahuan alli apanacungapaj esforzarijpica Jehová Diosca cushillami sintirin (Isaías 26:3; Ageo 2:7).

18. ¿Imacunallapitaj cutin cutin yuyana canchij?

¹⁸ Jehová Diosca paita alli sirvichunmi achca bendicioncunata cushca. ¿Chaicunata aprovechangapajca imatataj rurana canchij? Bibliapi, publicacioncunapi imata yachashcapimi cutin cutin yuyana canchij. Chaita rurashpaca cꞌuyaj, llaquij, perdonaj, mana utca pꞌiñarijmi tucushun (Romanos 12:10). Jehová Dios cushca bendicioncunapipish yuyashpaca paipajmanmi ashtahuan cꞌuchuyashun. Dios cusha nishcacunapipish yuyashpaca ñucanchij fetami sinchiyachishun. Chashnami Jehová Diostaca cushilla sirvishpa catishun.

19. a) ¿Isaías 30:18-pica imatataj yachachin? b) ¿Cushicuihuan ahuantashpa catingapajca imatataj rurana canchij?

¹⁹ Cai mundo tucurina horaspimi Jehová Diosca ñucanchijta quishpichinga (Isaías 30:18). Ñucanchijca Jehová Dios allita ruraj cashcataca segurosmi canchij. Chaimantami Jehová Diosca cai mundopi tiyaj ruraicuna huiñaipaj tiyachunca mana saquinga. Cai mundota tucuchina punllaca manataj qꞌuipayangachu (Isaías 25:9). Chaimantami Jehová Diospish, ñucanchijpish pacienciahuan shuyashpa caticunchij. Chai punlla chayangacamaca Jehová Diosta shungumanta mañangapaj, paipaj Shimita estudiangapaj, pajtachingapaj, pai cushca bendicioncunapipish yuyangapajmi esforzarina canchij. Caicunata rurajpica Jehová Diosca tucui laya llaquicunata cushicuihuan ahuantachunmi ayudanga.