YACHAI 45
Jehová Diosca pai mingashcata pajtachichunmi ayudan
“Can huillajpimi, paicunapurapica shuj huillaj tiyashcataca yachangacuna” (EZEQUIEL 2:5).
CANTO 67 Diospaj Shimita huillashunchij
CAITAMI YACHASHUN a
1. ¿Predicangapaj jarcaicunata charishpapish imatataj rurana canchij?
CAI PUNLLACUNAPICA huaquin gentecunaca ñucanchijcuna ama predicachunmi jarcasha nincuna. Shamuj punllacunapipish ashtahuan jarcaicunata churanataca allimi yachanchij (Daniel 11:44; 2 Timoteo 3:12; Apocalipsis 16:21). Pero ñucanchijca Jehová Dios ayudanapimi confianchij. Jehová Diosca ñaupa tiempopipish paita sirvijcunapaj sinchi cajpipish shujtajcunaman predicachunmi ayudarca. Cai yachaipica Babiloniapi caj judiocunaman predicachun Jehová Dios ima shina Ezequielta ayudashcatami ricushun.
2. a) ¿Ezequiel predicashca gentecunaca ima shinataj carcacuna? b) ¿Cai yachaipica imatataj yachashun?
2 Ezequielca pꞌiñaj gentecunaman, rumi shungu gentecunaman, mana cazujcunamanpishmi predicana carca. Paicunaca casha yuracuna shina, escorpioncuna shinami yallitaj millai carcacuna. Chaimantami Jehová Diosca Ezequieltaca “paicunataca ama manchaichu” nirca (Ezequiel 2:3-6-ta liyipai). Pero ¿Jehová Diosca Ezequieltaca ima shinataj ayudarca? 1) Jehová Diosca Ezequieltaca paillataj predicachun cachashcatami yuyachirca, 2) paipaj espíritu santohuanmi fuerzasta curca, 3) paipaj nishcacunahuanmi sinchiyachirca. Cunanca Jehová Dios Ezequielta ima shina ayudashcata, ñucanchijtapish ima shina ayudacushcatami ricushun.
JEHOVÁ DIOSMI EZEQUIELTA PREDICACHUN CACHARCA
3. ¿Jehová Diosca Ezequieltaca imata nishpataj animarca?
3 Jehová Diosca Ezequielta predicachun cachashpaca Moisesta, Isaiasta animaj shinallatajmi animarca (Éxodo 3:10; Isaías 6:8). Jehová Diosca Ezequieltaca ishqui cutincunami: “Cantaca ñucami Israelcunapajman cachani” nirca (Ezequiel 2:3, 4). Chaita uyashpaca Ezequielca achcatami animarirca. Ezequielca Jehová Dios chai profetacunata ayudashca shinallatajmi paitapish ayudanata tucui shunguhuan crirca. Ashtahuancarin achca cutincunami Ezequielca “Mandaj Diosca ñucataca cashnami nirca” nishpami quillcarca (Ezequiel 3:16; 6:1). Chaimantami Ezequielca Jehová Dios paita apoyacushcataca seguro carca. Ezequielpaj yayaca sacerdotemi carca. Chaimantami paipaj yayaca Jehová Dios profetacunata siempre apoyashcata yachachishcanga. Jehová Diosca Isaactapish, Jacobtapish, Jeremiastapish: “Ñucami canhuan casha” nishpami animarca (Génesis 26:24; 28:15; Jeremías 1:8).
4. ¿Ezequielca imata uyashpataj animarirca?
4 ¿Israelitacunaca Ezequiel huillashcacunataca uyasha nircacunachu? Jehová Diosca Ezequieltaca: ‘Israelcunaca can huillashcataca, manataj uyasha ningacunachu. Paicunaca ñucataca mana uyasha nincunachu’ nircami (Ezequiel 3:7). Chai israelitacunaca Ezequielta mana uyashpaca Jehová Diostami mana uyasha nircacuna. Chaimantami Ezequielca pai mana alli profeta cashcataca mana yuyana carca. Gentecuna mana uyasha nijpipish paica tranquilomi sintirina carca. Ashtahuancarin Jehová Diosca Ezequieltaca: ‘Can nishcacuna pajtarijta israelitacuna ricushpaca paicunapurapi shuj profeta tiyashcataca allimi yachangacuna’ nircami (Ezequiel 2:5; 33:33). Caita uyashpami Ezequielca huillashpa catingapaj fuerzasta japirca.
JEHOVÁ DIOSMI ÑUCANCHIJTAPISH PREDICACHUN CACHAN
Ezequielta mana uyashca shinallataj, jarcashca shinallatajmi ñucanchijtapish jarcasha ningacuna. Pero Jehová Diosca ñucanchijtami ayudashpa catinga. (Párrafos 5 y 6-ta ricui).
5. Isaías 44:8-pi nishca shinaca ¿Jehová Diosca imata nishpataj ñucanchijta animan?
5 Jehová Diosca ñucanchijtapish predicachunmi cachan. Jehová Diosmanta huillajcuna cashcamantami cushilla sintirinchij (Isaías 43:10). Jehová Diosca Ezequielta animashca shinallatajmi ñucanchijtapish animashca. Paica ñucanchijtaca: “Ama manchaichijchu” ninmi. Pero ¿imamantataj predicanataca mana manchana canchij? Jehová Dios ñucanchijtapish ayudanata yachashcamantami mana manchana canchij (Isaías 44:8-ta liyipai).
6. ¿Jehová Dios ñucanchijta apoyacushcataca ima shinataj yachanchij?
6 ¿Jehová Dios ñucanchijta apoyacushcataca ima shinataj yachanchij? Jehová Diosca ñucanchijtaca: “Yacuta chꞌimbacujpipish ñucami canhuan casha. Jatun yacucunata chꞌimbacushpapish, mana millpuringuichu. Nina jahuata pasashpapish, mana rupanguichu. Lunyacuj ninapish, canpica mana japiringachu” ninmi (Isaías 43:2). Caipi nishca shinaca predicacushpaca, maipica yacuta chꞌimbacuj shina o nina jahuata pasacuj shinami chꞌican chꞌican jarcaicunata charinchij. Pero Jehová Dios ayudajpimi predicashpa catinchij (Isaías 41:13). Cai tiempopi gentecunapish Ezequielta mana uyashca shinallatajmi ñucanchijtapish mana uyasha nincuna. Pero mana uyasha nijpipish ñucanchijcuna mana alli predicajcuna cashcataca mana yuyanachu canchij. Ashtahuanpish predicashpa catishcamanta Jehová Dios cushilla cashcata yachashpaca achcatami animarinchij. Apóstol Pabloca: ‘Imata rurashcamantaca cada unomi japina cashcata japingacuna’ nircami (1 Corintios 3:8; 4:1, 2). Achca huatacunata precursora caj shuj panica: “Ñucanchij predicashcamanta Jehová Dios bendicianata yachashpaca cushillami sintirini” ninmi.
EZEQUIELCA ESPÍRITU SANTOTA CHASQUISHPAMI FUERZASTA JAPIRCA
Ezequielca muscuipi shinami Jehová Diospaj carrota ricucun. Chaita ricushpami yayitu Diosllataj paita ayudanapi confiacun (Párrafo 7-ta ricui).
7. ¿Ezequielca imata ricushcata yuyarishpaca imamantataj animarij carca? (Página unopaj dibujomanta parlapai).
7 Ezequielca Jehová Dios paipaj espíritu santohuan achca poderta charij angelcunata ayudashcata, shuj jatun carropaj ruedacunata pushacushcatapishmi ricurca (Ezequiel 1:20, 21). Chaita ricushpaca Ezequielca mancharishcami saquirirca. Chaimantami paica ñahui pambaman tupajta cumurirca (Ezequiel 1:28). Ezequielca imata ricushcata yuyarishpaca paipish Diospaj espíritu santohuan tucuita pajtachi tucushcatami yuyarij carca.
8, 9. a) ¿Jehová Diosca Ezequieltaca imatataj mandarca? b) ¿Jehová Diosca Ezequieltaca ima shinataj animarca?
8 Jehová Diosca Ezequieltaca: “Huañujlla aichayuj runalla, jatarishpa shayari, canhuanmi parlasha nini” nishpami mandarca. Chashna nishcahuanmi Diospaj espíritu santoca Ezequielpi yaicushpa jatarichirca, chashnami Ezequielca fuerzasta japirca (Ezequiel 2:1, 2). Qꞌuipaca Jehová Diosca paipaj maquita Ezequielpaj jahuapi churaj shinami paipaj espíritu santohuan pusharca (Ezequiel 3:22; 8:1; 33:22; 37:1; 40:1). Ezequielca Diospaj espíritu santota chasquishcamantami rumi shungu gentecunaman predicai tucurca (Ezequiel 3:7). Jehová Diosca Ezequieltaca: “Cambaj umataca, sinchi rumitapish yalli sinchi diamanteta shinami rurarcani. Paicunataca ama manchanguichu. Paicunapaj ñaupajpi cashpapish, ama mancharinguichu” nircami (Ezequiel 3:8, 9). Chashna nishpaca Jehová Diosca Ezequieltaca: “Paicuna desanimachichun ama saquichu, ñaupajman cati” nishpami fuerzasta cucuj shina carca.
9 Qꞌuipaca Jehová Diosca Ezequieltaca paipaj espíritu santohuanmi maipimi huillagrin pushtucunaman pusharca. Ezequielca ‘Mandaj Diosca paipaj maquihuanmi ñucataca sinchita charirashpa pusharca’ nircami. Chai huashaca Ezequielca Dios ima nishcata intindishpa ima shina huillanata yachacushpami shuj semanata pasarca (Ezequiel 3:14, 15). Qꞌuipacarin Ezequielca shuj chaquishca pambapi cashpami espíritu santohuan junda carca (Ezequiel 3:23, 24). Chaimi paica shujtajcunaman predicangapaj listo carca.
ÑUCANCHIJPISH ESPÍRITU SANTOTA CHASQUISHPAMI FUERZASTA CHARISHUN
¿Ezequiel shina predicashpa catingapajca imatataj rurana canchij? (Párrafo 10-ta ricui).
10. ¿Gentecunaman predicangapajca imatataj minishtinchij?
10 ¿Gentecunaman predicashpa catingapajca imatataj minishtinchij? Ezequielpi yuyashun. Paica espíritu santota chasquishpami predicangapaj fuerzasta japirca. Ñucanchijpish espíritu santota chasquishpallami gentecunaman predicashpa cati tucunchij. ¿Imamantataj chashna ninchij? Ñucanchijca espíritu santota chasquishcamantami, Diablo ama predicachun jarcaicunata churajpipish, pai achca poderta charijpipish mana saquirinchij (Apocalipsis 12:9-11, 17). Mana manchashpa gentecunaman predicashpaca Diablotami mishanchij, paita mana manchashcatapishmi ricuchinchij. Chaimi Jehová Dios ñucanchijman paipaj espíritu santohuan fuerzasta cucushcata, bendiciacushcatapish intindinchij (Mateo 5:10-12; 1 Pedro 4:14).
11. ¿Diostaca paipaj espíritu santota cuchunca imamantataj mañashpa catina canchij?
11 Jehová Dios Ezequielta sinchiyachishca shinallatajmi ñucanchijmanpish paipaj espíritu santota cushpa sinchiyachinga. Chashnami ima jarcaicuna ricurijpipish tucuita ahuantai tucushun (2 Corintios 4:7-9). Shinaca ¿Diospaj espíritu santota chasquishpa catingapajca imatataj rurana canchij? Jehová Diostami cutin cutin shungumanta mañashpa catina canchij. Jesucristoca paipaj discipulocunataca: “Mañashpa catichij, mashcashpa catichij, punguta huajtashpa catichij” nircami. Chashna mañajpica Jehová Diosca paipaj espíritu santotami ñucanchijman cungalla (Lucas 11:9, 13; Hechos 1:14; 2:4).
EZEQUIELCA DIOSPAJ SHIMICUNATA CHASQUISHPACA ALIMENTARIJ SHINAMI SINCHIYARIRCA
12. Ezequiel 2:9 al 3:3-pi nishca shinaca ¿quillcashca rolloca maimantataj shamurca?, ¿chai rolloca ima mensajetataj charirca?
12 Ezequielca Diospaj shimicunata chasquishpaca alimentarij shinami sinchiyarirca. Paica shuj maqui shuj quillcashca rollota charicujtami ricurca (Ezequiel 2:9–3:3-ta liyipai). ¿Chai rolloca maimantataj shamurca? ¿Ima mensajetataj charirca? ¿Chai rollopi ima nishcata yachashpaca Ezequielca ima shinataj sinchiyarirca? Chai rolloca Jehová Diosmantami shamurca. Ezequiel ricushca chuscu angelcunamanta shuj angelmi chai rollotaca paiman curca (Ezequiel 1:8; 10:7, 20). Chai rollopica mana cazuj israelitacunahuan ima tucuna cashcatami huillacurca (Ezequiel 2:7). Chai rolloca ñaupajmanpish, huashamanpishmi quillcashca carca.
13. a) ¿Jehová Diosca Ezequieltaca imamantataj chai rollota micuchun mandarca? b) ¿Chai rolloca imamantataj yallitaj mishquijlla carca?
13 Shuj muscuipi shinaca Jehová Diosca profeta Ezequieltaca: “Canman carashca quillcashca rollota micushpa cambaj huijsapipish jundachi” nircami. Chashna nijpimi Ezequielca chai rollota micurca. ¿Chaica imatataj nisha nirca? Profeta Ezequiel Diospaj shimicunata alli intindina cashcatami nisha nirca. Ezequielca shujtajcunaman predicangapajca Diospaj shimicuna paipaj shunguman chayachunmi saquina carca. Shinallataj muscuipi shina Ezequielca chai rollota micushpaca yallitaj mishquijlla cashcatami sintirca (Ezequiel 3:3). Ezequielca chai mishquita munanajlla caj shinallatajmi Yayitu Diosmanta huillanataca achcata munarca (Salmo 19:8-11). Chaimantami Ezequielca Jehová Dios profeta cachun paita agllashcamanta achcata agradicirca.
14. ¿Ezequielca shujtajcunaman predicangapaj listo cangapajca imatataj rurana carca?
14 Qꞌuipaca Jehová Diosca Ezequieltaca: “Ñuca imalla nishca shimicunataca, cambaj shungupi huaquichingui. Cambaj rinrinhuantaj alli uyangui” nircami (Ezequiel 3:10). Jehová Diosca Ezequiel chai rollopi tiyaj shimicunapi cutin cutin yuyarichunmi munarca. Chashnami Ezequielca alli alimentarij shina predicangapaj fuerzasta japina carca (Ezequiel 3:11). Ezequielca Diospaj Shimicunata paipaj shungupi charishpaca shujtajcunaman predicangapajmi listo carca (Salmo 19:14-ta ricui).
ÑUCANCHIJPISH DIOSPAJ SHIMICUNATA CHASQUISHPACA ALLI ALIMENTARIJ SHINAMI SINCHIYARISHUN
15. ¿Huillanata ama saquingapajca imatataj rurana canchij?
15 Diosmanta huillanata ama saquingapajca Diospaj shimicunata yachashpami catina canchij. Diospaj shimicunapish ñucanchij shunguman chayachunmi saquina canchij. Cunan punllacunapica Diospaj shimicunataca Bibliapimi charinchij. Pero ¿Diospaj shimicuna ñucanchij shunguman chayachunca imatataj rurana canchij?
16. ¿Diospaj shimicuna ñucanchij shunguman chayachunca imatataj rurana canchij?
16 Alli micunata micunaca Bibliata liyina shinami can. Pero chai micunamanta beneficiaringapajca micunata alli cashtushpami pasachina canchij. Chai micunata alli cashtushpa pasachicuj shinami Bibliamanta imata liyishcapipish, imata yachashcapipish cutin cutin yuyana canchij. Chaimantami Diospaj shimicuna ñucanchij shunguman chayachunca puntaca Jehová Diosta mañana canchij. Qꞌuipaca Bibliapica huaquin versocunatami liyina canchij. Chai huashaca imata liyishcapipish, imata yachashcapipishmi cutin cutin yuyana canchij. Chaita rurajpica Diospaj shimicunaca ñucanchij shungumanmi chayanga.
17. ¿Bibliamanta liyishcacunapica imamantataj cutin cutin yuyana canchij?
17 ¿Imamantataj Bibliataca liyina canchij? ¿Liyishcapipish imamantataj yuyana canchij? Chaita rurashpaca Diospaj Gobiernomanta predicangapajmi fuerzasta charishun. Millai gentecuna tucurigrishcata ñalla huillangapajpishmi mana manchashun. Ashtahuancarin Jehová Dios cꞌuyaj, perdonaj, allita ruraj cashcapi cutin cutin yuyashpaca paipajmanmi ashtahuan cꞌuchuyashun. Chashnami ñucanchij shungupipish, yuyaipipish cushilla sintirishun (Salmo 119:103).
MANA MANCHASHPA ÑAUPAJMAN CATISHUNCHIJ
18. ¿Gentecunaca Jehová Dios juzgana punllapica imatataj cuentata cungacuna?
18 Ezequiel shina profetacuna mana cashpapish ñucanchijca Diospaj Shimimantami predicashpa catinchij. Jehová Dios “caicama huillaichij” ningacamami predicashpa catishun. Yayitu Dios juzgana punllapica gentecunaca “ñucanchijmanca pi mana huillashcachu” nishpaca mana ni tucungacunachu (Ezequiel 3:19; 18:23). Ashtahuanpish chai gentecunaca ñucanchij huillashcacuna Jehová Diosmanta shamushcatami cuentata cungacuna.
19. ¿Huillashpa catichunca Jehová Diosca ima shinataj ñucanchijta sinchiyachin?
19 ¿Gentecunaman huillashpa catichunca Jehová Diosca ima shinataj ñucanchijta sinchiyachin? Ezequielta sinchiyachishca shinallatajmi ñucanchijtapish sinchiyachin. Chaipajca Jehová Diosca pai ñucanchijta predicachun cachashcatami yuyachin. Paipaj espíritu santohuanpishmi predicangapaj fuerzasta cun. Paipaj Shimihuanpishmi alli micunata cucuj shina sinchiyachin. Jehová Dios ñucanchijta chashna ayudacushcata yachashpami tucuringacama predicashpa, ahuantashpa catishun (Mateo 24:13).
CANTO 65 ¡Sinchiyashpa ñaupajman catishunchij!
a Cai yachaipica Jehová Dios pai nishcacunata huillachun profeta Ezequielta ayudashcatami ricushun. Chaita yachashpaca ñucanchijtapish Jehová Dios ayudanapimi tucui shunguhuan crishun.