YACHAI 47
Jehová Diosmantaca pi ama chꞌicanyachichun
“Ñucaca Mandaj Dioslla, quiquinpimi shunguta churani” (SALMO 31:14).
CANTO 122 ¡Tucuri punllacama amataj shaicurishunchij!
CAITAMI YACHASHUN a
1. ¿Jehová Diosca ñucanchij cꞌuchullapi casha nishcataca ima shinataj ricuchin?
JEHOVÁ DIOSCA ñucanchij Dios, ñucanchij Yaya, ñucanchij amigomi casha nin. Chaimantami ñucanchijtaca paipajman cꞌuchuyachun mañacun (Santiago 4:8). Jehová Diosca ñucanchij mañashcacunataca siempremi cutichin. Ima llaquicunata charijpica ñucanchijta ayudangapajca listomi can. Ashtahuancarin paipaj organizacionhuanmi ñucanchijtaca alli cuidan, alajata yachachin. Pero ¿Jehová Diospaj cꞌuchullapi cangapajca imatataj rurana canchij?
2. ¿Jehová Diospajman cꞌuchuyangapajca imatataj rurana canchij?
2 Jehová Diosta shungumanta mañashpa, Bibliata liyishpa, imata yachashcapi cutin cutin yuyashpami paipajmanca ashtahuan cꞌuchuyashun. Chashnami Jehová Diosta ashtahuan cꞌuyashun, paihuanpish agradecidos cashun. Jehová Diosta tucuipi cazunata, paita alabanatapishmi munashun (Apocalipsis 4:11). Jehová Diosta ashtahuan rijsishpa, paipaj organización ñucanchijta cuidacushcata ricushpaca Jehová Diospi, paipaj organizacionpimi tucui shunguhuan confiashun.
3. a) ¿Diabloca Yayitu Diosmantaca ima shinataj chꞌicanyachisha nin? b) ¿Jehová Diosmanta, paipaj organizacionmanta ama caruyangapajca imatataj rurana canchij?
3 Diabloca ñucanchijcuna llaquicunata chari horasmi ashtahuantajca Diosmanta caruyachisha nin. Paica Jehová Diospi ama confiachun, paipaj organizacionpi ama confiachunmi munan. Pero sinchi feta charishpa, Jehová Diospi tucui shunguhuan confiashpaca Jehová Diosmanta, paipaj organizacionmantapish manataj caruyashunchu. Chashnami Diabloca ñucanchijtaca mana mishanga (Salmo 31:13, 14-ta liyipai).
4. ¿Cai yachaipica imatataj yachashun?
4 Cai yachaipica Jehová Diospi, paipaj organizacionpi ama confiachun Diablo quimsa trampacunata churasha nishcatami ricushun. Pero chai trampacunapi ama urmangapaj imata rurana cashcatapishmi yachashun.
DIABLOCA LLAQUICUNATA CHARI HORASMI JEHOVÁ DIOSMANTA CARUYACHISHA NIN
5. ¿Llaquicunata chari horasca Diabloca imata rurachuntaj munan?
5 Maipica tal vez ñucanchij familiaca Diosta ama sirvichunmi jarcaicunata churan o quizás trabajo illajmi saquirishcanchij. Chashna laya llaquicunata achca tiempota charishpaca llaquillami sintirinchij. Chaicunata allichina esperanzatacarin mana charinchijchu. Chaimi Diabloca Jehová Dios ñucanchijta mana cꞌuyashcata crichun munan. Jehová Diostapish, paipaj organizaciontapish culpachunmi munan. Diabloca israelitacunatapishmi chashnallataj pandachirca. Callaripica israelitacunaca Egiptomanta paicunata llujchichun Aaronta, Moisesta Jehová Dios agllashcatami crircacuna (Éxodo 4:29-31). Pero Egipto llajtata mandaj Faraón paicunata ashtahuan llaquichijpica Moisestapish, Aarontapishmi culparcacuna. Paicunaca: “Cancuna ñucanchijta chashna rurashpaca cancunallatajmari paicunapaj maquipi espadata churaj shina ñucanchijtaca huañuchichigringuichij” nircacunami (Éxodo 5:19-21). Dios churashca pushajcunata chashna culpanaca mana allichu carca. Tal vez canpish achca tiempotami llaquicunata charingui. Pero ¿Jehová Diospi, paipaj organizacionpi confiashpa catingapajca imatataj rurana cangui?
6. ¿Habacucmantaca imatataj yachai tucungui?
6 Can ima shina sintirishcataca Jehová Diosmanmi tucuita huillana cangui. Pai canta ayudanapipishmi confiana cangui. Profeta Habacucca achca llaquicunatami charirca. Chaimantachari Habacucca Jehová Dios paimanta mana preocuparishcata yuyashcanga. Chaimi paica ima shina sintirishcataca Jehová Diosman tucuita huillarca. Habacucca: ‘Mandaj Dioslla, ¿maicamataj mañacushallari? manataj uyahuanguica. ¿Ima nishpataj ñuca mana ricunachishca maillata ruranacunataca ricuchihuanguiyari?’ nircami (Habacuc 1:2, 3). Chashna mañajpimi Jehová Diosca paita cutichirca (Habacuc 2:2, 3). Qꞌuipaca Habacucca Jehová Dios paipaj pueblota ima shina quishpichishcata yuyarishpami cushilla, tranquilo sintirirca. Ashtahuancarin Jehová Dios paita cꞌuyashcata, paita ayudanatapishmi tucui shunguhuan crirca (Habacuc 3:17-19-ta liyipai). ¿Habacucmantaca imatataj yachai tucungui? Canpish llaquicunata charishpaca Jehová Diostami mañana cangui. Can ima shina sintirishcataca tucuitami huillana cangui. Pai canta ayudanapipishmi tucui shunguhuan confiana cangui. Jehová Diosca llaquicunata ahuantachunmi canmanca fuerzasta cunga. Dios canta chashna ayudashcata ricushpaca cambaj fetami sinchiyachingui.
7. a) ¿Shuj familiaca ima nishpataj Shirleytaca desanimachisha nirca? b) ¿Shirleyca Diosmanta ama caruyangapajca imatataj rurarca?
7 Jehová Diosta sirvinataca manataj saquinachu cangui. Papúa Nueva Guinea llajtamanta pani Shirleyca b Diosta sirvinata mana saquishcamantami llaquicunata ahuantai tucurca. Paipish, paipaj familiapish pobrecuna cashcamantami maipica suficiente micunata charinaca sinchi carca. Shuj cutinca shuj familiaca paipaj fetami chiriyachisha nirca. Chai familiaca pani Shirleytaca: “Canca ‘Diospaj espíritu santomi ñucanchijta ayudacun’ ninguimi. Pero ¿Diosca maitataj cancunata ayudacungayari? Cancunaca pobresmi cashpa catinguichij. Diosmanta predicashpapish cancunapaj tiempotami perdicunguichij” nircami. Chaimi Shirleyca “¿Jehová Dios ñucata, ñuca familiataca natijchu yuyarin?” nishpa tapurirca. Pani Shirleyca: “Chai ratomi Jehová Diosta ayudachun mañarcani. Ñuca ima shina sintirishcataca tucuitami huillarcani. Bibliatapish, publicacioncunatapishmi liyishpa catircani. Huillanamanpish, tandanacuicunamanpish manataj faltarcanichu. Chaimi Jehová Dios ñuca mañashcacunata cutichishcata ricurcani” ninmi. Pani Shirleyca Jehová Dios paicunata cuidacushcata, micunacunatapish caracushcata, Jehová Diosta cushilla sirvicushcatapishmi cuentata curca (1 Timoteo 6:6-8). Canpish pani Shirley shinallataj Jehová Diosta sirvinata mana saquishpaca, problemacuna ricurijpipish ima dudacunata mana charishpami Jehová Diosmanta manataj caruyangui.
PUSHAJ HUAUQUICUNATA LLAQUICHI HORASMI DIABLOCA DIOSMANTA CARUYACHISHA NIN
8. ¿Pushaj huauquicunataca imatataj rurai tucuncuna?
8 Ñucanchijpaj contracunaca noticiacunapi, redes socialescunapimi Dios churashca pushaj huauquicunamanta llullacunata nincuna (Salmo 31:13). Huaquin huauquicunataca yangamanta juchachishpami carcelpi churashcacuna. Apóstol Pablotapishmi yangamanta juchachishpa carcelpi churarcacuna. Pero ¿apóstol Pablo carcelpi cajpica huauqui panicunaca imatataj rurarcacuna?
9. ¿Apóstol Pablo carcelpi cajpica huaquin huauqui panicunaca imatataj rurarcacuna?
9 Apóstol Pablo Roma llajtapi prezupi cajpica huaquin huauqui panicunaca paitami saquircacuna. ¿Chai huauqui panicunaca Pablo carcelpi cashcamantachu pingaita charishpa saquircacuna? (2 Timoteo 1:8, 15). ¿Mana cashpaca llaquichijcunata manchashcamantachu paita saquircacuna? (2 Timoteo 2:8, 9). Ima laya cajpipish apóstol Pabloca paicunamanta huañunata mana manchashpa achca llaquicunatami ahuantashca carca. Chaimi paicuna saquijpica Pabloca achcata llaquirishcanga (Hechos 20:18-21; 2 Corintios 1:8). Ñucanchijca chai huauqui panicuna shinaca mana casha ninchijchu. ¿Pushaj huauquicunata carcelpi churajpica imatataj yuyarina canchij?
10. ¿Pushaj huauquicunata carcelpi churajpica imatataj yuyarina canchij?
10 Ñucanchijta imamanta catirashpa llaquichicushcata, pi chashna llaquichicushcatapishmi yuyarina canchij. 2 Timoteo 3:12-pica: “Cristo Jesusta catijcuna shina Diosta tucui shunguhuan adorashpa causasha nijcunataca tucuicunatami catirashpa llaquichingacuna” ninmi. Chaimantami pushaj huauquicunata carcelpi churacushcata ricushpaca mana mancharina canchij. Diabloca cai pushaj huauquicuna Diosta sirvinata saquichunmi munan. Ñucanchijpish chaita ricushpa manchaita charichunmi munan (1 Pedro 5:8).
Apóstol Pablo carcelpi cajpica Onesiforomi mana manchashpa paita ayudarca. Cunan punllacunapipish huauqui panicunaca carcelpi caj huauqui panicunatami ayudancuna. (Párrafos 11 y 12-ta ricui).
11. ¿Onesiforomantaca imatataj yachai tucunchij?
11 Pushaj huauquicunata ayudanataca manataj saquinachu cangui (2 Timoteo 1:16-18-ta liyipai). Apóstol Pablo carcelpi cajpica huauqui Onesiforomi paita ayudarca. Chaimantami Pabloca: ‘Prezupi cadenahuan huatashca cajpipish ñucamantaca Onesiforoca mana pingarircachu’ nirca. Onesiforoca Pablota japingacamami mashcarca. Chaipica huañunata mana manchashpami Pablo ayudata minishticui horas paita ayudarca. ¿Onesiforomantaca imatataj yachai tucungui? Llaquichijcunata mana manchashpami pushaj huauquicunata ayudashpa catina cangui. Paicunata difindingapajpishmi esforzarina cangui (Proverbios 17:17). Chai llaqui horaspica paicunaca ñucanchijcuna cꞌuyaita ricuchichun, paicunata ayudachunmi minishtincuna.
12. ¿Rusiapi caj huauqui panicunamantaca imatataj yachai tucunchij?
12 Rusia llajtapi huaquin huauqui panicunata carcelpi churajpi caishuj huauqui panicuna imata rurashcata yuyari. Maijan huauquita o panita tribunalpi juzganata yachashpaca achca huauqui panicunaca paicunata apoyangapajmi chai tribunalman rincuna. ¿Caimantaca imatataj yachai tucungui? Pushaj huauquicunata yangamanta juchachishpa carcelpi churajpica mana mancharinachu canchij. Ashtahuanpish paicunamantami Yayitu Diosta mañana canchij. Paicunapaj familiatapish cuidangapajmi esforzarina canchij. Paicunata ima shina ayudanatapishmi ricurana canchij (Hechos 12:5; 2 Corintios 1:10, 11).
ÑUCANCHIJMANTA BURLARI HORASMI DIABLOCA DIOSMANTA CARUYACHISHA NIN
13. ¿Gentecuna burlarijpica maipica ima dudacunatataj chari callarishun?
13 Diosmanta predicashcamanta o Diosta cazushcamantami maipica familiacuna, escuelapi, trabajopi, compañerocunapish ñucanchijmanta burlarincuna (1 Pedro 4:4). Huaquincunaca: “Canca alli personami cangui. Pero cambaj religionca exageradosmi can” nincunami. Mana cashpaca shujtajcunaca congregacionmanta llujchishcacunata mana saludashcata, paicunahuan mana parlacushcata ricushpaca “¿maitataj canca cꞌuyaita ricuchinguiyari?” nincunami. Huaquincuna chashna nijpica canca: “¿Diospaj mandashcacunaca allichu canga? ¿Diospaj organización nishcacunapish allichu canga?” nishpachari dudai callaringui. ¿Cai rato can chashna dudacushpaca Jehová Diosmanta, Diospaj organizacionmanta ama caruyangapajca imatataj rurana cangui?
Jobca paipaj mana alli amigocunapaj llullacunataca mana crircachu. Ashtahuanpish Jehová Diostami tucuipi cazurca. (Párrafo 14-ta ricui).
14. ¿Ñucanchijcuna Diosta tucuipi cazushcamanta shujtajcuna burlarijpica imatataj rurana canchij?
14 Diospaj mandashcacunatami mana dudashpa tucuipi cazuna cangui. Jobca shujtajcuna paimanta burlarijpipish Diospaj mandashcacunatami tucuipi cazurca. Jobpaj shuj mana alli amigoca: “Jehová Diosca can cazushcata o mana cazushcataca mana ricunchu” nishpami crichisha nirca (Job 4:17, 18; 22:3). Pero Jobca chai llullacunataca mana crircachu. Ashtahuanpish paica Diospaj mandashcacuna paipaj allipajllataj cashcatami alli yacharca. Chaimantami shujtajcuna paimanta burlarijpipish, mana dudashpami Diospaj mandashcacunata cazunata agllarca (Job 27:5, 6). ¿Jobmantaca imatataj yachai tucungui? Shujtajcuna canmanta burlarijpipish Diospaj mandashcacuna cambaj allipajllataj cashcataca mana dudanachu cangui. Ashtahuanpish chai mandashcacunata cazushcamanta alli causaita charishcatapishmi yuyarina cangui. Diospaj organizacionpish Dios cushca mandashcacunata cazuchunmi yachachin. Chaimantami Diospaj organizaciontaca mana dudashpa apoyana canchij. Caita rurashpaca shujtajcuna burlarijpipish Jehová Diosmantami mana caruyashun (Salmo 119:50-52-ta liyipai).
15. ¿Brizitpaj familiacunaca imamantataj paimanta burlarircacuna?
15 India llajtamanta pani Brizitpaj ejemplopi yuyashun. Pani Brizit Testigo cashcamantami paipaj familiacunaca achcata burlarishpa chꞌican chꞌican jarcaicunata churarcacuna. Paica 1997 huatapimi bautizarirca. Pero pai bautizarishca qꞌuipallami paipaj cusaca trabajo illaj saquirirca. Chaimantami paipaj cusaca paipaj huarmihuan, paipaj ushushicunahuan paipaj yaya mamapaj huasipi causanaman rircacuna. Chaiman rishpapish Brizitca ashtahuan llaquicunatami charishpa catirca. Paipaj cusa trabajota mana japishcamantami pani Brizitca paipaj familiata mantiningapajca tiempo completota trabajana carca. Chai jahuapish paipaj congregacionca 350 kilometrocunapi yallitaj carumi carca. Paipaj cusapaj familiacunacarin pai Testigo cashcamantami paipaj contra carcacuna. Chaimantami pani Brizitca paipaj familiahuan shujtaj lugarpi causanaman rina tucurca. Pero ñapishmi paipaj cusaca huañurca, paipaj ushushipish 12 huatacunata charishpallami cáncer ungüihuan huañurca. Chaimi paipaj cusapaj familiaca: “Can testigo de Jehová mana tucushca cajpica cai tucui llaquicunaca mana japinmanchu carca” nishpa juchachircacuna. Shinapish pani Brizitca Jehová Diospimi confiashpa catirca. Diospaj organizacionmantapish manataj caruyarcachu.
16. ¿Pani Brizitca Jehová Diosmanta mana caruyashcamanta, Diospaj organizacionmantapish mana caruyashcamantaca ima bendicioncunallatataj chasquirca?
16 Pani Brizit congregacionmanta yallitaj carupi causacushcamantami, shuj superintendente de circuitoca paipaj huasipi tandanacuicunata rurachun, pai causan ladopi gentecunaman predicachunpish animarca. Chaipica pani Brizitca “caitaca mana pajtachi tucushachu” nishpami yuyarca. Chashna jahuapish superintendente ima nishcata cazushpami gentecunaman predicai callarirca. Paipaj huasipi tandanacuicunatapishmi rurai callarirca. Paipaj ushushicunahuanpishmi Bibliamanta yachashpa catirca. ¿Caicunata pajtachishcamantaca pani Brizitca ima bendicioncunatataj chasquirca? Paica Bibliamanta achca yachacujcunatami charirca. Paihuan yachacujcunaca achcacunami bautizarircacuna. Chaimantami cunanca pai causan ladopica ishqui congregacioncuna tiyan. Pani Brizitca 2005 huatapimi precursora regular tucurca. Paipaj ushushicunapish cunancamami tucui shunguhuan Diosta sirvicuncuna. Pani Brizitca Jehová Dios tucui llaquicunata ahuantachun ayudashcatami segura can.
JEHOVÁ DIOSTA, PAIPAJ ORGANIZACIONTAPISH AMATAJ SAQUISHUNCHIJ
17. ¿Diosmanta ama caruyangapajca imatataj rurana canchij?
17 Diabloca llaqui horaspi Jehová Dios ñucanchijta mana ayudanata crichunmi munan. Diospaj organizacionta cazunapish yanga cashcata crichunmi munan. Pushaj huauquicunata carcelpi churajpi, paicunata catirashpa llaquichijpica manchaita charichunpishmi munan. Ashtahuancarin shujtajcuna ñucanchijmanta burlarijpica Diospaj mandashcacuna mana alli cashcata yuyachunmi munan. Pero ñucanchijca Diablo chashna pandachichunca mana saquinachu canchij (2 Corintios 2:11). Ashtahuanpish Diablopaj llullacunapi mana crishpami Jehová Diospi, paipaj organizacionpi confiashpa catina canchij. Jehová Diosca ñucanchijtaca manataj saquingachu (Salmo 28:7). Chaimantami paimantaca pi ama chꞌicanyachichun manataj saquina canchij (Romanos 8:35-39).
18. ¿Catij yachaipica imatataj yachashun?
18 Cai yachaipica Diospi mana crijcuna Jehová Diospi ama confiachun, Diospaj organizacionpipish ama confiachun jarcaicunata churashcatami ricushcanchij. Catij yachaipica congregación ucupi maipica huaquin jarcaicuna tiyajpipish chaicunahuan ima shina chꞌimbapuranatami yachashun.
CANTO 118 “Ashtahuan crina yuyaita cuhuai”
a Cai tucuri punllacunapi ahuantashpa catingapaj, Jehová Diosmanta ama caruyangapajca Jehová Diospi, paipaj organizacionpimi confiashpa catina canchij. Diabloca Jehová Diospi confianata saquichunmi munan. Chaimantami cai yachaipica Diablopaj quimsa trampacunamanta yachashun. Chai trampacunapi ama urmangapaj imata rurana cashcatapishmi ricushun.
b Cai yachaipica huaquin shuticunatami cambiashcanchij.