Bueno caicunata manaraj parlashpa tiempo completopi ima shina sirvi callarishcatarajmi parlagrini.

Ñuca yayaca Surinam llajtamantami carca. Pero ñuca manaraj huacharijpimi Caribe islacunamanta Curazao nishcapi trabajanaman shamushca carca. Chai llajtapimi ñucaca 1942 huatapi huacharircani. Chaipica ñuca yayami punta testigo de Jehová tucurca. a Mana fácil cashpapish ñucanchijhuanmi Bibliataca tucui semanacuna estudiaj carca. Ñuca 14 huatacunata charishpaca ñuca yayahuanmi Surinam llajtaman tigrarcanchij. Paipaj yuyajlla mamata cuidangapajmi chaiman tigrarcanchij.

Surinam llajtapica Jehová Diosta alli sirvij jovencunahuanmi apanacui callarircani. Paicunaca ñucata yalli huatacunatami charircacuna. Shinallataj precursores regularesmi carcacuna. Paicunaca predicacionpi ima shina pasashcatami cushicuihuan parlajcuna carca. Tandanacuicunata tucuchishca huashami paicunahuan valishca yuyaicunata Bibliamanta parlaj carcanchij. Huaquinpicarin tutami canllaman llujshishpa alaja estrellacunata ricuihuan Bibliamanta valishca yuyaicunata ricuj carcanchij. Paicunahuan alli apanacushcamantami Jehová Diosta sirvina ashtahuan valishca cashcata cuentata curcani. Chaimantami ñucaca 16 huatacunallata charishpa bautizarircani. Qꞌuipacarin ña 18 huatacunata charishpaca ñucapish precursor regularmi tucurcani.

Precursor regular cashpaca achcatami yacharcani. Por ejemplo, congregacionpi shujtajcunata yachachina cashcatami ñucapish yacharcani. Ñuca precursor tucujpica Willem van Seijl misioneromi b congregacionpi ima shina  ayudana cashcata yachachirca. Chashna yachachishcamantami qꞌuipaca congregacionpi ayudai tucurcani. Shuj huata huashaca precursor especial cachunmi nombrarcacuna. Chaimi Surinam selvaman rishpa chaipi tiyaj achca comunidadpi huauquicunahuan predicaj carcanchij. Ñucata chashna yachachishcamantami ñucapish shujtajcunaman yachachinataca achcata munani.

Shinallataj minishtirishca cosascunallahuan cushilla causanata, alli organizado canatami yacharcani. Por ejemplo, ñucahuan causaj precursor especialhuanca cada quillapaj cullquita pajtachinata, imalla minishtirishcacunatapishmi alli ricunaraj carcanchij. Chai qꞌuipaca ishquindijmantaca shujmi capitalman rishpa imalla minishtirishca cosascunata randinaman rij carcanchij. Randishcacunatapish tucui chai quillapajmi pajtachina carcanchij. Ima illaj saquirijpica ñucanchijtaca chai shitashca selvapica ¿pitaj ayudaiman carca? Charishca cosascunallahuan cushilla causanata, tucuita alli organizashpa causanatami jovenmantapacha yachashcani. Chaimantami Yayitu Diosta sirvina yuyailla causashcani.

Ashtahuanpish huillacushpaca gentecunapaj propio shimipi huillana cashcatami yacharcani. Ñucaca holandés, inglés, papiamento y surinamés shimicunata parlashpami huiñarcani. Surinam llajtapica surinamés shimitami parlajcuna carca. Shinapish selvapica chꞌican chꞌican shimicunatami parlajcuna carca. Selvapi gentecunapaj propio shimipi ñuca predicajpica paicunaca cushicuihuanmi chasquijcuna carca. Por ejemplo, ñucapajca saramacano shimita parlanaca sinchimi carca. Chai shimitaca tononchishpami parlajcuna carca. Shinapish paicunapaj propio shimipi parlangapaj esforzarishcamantami achcacunamanca Yayitu Diosmanta yachachi tucushcani.

Ñucaca shujtaj shimipi parlacushpaca mana alli experienciacunatami charircani. Por ejemplo, shuj cutinca Bibliamanta yachacuj shuj huarmica huijsa nanaihuanmi cashca carca. Chaimi ñucaca ¿allillachu cangui? nishpa tapunapaj randica ¿chichuchu cangui? nishpa tapushca carcani. Chaimantami achcata pingarircani. Chairucuta tapushcamantami chai huarmica mana alli sintirishcanga. Chashna pandarishpapish ñucaca paicunapaj propio shimipi huillangapajmi achcata esforzarircani.

Ñucataca1970 huatapimi superintendente de circuito cachun nombrarcacuna. Chai huatallapitajmi selvapi caj achca grupocunataca “Visitando la central mundial de los testigos de Jehová” nishca fotocunata ricuchircani, audiocunatapish uyachircani. Chaita ricuchinaman ringapajca achca huauquicunahuanmi shuj largo barcopi riota rina carcanchij. Ñucanchijca barcopica shuj generador electricota, marcanalla shuj tanque de gasolinata, gasolinahuan japirij lamparacunata, fotocunata ricuchingapaj maquinacunatami aparcanchij. Ña chayashpaca gentecuna maipi can pushtumanmi tucui chaicunata aparcanchij. Chai fotocunata ricunata, chai audiocunata uyanataca chai gentecunaca achcatami munarcacuna. Ñucaca achca gentecunata Yayitu Diospaj organizacionman  cꞌuchuyachun ayudashcamantami cushilla sintirircani.

Soltero cashpaca Jehová Diostami achcata sirvi tucurcani. Shinapish cazaranatami munarcani. Chaimantami Yayitu Diostaca “ñucahuan caipi cushicuihuan sirvichun shuj huarmita cuhuai” nishpa mañarcani. Shuj huata huashami Ethel huarmita rijsircani. Paica tucui shunguhuanmi Yayitu Diostaca sirvij cashca carca. Precursorapishmi cashcarca. Paica jovenmanta pachami apóstol Pablo shina Yayitu Diosta sirvinataca munashca carca. Ñucanchijca septiembre de 1971 huatapimi cazararcanchij. Chaimi congregacioncunata visitanamanca ishquindij rij carcanchij.

Ethelca minishtirishca cosascunahuanmi huiñashca carca. Chaimantami paipajca selvaman rinaca jahualla carca. Por ejemplo, selva ucupi caj congregacioncunata visitanaman rishpaca ashalla cosascunatami aparcanchij. Ropacunatapish chaipimi tajshaj carcanchij. Chaipi tiyaj riocunapipishmi armarij carcanchij. Ñucanchij huauqui panicuna ima carashquitatapishmi micujlla carcanchij. Iguanatapish, pirañatapish, ima cazashca animaltapish o riopi japishca ima animaltapish micunllami carcanchij. Platucuna mana tiyajpica platanocunapaj pꞌangacunapimi micujlla carcanchij. Cucharacunapish mana tiyajpica maquicunahuanmi micujlla carcanchij. Ethelpish, ñucapish tandalla Jehová Diosta sirvishcamantami quimsapi caupushca shuj huasca shina tucushcanchij (Eclesiastés 4:12). Chashna causanami shuj jatun bendición cashca.

Shuj cutinca selvamanta tigracushpami ñapish yacu manchanai vulacuj pushtuta pasarcanchij. Chaimi barcoca rumicunahuan tacarishpa pambarirca. Chaitami callaripica parlacurcani. Pero pambarishcahuanmi barcoca chai rato llujshirca. Ñucanchijca chalecocuna churarishcami  carcanchij. Y barcomantaca antes mana urmarcanchijchu. Pero barcoca yacu jundami llujshirca. Chaimi ñucanchijca mangapi tiyaj micunata yacupi shitashpa barcomanta chai tucui yacuta mangahuan llujchircanchij.

Micunata yacupi shitashcamantami riota shamucushpaca pescadocunata japisha nircanchij. Pero imata mana japircanchijchu. Chaimantami Yayitu Diostaca “micunata carahuaiyari” nishpa mañarcanchij. Mañashca huashallami shuj huauquica shuj jaturucu pescadota japirca. Chaimi chaipi caj cincopura chai tutaca micui tucurcanchij.

Cinco huatacunatami chai congregacioncunata visitashpa pasarcanchij. Pero ñapishmi shuj huahuata charigrishcata yacharcanchij. Chaica shuj alaja bendicionmi carca. Dimastaj cushillami carcanchij. Chaitaca mana shuyashcarcanchijchu. Ethelpish, ñucapish tiempo completopi sirvishpa catinatami munarcanchij. Ñucanchij punta churi Ethniëlca 1976 huatapimi huacharirca. Ishqui huata chaupi qꞌuipaca Giovanni shuti shujtaj huahuatami charircanchij.

Surinam llajtapica congregacioncuna ayudata minishtishcamantami, sucursalpi caj huauquicunaca huahuayuj cashpapish superintendente de circuito shina sirvishpa catichun nircacuna. Ñuca huahuacuna ña jovenyajpica ashalla congregacioncunata visitachunmi nircacuna. Chaimantami quillapica huaquin semanacunataca superintendente de circuito shina, cutin caishuj semanacunataca ñuca congregacionpi precursor shina sirvi tucurcani. Ñucanchij huasi cꞌuchullapi caj congregacioncunata visitanaman rishpaca ñuca huarmipish, ñuca huahuacunapish ñucahuanmi rijcuna carca. Pero carupi caj congregacioncunata visitanaman rishpaca ñuca solomi rij carcani.

Ñuca responsabilidadcunata alli pajtachingapajca tucuitami alli organizaj carcani. Tucui semanacuna estudio de familiata charingapajpish allimi ricuraj carcani. Carupi caj congregacioncunata visitacushpaca Ethelmi ñuca huahuacunahuan estudio de familiata ruraj carca. Shinapish familiahuan tandalla cangapajmi tucui pudishcata ruraj carcanchij. Huaquinpica paseanaman, pugllanaman o maipi purinamanmi llujshij carcanchij. Ñucaca discursocunata, shujtaj mingashcacunata pajtachingapajmi tutacama prepararij carcani. Pero ñuca huarmi Ethelca  Proverbios 31:15-pi nij huarmi shinami carca. Paica tutamantijta jatarishpami desayunota ruraj carca. Huahuacuna escuelaman manaraj rijpi alli micuchun, texto diariotapish liyichunmi tucuita listota charij carca. Chashna huarmita charishcamanta, ñucata ayudashcamantami dimastaj agradecido cani.

Ñucanchij huahuacunataca Yayitu Diosta tucui shunguhuan cꞌuyachun, paita sirvichunmi yachachircanchij. Chashna yachachishcamantami paicunaca Yayitu Diosta tiempo completopi sirvinata agllashcacuna. Ñucanchijpish chaita rurachunmi tucui shunguhuan munarcanchij. Ñucanchij huahuacunamanca ima llaquicunata charishpapish tiempo completopi Yayitu Diosta sirvishpaca dimastaj cushilla, alajata pasashcatami huillaj carcanchij. Jehová Diospish ñucanchijta ima shina ayudashcata, ima shina bendiciashcatami parlarcanchij. Shinallataj ñucanchij huahuacunapish Diosta punta lugarpi churaj huauqui panicunahuan alli apanacuchunmi ayudaj carcanchij.

Ñucanchij huahuacunata huiñachicui horasca Yayitu Diosca tucui ñucanchij minishtishcata cushpami ayudashca. Selva ucupi precursor especial shina sirvishcamantami minishtirishca cosascunahuan causanata, ima shina organizanata yacharcani. Shinapish huaquinpica mana tucuichu ñucanchij munashca shina llujshij carca. Pero chaipimi Yayitu Diosca ñucanchijta ayudaj carca. Por ejemplo, 1986 huatamanta 1992 huatacamaca Surinam llajtapimi achca gentecuna jatarishpa caishujmanta chaishujmanta macanacujcuna carca. Chai huatacunapica minishtirishca cosascunallatapish charinaca sinchimi carca. Chashna cajpipish Yayitu Diosmi ñucanchijtaca achcata ayudarca (Mateo 6:32).

Tucui ñucanchij causaipi Jehová Dios ayudashcamantami cushilla canchij. Jehová Diosca ñucanchijtaca huahuitocunahuanmi bendiciashca. Shinallataj paicunata huiñachina, Yayitu Jehová Diosta tiempo completopi sirvicushcata ricunaca shuj jatun bendicionmi cashca. Ñuca churi Ethniëlpish, Giovannipish Diospaj organizacionpaj escuelacunapimi graduarishcacuna. Paicunaca paicunapaj huarmindijmi sucursalpi sirvicuncuna.

Ethelpish, ñucapish ñami yuyajcuna canchij. Shinapish precursores especiales shinami Yayitu Diostaca sirvishpa catinchij. Yayitu Diosta sirvina yuyaillami pasashcanchij. Dimastaj ocupadosmi cashcanchij. Chaimantachari nadanallatapish manaraj yachashcani. Pero mana arrepintirinichu. Huambramantapacha tiempo completopi Yayitu Diosta sirvingapaj tucuita saquishcamantapish mana arrepintirinichu.