Jesusca Dios churashca Mandanamantaca muyundij Allpapimi huillangacuna nircami. Chai profeciaca cunan punllami pajtaricun (Mateo 24:14). Daniel libropica chai Mandana shuj gobierno cashcata, jahua pachamanta mandana cashcatami huillan. Daniel capítulo 2-pica ñaupa Babilonia llajtata mandajcunamanta cunan punlla mandajcunacama ima tucushcatami parlan. Shinallataj verso 44-pica cai pachapi gobiernocuna ima tucunatami huillan. Chaipica:

‘Jahua pacha Taita Diosca nunca pi mana chingachina mandanatami churanga. Chai mandanataca shujtaj llajtacuna mandachunca manataj saquingachu. Shujtaj mandanacunataca tucuitami ñutushpa chingachinga. Paica manataj chingaringachu’ ninmi.

Bibliapi tiyaj shujtaj profeciacunapish Dios churashca gobiernoca cai pachapi gobiernocunata tucuchishpa, gentecunaman alli causaita cuna  cashcatami huillan. ¿Dios churashca gobiernoca imallatataj ruranga?

• MACANACUICUNA MANA TIYANGACHU

  Salmo 46:9-pica: ‘Diosca tucui macanacuicunata tucuchijmi. Paica arcocunatapish pꞌaquijmi. Lanzacunatapish ñutujmi. Macanacuna carrocunatapish rupachijmi’ ninmi.

  Gentecunaca armacunata ruranapimi dedicarincuna. Pero chaita saquishpa caishuj chaishuj ayudanacujpica ¿ima shinashi causanchijman? Diospaj gobierno mandacujpica macanacuicunaca mana tiyangachu.

• UNGÜICUNACA ÑA MANA TIYANGACHU

  Isaías 33:24-pica: “Caipi causajcunaca: ‘Ungushcami cani’ nishpa pi mana ningacunachu” ninmi.

  Shungu nanaicuna, cáncer, diabetes o shujtaj ungüicuna mana tiyajpica ¿ima shinashi causanchijman? Ungüicuna mana tiyajpica hospitalcunata, jambicunatapish mana minishtinchijmanchu. Shamuj punllacunapica tucui gentecunami alli saludta charishun.

• YARICAICUNA MANA TIYANGACHU

  Salmo 72:16-pica: “Allpapica lutsai muyullatami tarpunga. Chaica tucui urcu puntacunacama tucuita grano pꞌucushpami, Líbano urcu yuracuna shina huajiacunga” ninmi.

  Allpapica achca granocunami pꞌucunga. Tucuicunami achca micunacunata charishun.

• HUAÑUIPISH LLAQUIPISH MANA TIYANGACHU

  Apocalipsis 21:4-pica: “Diosca paicunapaj ñahuicunamantaca, tucui huiquitami pꞌichanga. Ñaupa tucui imalla tiyajcunaca, ña mana tiyashcamanta huañuipish, huacaipish, llaquipish, nanaipish ña mana ashtahuan tiyangachu” ninmi.

  Cai Allpaca ñallami shuj paraíso tucunga. Chaipica jucha illajcunami cashun. Ima llaquicunatapish mana charishunchu. Jehová Diosca tucui gentecuna cushilla causachunmi munan.

¿Dios cusha nishca bendicioncunaca pajtaringachu? Achca gentecunaca ‘Bibliapi nishcacuna pajtarishpaca alhajami canman’ nincunami. Pero tucuicunami huañushpa tucurinchij. Chaimantami ‘maitashi huiñaitaca causai tucushunyari’ nincuna.

Adán Eva juchapi urmashca punllamantami ñucanchijpish juchayujcuna huacharinchij, huañunchijpish. Chaimantami gentecunaca ‘Diosca llaquicunahuan, nanaicunahuan causachunmi destinashca’ nincuna. Pero Diosca gentecuna huañuchunca mana munanchu.

Tucui pai nishcacuna pajtarinataj cashcata crichunmi Diosca: “Ñuca shimimanta llujshij shimicunapish chai shinallataj ñucapajmanca, mana chushajlla tigrangachu. Ñuca munashcata rurashpatajmi tigranga. Ñuca imallaman cachashcataca rurashpa catingatajmi” nirca (Isaías 55:11).

Biblia nishca shinaca ‘Diosca mana llullanchu’ (Tito 1:2). Paimi cai sumaj bendicioncunata pajtachisha nin. Chaimantami cashna tapurina canchij: “¿Cai Allpapica huiñai causaita chari tucushunchu? ¿Dios cusha nishca bendicioncunata chasquingapajca imatataj rurana canchij?”. Catij temacunapimi chai tapuicunamanta yachashun.