¿Paipaj shutica maijantaj can? Traducción del Nuevo Mundo Bibliapi Isaías 42:8-pica: “Ñucaca Jehovami cani. Chaimi ñuca shutica” ninmi. Bibliapica Diospaj shutica casi 7.000 cutincunami ricurin. Shinapish achca Bibliacunapica Diospaj shutita churanapaj randica Señor nishpami churashcacuna. Yaya Diosca cambaj amigomi casha nin. Shinallataj paipaj shutipi mañachunmi munan (Salmo 105:1).

¿Ima titulocunatataj charin? Bibliapica Jehová Diostaca Taita Dios, Tucui poderta charij, Tucuita Ruraj, Señor, Jatun Mandaj ninmi. Ñaupa punllacunapi Diosta sirvijcunaca chai titulocunata nishpami Jehová Diosta mañajcuna carca (Daniel 9:4).

¿Ima shinataj can? Diosca shuj espiritumi can, paitaca mana ricui tucunchijchu (Juan 4:24). Juan 1:18-pica: “Taita Diostaca pi manataj ricushcachu” ninmi. Shinallataj Bibliapica Yayitu Diosca cushilla, llaquilla sintirij cashcatami huillan. Chaimantami  ñucanchij ruraicunahuan paitaca cushichi o llaquichi tucunchij (Proverbios 11:20; Salmo 78:40, 41).

Taita Diosca cꞌuyaj, llaquij, mana utca pꞌiñarij, mana llullaj Diosmi can (Éxodo 34:6, 7). Chaimantami maijan llajtamanta cajpipish, ima familiamanta shamujpipish paipaj ñaupajpica tucuicuna igual canchij (Hechos 10:34, 35). Taita Diosca ashtahuantajca tucui poderta charij, yachaj, cashcata ruraj, cꞌuyaj Diosmi can.

Diosllami tucui poderta charin. Chaimantami pai imata rurasha nishpaca tucuita pajtachin (Génesis 17:1).

Diosllami tucuita yachan. Chaimantami paitaca Romanos 16:27-pica: ‘Tucuita yachaj shujlla Dios’ nin.

Deuteronomio 32:4-pica: Diosmanta parlashpaca “pai rurashcacunapica ima panda mana tiyanchu. Paica cashcata rurajmi” can ninmi.

Diosca gentecunamanca mana cꞌuyaillatachu ricuchin. 1 Juan 4:8-pica: “Diosca cꞌuyajmari” can ninmi. Cai verso nishca shinaca cꞌuyaica paipimi tiyan. Paipaj tucui ruraicunapimi cꞌuyaj Dios cashcata ricunchij. Chaimantami ñucanchijpish beneficiarinchij.

Diosca ñucanchij alli amigomi casha nin. Paica ñucanchij cꞌuyaj Yayami can (Mateo 6:9). Diospi feta churashpaca paihuanmi alli apanacushun (Salmo 25:14). Yayitu Diosca ñucanchijmantami sustarin. Chaimantami paita mañashpa paipajman cꞌuchuyachun munan. Ñucanchij llaquicunatapish paiman mingachunmi munan (Santiago 4:8; 1 Pedro 5:7).

Jesusca Diospaj Churimi can. Diosllami Jesustaca rurarca. Chaimantami Bibliapica Jesusca Diospaj Churimi can nin (Juan 1:14). Jesusmi Diospaj punta Churi can. Jehová Diosca tucuita rurangapaj, allichingapajmi Jesús ayudachun agllarca (Proverbios 8:30, 31; Colosenses 1:15, 16).

Jesusca ñucaca Diosmi cani nishpaca mana nircachu. Ashtahuanpish “Ñucaca Diospaj randimi  shamuni. Paimari ñucataca cacharca” nircami (Juan 7:29, NM ). Jesusca Diosta sirvij huarmihuan parlanacucushpaca Jehová Diosca ñuca Yayami, cancunapaj Yayapishmi. Ñuca Diosmi, cancunapaj Diospishmi can nircami (Juan 20:17). Jesús huañujpica Yaya Diosmi paitaca jahua pachapi causachun causachirca. Ña jahua pachapi cashpaca Jesusca Diospaj alli ladopimi tiyarirca. Autoridadtapishmi chasquirca (Mateo 28:18; Hechos 2:32, 33).

Jesusca Diosta rijsichunmi ayudai tucun

Jesusca paipaj Yayamanta yachachingapajmi cai Allpaman shamurca. Jehová Diosllatajmi Jesusmanta parlashpaca: “Paica ñuca cꞌuyashca Churimi, paita uyaichij” nirca (Marcos 9:7). Jesusmi Diostaca alli rijsin. Chaimantami paica: “Yaya pi cashcatapish pi mana rijsinchu, Churillami rijsin. Pi cashpapish Churi rijsichisha nishcacunallami, Yayataca rijsin” nirca (Lucas 10:22).

Jesusca tucuipimi paipaj Yaya shinallataj ruraj can. Chaimantami paica: “Maijanpish ñucata ricujca, ñuca Yayatapish ña ricushcami” nirca (Juan 14:9, QC, 1989). Jesusca paipaj shimicunahuan, paipaj ruraicunahuanmi gentecunamanca paipaj Yaya shina cꞌuyaita ricuchirca. Chashnami Jehová Diosta rijsichun gentecunata ayudarca. Jesusca: “Ñucamari ñan cani, mana llullapish, causaiyujpish cani. Yayapajmanca pi mana paillatajca chayai tucunchu. Ñucami Yayapajman chayachij ñan cani” nircami (Juan 14:6). Shinallataj Jesusca: “Yaya Diostaca Espíritu yuyaita cushca shina, mana nij tucushpalla adorana punlla chayamunami carca. Chai punllamari ña chayamun. Yaya Diosca chashna adorajcunatami munan” nircami (Juan 4:23). ¡Yuyai! Yayitu Diosca can shina paimanta yachanata munaj gentecunatami mashcacun.