“Quiquinca mañashcata uyanguimi. Tucuicunami quiquinpajmanca shamungacuna” (Salmo 65:2).

Huaquincunaca paicuna mañashcataca mana pi uyanchu nishpapish alli sintiringapajllami mañancuna. Pero mañanaca mana problemacunamanta aliviaringapajllachu can. Bibliapica: ‘Jehová Diosca,  * tucui paita mañajcunapaj cꞌuchullapimi. Tucui shunguhuan paita mañajcunapaj cꞌuchullapimi. Paicuna caparishpa mañashcataca uyangami’ ninmi (Salmo 145:18, 19, NWT ).

Jehová Diosca paita sirvijcunapaj mañashcataca uyanmi. Cꞌuyaihuanmi paica cashna nin: “Ñucata mañanguichijllami. Ñucapajman shamushpa mañashcataca ñucapish uyashallami” (Jeremías 29:12).

“Diostaca mañaracuichijlla” (Romanos 12:12).

Bibliapica, Diostaca mañaraichij, punllanta mañaichij nishpami animan. Caita yachashpami Diosca paita mañachun munashcata intindinchij (Mateo 26:41; Efesios 6:18).

¿Diosca imamantataj paita mañachun munan? Caipi yuyai: Shuj yayaca paipaj huahuitu ayudachun mañajpica cushillami sintiringa ¿nachu? Yayaca huahua ima shina sintirishcata, imata minishtishcataca ñachari alli yachan. Pero huahua ayudachun mañajpica yayaca paipaj huahua paipi confiashcata, paita cꞌuyashcatami ricunga. Chai shinallatajmi Jehová Diosca paita mañajpica ñucanchijcuna paipi confiashcata, paipajman cꞌuchuyasha nishcata ricunga (Proverbios 15:8; Santiago 4:8).

“Diosmi cancunataca cuidacun. Chaimanta ima llaquicuna yuyailla canataca paiman mingaichij” (1 Pedro 5:7).

Diosca ñucanchijta cꞌuyashcamanta, ñucanchijmanta sustarishcamantami paita mañachun munan. Paica ñucanchij llaquicunahuan cajta ricushpami ayudasha nin.

Rey Davidca tucui paipaj causaipimi Yaya Dios ayudachun mañarca. Pai ima shina sintirishcata, imata yuyashcatami Diosman huillarca (Salmo 23:1-6). Diosca Davidtaca achcatami cꞌuyarca. Tucui paipaj mañashcacunatami uyarca (Hechos 13:22) Chai shinallatajmi Yayitu Diosca ñucanchijmanta sustarishpa ñucanchij mañashcacunataca uyan.

Cai shimicunataca Salmos libropimi tarinchij. Cai salmota escribijca Jehová Dios paipaj mañashcacunata uyaj cashcatami seguro carca. Chashnami Diospaj cꞌuchullapi cashcata, ima llaquicunata chꞌimbapurangapajpish fuerzata charishcata sintirca (Salmo 116:1-9).

Yaya Dios ñucanchij mañashcacunata uyaj cashcata seguros cashpaca paita mañanataca manataj saquishunchu. Españapi causaj Pedro shuti runahuan ima pasashcata yachashun. Paipaj churica 19 huatacunata charishpami carro accidentepi huañurca. Pedroca chai llaqui horaspica, paita cushichichun, paita ayudachunmi pai ima shina sintirishcata Diosman parlarca. Pedroca: “Jehová Diosca ñuca mañashcacunataca uyarcami. Shujtaj huauqui panicuna animachijpimi ñuca huarmipish, ñucapish Yaya Dios ayudacushcata, cushichicushcata sintircanchij” ninmi.

Pedropaj churica mana causarircachu. Pero Yaya Diosta mañashpami Pedropish paipaj familiapish tranquilo sintirircacuna. Paipaj huarmi María del Carmenca: “Chai llaquita ahuantangapajca Diostami mañarcani. Chashnami tranquila sintirircani. Paica allimi ñucataca intindihuarca” ninmi.

Bibliapish, huaquin gentecunapaj experienciacunapish Dios ñucanchij mañashcacunata uyaj cashcatami ricuchin. Shinapish Diosca mana tucui mañashcacunatachu uyan. ¿Imamantataj Diosca huaquin mañashcacunata uyashpapish, shujtaj mañashcacunataca mana uyan?