SHUJ cusa o shuj huarmi shujtajhuan traicionaica llaquimi can. Maijancunaca cusa, huarmi shujtajhuan traicionajpipish perdonashpami cutin causai callarishcacuna. * Pero ishquindij causashpa catishpa o chꞌicanyarishpapish culpata mana charij cusa, huarmimi achcata sufrin. Pero, ¿ama yalli llaquilla cangapajca imatataj rurai tucungui?

Shungupi llaquilla cashpapish culpata mana charij cusacuna, huarmicunaca Bibliata liyishpami animarishcacuna. Yaya Diospish paicuna llaquilla cajta intindishcatami cuentata cushcacuna (Malaquías 2:13-16).

“Yallitaj yuyaicunahuan ñuca yuyaipi cajpica, quiquinpaj cushicuimari ñuca almataca cushichirca” (Salmo 94:19).

Victorca: “Cai versota liyishpami Jehová Diosca shuj yaya shina ñucata cꞌuyashcata sintircani” ninmi.

“Canmanta manataj caruyajpica canpish manataj caruyanguichu” (Salmo 18:25, La Biblia. Traducción del Nuevo Mundo).

Carmenpaj cusaca achca quillacunatami shujtaj huarmihuan purishca carca. Carmenca: “Ñuca cusa ñucata saquijpipish, Jehová Diosca nunca mana saquingachu” ninmi.

‘Imamantapish ama yallitaj sustarichijchu. Ashtahuanpish Diosta mañashpa tucuita paiman huillaichij. Chashnami Diosca pi mana intindipaj sumaj causaita cancunaman cunga. Cancunapaj shungutapishmi huaquichinga’ (Filipenses 4:6, 7).

Susanaca: “Cai versotaca cutin cutinmi liyij carcani. Yaya Diosta tucui shunguhuan mañashpami tranquila sintirij carcani” ninmi.

Cai yachaipi parlashca cꞌari huarmicunaca ña mana causashpa catinatami yuyarcacuna. Pero Jehová Diospi confiashpa, Bibliapi tiyaj consejocunata catishpami achcata animarircacuna. Victorca: “Ñuca causai tucurishca laya cajpipish sinchi feta charishcamantami ñaupajman cati tucurcani. Huañunalla amsa huaicuta shina ricujpipish Yaya Diosmi ñuca ladopi carca” ninmi (Salmo 23:4).