Bibliaca caitami yachachin: “Cancunaca quiquinpajlla ashtahuan charij canataca ama munaichijchu. Cunan imata charishcacunallahuan cushi caichij” (Hebreos 13:5).

Gentecunaca cushilla causangapajca achca cosascunata charinami minishtirin nincunami. Pero Bibliapica ima charishcacunallahuan cushilla causai tucushcatami yachachin. Chaipajca ¿imatataj rurana canchij?

Cullqui solopi mana yuyana. Gentecunaca cullquita charingapajmi imatapish rurancuna. Por ejemplo, paicunapaj saludpi, paicunapaj familiapi, amigocunapi mana yuyancunachu. Paicunaca allicunata ruranata ladoman saquishpami pinganayai cosascunata rurashcacuna (1 Timoteo 6:10). Ashtahuanpish cullqui solopi yuyajcunaca mashnata charishpapish mana cushicuncunachu (Eclesiastés 5:10).

Gentecunami cosascunatapish yalli valishca can. Causaipica achca cosascunatami minishtinchij. Pero chaicunaca ñucanchijmanca mana cꞌuyaita ricuchi tucunchu. Cꞌuyaitaca gentecunallami ricuchi tucunchij. Chaimi shuj alli amigota charishpaca cushilla sintirinchij (Proverbios 17:17).

Bibliaca caitami yachachin: “Cushijlla shunguhuan causanaca, aichapajpish alli jambimi” (Proverbios 17:22).

Ungüicunata ahuantangapajca cushilla canami shuj jambi shina ayudan. Pero ungushca cashpaca ¿ima shinataj cushilla cai tucushun?

Pagui nijcuna cana. “Ungushcami cani” nirishpallaca tucui punllacunami llaquilla causashun (Proverbios 15:15). Bibliapica, “pagui nijcuna caichij” ninmi (Colosenses 3:15). Ñucanchij causaipica siempremi pagui ninata yachana canchij. Por ejemplo, inti huashicujta ricushpa, sumaj huairata sintishpaca Diosta pagui nishunchij. Ñucanchij familia cushilla cajta ricunapish mai sumajmi can.

Shujtajcunata ayudana. Mana alli saludta charishpapish shujtajcunamantami allicunata rurai tucunchij. Bibliapica “Imatapish cujmi, cushcata japijta yalli cushicun” ninmi (Hechos 20:35). Shujtajcunata ayudashpa, paicuna pagui nijpica achcatami cushicunchij. Chashnami ñucanchij problemacunallapica ña mana tanto yuyashun.

Bibliaca caitami yachachin: “Imacuna ashtahuan importante cashcata ama cungarichun” (Filipenses 1:10, NM).

Cusa huarmi ishquindij mana tiempota pasashpaca asha ashami chꞌicanyaringacuna. Chaimantami cusa huarmica paicunapaj matrimonio importante cashcata siempre yuyarina can.

Ishquindij imatapish ruraichij. Bibliapica: “Ishqui causanami ashtahuan alli” ninmi (Eclesiastés 4:9). Cada cual chꞌican chꞌican cosascunata ruranapaj randica ishquindijmi imatapish rurangapaj esforzarina canguichij. Por ejemplo, ishquindij yanungapaj, paseanaman ringapaj, cafeta ubyangapaj o imapi divirtirishpa pasangapajmi tiempota surcuna canguichij.

Cꞌuyaita ricuchichij. Bibliapica cusa huarmipura cꞌuyanacushpa, respetanacushpa causaichij ninmi (Efesios 5:28, 33). Cusa huarmi paicunapura shuj regalitota cujpi, cꞌuyaihuan ugllajpi, cushilla ñahui tratajpica ashtahuanmi cꞌuyaica mirashpa catinga. Shinallataj cusa huarmipurallami chayarinacuna can (Hebreos 13:4).