¿Huañuica ima shinataj tucuchishca canga?
ÑUCANCHIJ punta yaya mama Adán Eva juchata rurashcamantami tucuicuna juchayuj tucushpa huañunataj cashcanchij. Shinapish Diospaj munaica mana cambiashcachu. Bibliapimi Diospaj munai maijan cashcata cutin cutin ricuchin.
-
“Cashcata rurajcunallami Dios cusha nishca llajtata [Allpata, NM] japingacuna. Tucui causaipimi chai llajtapi causangacuna” (Salmo 37:29).
-
“Mandaj Jatun Diosca, huañuitapish huiñaipajmi chingachinga. Tucuicunapaj ñahuimantami huiquicunata chaquichinga” (Isaías 25:8).
-
“Tucui pꞌiñajcunata tucuchishca qꞌuipaca, Diosca huañuitapish tucuchingami” (1 Corintios 15:26, QC, 1989).
-
“Huañuipish, huacaipish, llaquipish, nanaipish ña mana ashtahuan tiyangachu” (Apocalipsis 21:4).
¿Yaya Diosca huañuita “tucuchingapajca” imatataj ruranga? Bibliapica, cashcata rurajcunami cai Allpapica huiñaita causangacuna ninmi. Cutin, Eclesiastés 7:20-pica: “Cai pachapica cashcata ruraj cashpapish, manataj ima juchata rurashpa, allillata rurashpa causajca, shujllapish mana tiyanchu” ninmi. Shinashpaca jucha illajcuna shujllapish mana tiyajpica, ¿Diosca paipaj mandashcacunata alli cazuchunca ña manachu mañanga? ¿Chashnachu gentecunamanca huiñai causaita cunga? Mana, Diosca nunca mana llullanchu (Tito 1:2). Shinashpaca, ¿cai Allpapi paipaj munaita pajtachingapajca imatataj ruranga?
“DIOSCA HUAÑUITAPISH HUIÑAIPAJMI CHINGACHINGA” (ISAÍAS 25:8).
¿HUAÑUITA TUCUCHINGAPAJCA DIOSCA IMATATAJ RURARCA?
Jehová Diosca yallitaj cꞌuyaj cashcamantami huañuimanta quishpichingapajca shuj valishca preciota pagana carca. Bibliapica pagana preciomanta parlashpaca justiciata rurangapaj, maijanpish ima dañota rurashcamanta cabalta pagana cashcatami intindichin. Gentecunaca juchayuj cashcamantami tucuicuna huañunataj canchij. Bibliaca: “Paicunapuramantaca shujllapish ima chaicunahuanca paipaj huauquitaca mana quishpichingachu. Paita quishpichichunpish Taita Diosmanca mana pagai tucungachu. Paipaj causaita quishpichingapajca mashna tiyashcapish mana pajtangachu. Chaicunahuanca manataj nunca quishpiringachu” nin (Salmo 49:7, 8).
Shuj runa huañushpaca paipaj juchacunamantami huañun. Chashnami paipaj juchacunamanta pagan. Paillatajca mana quishpiri tucunchu, shujtajcunatapish paicunapaj juchacunamantaca mana quishpichi tucunchu (Romanos 6:7). Chaimantami shuj jucha illaj runa paipaj causaita ñucanchijmanta cushpa quishpichichun minishtircanchij (Hebreos 10:1-4).
Gentecunata quishpichingapajmi Yaya Diosca paipaj Churita cai Allpaman cacharca (1 Pedro 2:22). Diospaj churi Jesusca paipaj jucha illaj causaita cushpa tucuicunata randishpa cacharichingapajmi shamurca (Marcos 10:45). Jesusca huañuimanta quishpichingapaj, huiñai causaita cungapajpishmi shamurca (Juan 3:16).
¿IMA HORASHI HUAÑUICA TUCUCHISHCA CANGA?
Cunan punllacunapica sinchi llaqui punllacunapimi causacunchij. Bibliapica, “cai punllacuna tucurinapajca llaqui punllacunami shamunga” 2 Timoteo 3:1). Cai último punllacunaca millai gentecunata juzgashca qꞌuipa, chingachishca qꞌuipami tucuringa (2 Pedro 3:3, 7). Cutin, Yaya Diosta cꞌuyaj gentecunaca llaqui punllacunamanta quishpirishpami huiñai causaita charingacuna (Mateo 25:46).
ninmi (Jesusca “paipaj causaita cushpa tucuicunata randishpa cacharichingapajmi shamurca” (Marcos 10:45).
Achca gentecuna causarishpaca huiñai causaita charina oportunidadtami charingacuna. Jesusmi huañushcacunataca causachi tucun. Por ejemplo, Naín pueblopica shuj viuda huarmipaj shujlla churitami llaquishpa causachirca (Lucas 7:11-15). Apóstol Pablopish: “Tucui huañushcacunatami cashcata rurajcunatapish, mana cashcata rurajcunatapish Taita Dios causachinga” nircami. Cai alaja esperanzami Yaya Dios gentecunata achcata cꞌuyashcata ricuchin (Hechos 24:15).
Achca millones gentecunami huiñaita causana oportunidadta charingacuna. Bibliapica: “Cashcata rurajcunallami Dios cusha nishca llajtata [Allpata, NM] japingacuna. Tucui causaipimi chai llajtapi causangacuna” ninmi (Salmo 37:29). Chai punllacunapica dos mil huatacuna huashaman apóstol Pablo nishca shimicunallatatajmi nishun: “Huañui, ¿maipitaj cambaj tujsishpa huañuchinaca? Pambana jutcu ¿maipitaj can cushicunaca?” (1 Corintios 15:55). Huañuica chaipimi tucuchishca canga.