Huiñaita causangapajmi rurashca canchij
TUCUICUNAMI alli saludhuan, huiñaita cushilla causanata munanchij, ¿nachu? Chashna causashpami ñucanchij familiahuan, amigocunahuanca achca tiempota pasai tucunchijman. Mundo enterota viajashpa, mushuj cosascunata rurashpa, ñucanchij munashca temacunamanta ashtahuan yachashpami sumajta causai tucunchijman.
¿Imamantataj gentecunaca huiñaita causasha nin? Bibliapi nishca shinaca Yaya Diosca huiñai huiñaita causana munaitami gentecunapaj yuyaipi churashca (Eclesiastés 3:11). Shinallataj Diosca cꞌuyajmi can (1 Juan 4:8). Mana huiñaita causana cashca cajpica Diosca maitataj gentecunapaj yuyaipica chai munaita churanman carcari.
Huañunataca mana munanchijchu. Bibliaca huañuica shuj “pꞌiñaj” enemigo shinami can ninmi (1 Corintios 15:26). Huaquincunaca achca huatacunata, shujtajcunaca ashalla huatacunatami causancuna. Pero, ima laya cashpapish tucuicunami huañuna canchij. Achca gentecunaca huañunata yachashcamantami yallitaj sustopina purincuna. ¿Huañuica shuj punlla tucuringachu?
¿HUIÑAITA CAUSAI TUCUSHCATACA IMAMANTATAJ CRINCHIJ?
Diosca gentecunataca ama huañuchunmi rurarca. Bibliapica Jehová Diosca * gentecunataca huiñaita cai Allpapi causachun rurashcatami ricuchin. Chaimantami cai Allpapica gentecuna cushilla causachunca tucuita rurarca. Chai qꞌuipami Adanta rurarca. Paitaca Edén nishca sumaj huertapimi churarca. Yaya Diosca “pai rurashca tucui chaicunaca yallitaj sumaj alli cashcatami ricurca” (Génesis 1:26, 31).
Diosca Adantaca paiman rijchajtami rurarca. Adanca jucha illajmi carca (Deuteronomio 32:4). Adanpaj huarmi Evapish jucha illajmi carca. Chaimi Jehová Diosca: “Huahuacunayuj tucushpa, alli huiñachishpa achcata mirarishpa cai pachapi jundarishpa cai pachata mandanguichij. Yacupi causaj animalcunatapish, huairapi purij alasyuj animalcunatapish, allpapi purij tucui animalcunatapish cancuna mandanguichij” nirca (Génesis 1:28).
Adán Evapaj huahuacuna cai Allpapi mirashpa jundachunca achca tiempomi pasana carca. Diospaj munaita pajtachingapajca Evaca achca huahuacunatami charina carca. Shinallataj Evapaj huahuacunapish ashtahuan huahuacunatami charina carca (Isaías 45:18). Adanpish Evapish, paicunapaj huahuacunallata, ñietocunallata ricuna cajpica Diosca ¿imapajtaj huahuacunayuj tucushpa cai allpapi jundarichun mandanman carca?
Tucui laya ‘animalcunata mandangapajca’, ¿Adanca imatataj rurana carca? Paica cada animalcunatami shutita churana carca (Génesis 2:19). Shinallataj animalcunata ima shina cuidanatami yachana carca. Chaipajca achca tiempomi minishtirirca.
Yaya Diosca Adán Evata cai Allpapi mirarichun mandashpa, animalcunata cuidachun mandashpaca achca tiempota causachun rurashcatami ricuchin. Adanca achca huatacunatami causarca.
DIOSCA GENTECUNATACA PARAÍSO ALLPAPI HUIÑAITA CAUSACHUNMI RURARCA
ACHCA HUATACUNATAMI CAUSARCACUNA
Adán (930 huatacuna)
Matusalén (969 huatacuna)
Noé (950 huatacuna)
Cunan (70-80 huatacuna)
Cunan tiempoca asha huatacunallatami causanchij. Pero, Bibliapica manaraj yacu juillu shamujpimi gentecunaca achca tiempota causashcata ricuchin. Por ejemplo, Génesis 5:5-pica: “Adanca tucuimantaca, 930 huatacunata causashpami huañurca” ninmi. Shinallataj 6 runacuna 900 huatacuna yallita causashcatami ricuchin. Caicunaca Set, Enós, Cainán (Quenán), Jared, Matusalén, Noé runacunami carca. Yacu juillu shamujpica Noeca 600 huatacunatami charirca (Génesis 5:6-27; 7:6; 9:29). Chai runacunaca, ¿imamantataj achca huatacunata causarca?
Paicunaca Adán, Eva jucha illaj canata saquishca asha tiempo qꞌuipallami causarcacuna. Chaimantami achca huatacunata causashcanga. Pero, ¿jucha illaj causaica achca huatacunata causanahuanca imatataj ricunata charin? ¿Huañuica ima shinataj tucuchishca canga? Caimanta yachangapajca puntaca imamanta yuyajyashpa huañuj cashcatarajmi intindina canchij.
[Nota]
^ par. 6 Bibliapica Diospaj shuti Jehová cashcatami yachachin.